Tē 12 chiuⁿ
Pí-sài Liu-peng
Kong-im chhin-chhiūⁿ chı̀ⁿ, put-kak í-keng kàu cha̍p-jı̄ ge̍h 30 hō lah. Hit sı̂ chin hó thiⁿ-sı̂, sui-jiân jı̍t-kng koâiⁿ-koâiⁿ teh chiò, khoe-chúi kian peng kàu chin kāu, lóng bô hō͘ jı̍t hoà-khı̀. Chit jı̍t chiū-sı̄ koāiⁿ koaⁿ ê siⁿ-jı̍t, te̍k-piat siat pí-sài liu-peng ê thit-thô, pí-sài ê hoē-tiûⁿ chiū-sı̄ siat tı̄ Hô-lân ê Kiaⁿ-siâⁿ goā, hit jı̍t ū chin choē ê lâm lú ló-iù kàu chit só͘-chāi, lâi khoàⁿ sài-hoē, ū chı̂ⁿ ê lâng sin chhēng hô͘-lı̂ phê ê goā thò, thâu tı̀ hong-bō, chhiú ū phòng-se lông, goā-bı̄n ke chhiú-lông. Bō téng chhng chin choē kim soān pó-chio̍h koh ū n̂g kim chhiú-chí chhiú-khoân chiah-ê mı̍h, tē-it hó-gia̍h ê lâng, i choân-sin ê chong sek phín, iok ta̍t nn̄g bān goā kho͘, i-ho̍k choân sı̄ siù hoe ê, só͘ toà ê lô͘-po̍k, lóng the̍h hé-thang thán-á, tè tı̄ āu-bı̄n, m̄-nā hù-kùi ê lâng khoàⁿ, chiū tiong hā téng ê lâng iā lóng lâi khoàⁿ, ū ê tùi kiaⁿ-siâⁿ lâi ê, ū ê tùi ta̍k hiuⁿ-siā, ta̍k ê koe-chhı̄, koh ū tùi hn̄g-hn̄g lâi ê, chhēng tiû chhēng pò͘ ê, toà kim toà gûn ê, sı̄m-chı̀ ū toà tâng le̍k kim ê, ta̍k téng-hō ê i-ho̍k put-it.
Chit jı̍t ta̍k keng o̍h-tn̂g lóng thêng-khò, só͘ ū ê kàu-oân chit oân lóng chhoā ha̍k-seng, ta̍k ê chhēng hāu i, lâi hù hoē, koh boē ko, boē thn̂g, boē ké-chí, ta̍k hō ê chia̍h mı̍h ê sió seng-lí lâng, lóng lâi chit ê lāu-jia̍t ê hoē-tiûⁿ, jı̂n-san jı̂n-hái, boē-oē sǹg-tit, hı̄-á chí-ū thiaⁿ-kı̀ⁿ lâng siaⁿ hoā-hoā háu, kiò boé, kiò boē ê siaⁿ, toā lâng hoaⁿ-hí chhiò ê siaⁿ, gín-ná khàu ê siaⁿ, kiò kiáⁿ cha-bó͘ kiáⁿ ê siaⁿ, kiáu-chhá boē-oē kham-tit, tı̄ peng khoe sı̀-ûi tah chháu-pı̂ⁿ, pı̂ⁿ ē lâng lóng chē moá, chhin-chhiūⁿ chı̍t tiâu toā liān, ûi chit ê peng khoe, bô làng-tn̄g ê só͘-chāi. Peng khoe khoân lāi ê sai piⁿ ū chı̍t tè toē lio̍h-á khah koâiⁿ, tı̄ téng-bı̄n tha̍h chı̍t chō koâiⁿ tâi, téng-bı̄n ê chong sek kap it-chhè ê pho͘-siat chin súi. Koāiⁿ koaⁿ kap in chı̍t ke lóng chē tı̄ téng-bı̄n, tâi ê tùi-bı̄n iā tah chı̍t chō chháu-pı̂ⁿ pho͘-siat iā chin kó khoàⁿ, lāi-bı̄n chiū-sı̄ kun-ga̍k tūi só͘ chē, chok-ga̍k ê siaⁿ iông-iông, tiān ke̍k hó, lı̄ kun-ga̍k-tūi chha-put-to gō͘ tn̄g koh tah chı̍t chō soè têng, lāi-tiong khiâ chı̍t ê lâng, chhiú-kia̍h lâm kı̂, tı̄ lāi-bı̄n su-lēng.
