Sı̀n-kiat ê pa-pa sı̄ teh kò͘ thih-lō͘--ê, hoé-chhia beh koè ê sı̂, i tio̍h gia̍h âng kap pe̍h ê kı̂ khiā tı̄ thih-lō͘ piⁿ. Sı̀n-kiat ê chhù sı̄ tı̄ thih-lō͘ piⁿ ê sè-keng chhù, chóng-sı̄ i chin ài tōng-bu̍t, tı̄ thih-lō͘ piⁿ ê chı̍t-tè-á khang-tē chhı̄ 7 chiah ke kap 3 chiah thò͘-á.
Sı̀n-kiat kin-nı̂ chiah seng khı̀ 3 nı̂-kip ê ha̍k-seng. I ê ma-ma sı̄ tı̄ Sı̀n-kiat 4 hoè ê sı̂ lı̄-khui sè-kan. I kap pa-pa poaⁿ lâi kò͘ thih-lō͘ sı̄ 7 hoè ê sı̂.
Chı̍t ê chin koâⁿ ê tang-thiⁿ ê àm-sı̂, m̄ chai tùi tó-lo̍h lâi, chı̍t chiah iá-niau cháu jı̍p-lâi in ê chhù-lāi, Sı̀n-kiat khoàⁿ-tio̍h iá-niau chin thiàⁿ i, chóng-sı̄ m̄ chai cháiⁿ-iūⁿ m̄ jı̍p chhù-lāi, tiāⁿ-tiāⁿ to khùn tı̄ chhù-téng thó͘ ian-tâng chhut-lâi ê só͘-chāi.
Bô joā-kú, Sı̀n-kiat kiò i, i chiū tùi chhù-téng lo̍h-lâi kap i saⁿ-kap sàn-pō͘. Chóng-sı̄ pa-pa bô ài niau-á, só͘-í Sı̀n-kiat ta̍k-jı̍t àm-chı̄ⁿ tùi chàu-kha chiong chhun ê pn̄g kap chhài, the̍h khı̀ āu-bı̄n hō͘ i chia̍h. Sı̀n-kiat kā i hō miâ kiò “A-gio̍k”. Sı̀n-kiat múi lé-pài hō͘ pêng-iú chio khı̀ hū-kı̄n ê lé-pài-tn̂g hù Chú-jı̍t-o̍h. Tı̄ Chú-jı̍t-o̍h i thiaⁿ-tio̍h chin-choē koan-hē Siōng-tè ê oē, kap tio̍h cháiⁿ-iūⁿ thiàⁿ lâng.
Kàu 12 ge̍h, seh lo̍h beh kàu chı̍t-chhioh, tı̄ chhù-lāi tio̍h khí hoé-lô͘ ê sı̂-chūn. Sı̀n-kiat tú tùi ha̍k-hāu tò-lâi, pa-pa the̍h 5 kho͘-gı̂n hō͘ i, kiò i khı̀ bé chı̍t-tè tāu-hū. Sı̀n-kiat thiaⁿ-tio̍h A-gio̍k tı̄ chhù-téng teh háu, chiū kiò i lo̍h-lâi, kā i khǹg tı̄ i saⁿ-á lāi, i chiū tı̍t-tı̍t cháu khı̀ tāu-hū-tiàm. Tò-tńg-lâi ê sı̂ i khoàⁿ-kı̀ⁿ chı̍t ê lāu a-peh-à chhēng phoàⁿ-saⁿ, seng-khu chùn-leh chùn-leh tùi i kóng “Gín-ná hiaⁿ, goá pak-tó͘ chin iau, lí só͘ the̍h ê tāu-hū hō͘ goá hó bô?” Sı̀n-kiat hō͘ i kiò chı̍t-ē tio̍h chı̍t kiaⁿ, chóng-sı̄ sûi-sı̂ siūⁿ tio̍h tı̄ Chú-jı̍t-o̍h só͘ thiaⁿ ê kà-sı̄, kóng “A-peh-à, tāu-hū sı̄ pa-pa hoan-hù ê, goá chı̂ⁿ hō͘ lí lah”. Kóng án-ni chiū chiong só͘ chāu ê 4 kho͘-gı̂n lóng hō͘ i. A-peh-à, kóng, “To-siā, to-siā”, koh kā i kiâⁿ 2, 3 ê lé, chiū bô koh khoàⁿ-kı̀ⁿ.
