Tē 5 chiuⁿ
Phok I-seng koah chèng.
Koh sı̀ jı̍t Phok i-seng kap chı̍t ê siàu-liân koâiⁿ-toā ê hù-chhiú kàu Hêng-sū ê ke-lāi khoàⁿ i ê lāu-pē. I-seng ēng soè siaⁿ kap hù-chhiú tâm-lūn, Hêng-sū khiā tı̄ thang-á piⁿ, kiong-kèng thèng-hāu i-seng siat-hoat kiù i ê lāu-pē. Āu-lâi i-seng kóng, “ Goá chhim-sı̀n chit ê pı̄ⁿ sı̄ hut-jiân chı̍t ē poa̍h-tó khı̀ tōng-tio̍h náu, tı̀-kàu chit ê e̍k-lông kap chı̍t ê soè liû siⁿ tı̄ náu-lāi, náu-chhé siū teh, só͘-í sit-liáu ti-kak, eng-kai tio̍h liâm-piⁿ koah.”
Hù-chhiú kóng, “Lí kin-á-jı̍t í-keng hō͘ lâng chhiáⁿ beh choè saⁿ hāng sū, (1) tı̄ kiaⁿ-siâⁿ, ū saⁿ ê kha beh koah, (2)tı̄ Phok-lo̍k-khek ê só͘-chāi, ū chı̍t lúi ba̍k-chiu beh iah khí-lâi, (3) tı̄ Hô piⁿ, ū chı̍t ê liû beh koah, cháiⁿ-iūⁿ oē koh i chit ê pı̄ⁿ nı̍h ?”
I-seng kóng, “Hit ê kha kap ba̍k-chiu to boē hāi-tio̍h sin-khu, chit ê sı̄ kı̂-koài ê pı̄ⁿ, eng-kai tio̍h tāi-seng i-tı̄, lâi chhı̀-khoàⁿ goá ê chhiú-toāⁿ, lí khoàⁿ chit ê Pek chím, nn̄g ge̍h jı̍t bô kia̍h thâu lah, chin khó-lı̂n ah, chit hāng chèng khiok sı̄ chin toā ê.” Chit sı̂ i-seng chin toā siaⁿ kóng chhin-chhiūⁿ boē-kı̀-tit sı̄ tı̄ sím-mı̍h só͘-chāi, in-ūi tit-tio̍h chit ê kı̂-koài ê pı̄ⁿ thang i-tı̄, cha̍p-hun ê ko-hèng. Hù-chhiú kóng, “Lí siūⁿ chit sı̂ oē liâm-piⁿ kiù chit ê khó-lı̂n ê pı̄ⁿ lâng mah ?”
I-seng kóng, “Goá siūⁿ tiāⁿ-tio̍h oē kiù i.”
Hù-chhiú chiū láu-sı̍t kóng, “Goá siūⁿ Hô-lân bô lâng oē i chit téng-hō ê pı̄ⁿ, to̍k-to̍k khiám-chhái lí oē.”
I-seng thiaⁿ liáu chiū bô hoaⁿ-hí kóng, “Lí m̄-bián ke kóng-oē.” Chiū kiò Hêng-sū lâi tı̄ bı̄n-chêng kap i kóng-oē.
Phok i-seng choè lâng sı̄ kı̂-koài, pún m̄ ài kap cha-bó͘ lâng kóng-oē, koh m̄ ài hù-chhiú kóng kàu koah chèng ê sū, kiaⁿ-liáu cha-bó͘ lâng thiaⁿ-kı̀ⁿ beh koah, chiū kiaⁿ beh hūn-khı̀, á-sı̄ toā khàu, só͘-í i kap Hêng-sū kóng i ê lāu-pē ê chêng-hêng, koh kā i kóng, i ka-kı̄ chhim-sı̀n oē kiù chit ê pı̄ⁿ. Hêng-sū kiong-kèng thiaⁿ chı̍t pái, bı̄n chı̍t pái pe̍h, chı̍t pái âng, ba̍k-chiu chù-ı̀ khoàⁿ i ê lāu-pē, oa̍t-thâu toā siaⁿ mn̄g i-seng “Lí kiám m̄-sı̄ kóng, kiám-chhái thâi-koah liáu goá ê lāu-pē oē sí mah ?”
I-seng kóng, “Kiám-chhái, chóng-sı̄ goá chhim-sı̀n oē i-tı̄ i, boē tı̀-kàu sí.”
Hêng-sū kóng, “Nā bô koah, chit ê pı̄ⁿ oē tı̀-kàu sí mah ?”
I-seng kóng, “Chı̍t jı̍t kè chı̍t jı̍t ná siong-tiōng, kàu lō͘-bé e̍k-lông teh-tio̍h náu, liâm-piⁿ chiū sí.”