Peng khoe lāi ê chiu-ûi, chhah chin choē ê tek koaⁿ, koaⁿ-thâu kok ū soè kı̂ chı̍t bı̄n, ēng soh khan tı̄ koaⁿ téng, chiâⁿ chı̍t toā khoân, khoân ê ı̂ⁿ-kēng iok-lio̍k ū chı̍t Eng-lí tn̂g, su-lēng tâi chêng iū-piⁿ ū nn̄g ki pe̍h thiāu, téng-bı̄n ēng chêng-ki chat chiâⁿ chhái-sek ê mn̂g, miâ choè Koat-sèng mn̂g. Teh-beh sài peng chiah-ê gín-ná, lâm lú kok jı̄-cha̍p lâng í-keng pı̄-pān hó lah, tı̄ têng ê āu-bı̄n lóng táⁿ-pān teh chin thé-biān, tı̄ hit lāi ū ê teh thiàu, ū ê bú, ū ê kóng oē, ū ê chhiò, cheng-sı̂n oa̍h-tāng, chı̍t-ê chı̍t-ê hián-chhut chin khoài-lo̍k ê iūⁿ, bô ū chı̍t ê bı̄n tài chhiû-iông ê iūⁿ, khiā teh bô tín-tāng. Kàu pí-sài ê sı̂ im-ga̍k-tūi chò͘-khí te̍k-piat ê im-ga̍k siaⁿ, piáu-bêng khui hoē ê ı̀-sù, im-ga̍k thêng, lâng siaⁿ hut-jiân chēng, su-lēng koaⁿ toā siaⁿ soan-pò͘ pí-sài ê chong-chí kap kui-lē, koâiⁿ siaⁿ kiò kóng, “Kin-á-jı̍t sı̄ koāiⁿ koaⁿ ê siⁿ-jı̍t, só͘-í kú-hêng chit ê hoē, kap peh-sı̀ⁿ tâng hoaⁿ-hí, lâm lú ta̍k ê gín-ná hun choè nn̄g pan, lâm ê choè chı̍t pan, lú ê choè chı̍t pan, kok pan sài peng saⁿ pái, tùi su-lēng tâi-chêng liu khı̀, chiàu ı̂ⁿ-khoân pháu chı̍t lı̀n, kàu Koat-sèng mn̂g chí, kiōng chı̍t Eng-lí, nā ū chı̍t ê gín-ná oē nn̄g pái tāi-seng jı̍p Koat-sèng mn̂g, chiū thang tit-tio̍h siúⁿ. Soan-pò͘ í-keng bêng-pe̍k, chiū kiò cha-bó͘ gín-ná pâi-lia̍t hó, chhiú kia̍h lēng kı̂, kiò kóng, “Chı̍t, nn̄g, saⁿ.”
Saⁿ iáu-bē hoah oân, lāi-bı̄n ū chı̍t ê cha-bó͘ gín-ná í-keng tāi-seng liu joā hn̄g, su-lēng chiū koáⁿ-kín hoah kóng, “Oat-lâi, tio̍h thèng-hāu goá hoah-oân, tāi-ke chı̍t choê khui-pō͘, thái-thó oē chı̍t lâng tāi-seng liu nı̍h ?” Tùi án-ni koh têng hoah kóng, “Chı̍t, nn̄g, saⁿ.” Chiong kı̂ ǹg-ē chı̍t-ē ia̍t,chit sı̂ ta̍k ê gín-ná chı̍t choê khai-pō͘ sài-liu, só͘ ū khoàⁿ ê lâng lóng chēng-chēng bô siaⁿ choân-hù cheng-sı̂n, lóng chù-ı̀ tı̄ ta̍k ê gín-ná. Khí-thâu gō͘ ê gín-ná tı̄ thâu-chêng pâi, chí gō͘ ê gín-ná, āu-bı̄n ê chiū-sı̄ chhēng âng ê, chhēng âng ê āu-bı̄n sı̄ chhēng lâm, chhēng lâm ê āu-bı̄n sı̄ chı̍t ê chhēng n̂g ê, kı̂-û chı̍t tı̄n ê gín-ná tè tı̄ āu-bı̄n, khoàⁿ boē chheng-chhó sı̄ sím-mı̍h lâng, liu liáu chı̍t poàⁿ ê lō͘ chí-ū khoàⁿ chhēng âng ê gín-ná chhin-chhiūⁿ chı̀ⁿ chı̍t iūⁿ, tı̍t hiòng-chêng liu khı̀, bô kàu chı̍t tia̍p-á kú í-keng choè thâu-chêng, beh kàu Koat-sèng mn̂g chí-ū khoàⁿ-kı̀ⁿ chhēng âng kap chhēng lâm ê nn̄g lâng pı̂ⁿ-pı̂ⁿ. Chit sı̂ í-keng khoàⁿ-kı̀ⁿ chheng-chhó, chhēng âng ê sı̄ Kat-la-tí, chhēng lâm ê sı̄ koāiⁿ-koaⁿ ê cha-bó͘ kiáⁿ Hek-tek sió-chiá. Chèng lâng khoàⁿ-liáu chin chhù-bı̄, ū ê hoah kóng, “Kat-la-tí khah kín ah,” ū ê hoah kóng, “Hek-tek khah kín ah.” Hoah ê siaⁿ, chhin-chhiūⁿ lûi, iā boē chai sı̄ sím-mı̍h lâng hoah ê, to̍k-to̍k Kat-la-tí thiaⁿ-kı̀ⁿ i ê lāu-pē ê siaⁿ-im hoah kóng tio̍h liu kín. Hek-tek thiaⁿ-kı̀ⁿ i ê lāu-pē tı̄ tâi-téng hoah kóng, “Khah kín, khah kín.”
