Gı̂ Tiâu-chheng ê Sió-toān

Thoân-tō-su Gı̂ Tiâu-chheng, i ê pún só͘-chāi tı̄ Ko-hiông chiu Kı̂-san kūn Sam-nâ-chng Sin-chhù-á, i ê pē-bó chá-chá chiū koè-sin, sè-hàn ê sı̂ lóng sı̄ oá-khò i ê kong khan-kà. Hit-tia̍p Sin-chhù-á ū kàu-hoē tı̄-hia, i ê kong Gı̂ Seng put-chí jia̍t-sim pài Siōng-tè, chiū peh-kàu hō͘ i lâi tha̍k Tiong-o̍h. Āu-lâi tú-gū goá lâi tı̄ Kau-phiâⁿ chò thoân-tō, goá ū siat chı̍t keng kàu-hoē ê sió-o̍h, hit-sı̂ goá chiū chhiáⁿ i lâi kà sió-o̍h, só͘ keng-koè ê sêng-chek put-chí hó. Āu-lâi goán khoàⁿ i put-chí koan-sim ài chò kàu-hoē ê kang, só͘-í ū kí-chiàn i lâi tha̍k Sı̂n-ha̍k. I chut-gia̍p chiū khı̀ toà tı̄ Kau-phiâⁿ, Thâu-siā, Koan-á-niá, Tang-āu-liâu ê kàu-hoē. Tı̄ kin-nı̂ Thoân-tō-kio̍k ū phài i beh khı̀ toà tı̄ Kong-á-nâ ê kàu-hoē, i tı̄ 4 goe̍h 14 ê lé-pài ū choán-jı̄m khı̀ Kong-á-nâ. Koh koè lé-pài tò chhut-lâi beh siat-hoat i ê hêng-lí jı̍p-khı̀, bô phah-sǹg kàu Sin-hoà-ke, i chiū khí kip-sèng ê hı̀-iām, chia̍h io̍h bô hāu. Kàu 21 jı̍t chiū lı̄-khui sè-kan, kin-nı̂ 37 hoè. Lūn i toà kàu-hoē put-chí chı̄n-tiong chò kang iā sı̄ chin oa̍h-tāng, bô-lūn toà sím-mı̍h kàu-hoē, m̄-bat thiaⁿ-kı̀ⁿ kap lâng chhiong-tu̍t, tı̄ siā-hoē put-chí pêng-hô, che iā sı̄ chin thang khó-chhú. Siāng khó-sioh thang thè i khoà-lū ê chiū-sı̄ i hiān-sı̂ ū 5 ê poàⁿ kiáⁿ, chiū sı̄ chı̍t ê iáu boē chhut-sı̀, I ê kiáⁿ lóng iáu chin sè-hàn, thiaⁿ-kı̀ⁿ i koè-sin, seng-khu-piⁿ lóng bô ûi-sán. Taⁿ Gı̂ Sian-seⁿ-niû beh ı̂-chhı̂ hiah ê sè-kiáⁿ koè jı̍t, sı̍t-chāi ū tn̂g-tn̂g ê khoà-lū. Toā ǹg-bāng lia̍t-ūi saⁿ-thiàⁿ ê hó pêng-iú ūi-tio̍h i ê ke-koàn lâi tàu tông-chêng, lâi thè i kı̂-tó Siōng-tè, che sı̄ sim só͘ toā ǹg-bāng--ê. ( Tâi-oân Kàu-hoē-pò tē 531 koàn,1929 nı̂ 6 ge̍h)