Hêng-sū kóng, “Nā koah kiám-chhái oē kiù i, nā-sı̄ tio̍h loā-kú chiah oē chai oē hó boē ?”
Chit sı̂ Phok i-seng chiū hoat siū-khı̀ kóng, “Kiám-chhái chı̍t jı̍t á-sı̄ chı̍t tiám cheng, kín-kín kap lí ê lāu-bú siong-liông, goá ê sı̂-kan chin té, bô êng thang tâm-lūn.” Hêng-sū chiū kap i ê lāu-bú siong-liông, āu-lâi i ê lāu-bú kóng,“I-seng ah, oē hō͘ i thiàⁿ mah ?” Ìn kóng, “Goá m̄ chai, kiám-chhái oē thiàⁿ, kiám-chhái boē thiàⁿ.”
Lāu-bú koh mn̄g kóng, “Koah oē kiù i hó mah, lí oē pau mah ? Lí kā goá ê kiáⁿ kóng, Kiám-chhái, kiám-chhái.” Pek chím oē kóng bē liáu, i-seng kóng, “Sı̄, goá kā i kóng koah kiám-chhái oē sí, to̍k-to̍k ǹg-bāng oē kiù i.” Tùi án-ni chiū chiong pió-á khoàⁿ chı̍t ē kóng, “Thang koah á m̄-thang koah, kín-kín chú-ı̀.”
Pek chím oa̍t bı̄n kā Hêng-sū kóng, “EN-á, beh cháiⁿ-iūⁿ kóng nı̍h ?”
Hêng-sū kóng, “Siōng-tè oē hō͘ lí chai.” I ê lāu-bú àⁿ-thâu kı̂-tó kóng, “Kiû Siōng-tè chí-sı̄ goá tio̍h cháiⁿ-iūⁿ kóng.” Liâm-piⁿ chhin-chhiūⁿ i ê kı̂-tó tı̄ i ê sim lāi hō͘ i koat-tēng, chiū kia̍h thâu ǹg i-seng kóng, “Goá kam goān, thang lâi koah.” I-seng chiū boē-bián-tit kóng, “Cháiⁿ-iūⁿ chiah kú tiāⁿ-tio̍h ?” Tùi án-ni Phok i-seng kap i ê hù-chhiú ê saⁿ-kap gı̄-lūn, chiū tùi phê-pau-lāi the̍h chhut chı̍t ki kng-ku̍t ê to. Chit sı̂ Kat-la-tí khiā tı̄ thang-á chêng, chı̍t ē khoàⁿ i-seng kia̍h to, chı̀n-chêng khı̀ khoàⁿ, chiū kiò i ê lāu-bú kóng, “Lāu-pē bô hoān-choē, chā-jı̍t koh m̄-sı̄ ū ı̀-sù beh sio lí, cháiⁿ-iūⁿ in beh thâi sí i nı̍h ?” I ê lāu-bú kan-khó͘ ê siaⁿ kóng, “Goá m̄ chai, goá boē hiáu-tit.” I-seng kóng, “Án-ni boē-choè tit, lí kap lí ê cha-bó͘ kiáⁿ tio̍h chhut-khı̀, chí-ū lí ê kiáⁿ tı̄ chit lāi chiū hó.” Pek chím put-tek-í chiū tńg bı̄n-sek, lún-khı̀ thun siaⁿ, nā-sı̄ ba̍k-chiu sui-jiân âng, siaⁿ-im sui-jiân kē, kóng-oē khiok chhin-chhiūⁿ ū chú-kiàn ê lâng, chiū kóng, “I-seng chhiáⁿ lí hō͘ goá kap goá ê tiōng-hu tiàm-teh.”
I-seng kóng, “Thang, to̍k-to̍k lí m̄-thang choè siaⁿ.”
Ìn kóng, “Hó.”
Chit sı̂ Kat-la-tí kiaⁿ, chiū cháu-khı̀ lâu-téng, hit lāi oá piah ū chı̍t tiuⁿ soè bı̂n-chhn̂g, i chiū tó tı̄ chı̍t só͘-chāi, kèng-jiân bô lâng chai. I-seng chiū chiong goā-saⁿ thǹg-khí-lâi, ēng chı̍t ê phûn toé chúi hē tı̄ pı̄ⁿ lâng ê piⁿ-á, oa̍t-bı̄n tùi Hêng-sū kóng, “Gín-ná goá oē oá-khò lí mah ?”
Ìn kóng, “Oē.”
I-seng kóng, “Lí thang khiā tı̄ lí ê lāu-pē ê thâu-piⁿ, lí ê lāu-bú oē tı̄ i ê chiàⁿ-pêng.” koh tùi Pek chím kóng, “Lí tio̍h kı̀-tit, m̄-thang khàu chı̍t siaⁿ, ia̍h m̄-thang hūn-khı̀.”