Beh kàu ê sı̂ hut-jiân khoàⁿ-kı̀ⁿ chhēng âng ê choè thâu tı̍t-tı̍t liu jı̍p Koat-sèng mn̂g, su-lēng-koaⁿ chiong kı̂ chı̍t ē ia̍t, toā siaⁿ pò-kò kóng Kat-la-tí tit-tio̍h iâⁿ. Sı̀-ûi khoàⁿ ê lâng, phah chhiú ê siaⁿ bô soah, cha-bó͘ gín-ná sài liáu, tı̄ piⁿ-á hioh-khùn, Kat-la-tí liu liáu khı̀ chin chhoán, sin-thé iô-tāng, chin choē lâng lóng ûi-lâi kā i khèng-hō. Su-lēng-koaⁿ iô-khí lēng-kı̂, kiò ta-po͘ gín-ná pâi-lia̍t thang sài, kiò kóng, “Chı̍t, nn̄g, saⁿ.” Lēng bē hoah oân gín-ná lóng-chóng choè thâu cháu-khı̀, sui-sı̄ jı̄-cha̍p ê gín-ná, kàu chhin-chhiūⁿ ū 300 ê kha chı̍t iūⁿ, khoàⁿ ê lâng tāi-ke chhiò, su-lēng iáu bē kiò in tò-tńg lâi ta̍k ê gín-ná chai teh ûi-ke̍h kui-lē, ka-kı̄ chhiò, ka-kı̄ tò-tńg-lâi, koh-chài pâi chéng-choê. Su-lēng-koaⁿ hoah liáu ta̍k ê gín-ná saⁿ-chiⁿ choè thâu sài liu, chí-ū khoàⁿ-kı̀ⁿ chı̍t ê pûi ê gín-ná tı̄ thâu-chêng, tē jı̄ chiū-sı̄ Pí-tek, tē saⁿ chiū-sı̄ Hêng-sū, tē sı̀ sı̄ Cha-lı̍p. Hut-jiân khoàⁿ-kı̀ⁿ Hêng-sū pí in teh liu khah kín, chı̍t ba̍k-nih-kú, í-keng liu ǹg chêng khı̀, chiū tāi-seng jı̍p Koat-sèng mn̂g. Su-lēng-koaⁿ toā siaⁿ kiò kóng Hêng-sū tit-tio̍h iâⁿ, chèng lâng iā lóng phah chhiú. Su-lēng-koaⁿ hoan-hù cha-bó͘ gín-ná tē jı̄ pái sài liu. Chit pái Kat-la-tí bô lūn liu kàu sím-mı̍h lâng ê bı̄n-chêng, lâng to hoah kóng, “Kat-la-tí khah khoài liu.” Chèng lâng chı̄n thoè i tio̍h-kip, nā-sı̄ kàu Koat-sèng mn̂g ê sı̂, chiū-sı̄ Hek-tek tāi-seng jı̍p.