Sı̀n-kiat khoàⁿ i ná kiâⁿ chiū tò-lâi kàu chhù-nı̍h. Tńg-lâi kàu chhù-nı̍h, Sı̀n-kiat chiah siūⁿ-tio̍h pa-pa sı̄ chin sòng-hiong ê lâng, ta̍k ge̍h-jı̍t só͘ niá ê chı̂ⁿ chin chió, liân 1 kho͘-gı̂n iā chin pó-poè, i bô eng-kai chiong só͘ chāu ê chı̂ⁿ hō͘ pa̍t-lâng. “Hāi lah, tńg-khı̀ chhù-nı̍h pa-pa ē mē ......!” Só͘-í chiū tùi chhù āu-bı̄n ê sió mn̂g jı̍p-khı̀. Pa-pa mn̄g i kóng “Chāu ê chı̂ⁿ leh?” Sı̀n-kiat ı̀n kóng, “Ū chı̍t ê khó-lı̂n ê lāu a-peh-à, goá chiong hiah-ê chı̂ⁿ hō͘ i”. Pa-pa thiaⁿ-liáu chin siū-khı̀ kóng, “Tı̄ chit khoán pháiⁿ thàn chı̂ⁿ ê sı̂, iā ū chiong 4 kho͘-gı̂n hō͘ khit-chia̍h ê ah?”
Chóng-sı̄ tı̄ Sı̀n-kiat ê náu-lāi, Chú-jı̍t-o̍h ê lāu-su só͘ kóng ê oē bô bē kı̀-tit khı̀, chiū tùi pa-pa kóng, “Pa-pa, m̄-kú lán ta̍k-jı̍t lóng chia̍h 3 tǹg, hit-ê lâng chin kú bô chia̍h-pn̄g. Goá siūⁿ nā chı̍t-tǹg mài chia̍h, hō͘ i 4 kho͘-gı̂n bô iàu-kín, só͘-í chiah hō͘ i.” Pa-pa kóng, “Lí nā án-ni ta̍k-hāng hō͘ lâng, chı̂ⁿ khah chē mā bô kàu, án-ni lí ē-hng mài chia̍h-pn̄g hó! ......” Hō͘ pa-pa mē ê Sı̀n-kiat ná khàu phō hit chiah niau-á chhut-khı̀ goā-bı̄n. Pa-pa khoàⁿ-kı̀ⁿ kóng, “Sı̀n-kiat, lí kan-ta hō͘ hit chiah niau chia̍h ê pn̄g kap chhài, chı̍t-jı̍t tio̍h chı̍t-nn̄g kho͘ neh. Nā chı̍t kò-ge̍h chiū chin chē chı̂ⁿ, hit khoán niau tàn hiat-ka̍k hó lah!”
Sı̀n-kiat iā chai-iáⁿ sòng-hiong ê pa-pa, ūi-tio̍h beh hō͘ i tha̍k-chheh bé phō͘-á iân-pit, iā chin khùn-lân, só͘-í pa-pa kóng án-ni iā sı̄ bô m̄-tio̍h. Chóng-sı̄ beh chiong 3 nı̂ kú chò-hoé ê A-gio̍k hiat-ka̍k tı̄ chit-ê léng ê seh-tiong sı̍t-chāi chin m̄ kam, i chiū phō niau-á kiâⁿ kàu lı̄ ū chı̍t-kong-lí ê tiān-hoé-thiāu ê ē-bı̄n tı̄ hia teh khàu.
Hut-jiân-kan tı̄ heng-chêng ê niau-á tùi i kóng-oē, “Sı̀n-kiat hiaⁿ, Sı̀n-kiat hiaⁿ, to-siā lí chin kú iúⁿ-chhı̄ goá, goá beh chhoā lí lâi-khı̀ chı̍t ê hó só͘-chāi, chhiáⁿ toè goá lâi”. Niau-á chiū thiàu chhut-lâi, chhin-chhiūⁿ thò͘-á tı̄ seh ê téng-bı̄n tı̍t-tı̍t thiàu-khı̀, cháu tùi soaⁿ-téng khı̀. Sı̀n-kiat chiū toè i tı̍t-tı̍t khı̀.
Tı̄ soaⁿ-nı̍h ū chin chē toā châng ê chhiū-á, Ǹg tùi hit lāi-bı̄n tı̍t-tı̍t kàu soaⁿ lāi. Tı̄ chek chin chē seh ê só͘-chāi ū chı̍t ê sè-sè ê khang, niau-á chiū kā i pê-pê--leh, chiū nǹg tùi lāi-bı̄n jı̍p-khı̀. “Eh! Eh! He tio̍h chin kı̂-koài tı̄ chia ná ū chı̍t ê khang?” Teh khoàⁿ ê sı̂, tùi lāi-bı̄n ū chı̍t chiah toā-chiah hı̂m oá-lâi khang-kháu tùi i kóng, “Sı̀n-kiat hiaⁿ, tı̄ chiah koâⁿ ê thiⁿ lí iā lâi ah, taⁿ chhiáⁿ jı̍p-lâi”. Tı̄ tōng-bu̍t-hn̂g só͘ khoàⁿ ê hı̂m chin hō͘ lâng kiaⁿ, chóng-sı̄ chit chiah hı̂m thái ē án-ni, i teh tio̍h-kiaⁿ ê sı̂, hı̂m ēng i ê toā ki chêng-jiáu pê seh, hō͘ i pı̀ⁿ khah toā khang, hō͘ Sı̀n-kiat thang jı̍p-khı̀.