Pek chím ı̀n kóng, “Chai.” Chiū chē tı̄ chhn̂g-piⁿ. Chit sı̂ sı̄ tē-it thang kiaⁿ ê sı̂, hù-chhiú iā tı̄ hit lāi-bı̄n pang-chān. Kat-la-tí tı̄ lâu-téng ēng i ê kim-kim ê ba̍k-chiu thau-khoàⁿ, khoàⁿ-kı̀ⁿ chit ê kong-kéng, lún put-chū, chiū tùi lâu-téng cháu lo̍h-lâi, chē tı̄ mn̂g-goā sng-seh ê toē, thiaⁿ thang-á-lāi ê siaⁿ, put-chí toā, siūⁿ hit nn̄g ê ku-koài ê i-seng tiāⁿ-tio̍h chiong goá ê lāu-pē hāi-sí liáu, chiū khàu kàu bô siaⁿ; āu-lâi koh choán-siūⁿ goá ê lāu-bú iā tı̄ hit lāi, Hêng-sū iā tı̄ hit lāi, in tek-khak oē chiàu-kò͘ goá ê lāu-pē, koh siūⁿ goá ê lāu-bú ê bı̄n m̄ chai piàn-choè cháiⁿ-iūⁿ lah. Tú-tú teh siūⁿ ê sı̂ hut-jiân-kan chai ka-kı̄ ê sin-khu hui-siông ê koâⁿ-léng, koh chai sin-thé cha̍p-hun ê ià-siān, chiū ka-kı̄ kóng goá khah hó tio̍h khùn; tú-tú teh khùn ê sı̂, chai ū chı̍t lâng chiong chhiú hoāⁿ tı̄ i ê keng-thâu téng, un-jiû ê siaⁿ kóng, “Gín-ná kín khí-lâi, kín khí-lâi, lí tı̄-chia boē-oē khùn, kiaⁿ-liáu oē tàng-sí.”
Kat-la-tí bān-bān kia̍h-thâu beh thí ba̍k-chiu khoàⁿ, kan-khó͘ thí boē khui, kàu thí-khui soè-jı̄ chı̍t ē khoàⁿ, goân-lâi sı̄ Hek-tek sió-chiá, sim-siūⁿ chit ê sū ia̍h bô kı̂-koài, in-ūi siông-siông sı̄ bāng-kı̀ⁿ Hek-tek, chit sı̂ siūⁿ iā tı̄ bāng-tiong. Hek-tek sió-chiá iû-goân liân-liân kiò Kat-la-tí bô soah, kóng, “Lí tek-khak tio̍h koáⁿ-kín khí-lâi.” Kat-la-tí koh thí-khui ba̍k, chı̍t ē khoàⁿ sı̄ chin ê, pèng m̄-sı̄ bāng-kı̀ⁿ, chí-ū khoàⁿ siàu-liân khó-ài ê sió-chiá, ēng chhiú iô i chhíⁿ, bián-kióng i khí-lâi. Kat-la-tí chiām-chiām cheng-sı̂n, ēng siang-chhiú jê ba̍k-chiu, ka-kı̄ chı̄n kiàn-siàu kóng, “Goá cháiⁿ-iūⁿ khùn-khı̀ nı̍h ?”
Hek-tek chhiò kóng, “Lí chin ià-siān, lí ê chhùi-tûn í-keng chhin-chhiūⁿ seh ê pe̍h, chit tia̍p lí kui sin-khu oá tı̄ goá, tām-po̍h ūn-tōng, hō͘ sin-thé khah sio, jiân-āu goá chiah chhoā lí kàu ke-lāi.”
Kat-la-tí kóng, “M̄, m̄, m̄, i-seng m̄ ún goá jı̍p-khı̀.” Hek-tek sim-lāi put-chí kı̂-koài kóng, “Án-ni lán m̄-thang jı̍p-khı̀, chiū tı̄ chia kiâⁿ-kiâⁿ lah.” Koh mn̄g kóng, “Sı̄ cháiⁿ-iūⁿ m̄-thang jı̍p-khı̀ ?”
Ìn kóng, “I-seng kóng m̄-thang, goá ê lāu-pē sı̄ koah chèng, chit sı̂ tı̄ hit lāi teh tāng-chhiú, lí siūⁿ goá ê lāu-pē í-keng sí mah ?”
