Chit 1 kang sı̄ Gōng-kiáⁿ-sài in tiūⁿ-lâng chò 60 hoè toā-siū. In bó͘ chhoân mı̄-soàⁿ, ah-á, chiú kap 1-tè âng-pò͘ hō͘ i koè in tiūⁿ-lâng tau chiok-siū. I beh chhut-mn̂g ê sı̂, in khan--ê kau-tài i kóng, “Lí seng khı̀ kā pa-pa chiok-siū, goá ū tāi-chı̀, beh-àm-á chiah koè--khı̀.”
Gōng-kiáⁿ-sài iân-lō͘ kiâⁿ iân-lō͘ sńg. Kiâⁿ kàu poàⁿ-lō͘ ê sı̂, ah-á soà koāⁿ-koāⁿ-koāⁿ kiò boē thêng. Gōng-kiáⁿ-sài sim-lāi siūⁿ kóng, “Ah, ah-á teh chhùi-ta--lah. Pàng lí khı̀ chia̍h chúi.”
Gōng-kiáⁿ-sài siūⁿ boē kàu ah-á soà jú siû jú hn̄g. “Ah-á, ah-á, lí pháiⁿ sim-koaⁿ, pàng goá 1-ê tı̄ hô-hoāⁿ, lín-pē iōng mı̄-soàⁿ kā lí phah, nā hō͘ goá lia̍h--tio̍h phah kah hō͘ lí hoah m̄-káⁿ.” I tio̍h iōng chhiú--nı̍h ê mı̄-soàⁿ beh lâi khian chúi--nı̍h ê ah-á. Mı̄-soàⁿ lo̍h-chúi tio̍h tâm--khı̀. Ah-á m̄-nā khian bô--tio̍h, mı̄-soàⁿ mā tâm-kô͘-kô͘, noā-liáu-liáu.
Gōng-kiáⁿ-sài tı̄ teh-beh kiâⁿ kàu in tiūⁿ-lâng tau mn̂g-kha-kháu ê sı̂-chūn, keng-koè 1-phı̀ⁿ tek-á-nâ. Hong chhoe-tio̍h tek-á, hoat chhut sih-sih-suh-suh ê siaⁿ-im. Gōng-kiáⁿ-sài m̄-kam tek-á teh hoah koâⁿ. I tio̍h the̍h sim-koaⁿ-thâu hit-tè âng-pò͘ pa̍k tı̄ tek-á ê sin-khu téng.
Gōng-kiáⁿ-sài kiâⁿ lâi kàu in tiūⁿ-lâng tau ê tiū-tiâⁿ, khoàⁿ tio̍h thô͘-kha ū pit-sûn. “Goá chai--lah, lí ē joa̍h ho͘ⁿh. Lâi--lah, chit-koàn chiú chhiáⁿ--lí.” Tio̍h án-ne Gōng-kiáⁿ-sài siang-chhiú khang-khang lâi kàu in tiūⁿ-lâng tau.
Àm-thâu-á chia̍h-toh ê sı̂, in bó͘ khoàⁿ i pháiⁿ-sè ngoeh chhài, tio̍h tı̄ i ê saⁿ-kûn-á-piⁿ kat 1-tiâu soh-á, in bó͘ tiuh 1-ē, i tio̍h ngoeh 1-ē. Hó-sí m̄-sí soh-á khı̀ hō͘ 1-chiah koe-á tı̂ⁿ--tio̍h. Gōng-kiáⁿ-sài tio̍h chhin-chhiūⁿ koe-á chhia̍k-chhia̍k-thiàu kāng-khoán, chhiⁿ-chhám ngoeh, chhiⁿ-chhám chia̍h.
In ang-á-bó͘ tńg lâi chhù--nı̍h ê sı̂, soà lâi khí phùi-bı̄n. I ı̀n in bó͘ kóng, “Tiūⁿ-lâng in tau sı̄ tang-pêng ûi lêng, sai-pêng ûi hó͘, āu-mn̂g 1 phoà-kó͘, lí nā khı̀ khoàⁿ, lí tio̍h chai goá khó͘.」Goān-lâi gōng-kiáⁿ-sài chia̍h pháiⁿ pak-tó͘ koh chhoē bô piān-só͘.
Chit-ê kò͘-sū sı̄ goán goā-má tı̄ goá kok-hāu 4-nı̂ ê sı̂ kā goá kóng--ê. Goā-má bat kóng chin choē gín-á-kó͘. Sǹg--lâi mā ū 10-nı̂--ah, m̄-kú goá iû-goân kı̀ chiok chheng-chhó. Oân-choân lóng ài kám-siā kok-hāu ê lāu-su. Nā m̄-sı̄ i hoa̍t goá sàu piān-só͘, goá mā boē ū hiah-nı̍h hó ê kı̀-tı̂ khı̀ kı̀ chit-ê kò͘-sū. Tio̍h in-ūi goá tı̄ ha̍k-hāu『說話課』ê sı̂ iōng goán ma-ma kà--goá ê gí-giân lâi kóng goán goā-má kóng ê kò͘-sū, siūⁿ boē kàu tı̄ 1991-nı̂ koh ū m̄-chún ha̍k-seng kóng in ê bú-gí ê lāu-su. Chin ka-chài kàu-io̍k ū piàn hó, chiah boē koh hāi tio̍h khó-liân ê ha̍k-seng gín-á.
(Tâi-oân-jı̄ cha̍p-chı̀ tē 15 kı̂, 2003 nı̂ 3 ge̍h)