Tı̄ hı̂m ê tōng-hia̍t lāi, tû-liáu toā hı̂m í-goā, ū i ê thài-thài kap chı̍t chiah sè-chiah hı̂m-á-kiáⁿ, chē kàu chin hó-sè, kap niau-á A-gio̍k chin siong-hó teh kóng oē, hı̂m thài-thài chiū tùi toā hı̂m kóng. Toā-hı̂m chhiò-chhiò tùi Sı̀n-kiat kóng, “Sı̀n-kiat hiaⁿ, tı̄ 3 nı̂-kú lí chin thiàⁿ goán ê hó pêng-iú A-gio̍k. Taⁿ goán chia ū koh siⁿ sin ê eⁿ-á, chhiáⁿ lí ûn-ûn-á thit-thô. Tı̄ chit hū-kı̄n ū hûn-chhiok, siân lóng teh hioh koâⁿ, lâi khı̀ chhiáⁿ in lâi.” Toā-hı̂m chiū hoan-hù sè-chiah hı̂m khı̀ kiò in lâi. In lâi liáu-āu toā-hı̂m chiū tùi in kóng-oē.
Oē kóng soah hûn-chhiok kap siân chin hoaⁿ-hí, thiàu lâi Sı̀n-kiat ê bı̄n-chêng kā i kiâⁿ 3, 4 pái lé. A-gio̍k chiū tùi Sı̀n-kiat kóng “Sı̀n-kiat hiaⁿ, hûn-chhiok kap siân, thiaⁿ-tio̍h lí chin thiàⁿ tōng-bu̍t, beh kā lí seh-siā, kim-mı̂, tāi-ke tı̄ chia beh saⁿ-kap lâi iû-hı̀.” Siân chiū háu kàu “jí-jí ... ”, hûn-chhiok iā tı̍t-tı̍t chhiùⁿ-koa poe-koân poe-kē, sè-chiah hı̂m iā toè hiah-ê koa-siaⁿ thiàu-bú, toā-hı̂m kap hı̂m-bú chin hoaⁿ-hí teh háu. Niau-á iā chham-ka lo̍h-khı̀ thiàu-bú, nn̄g-chiah toā-hı̂m iā jím bē tiâu, khai-sí chhiùⁿ koa. In-ūi chin sim-sek, Sı̀n-kiat soà bē kı̀-tit i sı̄ tı̄ hı̂m ê tōng-hia̍t, ka-kı̄ iā phah-chhiú chham-ka in ê thiàu-bú. Hut-jiân A-gio̍k hoah kóng “Sit, sit ...... ” kiò tāi-ke soah.
Siân mn̄g kóng, “Sím-mı̍h tāi-chı̀?”
Hûn-chhiok seng-khu chùn chı̍t-ē kóng, “Ū lâng ê kha-pō͘ siaⁿ, m̄ chai sı̄ phah-la̍h--ê á m̄ sı̄?” Thiaⁿ tio̍h án-ni, toā-hı̂m koáⁿ-kín chiong jı̍p-kháu piⁿ ê seh lâi that tı̄ jı̍p-kháu--nı̍h. Toā-hı̂m kóng, “Lâng sı̍t-chāi chin pháiⁿ, khoàⁿ-tio̍h goán chiū sûi-sı̂ phah chhèng, só͘-í bē-thang an-sim chiong jı̍p-kháu khui-khui. Chóng-sı̄, tı̄ hiah pháiⁿ ê lâng ê tiong-kan, iā ū chhin-chhiūⁿ Sı̀n-kiat hiaⁿ chiah-nı̍h hó ê lâng, sı̍t-chāi iā thang kám-siā”. Siân hoaⁿ-hí án-ni kóng.
Lâng ê kha-pō͘ siaⁿ bô thiaⁿ-kı̀ⁿ í-āu, Sı̀n-kiat siūⁿ-tio̍h, he kiám-chhái sı̄ i ê pa-pa khoà-lū i ê to̍k-siⁿ kiáⁿ, chiah lâi chhoē, chiū-kóng “Goá beh tò-khı̀ chhù-nı̍h, chin to-siā, kim-mı̂ chin sim-sek, soà m̄ chai sı̂-kan teh koè-khı̀.”
