Gōng-lâng kóng gōng-oē
Ai-su-lân (lceland) chı̍t ê siàu-liân lâng cháu-kè bó͘ soa-lio̍k-toē, tú-tio̍h chı̍t lâng khiâ chı̍t chiah soè chiah bé, hêng-chōng kiaⁿ-hiâⁿ chin kı̂-koài, chiū kap i saⁿ-kap kóng-oē. Ai-su-lân lâng mn̄g kóng, “Kun chun-sèng tāi-bêng?” Ìn kóng,“Miâ Sū-thê-hun.”Koh mn̄g i sı̄ sim-mı̍h-lâng ê kiáⁿ.” Ìn kóng, “Thoat-ní-su-thèng ê kiáⁿ.” Koh mn̄g i kóng, “Kun beh tó-khı̀?” I ı̀n kóng,“Goá in-ūi thau-lia̍h chı̍t-chiah iûⁿ, beh khı̀ kaⁿ-ga̍k.” Koh mn̄g i kóng, “ Lí í-keng hoān-choē cháiⁿ- iūⁿ bô lâng lâi toà lí khı̀?” I ı̀n kóng, “Gê-mn̂g kong-sū chin choē bô êng thang lâi lia̍h goá, hoan-hù goá ka-kı̄ tio̍h khı̀, só͘-í hō͘ goá chı̍t tiuⁿ toaⁿ choè jı̍p kaⁿ ê pı̂n-kù.”Kóng soah, tāi-ke saⁿ lı̄-pia̍t. Āu-lâi koh chı̍t lé-pài, siàu-liân-lâng koh tò-tńg iû-goân tùi goân-lō͘ keng-kè, bô phah-sǹg koh tú-tio̍h hit lâng, kı̂-koài mn̄g kóng,“ Sū-thê-hun lí kám m̄-sı̄ kóng beh khı̀ kaⁿ-ga̍k?” Ìn kóng, ” Chiàⁿ-sı̄, kò-kaⁿ-ê m̄ chiap-la̍p goá.” Mn̄g i kóng, “Cháiⁿ- iūⁿ m̄ chiap- la̍p lí?” Ìn kóng,“In -ūi chêng só͘ hō͘ goá hit-tiuⁿ toaⁿ phah-m̄-kı̀ⁿ, i m̄ sı̀n goá thau-khan iûⁿ ê sū, siat-sú boē-oē chhē-tio̍h hit tiuⁿ toaⁿ, chiū éng m̄ chiap-la̍p goá, án-ni chin hoân-ló, chhéng-kàu láu-ko, goá tio̍h chiong iûⁿ khan khı̀ hō͘ i khoàⁿ, ia̍h sı̄ tio̍h kiû koaⁿ-hú koh chhut chı̍t-tiuⁿ toaⁿ hō͘ goá.” Siàu-liân lâng khó͘-khǹg i kóng, “I m̄-ài lí jı̍p kaⁿ, lí tio̍h tò-khı̀.” Sū-the-hun kóng, “ Hàiⁿ! Í-keng boē-tit thang jı̍p kaⁿ ia̍h sı̄ tio̍h tò-khı̀ tiāⁿ-tiāⁿ.” Chiàu Sū-thê-hun sui-jiân chai choē ka-kı̄ siūⁿ tio̍h siū choē ê hêng-hoa̍t, bô siūⁿ tio̍h chhē pa̍t tiâu lō͘ lâi kái-ûi, chin-chiàⁿ gōng-lâng kóng gōng-oē.
Sio̍k-gú kóng, “Thiông hui jı̍p hó͘, chū-sún kı̂-sin ”; kaⁿ-ga̍k hêng-khū sı̄ lâng só͘ ùi-khı̄, siáⁿ lâng ū phah-sǹg Tâi-pak gō͘-ge̍h cha̍p-saⁿ jı̍t Sū-thê-hun hit-poè toā-koe sió-hāng moá-moá sı̄, giâ-kê, phāiⁿ tún, só-liān, chhiú-khàu, saⁿ-pó͘ chı̍t-kūi, bê-lō͘ lân-hoán chı̄n-la̍t tâu-jı̍p tē-ge̍k, m̄-chai ki-tok sı̄ Kiù-chú,sı̀n-khò I choè tiong-pó, sui ū choē, ū hoat thang kái-ûi.
(Tâi-lâm Kàu-hoē-pò tē 354 koàn, 1914 nı̂ 9 ge̍h)