Hek-tek thiaⁿ-kı̀ⁿ kóng, chiū àⁿ hı̄-khang soè-jı̄ thiaⁿ, lóng bô lâng teh choè siaⁿ, chiū cháu kàu thang-á chêng thau-khoàⁿ. Kat-la-tí kóng, “Hek-tek sió-chiá, hit lāi khoàⁿ bô kı̀ⁿ, goá ê lāu-bú í-keng ēng iù-choá kô͘ ba̍t lah, thang khı̀ lâm-sı̀ phoà-thang-á hit ūi khoàⁿ.” Hek-tek kín-kín cháu-khı̀, koh tùi Kat-la-tí kóng, “Lí iā thang lâi saⁿ-kap khoàⁿ.” Nn̄g lâng chiū kàu phoà thang-á kháu, Hek-tek kiò Kat-la-tí tāi-seng khoàⁿ, Kat-la-tí khoàⁿ chı̍t tia̍p-á-kú, Hek-tek mn̄g kóng, “Lí khoàⁿ sím-mı̍h mah ?”
Kat-la-tí kóng, “Sió-chiá, goá ê lāu-pē khùn khı̀ lóng bô tín-tāng, thâu í-keng ēng pò͘ pau teh, kı̂-û ê lâng ba̍k-chiu lóng teh khoàⁿ i, goá beh jı̍p-khı̀ khoàⁿ-khoàⁿ, lí beh jı̍p mah ?”
Hek-tek kóng, “Chit sı̂ goá m̄-thang jı̍p-khı̀, goá beh tò-khı̀ lah, chài-hoē.” Kóng soah chiū khı̀.
Tē 6 chiuⁿ
Lāu-pē Chhíⁿ
Kat-la-tí cháu jı̍p pâng-lāi, khoàⁿ-kı̀ⁿ pâng-tiong lóng bô siaⁿ-seh liân hit ê lāu i-seng ho͘-khip, iā thiaⁿ oē kı̀ⁿ, Kat-la-tí chiū bong i ê lāu-bú ê chhiú chhin-chhiūⁿ sng ê léng, khoàⁿ-kı̀ⁿ i ê bı̄n khiok sı̄ hoat âng, kè bô loā-kú khoàⁿ-kı̀ⁿ pı̄ⁿ lâng lio̍h-lio̍h á tín-tāng. Phok i-seng chiū chù ba̍k khoàⁿ i, kı̂-û ê lâng iā put-chí kı̂-koài, koh thêng chı̍t tia̍p-á-kú, i ê lāu-pē koh kia̍h i ê chhiú khí-lâi bong ka-kı̄ ê thâu-hia̍h, chiām-chiām-thí-khui ba̍k-chiu chhin-chhiūⁿ kiaⁿ ê khoán-sit, kóng, “Hit ê chháu-chhio̍h tio̍h khah koâiⁿ lah, taⁿ tio̍h thiⁿ chhiah-thô͘, chúi lâu chin kín lóng bô sı̂ thang....” I ê lāu-bú ǹg chêng khan i ê chhiú khoàⁿ i mn̄g kóng,“Sı̄ kā goá kóng á m̄-sı̄.”
Pı̄ⁿ-lâng soè-á siaⁿ kóng, “Sı̄ lí mah ? goá khùn-khı̀, chit sı̂ thâu ū tām-po̍h thiàⁿ, soè Hêng-sū tı̄ tah lo̍h ?”
Hêng-sū hoaⁿ-hí chiū toā siaⁿ kiò kóng, “A-tia, goá tı̄ chit lāi.”
I-seng khoàⁿ-kı̀ⁿ in chit iūⁿ koáⁿ-kín poah in thè-khui, Pek chím kóng, “Kám-siā Siōng-tè, i chit sı̂ oē jı̄n-tit goá lah, Kat-la-tí kín lâi khoàⁿ lí ê lāu-pē.” Phok i-seng chit sı̂ chı̄n la̍t kiò in m̄-thang choè siaⁿ, bô lō͘-ēng, bián-kióng in lı̄ khah hn̄g iā boē-oē kiâⁿ.