Toā-hı̂m kám-kak chin m̄ kam-sim kóng, “Lí beh tò-khı̀ lah, goán kiò-sı̄ lí kim-mı̂ beh toà chia, chóng-sı̄ iā khoà-lū lín pa-pa ê tāi-chı̀. Goán ài mı̍h-kiāⁿ sàng lí chò kı̀-liām, Sı̀n-kiat hiaⁿ lí ài sím-mı̍h?” Sı̀n-kiat ı̀n kóng, “Goá, bô ài sím-mı̍h, chóng-sı̄ goá siūⁿ ài chiong chia̍h-mı̍h sàng hō͘ hiah-ê keng-koè hoé-chhia-lō͘ ê bô thâu-lō͘ ê lâng. Goán tau chin sàn, só͘-í siūⁿ ài hō͘ in, iā bô pān-hoat, kin-á-jı̍t chiong bé tāu-hū só͘ chāu ê chı̂ⁿ hō͘ lâng, só͘-í hō͘ pa-pa mē.” “Hit-ê tāi-chı̀, goán í-keng tùi A-gio̍k thiaⁿ liáu lah, goán ū chı̍t hāng ài chhiáⁿ lí the̍h tńg khı̀ chhù, chiū-sı̄ “Ô͘-thô”. Khoàⁿ lí ài joā chē, chiū ē cháu joā chē chí chhut-lâi.” Toā-hı̂m ná kóng, chiū tùi tōng-hia̍t ê lāi-bı̄n kak the̍h chı̍t-lia̍p ô͘-thô chhut-lâi. Tı̄ Sı̀n-kiat ê bı̄n-chêng, chhùi m̄ chai teh liām sím-mı̍h, chiū iô ô͘-thô. Chin kı̂-koài, sè lia̍p thô-á-chí tı̍t-tı̍t cháu chhut-lâi. “Lí khoàⁿ cháu chiah chē chhut-lâi, chiong che àm-chı̄ⁿ chèng tı̄ lín pa-pa ê hoé-chhia liâu-á piⁿ, chèng tı̄ thih-lō͘ ê siang-pêng piⁿ. Teh chèng ê sı̂ bē ēng-tit hō͘ lâng khoàⁿ-kı̀ⁿ, nā àm-chı̄ⁿ tı̄ àm-sı̂ chèng, chı̍t mı̂ ê tiong-kan chiū toā châng kiat-sı̍t. Chiong hiah-ê chı̍p chò-hoé sàng hō͘ hiah-ê bô kang-chok ê lâng, ô͘-thô pí pn̄g khah ū chu-ióng-hun, só͘-í nā chia̍h 10 lia̍p chiū bô khah su chı̍t oáⁿ pn̄g.” Sı̀n-kiat thiaⁿ liáu chin hoaⁿ-hí, chiū the̍h khí-lâi hàiⁿ, chóng-sı̄ lóng hàiⁿ bô. Toā-hı̂m khoàⁿ-tio̍h án-ni toā siaⁿ chhiò “Hah, hah....... Bē kı̀-tit, bē-kı̀-tit. Beh hàiⁿ í-chêng tio̍h ēng Chú ê kı̂-tó-bûn kı̂-tó, thô-á-chí chiah ē cháu chhut-lâi. Lí iā bat khı̀ Chú-jı̍t-o̍h, só͘-í tùi Siōng-tè ê tāi-chı̀ chin chai chiah tio̍h. Nā chhut-tı̄ tham-sim lâi kı̂-tó, Siōng-tè bē chiong ô͘-thô hō͘ lán. Lí nā sim siūⁿ, kiû Siōng-tè chiong ô͘-thô lâi siúⁿ-sù hiah-ê khó-lı̂n ê sòng-hiong lâng, lâi kı̂-tó, chiū Siōng-tè ē hō͘ chı̍t-lia̍p ô͘-thô cháu-chhut lí só͘ ài ê ô͘-thô-á.” Sı̀n-kiat thiaⁿ-liáu chin kám-kek.
