Gû-liâu-á ê Kò͘-sū

A-bú kè a-pa liáu-āu, tō toè a-pa kò͘ chhù--nih chit tè 3-hun-tē. Chhiâng-chāi a-pa khı̀ kang-tiûⁿ siōng-pan, goán 3 ê gín-á tı̄ ha̍k-hāu siōng-khò, a-má kò͘-chhù, a-bú tō tı̄ hn̂g--nih choh-sit, tiong-tàu chiah tńg-lâi chhù--nih hioh-khùn. Kàu goá tha̍k kok-tiong ê sı̂-chūn, hn̂g piⁿ--á ê gû-liâu-á ū khiàm tēⁿ gû-leng ê cha-bó͘-lâng-kang (goán lóng kóng cho͘-lâng-kang ), sı̂-kan ùi thàu-chá 5 tiám kàu 7 tiám, e-po͘ 4 tiám kàu 6 tiám, 1 kang lóng-chóng 4 tiám-cheng, ū 470 kho͘, goe̍h-kip chha-put-to 14000 goā, 1 tang ē-tàng hioh 7 kang, a-pa siūⁿ kóng siōng-pan sı̂-kan bē kài tn̂g, ē-sái ke-kiám thàn tō bóng thàn, tō kó͘-lē a-bú khı̀ gû-liâu-á chia̍h thâu-lō͘. Sui-bóng kóng sı̄ 1 kang siōng-pan 4 tiám-cheng, m̄-koh tiāⁿ-tiāⁿ siōng beh 6 tiám-cheng. Tēⁿ gû-leng ê cha-bó͘-lâng lóng-chóng chiah 4 ê, 1 kang ài tēⁿ 1000 chiah gû-á, tı̄ hia ê sı̂-kan lóng iōng khia--ê, bô thang chē, ke--chhut-lâi ê sı̂-kan mā bô sǹg ka-pan-hùi, siōng-pan nā bān-kàu, gû-thâu-á (goán chng-á lóng án-ne kiò gû-liâu-á ê thâu-ke ) ê bı̄n tō chhàu gah pí ti-sái koh khah chhàu, hā-pan sı̂-kan nā-sı̄ kā lâng chhiân--tio̍h, i mā bô-iàu-bô-kín, 1 tiám-á to bē pháiⁿ-sè. Chit-ê thâu-lō͘ kui-nı̂-thàng-thiⁿ lóng bô hioh-khùn, liân koè-nı̂ mā ài chò, choân-khı̂n ū 700 kho͘, chhéng-ká 1 kang sǹg 1-kò͘-goe̍h ê choân-khı̂n-gia̍h, nā chhéng-ká 3 kang, 3-kò͘-goe̍h ê choân-khı̂n tō bô--khı̀-a. Goán nā hioh-koâⁿ hioh-joa̍h beh tńg-khı̀ a-má hia chhit-thô, a-bú lóng m̄-bat chhéng-ká chhiau-koè 3 kang, in-ūi kha-chhiú bô hiah chē, chhun--ê lâng khang-khoè-liōng ē siuⁿ tāng; 6-goe̍h-chhe goá tō tāi-ha̍k chhut-gia̍p--a, thàn chit-ê sı̂-chūn kiò a-bú lâi Hoa-lian chhit-thô, i it-tı̍t m̄-káⁿ tah-èng, in-ūi i m̄-káⁿ khui-chhùi chhéng-ká. Hok-lı̄ kan-taⁿ Tiong-chhiu sàng 1 a̍p goe̍h-piáⁿ, koè-nı̂ pau 300 kho͘ âng-pau, gû-thâu-á ê kho̍k, tı̄ gún hia sı̄ kui-chng thong-lâng-chai. A-bú chit-ê thoâ-lō͘ chò beh 8 tang--a, poàⁿ-tang khí 10 kho͘, 1 tang ke 1 kang ê hiu-ká, m̄-koh khí kàu 510 kho͘ ê sı̂-chūn tō bô koh khí--a, chit-má choân-khı̂n chióng-kim mā bô--a, hiu-ká bē-sái hioh, gû-thâu-á oāⁿ chı̂ⁿ chún--koè, 1 kang sǹg 500 kho͘. Tùi 1 ê beh tı̄ lô-tōng chhı̄-tiûⁿ chia̍h thâu-lō͘ ê cha-bó͘-lâng lâi kóng, pun--tio̍h ê sı̄ goe̍h-kip chió, hō͘ lâng koán-lí chí-hui ê khang-khoè, chit-hūn sin-súi sui-bóng m̄-sı̄ ı̂-chhı̂ ka-têng ê chú-iàu siu-jı̍p, m̄-koh tùi kui-ê ka-têng keng-chè ū chiâⁿ toā ê chok-iōng, liân án-ne ê thâu-lō͘ chò--khí-lâi mā sı̄ bô khin-sang, koh ē hō͘ thâu-ke pak-siap. Tùi a-bú lâi kóng, bān-goā-kho͘ chóng--sı̄ 1 pit chı̂ⁿ, chit-má 2 ê gín-á tı̄ goā-kháu tha̍k-chheh, sū-sū-hāng-hāng lóng ài chı̂ⁿ, hn̂g--nih ê sit-thâu koh bô kài ún-tēng, chit-hūn thâu-lō͘ bóng chò ke-kiám siu, koh án-choáⁿ kan-khó͘, mā tio̍h au kàu 3 ê gín-á lóng chhut-gia̍p ......, a-bú sim-koaⁿ-té án-ne siūⁿ. (TGB Thong-sı̀n tē 21 kı̂, 2001 nı̂ 6 goe̍h)