Hêng-sū kap i ê lāu-bú liân-khàu toà-chhiò, bong hun-bê tú-á chhíⁿ ê pı̄ⁿ lâng, Kat-la-tí sui-jiân bô choè siaⁿ, khoàⁿ i chin khoài-lo̍k, i ê ba̍k-chiu iā sı̄ hoat kim, i ê lāu-pē koh soè-á siaⁿ kóng, “Sió pó-poè teh khùn mah ?” Sió pó-poè sı̄ in cha̍p-nı̂ chêng kiò Kat-la-tí ê oē; tāi-seng kiò soè Hêng-sū iā sı̄ in cha̍p nı̂ chêng kiò Hêng-sū ê oē. I khùn liáu cha̍p nı̂ m̄ chai soè-hàn gín-ná í-keng toā-hàn lah, tùi án-ni i ê bó͘ kí Kat-la-tí kóng, “Chit ê chiū-sı̄.” Koh tùi i-seng kóng “Sian-siⁿ ah, lí kiù goán chiah-ê, i cha̍p nı̂ ê tiong-kan chı̍t hāng sū to m̄ chai, kám-siā lí ê un i-hó i hiān-chāi chai sè-kan ê sū, sı̍t-chāi kám-siā lí bô soah.”Koh tùi Hêng-sū, Kat-la-tí kóng, “Lí choè sím-mı̍h, bô khah kín kám-siā i-seng nı̍h ?” Phok i-seng bô choè siaⁿ, ǹg thiⁿ chı̍t ē kí, in lóng bêng-pe̍k i ê ı̀-sù, chı̍t ê chı̍t ê kūi-lo̍h, Phok i-seng thâu-khak àⁿ-lo̍h. Pek chím kı̂-tó ê sı̂ iáu-kú khan i ê tiōng-hu ê chhiú, hù i-seng iā khiā tı̄ hé-lô͘ piⁿ, Hêng-sū ê lāu-pē mn̄g kóng, “Kin-á-jı̍t sı̄ lé-pài jı̍t mah ? Lín chiah-ê teh kı̂-tó.” Pek chím àⁿ thâu boē-oē ı̀n i sı̄ ūi-tio̍h sím-mı̍h iân-kò͘, in-ūi hit jı̍t pèng m̄-sı̄ Chú-jı̍t. I ê tiōng-hu koh bān-bān kóng, “Lán thang lâi tha̍k chı̍t chiuⁿ ê Sèng-keng,” koh kóng, “Goá boē hiáu-tit, goá cháiⁿ-iūⁿ oē chiah loán-jio̍k, nā bô, chhiáⁿ hit ê bo̍k-su tha̍k hō͘ goá thiaⁿ.” I chhò-gō͘ jı̄n i-seng choè bo̍k-su, só͘-í kóng chit hō oē. Kat-la-tí thiaⁿ-kı̀ⁿ kóng, tùi kè-á téng chiong toā pún ê Sèng-chheh the̍h lâi. Phok i-seng chheng choè bo̍k-su put-chí bô hoaⁿ-hí, chiū chiong Sèng-chheh the̍h hō͘ hù-chhiú ê kiò i tha̍k. Tha̍k bêng-pe̍k Phok i-seng kā in kóng, “Lín tio̍h cha̍p-hun ê an-chēng, m̄-thang kiáu-jiáu i, bô án-ni i iû-goân oē sí.”
Pek chím iô-chhiú kā i kóng, “Pı̄ⁿ lâng í-keng teh khùn, m̄-thang choè siaⁿ.”
I-seng koh soè-á siaⁿ kā Pek chím kóng, “Hoân sū choan-bū tio̍h an-chēng, lí oē hiáu-tit mah? Chit ê chin sı̄ chı̍t hāng ê toā sū, kin-á-jı̍t m̄-thang hō͘ i chia̍h chı̍t tiám-á ê chia̍h mı̍h, bı̂n-á-jı̍t goá beh koh-lâi khoàⁿ i.” Kóng soah chiū kín-kín kap hù-chhiú tò-khı̀; in chin thé-biān ê bé-chhia tı̄ goā-bı̄n peng-khoe téng, kiâⁿ-lâi kiâⁿ-khı̀, í-keng thèng-hāu chin kú, Hêng-sū chiū sàng i-seng chhut-khı̀ kiong-kèng kóng, “I-seng ah, goān Siōng-tè chiok-hok lí, goá lóng boē pò-tap lí chit hō ê toā un.”
I-seng kóng, “Pı̄ⁿ lâng chhíⁿ ê sı̂ chí-ū lí tio̍h chiàu lí só͘ oē hiáu-tit ê pang-chān i, chiū-sı̄ pò-tap goá lah, siat-sú in bô an-chēng, kiáu-jiáu ê siaⁿ-im, á-sı̄ khàu ê siaⁿ hō͘ i thiaⁿ-kı̀ⁿ, sui-jiân i-hó liáu lah, iā oē sí, hô-hòng i chit sı̂ tú-tú cha̍p-hun ê loán-jio̍k ê sı̂, nā-sı̄ lí ài lāu-pē hó, choan-bū tek-khak hō͘ i an-chēng sı̄ iàu-kín.” Kóng soah chiū chē bé-chhia, Hêng-sū khiā teh khoàⁿ, i ê chhia khı̀ liáu chiah jı̍p-khı̀.