The̍h hit lia̍p thô-á beh chhut-khı̀ goā-bı̄n ê sı̂, hûn-chhiok tùi i kóng, “Sı̀n-kiat hiaⁿ, goá iā chiong chı̍t ki ‘chháu-te̍k’ hō͘ lí, chit-ê chháu-te̍k, bô-lūn sím-mı̍h lâng pûn, thiⁿ-tiong ê poe-chiáu lóng ē poe lâi kap lí chò pêng-iú. Hiān-chāi siūⁿ ài pûn, chóng-sı̄ chhiū-nâ lāi ê chiáu-lūi lóng teh khùn, nā kā in phah-chhíⁿ chin pháiⁿ-sè. Taⁿ chit-ki hō͘ lí, nā bô phoāⁿ ê sı̂ lí thang pûn, nā beh kho͘ ke-á lâi, pûn iā chin hó ēng.” Sı̀n-kiat toā kā i seh to-siā. Chit sı̂ siân ēng chho͘-chho͘ kē-ke ê siaⁿ tùi i kóng “Sı̀n-kiat hiaⁿ, goá m̄ chai sím-mı̍h sı̂ chiah ē koh tú-tio̍h lí, só͘-í ài chiong ‘siân ê sı̍t-á’ hō͘ lí, lí nā koà tı̄ seng-khu, chiū ē-thang chhin-chhiūⁿ goán án-ni tı̄ khong-tiong chū-iû lâi poe”. I kóng án-ni chiū poé thô͘, tùi thô͘-té the̍h siân ê khak hō͘ i kóng “Che tio̍h tı̄ beh pang-chān lâng ê sı̂ chiah thang ēng, nā siūⁿ ài thàn chı̂ⁿ, á-sı̄ hō͘ lâng o-ló chiū bô hāu, chhiáⁿ lí ē kı̀-tit.” Sı̀n-kiat the̍h chit 3 hāng pó-poè tùi tōng-hia̍t chhut-lâi ê sı̂, niau-á A-gio̍k cháu lâi kā i seh-siā kóng, “Sı̀n-kiat hiaⁿ, chin kú siū lí ê chiàu-kò͘ chin to-siā, goá chiām-sı̂ ē kap toā-hı̂m in chò-hoé toà, chhiáⁿ m̄ bián khoà-lū.”
Sı̀n-kiat ná kiâⁿ ná hoaⁿ-hí, “Heh, chin hoaⁿ-hí, tit-tio̍h 3 hāng pó-poè”. Tı̄ seh tiong i tı̍t-tı̍t kiâⁿ kàu chhù-nı̍h. Pa-pa tú-tú gia̍h teng beh thèng-hāu choè àm ê hoé-chhia koè, tùi i kóng “Sı̀n-kiat, lí cháu-khı̀ tó-lo̍h, pa-pa chin hoân-ló, siūⁿ beh khı̀ chhoē lí. In-ūi bô lâng thè goá, só͘-í siūⁿ lí khoàⁿ ē koáⁿ-kín tńg-lâi. Ah, chin kai-chài.” Kóng án-ni chiū tùi tē-á-té the̍h sio hân-chı̂ lâi hō͘ i.
“Pa-pa, goá thè lí, lí seng khı̀ khùn.” Iú-hàu ê Sı̀n-kiat kóng án-ni chiū tùi pa-pa ê chhiú chiap teng-hoé. Bô joā kú choè àm ê chhia chiū koè-khı̀. “Taⁿ, tio̍h khai-sí lâi chò, chhù-piⁿ, thih-lō͘-piⁿ, kim-àm lóng lâi kā i chèng ô͘-thô-á, bı̂n-á chá-khí hō͘ pa-pa tio̍h-kiaⁿ chı̍t-ē”. I siūⁿ án-ni chiū tùi tē-á té the̍h ô͘-thô-á chhut-lâi, chiàu toā-hı̂m só͘ kóng, liām Chú ê kı̂-tó-bûn, chiū tı̍t-tı̍t hàiⁿ. “Khok, khok......”, thô-á-chí tı̍t-tı̍t lı̀n chhut-lâi, Sı̀n-kiat chiū chiong hiah-ê chèng tı̄ chhù ê sı̀-piⁿ, kap thih-lō͘ ê nn̄g-pêng, chin kı̂-biāu, chı̍t-ē chèng lo̍h-khı̀, sûi-sı̂ puh-gê, pı̀ⁿ-chò chhiū tı̍t-tı̍t toā châng, koh kiat chin chē koé-chí, hō͘ Sı̀n-kiat tio̍h chı̍t-kiaⁿ.
Sı̀n-kiat siūⁿ-tio̍h tı̄ soaⁿ-téng bô chhiū-á ê soaⁿ, lâi chèng ô͘-thô thang pang-chān sòng-hiong ê lâng, nā khah hn̄g chiah ēng ‘siân ê sı̍t-á’. Sı̀n-kiat chiū tı̄ àm-mı̂, tı̄ seh ê tiong-kan, tı̄ thih-lō͘ piⁿ tı̍t-tı̍t chèng, chiâⁿ-chò chhiū-nâ. Keh chı̍t-mı̂, thàu-chá khí-lâi, ô͘-thô-á lak-lo̍h tio̍h chhù-téng, chhin-chhiūⁿ teh tı̀m chio̍h-thâu. Pa-pa tio̍h chı̍t-kiaⁿ chhut-khı̀ khoàⁿ-māi, koh khah tio̍h-kiaⁿ, chı̍t mı̂ ê tiong-kan chhù-piⁿ lóng pı̀ⁿ-chò ô͘-thô ê chhiū-nâ, chiū cháu jı̍p chhù-lāi kóng, “Sı̀n-kiat, Sı̀n-kiat chin kı̂-koài ah, cha-mı̂ chı̍t-mı̂ ê tiong-kan lán chia chiū pı̀ⁿ ô͘-thô ê chhiū-nâ lah. Hò͘! Goá taⁿ nā khioh chiah-ê ô͘-thô, chiū pí niá ge̍h-kip khah hó.”