Thèng-hāu tē jı̄ pái ta-po͘ gín-ná sài-liu chèng lâng lóng hoah kóng,“Pí-tek, Hêng-sū, lín tio̍h khah khoài liu.” Hek-tek sió-chiá iā kóng, “Pí-tek, Hêng-sū nn̄g lâng, bô lūn tah-lo̍h chı̍t lâng tit-tio̍h iâⁿ to hó, to̍k-to̍k m̄ ài hō͘ Cha-lı̍p tit-tio̍h iâⁿ. Liu kàu poàⁿ lō͘ pún lâi sı̄ Cha-lı̍p tı̄ thâu-chêng, khiok poa̍h-tó tı̄ peng téng, in-ūi án-ni tit-tio̍h kàu Koat-sèng mn̂g, kó-jiân chiàu chèng lâng só͘ ài Cha-lı̍p boē iâⁿ, khiok sı̄ Pí-tek tit-tio̍h iâⁿ, in-ūi Cha-lı̍p pêng-sò͘ choè lâng bô hó, só͘-í chèng lâng lóng m̄-goān i, taⁿ sui-jiân khoàⁿ-kı̀ⁿ poa̍h-tó, iā bô lâng lı̂n-bín i. Su-lēng-koaⁿ koh bēng-lēng cha-bó͘ gín-ná pâi tūi, kú hêng tē saⁿ pái ê pí-sài. Chit sı̂ chèng lâng put-chí chù-ı̀, phah-sǹg chit pái nā-sı̄ iû-goân Kat-la-tí tit-tio̍h iâⁿ, Kat-la-tí chiū oē tit-tio̍h siúⁿ. Nā-sı̄ Hek-tek tit-tio̍h iâⁿ, Hek-tek chiū oē tit-tio̍h siúⁿ; só͘-í chin ūi-tio̍h in nn̄g lâng tio̍h-kip, nā-sı̄ kap in tâng pí-sài ê lâng lóng ài in nn̄g lâng boē-oē tit-tio̍h iâⁿ, siat-sú tē saⁿ lâng tit-tio̍h iâⁿ in iáu ū ǹg-bāng, in-ūi Kat Hek nn̄g lâng í-keng tit-tio̍h iâⁿ chı̍t pái, nā in nn̄g lâng tiong-kan chı̍t ê koh tit-tio̍h iâⁿ, siúⁿ í-keng tit-tio̍h lah, in chiū bô ǹg-bāng. Su-lēng-koaⁿ kia̍h kı̂ hoan-hù kóng, “Chit pái lín chiah-ê tio̍h hó-hó ēng sim sài liu, m̄-thang bô chù-ı̀, hō-lēng chı̍t ē chhut, ta̍k lâng ǹg chêng liu khı̀. Chit pái iā m̄-sı̄ Khái-tē tı̄ thâu-chêng, iā m̄-sı̄ Hek-tek tı̄ thâu-chêng, chí khoàⁿ-kı̀ⁿ Kat-la-tí chhin-chhiūⁿ pe chı̍t iūⁿ, tı̍t hiòng-chêng liu khı̀, bē kàu poàⁿ-lō͘, Kat-la-tí í-keng lı̄-khui in ū kúi-nā tn̄g hn̄g, bô kàu chı̍t khek kú ê kang-hu chiū jı̍p Koat-sèng mn̂g. Chèng lâng iā boē thèng-hāu-tit su-lēng-koaⁿ hoah chı̄-chūi tit-tio̍h iâⁿ, tāi-chiòng lóng phah chhiú toā hoah kóng Kat-la-tí tit-tio̍h gûn peng-oê ê siúⁿ, hoah ê siaⁿ chhin-chhiūⁿ lûi, phah chhiú bô soah, im-ga̍k tūi iā chek sı̂ chò͘ ga̍k hoan-gêng. Kat-la-tí chiū cháu kàu i ê pē-bú ê bı̄n-chêng, i ê pē-bú chin hoaⁿ-hí, khoàⁿ-tio̍h i chhiò bô soah, chèng lâng iā lóng ûi-lâi kā i kóng kiong-hí. Hek-tek iā oá tı̄ Kat-la-tí ê hı̄-á piⁿ hoaⁿ-hí kóng, “Lí chit pái liu teh chin hó, goá chin boē pí-tit lí.” Chit sı̂ sài peng ta̍k ê gín-ná, bô ū chı̍t lâng káⁿ khoàⁿ-khin Kat-la-tí, iā bô chı̍t lâng kóng i sı̄ khioh phoà-pò͘ ê gín-ná, in-ūi chit sı̂ i í-keng choè sài-peng ê thâu, Kat-la-tí iā chin ko-hèng.
Hiān-chāi lâm gín-ná í-keng beh pâi-lia̍t ū-pı̄ tē saⁿ pái ê pí-sài. Pí-tek tām-po̍h bô hoaⁿ-hí ê iūⁿ, khû teh, tı̄ hit-lāi pa̍k peng-oê, Hêng-sū kóng, “Lí ūi-tio̍h sím-mı̍h sū, bô hoaⁿ-hí ê iūⁿ ?”
Pí-tek kóng, “Goá ê peng-oê toà tn̄g khı̀, goá tı̄ chia siat-hoat pa̍k chit ê toà.”