Tē 7 chiuⁿ
Sòng-hiong ê Khoà-lū
Kè jı̍t Phok i-seng kàu Pek chím ê ke, chit ē jı̍p chhù, chiū khoàⁿ-kı̀ⁿ choân ke ê lâng lóng khoài-lo̍k ê khoán-sit, ka-kı̄ sim-lāi iā chin an-ùi. Pek chím chē tı̄ pı̄ⁿ lâng ê sin-piⁿ teh chhiah be̍h, i ê tiōng-hu an-ún khùn tı̄ bı̂n-chhn̂g nı̍h, Kat-la-tí tı̄ chhù-kak ê toh-téng teh choè mı̄-pau. I-seng jı̍p-khı̀ tāi-lio̍k mn̄g kúi-kù pı̄ⁿ lâng ê chêng-hêng, in ı̀n ê sı̂ hián-chhut khoài-lo̍k ê iūⁿ. I-seng khı̀ bong pı̄ⁿ lâng ê me̍h, chiū tùi Pek chím kóng, “Iáu-kú cha̍p-hun ê loán-jio̍k, hiān-sı̂ thang hō͘ i chia̍h tām-po̍h, to̍k-to̍k m̄-thang siuⁿ choē, iàu-kín i tio̍h chia̍h pó͘ ê mı̍h.”
Pek chím hoaⁿ-hoaⁿ hí-hí kóng, “Goán ū o͘ ê mı̄-pau, iáu ū ám-bê, sı̄ i pêng-siông chia̍h ê.”
I-seng iu-bı̄n kóng, “Bô ū pí chit ê khah hó mah? Hit ê mı̍h boē ēng-tit, pı̄ⁿ lâng tio̍h chia̍h gû-bah chiap, pe̍h mı̄-pau, hang ê piáⁿ koe-nn̄g, gû-ni, koe thng, phû-tô chiap, chiah-ê mı̍h.” Teh kóng ê sı̂ khoàⁿ-kı̀ⁿ pı̄ⁿ lâng chhin-chhiūⁿ léng ê khoán-sit, sûi-sı̂ kí kóng “I kah ê phē, iàu-kín tio̍h khin iā sio ê chiah hó.” Kóng soah koh mn̄g Hêng-sū tı̄ tah-lo̍h, Pek chím ı̀n kóng, “I chhut-khı̀ chhē kang thang choè, sian-siⁿ chhiáⁿ lí chē.”
I-seng kín-kín kóng, “M̄-bián chē, m̄-bián chē.” Pı̄ⁿ lâng khoàⁿ liáu Pek chím chit kù iáu-bē kóng chhut, i chiū khı̀. Pek chím chiū koáⁿ-kín kàu i ê tiōng-hu ê bı̂n-chhn̂g-chêng khoàⁿ i ê tiōng-hu, àm-àm lâu ba̍k-sái. Chit sı̂ Hêng-sū tò-lâi khoàⁿ i ê lāu-bú ê khoán-sit, chiū kiaⁿ kóng, “A-bú cháiⁿ-iūⁿ ah ? Lāu-pē ê pı̄ⁿ ū khah siong-tiōng mah ?”
I ê lāu-bú chiū oa̍t-thâu lâi tùi i ê kiáⁿ kóng, “Sı̄ ah, lí ê lāu-pē teh-beh gō-sí lah.”
Hêng-sū thiaⁿ-kı̀ⁿ kóng, bı̄n sûi-sı̂ piàn-sek kóng, “Sı̄ sím-mı̍h ı̀-sù nı̍h? I nā iau chit sı̂ koáⁿ-kín thang hō͘ i chia̍h.” Chiū kiò Kat-la-tí kóng, “Lí thang the̍h tām-po̍h bê lâi hō͘ lāu-pē chia̍h.”
I ê lāu-bú kín hoah kóng, “M̄-thang, m̄-thang, nā hō͘ i chia̍h bê, chiū oē sí lah, lán chit hō ê khó͘ lim chia̍h, i sı̄ boē-oē chia̍h ê. Hêng-sū ah, lí ê lāu-pē beh gō-sí lah, i-seng kóng i it-tēng tio̍h chia̍h bah, koe-nn̄g, koe thng, gû-ni,pe̍h mı̄-pau, phû-tô chiap, chit téng-hō ê pó͘-mı̍h chiah hó, ai-ah, chit sı̂ ke-lāi bô poàⁿ ı̂ⁿ, beh cháiⁿ-iūⁿ nı̍h ?”
Hêng-sū kóng, “A-bú, i-seng kóng i tek-khak tio̍h chia̍h chit hō ê mı̍h mah ?”
I ê lāu-bú kóng, “Tio̍h.”
Hêng-sū kóng, “A-bú, hiān-chāi lí m̄-thang tio̍h-kip, iā m̄-thang khàu, i beh chia̍h chiah-ê mı̍h, goá kin-á-jı̍t kàu àm thang chı̄n goá ê le̍k-liōng thàn tò-lâi boé hō͘ i chia̍h, tāi-seng chiong goá hit tiuⁿ bı̂n-chhn̂g ê phē hō͘ i kah, goá ē-hng thang khùn tı̄ chháu-lāi.”
