Eng-kai tio̍h kín-sı̄n

Ū chı̍t-ê hū-jı̂n-lâng, miâ-chò Khı̂n-ài-chím, bô-tâ-oâ tio̍h khı̀ hn̂g--nı̍h pê chháu. I ū chı̍t-ê kiáⁿ kiò-chò Khûn-á. In-ūi hit-ê gín-ná sı̄ sè-hàn bē-tit kā i pàng tı̄ chhù--nı̍h, só͘-í tio̍h toà i chò-hoé khı̀. Tng-teh chò kang ê sı̂ tú-tio̍h Khûn-á ià-siān ài khùn, chiū kā i hē tı̄ chháu--nı̍h, koh chiong hō͘-soàⁿ khoà-teh kā i jia. Khı̂n-ài-chím teh khı̂n-khı̂n chò kang, iáu-kú it-tio̍h kiáⁿ, só͘-í chia̍p-chia̍p oa̍t-thâu teh khoàⁿ i ū ún-tàng á-bô.

Chit-ê hū-jı̂n-lâng ū chı̍t-chiah káu, hō-chò Hoe-á, sı̄ put-chí ū lō͘-ēng ê cheng-seⁿ. Hoe-á chiàu-kò͘ i. Tı̄ Khûn-á sin-piⁿ ū chı̍t-pau kan- niû. Hoe-á iā chiàu-kò͘, lóng bô tham-sim beh oá-khı̀ chia̍h.

Hit-sı̂ sı̄ hó-thiⁿ, só͘-í chiáu-á kap boé-ia̍h tı̄ poàⁿ-khong-tiong poe-lâi poe-khı̀.

Hn̂g--nı̍h ê āu-bı̄n ū chı̍t-keng lé-pài-tn̂g chiū-sı̄ hū-jı̂n-lâng kap gín-ná tú-tio̍h Lé-pài-jı̍t ū jı̍p-khı̀ siú lé-pài.

Lán tāi-ke tio̍h o̍h Khı̂n-ài-chím ê khoán-sit; ia̍h tio̍h chiàu Hoe-á ê bô͘-iūⁿ lâi gâu kín-sı̄n.

(Tâi-lâm Hú-siâⁿ Kàu-hoē-pò tē 94 koàn, 1893 nı̂ 2 ge̍h)