Hêng-sū kóng, “Lí lâi the̍h goá chit tiâu toà khı̀ pa̍k, chit pái tāi iok chí-ū lí thang ǹg-bāng tit-tio̍h siúⁿ, goá ka-kı̄ chai boē-oē tit-tio̍h.”
Pí-tek kóng, “To-siā lí hó pêng-iú, iā thang ū ǹg-bāng.”
Hêng-sū kóng, “Lí kı̀-jiân jı̄n goá choè pêng-iú, chhiáⁿ lí kín-kín chiong goá ê toà the̍h khı̀ pa̍k, chit sı̂ teh-beh hoat hō-lēng.”
Pí-tek it-tēng m̄ khéng, Hêng-sū chài-saⁿ kiû i the̍h khı̀ pa̍k, Pí-tek khiok chêng boē kè, chiah the̍h lâi pa̍k, chı̍t bı̄n pa̍k, chı̍t bı̄n kóng, “Lí chin sı̄ hó ê lâng.” Oē kóng bē liáu ta̍k ê gín-ná kóng, “Khah kín, khah kín, liâm-piⁿ beh pâi-tūi.” Pí-tek liâm-piⁿ khí lâi lia̍t-tūi, su-lēng-koaⁿ hoat bēng-lēng, ta̍k ê gín-ná saⁿ-chiⁿ choè thâu pí-sài. Chèng lâng sim-lāi thoè Pí-tek kap Hêng-sū chin tio̍h-kip hūn boē chiong ka-kı̄ choân-hù cheng-sı̂n kap le̍k-liōng, thang hō͘ Pí-tek kap Hêng-sū ê sin, hō͘ in thang lâi tit-tio̍h iâⁿ. Hêng-sū in-ūi chı̍t kha ê toà hō͘ Pí-tek, peng-oê hō͘ Pí-tek, peng-oê boē-oē cha̍p hun ê tek-la̍t, chit pái kó-jiân sı̄ Pí-tek tit-tio̍h. Chı̍t ē jı̍p Koat-sèng mn̂g, su-lēng-koaⁿ iáu bô pò-kò, im-ga̍k tūi í-keng chò͘ lâi hoan-gêng i, im-ga̍k chò͘ liáu, su-lēng-koaⁿ hoan-hù lâm lú ta̍k ê gín-ná hun choè nn̄g pan, choè nn̄g ê poàⁿ ı̂ⁿ-hêng, khiā tı̄ su-lēng-koaⁿ ê bı̄n-chêng. Kat-la-tí kap Pí-tek khiā tı̄ nn̄g poàⁿ ı̂ⁿ-hêng ê tiong-kan, ta̍k ê choè thâu chhoā pún tūi kiâⁿ kàu koāiⁿ-koaⁿ ê tâi chêng, chò͘ kun-ga̍k ê sı̂, in ǹg téng-bı̄n kiâⁿ chı̍t ê kiok-kiong lé. Ū chı̍t lâng tùi koanN7-koaⁿ hit lāi the̍h nn̄g ê khoeh-á, lāi-bı̄n toé nn̄g siang gûn peng-oê, sàng hō͘ Kat-la-tí kap Pí-tek. Hit sı̂ nn̄g lâng ǹg koāiⁿ-koaⁿ kiâⁿ chı̍t ê kiok-kiong lé siā siúⁿ. Hoāiⁿ-koaⁿ khiā khí lâi hoê chı̍t ê lé, hut-jiân koh ū chı̍t lâng tùi koāiⁿ-koaⁿ ê hu-jı̂n bı̄n-chêng the̍h sı̀-nâ ê chhiⁿ hoe, pun hō͘ Kat-la-tí Hek-tek kap Pí-tek, Hêng-sū sı̀ lâng, sı̀ lâng iā ǹg hu-jı̂n kiâⁿ chı̍t ê kiok-kiong lé siā siúⁿ hu-jı̂n iā khiā khí hoê chı̍t ê lé, im-ga̍k tūi, chò͘-ga̍k hoan-sàng, ta̍k ê gín-ná soàⁿ tūi. Kat-la-tí the̍h-tio̍h gûn peng oê kap chhiⁿ hoe, ko-hèng tı̄ lâng ê bı̄n-chêng chhē i ê lāu-pē lāu-bú.