I ê lāu-bú kóng, “Hêng-sū ah, hit niá phē thài tāng, i-seng kóng it-tēng tio̍h ēng khin iā sio ê hō͘ i kah chiah hó.” Koh thó͘-khùi kóng, “Ai-ah, Hêng-sū ah, lí ê lāu-pē teh-beh tàng-sí lah, in-ūi hiān-chāi lán ê chhâ iā bô lah.”
Hêng-sū kóng, “Bô iàu-kín, goá chiong jû-chhiū ê ta ki chhò lo̍h-lâi sio, thang hō͘ chit ê pâng iā sio, goá chit sı̂ beh chhut-khı̀, iáu-bē àm goá beh chiong chiah-ê mı̍h boé tò-lâi, nā-sı̄ pún só͘-chāi bô tāi-chı̀ thang choè, goá chiū beh kàu kiaⁿ-siâⁿ khı̀ chhē kang, a-bú, lí m̄-bián kiaⁿ, gûi-hiám í-keng kè-khı̀ lah, lí khoàⁿ lāu-pē í-keng khah cheng-sı̂n lah, lán thang pàng sim choè chiong-lâi ê sū.
Pek chím koh thó͘-khùi kóng, “Bô chhò, bô chhò,” chiū chiong ba̍k-sái kín-kín chhit ta.
Hêng-sū kóng, “A-bú, lí m̄-thang kip, lí khoàⁿ lāu-pē khùn teh, khah hó lah, chhı̀-siūⁿ Siōng-tè í-keng chiong i sàng hoê-lâi, kiám khéng chit sı̂ hō͘ i gō-sí mah ? I só͘ tio̍h chia̍h ê mı̍h goá kim-mı̂ oē boé lâi, goá ê saⁿ tē-á lāi sui-jiân khang-khang, nā-sı̄ chhin-chhiūⁿ moá-moá chı̂ⁿ chı̍t iūⁿ, lí chhian-bān m̄-thang iu-būn.” Kóng soah chiū chhut-khı̀.
Pek chím ke-lāi chhin-chhiūⁿ chit iūⁿ ê sòng-hiong, tùi chá í-lâi iáu-bē ū tú-tio̍h, chit sı̂ ke tiong ê kéng-hóng, tı̄ chhù-piⁿ ê lâng khoàⁿ-liáu, iā sı̄ chin boē jím-tit, chhâ iā bô lah, bí-niû chí-ū chhun Kat-la-tí só͘ teh choè ê mı̄-pau nā-tiāⁿ, chí kúi jı̍t, in ke-lāi chiū khiām-séng teh chia̍h. Pek chím pún-sin siūⁿ, mı̄-pau bē chia̍h liáu ê í-chêng i kap i ê gín-ná oē thàn kúi ê chı̂ⁿ thang kè jı̍t, koh khoàⁿ i ê tiōng-hu khah hó, sim-lāi chin khoài-lo̍k, só͘-í iā bô ū hō͘ Hêng-sū chai ke-lāi bô chı̂ⁿ, bô phah-sǹg i-seng kiò i ê tiōng-hu tio̍h chia̍h hó ê mı̍h, ke-lāi iā lóng bô chı̍t ı̂ⁿ, só͘-í sim-lāi cha̍p-hun tio̍h-kip.