Sı̀n-kiat lóng bô chiong cha-mı̂ ê tāi-chı̀ kā pa-pa kóng, tı̀ⁿ m̄ chai-iáⁿ, chhut-khı̀ kàu goā-bı̄n, tı̄ ke tiâu-á-piⁿ pûn chháu-te̍k, “Pi-pi......”. Heh chin chhù-bı̄, thiⁿ-tiong ê poe-chiáu lóng poe-lâi. Pang-kah, o͘-a, chhiⁿ-ti-á, cha̍p-chí-moē,...í-goā joā-chē i m̄-bat miâ ê, in hioh tı̄ i ê keng-thâu téng, chhiú téng, koh iā hioh tı̄ i ê thâu-khak téng, khoàⁿ-tio̍h án-ni tio̍h-kiaⁿ ê pa-pa kóng, “Sı̀n-kiat, siáⁿ-sū chá-khí hiah chē chiáu-á poe-lâi. In-ūi lí thiàⁿ in chiah beh lâi ê ho͘h? Hó, goá iā chhı̀ khoàⁿ-māi, khoàⁿ ē poe lâi goá chia á-bē?” Pa-pa chiū iā kho͘ chiáu-á, chóng-sı̄ chiáu-á, khí tio̍h-kiaⁿ, lóng poe-khı̀ chhiū-á téng. Sı̀n-kiat siūⁿ beh koh hō͘ pa-pa khoàⁿ chı̍t hāng kı̂-koài ê tāi-chı̀, chóng-sı̄ siūⁿ “M̄-thang, m̄-thang, nā án-ni chiū bô chiàu siân ê iok-sok”, chiū thêng-chí. Sı̀n-kiat chiū tùi pa-pa kóng, “Pa-pa, tı̄ seh ê tiong-kan chē-chē bô kang-chok ê lâng, lán chiong chiah-ê ô͘-thô-á lâi pun hō͘ in, goá siūⁿ in chin khó-lı̂n.” Pa-pa iā toā chàn-sêng. Sı̀n-kiat chiū ta̍k-jı̍t chiong ô͘-thô-á pun hō͘ hiah-ê bē-thang khı̀ chò kang ê lâng, chiong in só͘ ài ê gia̍h pun hō͘ in.
Seh iûⁿ lah, seh ê chúi chiū chiâⁿ-choè toā chúi, pa-pa ta̍k-jı̍t ūi-tio̍h hiah-ê siū chúi-chai ê chò-sit-lâng khoà-lū. Sı̀n-kiat chiah siūⁿ-tio̍h “siân ê sı̍t-á” tio̍h tı̄ chit-ê sı̂-chūn lâi ēng, chiū tùi pa-pa kóng beh chhut-khı̀ chı̍t-ē, tùi āu-bı̄n chhut-khı̀ sûi-sı̂ koà “siân ê sı̍t-á”.
Kı̂-biāu ah, Sı̀n-kiat chhin-chhiūⁿ hui-ki chiū poe-khı̀, koh chhin-chhiūⁿ sè-chiah chiáu-á kap siân ē-thang thêng tı̄ ke̍k sè-ki ê chhiū-boé. Chóng-sı̄ Sı̀n-kiat siūⁿ-tio̍h i m̄-thang chò ka-kı̄ ê lō͘-ēng, chiū ta̍k só͘-chāi poe beh chiong ô͘-thô-á pun hō͘ hiah-ê bô mı̍h thang chia̍h ê lâng. Tı̄ ē-bı̄n chin chē thih-lō͘ ê kang-lâng teh siu-lí thih-lō͘, chóng-sı̄ iā bô khoàⁿ-kı̀ⁿ Sı̀n-kiat, in-ūi Sı̀n-kiat ê seng-khu pı̀ⁿ chhin-chhiūⁿ siân hiah-nı̍h sè.