Tē 13 chiuⁿ
Hoaⁿ-hí khoài-lo̍k
Hit jı̍t àm, Pek chím chı̍t ke ê lâng, chē tı̄ hé-lô͘ piⁿ hang hé, chin khoài-lo̍k, in ê pâng-lāi, pún lâi sı̄ chin sóng chheng-khı̀, í-toh, poe-poâⁿ, pâi-lia̍t teh cha̍p hun ê chéng-choê, chheh-kè téng ū chı̍t pún phê-bı̄n kim-kı̂ⁿ ê Sèng-keng, siū hit ê hé-lô͘ lāi ê hé kng chiò tı̄ Sèng-keng, kim-kng chhàn-lān, koh ke Kat-la-tí só͘ tit-tio̍h hó khoàⁿ ê gûn peng-oê kap súi hoe, pâi tı̄ toh téng, kek-goā hián-chhut chhù-lāi ê hó khoàⁿ. Pek chím kap i nn̄g ê gín-ná ná kóng ná chhiò hoaⁿ-hí liân chhùi iā koaiⁿ boē ba̍t. So͘ Pek-hok the̍h gûn-peng-oê, tı̄ hit lāi soè-jı̄ khoàⁿ, hut-jiân thiàu-khí-lâi kóng, “Goā ah, goá chai lah, goá chai lah,chit ê sı̄ To-má Hek, chiū-sı̄ i ê miâ-jı̄, chiū-sı̄ i-seng ê kiáⁿ ê miâ-jı̄, chit ê miâ-jı̄ cháiⁿ-iūⁿ tı̄ peng-oê nı̍h, chit ê peng-oê toé, iáu ū soè jı̄, goá khoàⁿ boē chheng-chhó. Hêng-sū kín lâi, lí the̍h pit tāi-seng siá chit ê miâ-jı̄.” Hêng-sū tú-tú teh kia̍h pit, hut-jiân thiaⁿ-kı̀ⁿ ū lâng phah mn̂g, Pek chím hoaⁿ-hí kóng, “Tiāⁿ-tio̍h sı̄ i-seng lâi.” Chı̍t ke toā soè, saⁿ-kap khı̀ khui mn̂g hoan-gêng, chiong mn̂g khui, chiah chai m̄-sı̄ i-seng, chiū-sı̄ Pí-tek, lâi hêng Hêng-sū ê peng-oê toà.
Pek chím kóng, “Pí-tek, lí kin-á-jı̍t sài peng tit-tio̍h siúⁿ, kā lí kiong-hí, lí kin-á-jı̍t liu teh chin hó.”
Pí-tek kóng, “M̄ káⁿ tng, m̄-thang kiong-hí goá, goá kàu eng-kai tio̍h lâi kiong-hí Kat-la-tí sió-chiá.” Kóng liáu in chhiáⁿ i chē, Pí-tek chiong toà the̍h hō͘ Hêng-sū kóng, “Tit-tio̍h lí chioh goá to-siā lí, lí khoán-thāi goá chin hó, chit ê siúⁿ eng-kai sı̄ lí tit-tio̍h, kám-siā lí ê hó ı̀-sù niū goá, sı̍t-chāi put-chí kám-kek goá, goá kap goán lāu-pē gı̄-lūn, lí m̄-bián koh-lâi choè kang, hit ê kang thang kiò pa̍t lâng choè, lí thang koh-chài jı̍p o̍h-tn̂g khı̀ tha̍k chheh, goá ê lāu-pē iā chin chàn-sêng chit hāng sū.”
Pek peh kóng: “Tio̍h, Pí-tek, lí kóng bô-chhò, Hêng-sū kap Kat-la-tí eng-kai kín-kín pı̄-pān jı̍p ha̍k-tn̂g.”
Pí-tek kóng,”Pek peh kóng chit ê oē goá chin hoaⁿ-hí, koh hoaⁿ-hí lí ê pı̄ⁿ hiān-chāi hó lah.”
So͘ Pek-hok kóng, “Goá sı̍t-chāi kám-siā Siōng-tè hō͘ goá tùi sí koh oa̍h, oē choè tāi-chı̀ chiàu í-chêng ê iūⁿ.”
Chit sı̂ Hêng-sū soè siaⁿ tùi Pí-tek kóng, “Tùi put-chū lí. Hiān-chāi goá ū chı̍t hāng iàu-kín ê sū, beh kàu siâⁿ-lāi chı̍t pái, sı̍t-chāi sı̄ sit-poê.”
Pek chím kóng, “Lí beh kàu siâⁿ-lāi mah ? Jı̍t beh àm, koh lí kin-á-jı̍t sài peng, kha tek-khak ià-siān, chiàu goá khoàⁿ bı̂n-á chá-khí chiah khı̀.”
So͘ Pek-hok kóng, “Bı̂n-á-jı̍t khı̀ boē choè tit, chit tia̍p tio̍h khı̀.”
