Ek-bûn siáⁿ-sū kái-piàn

Tı̄ lé-pài-jı̍t ê sı̂, Ek-bûn ê ma-ma hō͘ i 5 kak gûn, beh hō͘ i tı̄ Chú-jı̍t-o̍h thang hiàn-kim. I chı̍t bı̄n kiâⁿ, chı̍t bı̄n siūⁿ, “Siat-sú goá nā chiong chit 5 kak gûn lâu teh, goá tio̍h cháiⁿ-iūⁿ ēng chiah hó?” I koh tùi ka-kı̄ kóng, “Goá oē thang ēng chiah ê chı̂ⁿ lâi boé chı̍t ki peng-ki, á-sı̄ boé chı̍t lia̍p kan-lo̍k lâi thit-thô. Ah! Chiah ê chı̂ⁿ tùi goá chin ū lō͘-ēng.” Tı̄ Chú-jı̍t-o̍h ê lāi-bı̄n, tng sió pêng-iú teh hiàn-kim ê sı̂, Ek-bûn chiong i 5 kak gûn chhàng tı̄ tē-á-lāi. I siūⁿ kóng, i ê lāu-su it-tēng m̄-chai-iáⁿ, á-sı̄ i ê lāu-su oē siūⁿ kóng, i boē kı̀-tit toà hiàn-kim ê chı̂ⁿ. Tı̄ hun-pan teh tha̍k-chheh ê sı̂, sui-jiân i chin chù-ı̀ teh thiaⁿ lāu-su kóng kò͘-sū, chóng-sı̄ i ê sim siông-siông teh khoà-lū i ê 5 kak gûn, kiaⁿ-liáu hō͘ pa̍t lâng kā i thau-jı̂m khı̀, á-sı̄ bô--khı̀. I sim-lāi put-sı̂ teh siūⁿ, “Goá tek-khak boē ēng-tit hō͘ goá ê ma-ma chai-iáⁿ goá bô hiàn-kim; siat-sú goá nā chiong chı̂ⁿ tē tı̄ tē-á-lāi, bô kú goá ê ma-ma it-tēng oē chai-iáⁿ.” Só͘-í i tı̄ pı̀-hoē í-āu chiū koáⁿ-kín cháu tò-khı̀ chhù-nih, chiong chı̂ⁿ chhàng tı̄ i ê bı̂n-chhn̂g kha. Pêng-siông sı̂ Ek-bûn ta̍k jı̍t lóng chin oàⁿ khùn, chóng-sı̄ hit mı̂ i te̍k-pia̍t gâu-chá khùn. I beh khùn ê tāi-seng, i chiū khı̀ bı̂n-chhn̂g-kha sûn hiah ê chı̂ⁿ, khoàⁿ ū tı̄-teh bô? Jiân-āu i chiah an-sim peh chiūⁿ khı̀ khùn. Hiah ê chı̂ⁿ sui-jiân tı̄ ē-bı̄n bô lâng chai thang kā i the̍h, chóng-sı̄ i kui mı̂ hoan-lâi, hoan-khı̀, boē khùn-tit. Kàu chin àm, i khùn-khı̀ ê sı̂, i ū choè chin-choē bāng. Thâu chı̍t ê bāng, i khoàⁿ-tio̍h chı̍t ê sòng-hiong ê Hui-chiu gín-ná, tùi i ê pêng-iú kóng, “Goá kúi-nā jı̍t bô pn̄g thang chia̍h lah.” I ê pêng-iú chin kı̂-koài, chiū mn̄g i kóng, “Sı̄ án-choáⁿ? Siáⁿ lâng chiong lí ê pn̄g chhiúⁿ khı̀ chia̍h?” Hit ê gín-ná ı̀n kóng, “In-ūi Ek-bûn chit lé-pài bô hiàn-kim, só͘-í Siōng-tè bô chiong chı̂ⁿ siúⁿ-sù goá thang boé mı̍h-kiāⁿ chia̍h.” Ek-bûn koh bāng-kı̀ⁿ chı̍t ê Ìn-tō͘ cha-bó͘ gín-ná, khiā tı̄ chı̍t keng pı̄ⁿ-ı̄ⁿ ê goā-bı̄n teh phah-mn̂g, i kā hit ê lâi khui mn̂g ê hō͘-sū kóng, i ê ma-ma su-iàu io̍h-á lâi hō͘ i ê sió-tı̄ chia̍h, chóng-sı̄ hit ê hō͘-sū kā i kóng, “Chin sit-lé, kin-á-jı̍t goá boē thang hō͘ lí, in-ūi Ek-bûn chiong só͘ beh sàng lâi ê chı̂ⁿ koh toà tò-tńg-khı̀.” Ek-bûn khoàⁿ-kı̀ⁿ chit ê cha-bó͘ gín-ná chin sit-bāng tò-khı̀, i tò-khı̀ ê sı̂, chı̍t lō͘ ba̍k-sái tı̍t-tı̍t lâu, sim-lāi hui-siông thòng-khó͘, in-ūi thiaⁿ kóng Ek-bûn chiong i hiàn-kim ê chı̂ⁿ, koh toà tò-khı̀ beh choè i ka-kı̄ ê lō͘-ēng. Tng Ek-bûn thiⁿ-kng chhíⁿ khí-lâi ê sı̂, phak tı̄ i ê toh-téng kóng, “Goá choè chiah ê bāng chin-chiàⁿ thang kiaⁿ!” Āu-lâi chiū sûi-sı̂ chhēng saⁿ, chiong hit 5 kak gûn the̍h khı̀ hō͘ i ê lāu-su, kā i kóng, “Goá beh chiong chiah ê chı̂ⁿ sàng khı̀ goā-kok choè pang-chān sòng-hiong lâng ê lō͘-ēng.” I ê lāu-su chin hoaⁿ-hí, i iā chin hoaⁿ-hí, in-ūi i só͘ choè ê tāi-chı̀, hō͘ i ê sim chhiong-moá pêng-an kap khoài-lo̍k. Koh in-ūi i tùi thang kiaⁿ ê bāng hō͘ i bô chiong eng-kai hiàn ê chı̂ⁿ choè ka-kı̄ ê lō͘-ēng. （Lú-soan Ge̍h-khan Tē 79 kı̂, 1966 nı̂ 7 ge̍h)