Ū chı̍t ūi sı̀n Pu̍t chin khiân-sêng ê lāu-su, tiāⁿ-tiāⁿ tı̄ siōng-khò ê sı̂-chūn kà ha̍k-seng Pu̍t-hoat .
Ū chı̍t jı̍t, i ēng poàⁿ tiám-cheng ê sı̂-kan kā gín-á kóng tē-ga̍k sı̄ goā-nı̍h-á khióng-pò͘; jiân-āu i mn̄g gín-á kóng, “ Ū sím-mı̍h lâng siūⁿ beh lo̍h tē-ga̍k? Chhiáⁿ gia̍h-chhiú.” Bô poàⁿ ê gín-á gia̍h-chhiú, lāu-su kám-kak chin an-ùi.
Soà--lo̍h--khı̀, i koh ēng poàⁿ tiám-cheng ê sı̂-kan kā gín-á kóng ke̍k-lo̍k sè-kài sı̄ goā-nı̍h-á hó, kóng liáu i koh mn̄g gín-á, “ Ū sím-mı̍h lâng siūⁿ beh khı̀ ke̍k-lo̍k sè-kài? Chhiáⁿ gia̍h-chhiú.” Tāi pō͘-hūn ê gín-á lóng gia̍h-chhiú--ah, chí ū piah-kak--nı̍h chı̍t ê gín-á bô gia̍h-chhiú, bı̄n iu-iu. Lāu-su kā i kiò--khí--lâi, mn̄g i kóng, “Sı̄ án-choáⁿ lí bô siūⁿ beh khı̀ tē-ga̍k iā bô siūⁿ beh khı̀ ke̍k-lo̍k-sè-kài neh?”
Gín-á ı̀n kóng, “Goán ma-ma kóng, pàng-o̍h liáu-āu sím-mı̍h só͘-chāi mā bē sái khı̀, ài kín tńg lâi chhù--nı̍h.”
Chit ê chhiò-oē tio̍h sı̄ kóng, gán-chêng ê sı̂-kong chiah sı̄ siōng sı̍t-chāi--ê, beh khı̀ tē-ga̍k á-sı̄ thian-tông lóng ài tùi gán-chêng khai-sí.
Gán-chêng ê sı̂-kong nā sı̄ hoaⁿ-hí, ū ài-sim, koh jı̄n-chin phah-piàⁿ, kám-kak jı̂n-seng it-phiàn kong-bêng, chiū sı̄ tı̄ thian-tông. Gán-chêng ê sı̂-kong nā sı̄ chin thòng-khó͘ chí ū su-sim, oàn-tò͘, siû-hūn kap tūi-lo̍h, kám-kak jı̂n-seng it-phiàn o͘-àm, tio̍h sı̄ tı̄ tē-ga̍k--ah.
(Tâi-oân-jı̄ Cha̍p-chı̀ tē 7 kı̂, 2001 nı̂ 5 ge̍h)