So͘ Pek-hok chhiú the̍h peng-oê, chhùi liām, “To-má Hek,” bô soah, sim-siūⁿ chit ê To-má Hek bêng-bêng sı̄ i-seng ê kiáⁿ ê miâ-jı̄, i in-ūi hit sı̂ hoān liáu sū, só͘-í koé miâ oāⁿ sı̀ⁿ, kin-á-jı̍t goá chiah siūⁿ tio̍h, nā-sı̄ chit ê lâng kiù-kèng sı̄ tı̄ sím-mı̍h toē-hng nı̍h, hō͘ goá lâi khoàⁿ chit ê khoeh-á téng khoàⁿ ū sím-mı̍h mı̍h.” Kóng liáu chiū the̍h khoeh-á khoàⁿ, kó-jiân iā ū To-má Hek ê miâ-jı̄, ia̍h koh ū lēng-goā ū kúi-nā ê toā jı̄, sı̄ Pek-bêng-teng saⁿ jı̄,chiū kóng, “Goā, chit ê Pek-bêng-teng sı̄ Eng-kok.” Chiū kiò Hêng-sū kóng, “Lí koáⁿ-kín khı̀-pò.” Hêng-sū thiaⁿ liáu liâm-piⁿ ǹg goā-bı̄n cháu. Pí-tek khoàⁿ-kı̀ⁿ in chı̍t ke án-ni chhong-hông, chhin-chhiūⁿ ū iàu-kín ê sū, iā put piān thang chē kú, chiū tè Hêng-sū chhut khı̀, tò-khı̀. Chit sı̂ Hêng-sū iā bô êng thang chio-ho͘ Pí-tek, tı̍t-tı̍t cháu khı̀ i-seng ê ke, khoàⁿ-kı̀ⁿ Phok i-seng, chiong gûn peng-oê ê To-má Hek ê miâ-jı̄ kap sū-chêng, soè-jı̄ kā i kóng. Phok i-seng chı̍t ē thiaⁿ-kı̀ⁿ chit ê siau-sit, chiū koáⁿ-kín liâm-mi khí-sin kàu Pek-bêng-teng.
Bô nn̄g jı̍t ê kang, Phok i-seng tı̄ peng-oê tiàm lāi, chiū chhē-tio̍h i ê kiáⁿ To-má Hek, choē-choē nı̂ bô khoàⁿ-kı̀ⁿ, hoē bı̄n ê sı̂ chhin-chhiūⁿ tit-tio̍h chı̀ hó ê pó-poè, hoaⁿ-hí kàu ke̍k, iā lâu-ba̍k-sái, chiū toà i tò-lâi, kàu So͘ Pek-hok ê ke, to-siā i pò siau-sit ê toā un. Chit sı̂ i-seng ê bı̄n, kap chêng toā bô saⁿ-tâng, chá-chêng bı̄n tài chhiû-iông hun-hô bô cheng-sı̂n, chit sı̂ chhiò-iông moá-bı̄n, cheng-sı̂n chhiong-chiok, cha̍p hun khoài-lo̍k, chhin-chhiūⁿ pí í-chêng khah siàu-liân, kóng oē soah chiū tùi So͘ Pek-hok kóng, “Lí oē thoè goá choè tok-kang khí kúi keng tiàm, pı̄-pān hō͘ goá ê kiáⁿ choè seng-lí.”
Hêng-sū kóng, “Cháiⁿ-iūⁿ m̄ hō͘ lí ê lēng-lông pang-chō͘ lí choè hù-chhiú, hoán-tńg hō͘ i choè seng-lí nı̍h ?”
I-seng kóng, “Lí lia̍h-choè seng-lí sı̄ sit thé-biān mah.”
Hêng-sū kóng, “Goá pèng m̄-sı̄ kóng sı̄ sit thé-biān, to̍k-to̍k bô ū choè i-seng chit iūⁿ ê ko-kùi chhin-chhiūⁿ lí chit iūⁿ, tú-tio̍h koah chèng, oē kiù lâng ê sı̀ⁿ-miā, sı̄ sè-kài tē-it koâiⁿ-téng ê jı̂n-bu̍t.” I-seng lek ba̍k-bâi khoàⁿ Hêng-sū kóng, “Choè i-seng kó-jiân ko-kùi, to̍k-to̍k sı̄ chin bô khoài ê sū, nā m̄-sı̄ ū khek-kí thun-lún hó-táⁿ kap tē-it toā ê jı̂n-chû boē-oē.”
Hêng-sū kóng, “I-seng só͘ kóng ê oē bô chhò, chit-gia̍p ná koâiⁿ tō-tek eng-kai ná toā, koh chit hō ê kang iā sı̄ Siōng-tè só͘ hoaⁿ-hí ê.”