Sı̀n-kiat chiū poe-kàu hiah-ê in-ūi toā-chúi bô mı̍h thang chia̍h ê lâng ê chhù-téng, tùi lāi-bı̄n hoah kóng “Oeh, oeh! Lín ū khiàm-ēng chia̍h-mı̍h bô?” Tùi lāi-bı̄n ı̀n kóng, “Ouh, sím-mı̍h lâng ah, ū khiàm-kheh o͘h, bô chúi thang lim, iā bô chia̍h-mı̍h.” Sı̀n-kiat chiū sûi-sı̂ tùi tē-á lāi the̍h-chhut i ê “ô͘-thô-á” chhut-lâi kı̂-tó, tı̄ lâng bô khoàⁿ-kı̀ⁿ ê chhù-téng hàiⁿ chhut ô͘-thô-á chha-put-to chı̍t táu. Chiong hiah-ê the̍h jı̍p-khı̀ hō͘ in kóng, chhiáⁿ lín chia̍h che. “Chúi nā thè, lín chiong chí chèng tı̄ chhân-hn̂g chiū ē pang-chān lín ê seng-oa̍h”. Sı̀n-kiat chhin-chhiūⁿ án-ni se̍h chha-put-to 100 keng ê chhù, keh-jı̍t Sı̀n-kiat tùi ha̍k-hāu tńg-lâi, kā pa-pa kóng beh chhut-khı̀ thit-thô, chiū koh khı̀ thàm hiah-ê siū chai-hāi ê chò-sit-lâng, chiong chia̍h-mı̍h pun hō͘ in. Chit-ê tāi-chı̀ chiâⁿ-chò toā hong-siaⁿ: “He sı̄ thiⁿ-sài lah, hit-ê gín-ná ū hoat-sı̍t neh!”
Tùi án-ni chiū bē-thang tı̄ jı̍t-sı̂ poe tı̄ khong-tiong khı̀ thàm hiah-ê chò-sit-lâng, jı̍t lo̍h-soaⁿ í-āu àm-chı̄ⁿ khı̀. Chóng-sı̄ chò-sit-lâng in-ūi kiaⁿ bô lâng káⁿ kā i khui mn̂g. Sı̀n-kiat chiū chiong chı̍t táu ô͘-thô-á khǹg tı̄ chhù-téng. Sı̀n-kiat pun ô͘-thô-á hō͘ siū chúi-chai ê chò-sit-lâng ê tē 7 mı̂, ū chò-sit-lâng siūⁿ beh lia̍h thiⁿ-sài chò sim-sek, chiū chio-chı̍p chng lāi ê chheng-liân 3, 4 ê bih tı̄ hia teh thèng-hāu Sı̀n-kiat khı̀. Sı̀n-kiat lóng m̄ chai-iáⁿ, kàu-ūi kóng, “Oeh, bô chia̍h-mı̍h, ô͘-thô-á hō͘ lín”, beh jı̍p-khı̀ ê sı̂, in chiū kā i lia̍h-teh kóng, “Lí ū hoat-sı̍t, ū-iáⁿ bô?” Ū-ê mn̄g kóng “Lí sı̄ lâng á-sı̄ kúi? Lí thái ū hiah chē ô͘-thô-á? Lí iā bô chûn, iā bô chhia, tùi tó-ūi chài lâi?” Toā siaⁿ sè siaⁿ teh kā i mn̄g. In chiū kā i chhia-tó, chiong saⁿ lóng kā i thǹg khí-lâi, kóng “Lí to bô hoat-sı̍t ah!” “Chit-ê mā bô siⁿ boé, chóng-sı̄ ū kı̂-koài ê mı̍h, ô͘-thô-á, chháu-te̍k kap siân ê sı̍t-á. Kı̂-koài ê gín-ná ah, che beh chò sím-mı̍h?” In lûn-liû khoàⁿ hiah-ê mı̍h. Kı̂-tiong chı̍t ê khúi-khiat ê chheng-liân kóng, “Chit lia̍p thô-á, kiám-chhái sı̄ teh piàn kı̂-su̍t ê, lán lâi kā chām hō͘ phoà khoàⁿ-māi”. Sı̀n-kiat giōng beh khàu, kā in kóng, “Chhiáⁿ goân-liōng leh, he sı̄ goá ê pó-poè, m̄-thang kā goá lòng hāi.”
Hit sı̂ ê chheng-liân chiū jú ài beh lòng phoà ô͘-thô-á, Sı̀n-kiat siūⁿ, nā hō͘ in lòng phoà chiū hāi lah, koáⁿ kín khioh lak tı̄ thô͘-kha ê chháu-te̍k pûn chı̍t siaⁿ, “Pı̍t-pı̍t”. Hut-jiân-kan chin ióng ê chhin-chhiūⁿ eng-á, niau-thâu-chiáu......poe lâi thóng hiah-ê chheng-liân, chheng-liân tio̍h chı̍t-kiaⁿ chiong ô͘-thô-á hiat tùi chúi-té lo̍h-khı̀, Sı̀n-kiat chiū koh koáⁿ-kín khioh sı̍t-á poe tùi khong-tiong khı̀, chhiáⁿ chiáu-á kā i khioh ô͘-thô-á khí-lâi. Khoàⁿ kàu gāng ê chheng-liân kóng, “Aih ah! Bē-thang chò pháiⁿ tāi-chı̀, Siōng-tè teh hêng-hoa̍t lán. Chha chı̍t-sut-á goá ê ba̍k-chiu chiū khı̀ hō͘ thóng chhiⁿ-mı̂!” Chit-ê siau-sit thoân kàu ta̍k só͘-chāi, chiū chin chē lâng beh lâi khoàⁿ chit-ê kı̂-koài ê ē poe ê lâng.
