Choân séng choè soè ê cho̍k Saiset cho̍k
Hiān sı̂ tı̄ Tâi-oân ê san-toē lâng ū 10 cho̍k, kı̂ -tiong choè soè ê cho̍k kiò-choè Sài-hā cho̍k. In ê jı̂n-kháu iok 1500 miâ, toā-pō͘-hūn toà tı̄ Biâu-le̍k koāiⁿ Lâm-chng hiong, chiū sı̄ chhut-miâ ê Sai-thâu-soaⁿ koh jı̍p-khı̀ ê só͘-chāi, kı̂-û iok 70 hō͘ ê sı̄ toà tı̄ keh-piah koāiⁿ (Sin-tek ) Ngó͘-hong hiong ê Tāi-ek chhoan. In ê ta-po͘-lâng ê thé-keh oé-soè, ná jı̍t-pún lâng ê khoán-sit, lâm lú lóng ū súi ê ba̍k-chiu kap phı̄ⁿ. In kap Thài-ngá-ní cho̍k ê lâng kāng-khoán, khiā khí tı̄ chin phian-phiah ê só͘-chāi, koh chin hun-soàⁿ. Chin chhù-bı̄ iā chı̍t-bı̄n thang khoà-lū ê sū, chiū sı̄ chiàu goá khoàⁿ chit ê cho̍k tı̄ bô kú ê chiong-lâi oē kap kı̂-û khah kiông ê cho̍k tang-hoà--khı̀. Ēng khah kū-thé-tek ê oē lâi kóng, sı̄ kóng hun-soàⁿ tı̄ chit nn̄g só͘-chāi ê lâng bô joā-kú ē pı̀ⁿ-choè Thài-ngá- ní cho̍k, á-sı̄ Kheh-lâng. Ngó͘-hong hiong hiah ê 70 goā hō͘ ê lâng, pún-lâi in iû-goân iā sı̄ tiàm tı̄ Lâm-chng hiong, cháiⁿ-iūⁿ in oē poaⁿ lâi Ngó͘-hong hiong? Hit ê lí-iû khiok goá m̄-chai, chóng-sı̄ ū chı̍t ê sū-sı̍t, chiū-sı̄ in ê toā soè só͘ teh kóng ê oē- gú lóng sı̄ Thài-ngá-ní oē, liân toā-lâng iā soà giōng- giōng beh boē kı̀-tit in ka-kı̄ ê oē. Kū-nı̂ 6 ge̍h Kàu-hoē-pò San-toē soan-tō te̍k-khan ê lāi-bı̄n goá ū siá chı̍t phiⁿ “Ngó͘-hong Sı̀n-gióng ê Eng-hiông” hit ê chú-jı̂n ong Chu Thiam-siū Bo̍k-su, goân-lâi chiū sı̄ Sài-hā cho̍k ê chhut-sin. Thang chai in poaⁿ lâi Ngó͘-hong hiong ū siong-tong kú ê le̍k-sú. Nā án-ni, Lâm-chng chit pêng neh? In-ūi in pêng- siông só͘ chiap-sio̍k ê lâng, toā-pō͘-hūn lóng sı̄ Kheh-lâng, iū-koh chin-choē Kheh-lâng toà tı̄ soaⁿ-nih teh keng-êng soaⁿ, só͘-í toā-pō͘-hūn ê lâng lóng oē-hiáu kóng, á sı̄ thiaⁿ Kheh-oē. Tı̄ Lâm-chng hiong ê Sài-hā cho̍k, goá ū hoat-kiàn tio̍h chı̍t hāng chin chhù-bı̄ ê sū, chiū sı̄ ū lâng o̍h lán pı̂ⁿ-toē ê lâng chhāi ngó͘-siōng, sı̄m-chı̀ ū lâng iā chhāi kong-má-khám teh kā ho̍k-sāi. Tong-jiân in ê kè-chhoā iā chin hūn-cha̍p, ū ê kap Thài-ngá-ní cho̍k ê lâng, á sı̄ Kheh-lâng, á sı̄ goā-séng lâng kiat-hun, ū ê tùi-hoán, ta-po͘ ê chhoā chāi-toē Kheh-lâng ê cha-bó͘ gín-ná choè bó͘. In ê chong-kàu sı̀n-gióng thang kóng, nā m̄-sı̄ Ki-tok-kàu chiū-sı̄ Thian-chú-kàu, lióng-hong ê sı̀n-chiá sı̄ lán khah choē. In-ūi só͘ toà ê só͘-chāi tı̄ chhim-soaⁿ, kau-thong put-piān ê só͘-chāi, hia 2 hō͘, 5 hō͘; chia 3 hō͘, 4 hō͘, só͘-í beh jı̍p-khı̀ hia thoân-kàu chin khùn-lân. Tı̄ sió-sió ê Tang-hô chhoan kap