Kiàn-tio̍k lé-pài-tn̂g ê kang-lâng kā bo̍k-su kóng: “Bo̍k-su ah, kám ē-sái mâ-hoân lí chiong hit-ê o͘-bah-sáng ê 500 kho͘ thè hêng i, i put-sı̂ to lâi tùi goán choè ê khang-khoè liām-tang liām-sai, koh kóng kiàn-tio̍k hōng-hiàn i ū hiàn 500 kho͘ leh ......”
Kui toā-tı̄n ê kúi-á chū-chı̍p tı̄ chı̍t-keng lé-pài-tn̂g. Chiah-ê kúi-á chin lı̄-hāi, ē chhiùⁿ Sèng-si, ē tha̍k Sèng-keng, iā ē kı̂-tó, koh sian koáⁿ to koáⁿ boē cháu.
Hó-ka-chài, āu--lâi ū chı̍t-ê chin ū lêng-le̍k ê bo̍k-su lâi koáⁿ ...... I chiong hōng-hiàn-tē-á ǹg kúi-á tu--chhut-khı̀, só͘-ū ê kúi-á cháu kah ná teh poe leh.
Chia̍h-pn̄g chêng, chı̍t-ê gín-á chhoā kı̂-tó: “Kám-siā Siōng-tè, siúⁿ-sù goán hong-hù ê bí-niû chhài-se. Khò Chú ê miâ, a-men ...... ta̍k-jı̍t lóng chiah-ê chhài!”
Lí tiúⁿ-ló sı̍t-chāi sı̄ ū-kàu bô-êng. Lé-pài-jı̍t oāⁿ i su-hoē koh ài chò seng-lí. Bô-êng liáu, chông khı̀ kàu kàu-hoē í-keng 10 tiám chhiau-koè 5 hun. I chiū toā-lia̍p-koāⁿ kiâⁿ chiūⁿ tâi-á-téng, khoàⁿ chiu-pò, toā-siaⁿ hoah: “Sèng-si 57 kho͘ ...... ah, sit-lé sit-lé, sèng-si 57 kin.”
Chı̍t-tı̄n kàu-hoē hoē-iú lé-pài soah, lâi chhoē tiúⁿ-ló: “Tiúⁿ-ló ah, lán ê bo̍k-su sı̄ teh káng siáⁿ tō ? Goán ta̍k lé-pài liáu sı̂-kan sái hiah-kú ê chhia lâi chò lé-pài, bo̍k-su kóng he sı̄ siáⁿ tō-lí lah ? Tiúⁿ-ló ah, lí kóng khoàⁿ-māi leh, lí lâi chò lé-pài ū tit-tio̍h siáⁿ ?”
Tiúⁿ-ló kóng: “Tit-tio̍h an-hioh, tit-tio̍h ho̍k-sāi Siōng-tè, hiaⁿ-tı̄ chí-boē ê kau-gı̂ ......”
Hoē-iú kóng: “Goán m̄-sı̄ kóng che lah, goán sı̄ kóng, lí thiaⁿ káng-tō. O̍h-tio̍h siáⁿ ?”
Tiúⁿ-ló kóng: “O̍h thun-lún.”
(Hong-hiòng Tē 18 kı̂, 1992 nı̂ 3 goe̍h)