Hêng-sū chá-chá chhut-khı̀, kiâⁿ chı̍t poàⁿ jı̍t bô ū chhē-tio̍h chı̍t hāng sū, sim-lāi í-keng sit-bāng, tò-lâi ke-nı̍h, koh khoàⁿ-kı̀ⁿ, ke-tiong chit iūⁿ ê kong-kéng, sim-lāi koh khah ke-thiⁿ chhám-chhoeh, sui-jiân án-ni, i iáu sı̄ chin ióng-kám, ài chı̄n ka-kı̄ ê le̍k-liōng, pó͘-chō͘ i ê lāu-pē só͘ khiàm-ēng ê. Chit sı̂ koáⁿ-kín tùi kiaⁿ-siâⁿ, khı̀ chhē sū, chı̍t lō͘ kiâⁿ chı̍t lō͘ siūⁿ, i-seng nā chai goán ke-lāi ê kan-khó͘ i bô tek khak kiò goá chiong chit ê hó chia̍h mı̍h hō͘ lāu-pē chia̍h, āu-lâi koh siūⁿ goá m̄ eng-kai siūⁿ án-ni, hiān-sı̂ lāu-pē chit hō ê loán-jio̍k, sı̄ eng-kai tio̍h chia̍h ê, goá eng-kai chı̄n goá ê le̍k-liōng choè kang lâi thàn chı̂ⁿ thang boé, koh siūⁿ goá kàu siâⁿ-nı̍h chhē sū, chêng pái Pí-tek kā goá kóng nā-sı̄ goá khiàm-ēng sím-mı̍h thang lâi kā i kóng, i oē pang-chān, m̄ ta̍t-tio̍h lâi khı̀ chhē i. Ai-ah, nā Pí-tek ê lāu-pē tı̄-teh chiū hó, i tek-khak ū kang thang hō͘ goá choè, nā-sı̄ chit sı̂ hē-thiⁿ chiū hó lah, iā ū sū thang choè. Hêng-sū siūⁿ-tio̍h, kè hô koáⁿ-kín kiâⁿ khı̀ Pí-tek ê ke, koh iu-būn sim siūⁿ kóng, lāu-pē chit sı̂ teh thèng-hāu mı̍h thang chia̍h, goá beh chái-iūⁿ kin-á-jı̍t oē thàn chı̂ⁿ thang liâm-piⁿ boé hō͘ i chia̍h mı̍h, nā-sı̄ goá í-keng ún lāu-bú lah, hiān-sı̂ bô hoat lah, chí hó tāi-seng khı̀ Pí-tek ê ke thó tām-po̍h chia̍h mı̍h, Pí-tek iā lia̍h-choè bô kı̂-koài; kin-á-jı̍t thang chiām-sı̂ hō͘ lāu-pē chia̍h, goá koh-chài kàu siâⁿ-lāi thàn chı̂ⁿ, liāu-lí bı̂n-á-jı̍t ê lim chia̍h. Koh siūⁿ chit ê sı̄ thó-pn̄g ê sū chêng, chı̄n oh choè. Chit sı̂ sim-lāi kan-khó͘, bı̄n hián-chhut kiàn-siàu ê iūⁿ ka-kı̄ siūⁿ sı̀ⁿ So͘ ê ke, tùi chá í-lâi bô ū chı̍t lâng choè khit-chia̍h, thang kóng goá choè thâu chı̍t ê mah? Thang kóng goá ê lāu-pē sı̄ tùi sí koh oa̍h khí-lâi, iáu beh kiû lâng choè hó sū mah ? Hêng-sū siūⁿ kàu chia boē kı̀m-tit khui siaⁿ toā khàu kóng, “Ai-ah, goá ê lāu-pē sı̄ chin chhang-miâ koh chin lêng-kàn ê lâng, i koat-toàn m̄ khéng tùi lâng kiû-thó, iā koat-toàn m̄-khéng hō͘ goá choè khit-chia̍h.”
Hêng-sū hut-jiân siūⁿ lâi kóng, “Goá hiān-chāi cháiⁿ-iūⁿ m̄ chiong hit ê pió-á the̍h khı̀ tǹg ah, nā the̍h kàu siâⁿ-lāi, chiū thang oāⁿ chı̂ⁿ lâi, iā bián-tit choè chit ê hā-chiān ê kang, tùi lâng thó-chia̍h, āu-lâi goá koh-chài choè kang thàn chı̂ⁿ, chiong pió-á sio̍k-hoê lâi, kiám-m̄-sı̄ hó mah? Ai-ah, lāu-pē hiān-chāi í-keng oē-hiáu-tit, goá thang kap lāu-pē siong-liông.” Tùi án-ni khoài-lo̍k thiàu-khí-lâi, koh kóng nā-sı̄ lāu-pē kā goá kóng chit ê pió-á bô sím-mı̍h koan-hē, chiū chiong i boē iā thang, siūⁿ kàu chit ê liām-thâu chiū tńg-sin tùi peng-khoe tò-lâi, ná-chhin-chhiūⁿ pe chı̍t iūⁿ, kàu in ê ke. Kúi hun cheng ê kang-hu, chiū kàu ke-lāi, khoàⁿ-kı̀ⁿ i ê lāu-bú khiā tı̄ mn̂g-kháu, moá bı̄n chhiò-iông, kiò Hêng-sū kóng, “Hek-tek sió-chiá lâi lah, toà chı̍t nâ bah kap koe, mı̄-pau, gû-ni, koe-nn̄g chiah-ê lâi, i-seng iā tùi siâⁿ-lāi chhe lâng sàng chı̍t tiuⁿ hó ê bı̂n-chhn̂g lâi, koh chin khin sio ê phē jio̍k-á-lâi, ai-ah, lí ê lāu-pē thang ǹg-bāng hó lah, goān Siōng-tè chiok-hok in chiah-ê.” Hêng-sū iā kóng, “Goān Siōng-tè chiok-hok in.”