Chı̍t hong-bı̄n, tı̄ thih-lō͘ hū-kı̄n, tı̄ chı̍t-mı̂ ê tiong-kan chiâⁿ-chò ô͘-thô-á chhiū-nâ, iā chin chhut-miâ, só͘-í Sı̀n-kiat chiū bô hoat-tō͘ koh chhut-khı̀ pang-chān sòng-hiong-lâng. Ū chı̍t àm pa-pa mn̄g kóng, “Sı̀n-kiat, ta̍k-àm teh pun ô͘-thô-á ê sı̄ lí mah?” Sı̀n-kiat chiàu sı̍t kā pa-pa kóng. Pa-pa chiū kóng, “Sı̀n-kiat, lán poaⁿ lâi soaⁿ-lāi, kā lâng cho͘ soaⁿ lâi chò ô͘-thô-á ê chhiū-nâ, chiong ô͘-thô-á pun hō͘ sòng-hiong-lâng hó bô?” Pa-pa chiū khı̀ sı̂ kò͘ thih-lō͘ ê kang, kap Sı̀n-kiat sio-chhoā poaⁿ tùi toā-seh soaⁿ-kha khı̀. Ta̍k-jı̍t pa-pa teh chò kang ê sı̂, Sı̀n-kiat chiū àm-chı̄ⁿ iā ô͘-thô-á chí, ta̍k só͘-chāi chò ô͘-thô-á chhiū-nâ. Tı̄ soaⁿ-lāi kám-kak bô phoāⁿ ko͘-toaⁿ ê sı̂, chiū pûn chháu-te̍k, kap chiáu-á saⁿ-kap thit-thô.
Sı̀n-kiat ū chı̍t-ê ǹg-bāng, chiū-sı̄ kap chiáu-á pêng-iú kàu chin-hn̄g khı̀ thit-thô. Ū chı̍t-jı̍t pa-pa khı̀ ke-nı̍h bé mı̍h ê sı̂, Sı̀n-kiat pûn chháu-te̍k chio-chı̍p chiáu-á phoāⁿ chiū ēng siân ê sı̍t-á khı̀ soaⁿ-lāi thit-thô.
Hit jı̍t thiⁿ-khı̀ chin hó sı̍t-chāi chin hó thit-thô ê jı̍t, Sı̀n-kiat soah bē kı̀-tit siân ê hoan-hù, tı̄ soaⁿ-lāi cháu-sio-jiok, ng-ko̍k-ke, thiàu-bú. Kàu tiong-tàu ê sı̂, Sı̀n-kiat soah phah m̄-kı̀ⁿ pó-poè ê ô͘-thô-á. “Ah! Hāi lah, pó-poè phah m̄-kı̀ⁿ lah!” It-tı̍t chhoē, chhoē bô, chiáu-á-phoāⁿ iā kā i tàu chhoē, in-ūi soaⁿ chin toā, khah chhoē to chhoē bô. Teh chhoē ê tiong-kan chin pó-poè ê “siân ê sı̍t-á” koh bô--khı̀, Sı̀n-kiat chiū bô hoat-tō͘ koh poe khı̀ khong-tiong, Sı̀n-kiat chiah siūⁿ-tio̍h siân ê hoan-hù. Sı̀n-kiat chiū tı̄ hia kiû Siōng-tè sià-bián. Siū hoan-hù tio̍h ēng chò pang-chān lâng ê, i the̍h-lâi chò ka-kı̄ thit-thô ê khı̀-khū, sı̍t-chāi m̄ tio̍h. I siūⁿ án-ni chiū tńg-khı̀ chhù-nı̍h, pa-pa thiaⁿ-tio̍h án-ni, iā ta̍k só͘-chāi khı̀ chhoē, chóng-sı̄ lóng chhoē bô.
Chóng-sı̄, kai-chài, í-keng ū chō chin-chē ô͘-thô-á ê chhiū-nâ, Sı̀n-kiat kap pa-pa m̄-bián hoân-ló chia̍h-mı̍h, koh ē-thang pang-chān, khiàm-khoeh chia̍h-mı̍h ê lâng, hō͘ in hoaⁿ-hí.
Sı̀n-kiat chiām-chiām toā-hān chiū tı̄ Toā-seh soaⁿ-kha khui chı̍t ê chin khoah ê bo̍k-tiûⁿ, chı̍t-sı̀-lâng ēng ‘chháu-te̍k’ kap soaⁿ-lāi ê chiáu-á chò pêng-iú.
(Ka-têng ê pêng-iú tē 60-62 kı̂, 1963 nı̂ 2-4 ge̍h)
