Gín-ná ài thiaⁿ ê kò͘-sū Tham-sim ê Koân-sam

Kó͘-chá tı̄ Jı̍t-pún pak Kiú-chiu ê Eng-gān soaⁿ kha ū chı̍t ê hiuⁿ-siā. Tı̄ hia ū chı̍t ê tham-sim ê hó-gia̍h lâng kiò-chò Koân-sam, i ū chin-chē chı̂ⁿ chioh lâng, siu chin tāng ê lı̄-sek, sio-siāng hit ê chng lāi ū chı̍t ê gín-ná Hàu-kiat, i ê chhù chin sàn-hiong, pa-pa iū koh phoà-pı̄ⁿ chin kú, liân bé io̍h-á ê chı̂ⁿ to bô. Hàu-kiat chiū khı̀ chhoē hit ê hó-gia̍h lâng beh kā i chioh chı̂ⁿ, chóng-sı̄ Koân-sam lóng m̄ chioh i. Hàu-kiat kūi tı̄ thô͘-kha kā i iau-kiû, i chiah ko͘-put-chiong hiat 10 ê gı̂n-kak-á hō͘ i. Chóng-sı̄ Hàu-kiat ê pa-pa phoà-pı̄ⁿ chin kú, chı̂ⁿ ēng liáu lah; Hàu-kiat chiū koh khı̀ chioh chı̂ⁿ, Koân-sam toā siaⁿ jióng, “Lí káⁿ koh lâi chioh! Í-chêng chioh ê chı̂ⁿ lı̄-sek the̍h lâi hêng”, chiū kā i koáⁿ chhut-lâi, Hàu-kiat bô pān-hoat, ná kiâⁿ ná háu, lâi kàu tı̄ soaⁿ-kha chı̍t châng toā châng chhiū kha, hut-jiân-kan ū siaⁿ tùi chhiū-téng ū siaⁿ teh kiò kóng, “Hàu-kiat, Hàu-kiat, lí m̄ thang háu, goá chai-iáⁿ lí sı̄ chı̍t ê chin iú-hàu ê koai gín-ná. Taⁿ goá chit siang chhâ-kia̍h hō͘ lí.” Hàu-kiat chı̍t ē khoàⁿ chı̍t ê chhēng pe̍h-saⁿ ê lâng chē tı̄ chhiū-téng hiat chı̍t siang chhâ-kia̍h hō͘ i, chhâ-kia̍h ê ē-bı̄n bô pı̂ⁿ, ū chı̍t lêng phok-phok ê só͘-chāi. Hàu-kiat kóng, “Chin to-siā, chóng-sı̄ che thái ē chhēng-tit, chhēng lo̍h-khı̀ m̄-nā bē kiâⁿ lō͘, ē poa̍h-tó.” Hit lâng ı̀n kóng, “M̄ sı̄ án-ni, lí kan-ta chhēng teh poa̍h-tó chiū hó, lí peh-khí--lâi ê sı̂ chiū ē-thang khioh tio̍h chı̍t tè kim-á, chóng-sı̄ hit tè kim-á tio̍h ēng tı̄ pang-chān pa̍t-lâng. Siat-sú lí nā khí tham-sim, jú poa̍h-tó ē jú sè-hàn khı̀. Lí m̄-thang bē kı̀-tit”. I tò-khı̀ liáu-āu poa̍h-tó tit-tio̍h kim- á lâi chhiáⁿ i-seng i pa-pa ê pēⁿ, iā hàu sūn pa-pa, koh pang-chān chhù-piⁿ ê sàn-hiong lâng. Tham-sim ê Koân-sam thiaⁿ-tio̍h chit ê hong-siaⁿ, chiū lâi kàu Hàu-kiat ê chhù-nı̍h, chiong hit siang chhâ-kia̍h chhiúⁿ khı̀, chò í-chêng só͘ chioh ê 10 kho͘-gı̂n ê tí-ah. Koân-sam the̍h chhâ-kia̍h tò-khı̀, khí tham-sim tı̍t-tı̍t poa̍h-tó, tit-tio̍h kui keng chhù ê kim-á, chóng-sı̄ seng-khu tı̍t-tı̍t sè-hàn, āu-lâi soà pı̀ⁿ chò chhin-chhiūⁿ thâng hiah sè. Lia̍t-ūi sió pêng-iú, lán m̄-thang tham-sim, lán eng-kai thiàⁿ lâng koh pang-chān lâng. Tio̍h o̍h Hàu-kiat ê iú-hàu. (Ka-têng ê pêng-iú tē 65 kı̂, 1963 nı̂ 7 ge̍h)