Gûi-ki

Tiāⁿ thiaⁿ lâng teh kóng, siān kap ok, khiáu kap gōng, súi kap bái lóng keh 1-tiâu soàⁿ niâ. Nā án-ne, hēng-hok kap gûi-ki--leh? Àm-sı̂, sı̄ kui-ke-hoé-á chò-hoé ê sı̂-kan. A-pà pí-chhiú oē-to teh chhàu-toāⁿ i chò-peng ê tāi-chı̀, kóng hit-chūn i sı̄ joā-á-nı̄-á ióng-kám phiau-phiat, kóng kàu ke̍k-tōng ê sı̂, koh ē gia̍h-chhiú kiâⁿ-lé, a-pà ba̍k-chiu--nih ê kng hō͘ goá kám-tōng. Kāng 1-ê sı̂-chūn, goá mā khoàⁿ-tio̍h i chéng-thâu-á pau ê se-pò͘. A-pà chò khang-khoè tńg--lâi it-tēng seng sé sin-khu. Tú jı̍p-mn̂g tō khoàⁿ i kui-sian lâng siān-tauh-tauh, koh kui sin-khu chhàu-koāⁿ-sng-bı̄, kô͘ kah thái-ko noā-lô; sin-khu sé liáu i chiah khai-sí ū cheng-sı̂n. 20 tang lâi, goá bē kı̀-tit a-pà chò khang-khoè ê kan-khó͘, kap ūi goán chiah-ê gín-á ê hù-chhut. “Pâ--á, lí chhiú nah ē tio̍h-siong?” “Ah, Bô siáⁿ--lah, hō͘ teng-á chha̍k--tio̍h niâ.” “Ū chù phò-siong-hong--ê-bô?” “Bián--lah, hiah hùi-khı̀ beh chhòng-áⁿ?” Chı̍t-sı̂, goá chek-pı̄ ka-tı̄, tng goá tı̄ ha̍k-hāu hiâm kàu-sek bô an léng-khı̀ ê sı̂, a-pà soah tı̄ 30 kúi tō͘ ê khoân-kéng teh chò khang-khoè. “Pâ--á, koh koè 7~8 tang goá kap a-hiaⁿ tō ē thàn-chı̂ⁿ--a, lí tō ē-sái hó-hó-á hioh-khùn--a.” “Hah hah, lín lāu-pē chit-má mā bô thàn-tio̍h siáⁿ-mih chı̂ⁿ a!” Goá kiaⁿ 1-ē oē kóng bē chhut--lâi. A-bú chiap-oē kóng: “Lín pâ--á í-keng hông khiàm 30 kúi bān kang-chı̂ⁿ--a.” “Án-ne sı̄ án-choáⁿ koh beh kè-sio̍k chò--leh?” A-pà chhiò-chhiò bô ı̀n, ba̍k-chiu lāi ê kng-soàⁿ ta̍uh-ta̍uh-á àm--lo̍h-lâi...... Goá ná-chhiūⁿ hông phoah 1-tháng léng-chúi, goân-lâi gûi-ki chhàng tı̄ hēng-hok āu-piah, nā m̄-sı̄ koh ū 2 ê a-ché teh chia̍h thâu-lō͘, chhù--nih ē piàn-chò siáⁿ-khoán? Chhı̀n-koāⁿ it-tı̍t lâu koè goá ê kha-chiah-phiaⁿ. Kı̂-thaⁿ chò-kang-á-lâng, in sı̄ m̄-sı̄ oan-na ū kāng-khoán ê gûi-ki, koh bô siā-hoē hok-lı̄ thang chiàu-kò͘? M̄-koh, tō-sǹg ı̀-sek tio̍h chiah--ê, lán koh ē-sái án-choáⁿ? (TGB Thong-sı̀n tē 43 kı̂, 2003 nı̂ 4 goe̍h)