Gô͘ Ke-bó ê Sió-toān

Chāi 11 ge̍h 27 ho, tı̄ Pi-thâu pài-tn̂g ê pâng-keng, Siōng-tè ū tiàu lán ê hó pêng-iú Gô͘ Ke-bó (jū-miâ, Bûn-pin) khı̀ kap chú éng-oán toà. Lán chū-jiân tio̍h hoân-ló boē-oē thang tı̄-chia koh-chài kap i saⁿ-kı̀ⁿ; chóng-sı̄ sim ia̍h tio̍h pêng-an toā kám-un, in-ūi Gô͘ Sian-siⁿ 36 nı̂ kú choè kàu-hoē chı̄n-tiong ê chhe-ēng. I bat tı̄ kúi-nā só͘-chāi tng thoân-tō ê chit, chhin-chhiūⁿ tı̄ Ka-poà-soá, Giâm-chêng, Ka-tang-á, Āu-soaⁿ, Kam-á-nâ, Phêⁿ-ô͘, A-lí-káng, Gû-taⁿ-oan, Bān-tan kap Pi-thâu. Hoē-iú tı̄ ta̍k-ūi chun-kèng i, gâu thiàⁿ i, in-ūi thoân tō-lí ê sı̂-chūn, i só͘ kóng put-chí ū èng-hāu, oē kham-tit bián-lē an-ùi chèng lâng ê sim. Toà tı̄ Pi-thâu ê sı̂, Siōng-tè toā siúⁿ-sù I ê lô͘-po̍k. Kàu-hoē tı̄ hia khah kú chin léng-tām; m̄-kú Gô͘ Sian-siⁿ, sui-jiân hoân-ló, i ê sim bô loé-chı̀, hoán-tńg siông-siông chhut-goā pò͘-tō, sûn hiaⁿ-tı̄, iā chhiáⁿ sio bat ê lâng lâi pài-tn̂g siū kà-sı̄; tùi án-ni bô loā-kú kàu-hoē lio̍h-á heng-khí, khah choē lâng oá-lâi thiaⁿ tō-lí. Iū-koh Gô͘ Sian-siⁿ hit-sı̂ gâu siat-hoat kiàn-tı̀ chit keng sı̂n ê lé-pài-tn̂g kap siok-sià tı̄ Pi-thâu koe. Ūi-tio̍h chit chân-sū, i chin chhut-la̍t sı̀-koè kiû khah khoàⁿ-oa̍h ê pêng-iú lâi pang-chān. Kàu lo̍k-sêng hit-tia̍p chin choē lâng chū-chı̍p kap hoē-iú saⁿ-kap hoaⁿ-hí kám-siā Siōng-tè. Gô͘ Sian-siⁿ beh lı̂m-chiong ê jı̍t, i-ê sin-thé bô toā ut-chut kan-khó͘, oē jı̄n-tit lâng, soà an-ùi chhin-lâng ê sim. I kan-ta ài Iâ-so͘ kín-kín lâi chhoā i khı̀. chú chiū kā i kóng, “ Hó ah, lô͘-po̍k tiong-hō͘ ah, lí tı̄ chió-ê í-keng chı̄n-tiong, Goá beh ēng choē-choē-ê thok-tiōng lí, thang jı̍p lí ê chú ê khoài-lo̍k.” (Tâi-oân Kàu-hoē-pò tē 370 koàn,1916 nı̂ 1 ge̍h)