I-seng khoàⁿ-kı̀ⁿ i só͘ kóng chin ū kiàn-sek, chiū kia̍h thâu mn̄g i kóng, “Lí kin-nı̂ kúi hè ?”
Hêng-sū kóng, “Hu-tō͘ 15.”
Phok i-seng kóng, “Lí hoaⁿ-hí choè i-seng mah ?”
Hêng-sū chhiò kóng, “Goá chin hoaⁿ-hí.”
Phok i-seng kóng, “Lí kap lí ê pē-bú gı̄-lūn hō͘ lí tha̍k chheh, thèng-hāu toā o̍h pit-gia̍p, thang lâi goá ê só͘-chāi ha̍k-sı̍p, goá chı̄n la̍t kà kàu lí sêng-kong.” Hêng-sū toā hoaⁿ-hí kóng, “Hó, hó, kín-sı̄n chun tāi-bēng.”
Phok i-seng kóng, “Lí siūⁿ khoàⁿ, kóng sı̄ khoài, kiâⁿ sı̄ oh, lí hiān-chāi í-keng lı̍p-chı̀, to̍k-to̍k m̄ chai lí oē kian-chhı̂ kàu toé mah ?”
Hêng-sū kóng, “Goá oē, goá chóng m̄ koé goá ê chı̀.”
Pek chím chiap-chhùi kóng, “I ê chı̀-hiòng chhin-chhiūⁿ chio̍h chı̍t iūⁿ, kóng kè chı̍t pái āu-lâi bô kái piàn, lí khoàⁿ i chiah tha̍k kúi nı̂ chheh, í-keng tha̍k kàu La̍h-teng bûn.”
I-seng chhiò kóng, “Án-ni chin hó, lí ê pē-bú í-keng chàn sêng, chiū án-ni sı̍t-hêng, lí it-chhè ê ha̍k-hùi téng-téng goá thang chı̄n la̍t tam-jı̄m.”
So͘ Pek-hok khoàⁿ-kı̀ⁿ i-seng khoán-thāi i ê kiáⁿ án-ni ê hó, chiū kóng, “To-siā lí, tit-tio̍h lí ê un chiong goá ê pı̄ⁿ i-hó, goá chit sı̂ oân-choân hó, í-keng oē choè kang, i ê ha̍k-hùi goá thang tam-jı̄m.”
I-seng kóng, “M̄-thang kheh khı̀, lóng kui tı̄ goá tam-jı̄m sı̄ hó, phı̀-jū chhin-chhiūⁿ goá siⁿ nn̄g ê kiáⁿ, chı̍t ê choè seng-lí, chı̍t ê choè i-seng, lí khoàⁿ goá tı̄ Hô-lân kok lāi kiám m̄-sı̄ tē-it khoài-lo̍k ê lâng mah? chiū-sı̄ tio̍h án-ni,m̄-bián koh kóng.” Kóng soah chiū khí-sin, Hêng-sū kap chı̍t ke ê lâng kiong-kèng sàng i chhut mn̂g.
Chit tia̍p liáu-āu Hêng-sū chiū jı̍p Kui-thêng toā o̍h tha̍k gō͘ nı̂ pit gia̍p, sûi-sı̂ tı̄ Phok i-seng hit ūi gián-kiù i-tō. Phok i-seng chiong i pêng-seng só͘ o̍h, it-chı̄n thoân-siū hō͘ Hêng-sū. Koh pit-gia̍p choè i-seng kúi nı̂ liáu-āu miâ-siaⁿ toā chín-heng. Koāiⁿ-koaⁿ khoàⁿ-kı̀ⁿ Hêng-sū phín-hēng toan-chiàⁿ, ha̍k-būn ian phok, iā koh sin-thé ióng-chòng, bı̄n-māu hui siông, sûi-sı̂ chiong ka-kı̄ ê cha-bó͘ kiáⁿ Hek-tek ún hō͘ Hêng-hū choè bó͘. Pí-tek ê lāu-bú khoàⁿ-kı̀ⁿ Kat-la-tí sèng-chêng un-jiû hiu hân cheng-chēng, iā súi-súi thang thiàⁿ, chiū chhiáⁿ Phok i-seng choè kài-siāu-jı̂n ǹg i ê pē-bú kiû chhin, só͘-í Kat-la-tí āu-lâi sûi-sı̂ kè hō͘ Pí-tek, nn̄g tùi ê ang-bó͘ chêng-ı̀ siong-tô͘, cha̍p hun ê hô-bo̍k, āu-lâi nn̄g ke ê kiáⁿ-sun heng-sēng sûi-sı̂ choè Hô-lân ū miâ ê toā cho̍k.