Hông-lâi chhoan, in hun-soàⁿ tı̄ 12 só͘-chāi khiā khí, tı̄ 3 ūi ê só͘-chāi keng-siông teh chū-hoē. Thoân-kàu-su chí-ū chı̍t ê soan-tō-su, kı̂-û ê só͘-chāi, múi lé-pài ū tùi Sin-tek nn̄g ūi san-toē ha̍k-seng khı̀ pang-chān. Pài-tn̂g Chí ū chı̍t keng poàⁿ éng-kiú-sèng chng-chō ê lé-Pài-tn̂g tı̄ Tang-hô. Hông-lâi pún-lâi ū chı̍t keng Tek-chō ê pài-tn̂g, chóng-sı̄ í-keng àu-khı̀, hiān-sı̂ Teh kè-e̍k khí sin ê pài-tn̂g. Lūn khí chit nn̄g keng kàu-hoē, chiū sı̄ Gô͘ Bêng-chèng Bo̍k-su chêng tı̄ Sin-tek sèng-keng su-ı̄ⁿ teh tha̍k-chheh ê sı̂ khı̀ kó͘-bú khai-siat ê. Hiān-sı̂ Ngó͘-hong kap Lâm-chng nn̄g hiong ê sı̀n-chiá kap kiû-tō-chiá iok ū 800 goā lâng, kı̂-tiong iok ū 500 lâng í-keng siū soé. Taⁿ--choè-āu tı̄ chia ài lâi kài-siāu in tùi kó͘-chá lâu--lo̍h-lâi chin chhù-bı̄ ê chè-tián, chit ê oé-lâng chè-tián lēng-goā chı̍t ê miâ kiò-choè Pa-su Tāi-ek chè-tián, múi nn̄g nı̂ ê lông-le̍k 10 ge̍h 15 jı̍t khí, 3 jı̍t kú, in ū kú-hêng chit ê sēng-tāi ê chè-tián, tı̄ Lâm-chng koh jı̍p-khı̀ ê Tang-hô chhoan Hiòng-thian-ô͘. Tùi Ngó͘-hong, Tek-tang, Sai-thâm téng, kai cho̍k ê lâm-lú, ló-iù, chiâⁿ-kûn kiat-tūi chı̍p-oá, tı̄ hái-poa̍t 1200 goā kong-chhioh ê san-toē pı̂ⁿ-iûⁿ chiūⁿ ê Hiòng-thian-ô͘. Liân pa̍t cho̍k á-sı̄ pı̂ⁿ-toē lâng, iok ū 2000 goā lâng, liân-liân 3 mı̂ tı̄ hia chiú-bú kha-ta̍h kông-ko jia̍t-bú, hit ê siaⁿ-im hiáng-èng tı̄ soaⁿ-kok, hō͘ thiaⁿ ê lâng kám-kak giâm-siok ê koan-liām. Chit ê chè-tián ê khí-goân sı̄ án-ni, iok 500 nı̂ chêng tı̄ Hiòng-thian-ô͘ chit ê só͘-chāi, ū chı̍t cho̍k kiò-choè oé-lâng chéng-cho̍k, seng-khu ê koâiⁿ-toā chí-ū 3 chhioh, chóng-sı̄ chhong-bêng ióng-kám, múi nı̂ nā siu-koah ê sı̂, kiò i lâi giām-siu ê sı̂, koh kè hit nı̂ tiāⁿ- tio̍h kóng hong-siu. Khó-sioh tùi sèng ê hong-bı̄n bô chèng-keng, thiau-lân san-toē lióng-ka hū-lú, tı̀-sú jiá-khí lang ê siū-khı̀, siat kè-tı̀ kā in châu-bia̍t, chóng-sı̄ oé-lâng sí-liáu in ê im-hûn lâu tı̄ soaⁿ-tōng chhim-soaⁿ kok, mı̂-jı̍t kiáu-chhá, chiah ê soaⁿ-pau siūⁿ che sı̄ oé-lâng ê lêng lâi teh pò-oan, só͘-í tùi hit sı̂ khí, múi nn̄g nı̂ in chiū chio-chı̍p in ê cho̍k lâi an-ùi chiah ê oé-lâng ê lêng. Taⁿ-- goá tı̄ chia beh kiat-sok goá chit phiⁿ ê bûn ê sı̂, goá ài thê-chhíⁿ lán tāi-ke kèng-ka koan-sim chit ê tı̄ lán Tâi-oân siōng sè ê cho̍k=Sài-hā cho̍k . Chhun-chhut lán thiàⁿ ê chhiú tı̄ chit ê chı̀-bı̂-soè ê bı̂n-cho̍k, ún-tàng lán iā beh tit-tio̍h Chú ê chheng-ho͘, “Hó ah, hó koh chı̄n-tiong ê lô͘-po̍k.”
( “Soaⁿ-tè Kàu-hoē” 1963 nı̂)