Giâm Chheng-hoâ ê Sió-toān

Chheng-hoâ ia̍h miâ Hu̍t-á. I tı̄ sè-hàn ê sı̂ ū jı̍p sió-o̍h tha̍k chheh, ke-sū put-chí sàn, só͘-í kàu 16 hoè ko͘-put-chiong tio̍h thè o̍h khı̀ hō͘ lâng chhiàⁿ. Ū kap i ê thâu-ke saⁿ-kap khı̀ Kńg-tang, bô kú chiū koh tńg--lâi. Kàu 20 hoè chiū chhoā bó͘. Hit nı̂ Kai Bo̍k-su tú kàu Tām-chúi, i chiū khı̀ thàm i ài thó khoàⁿ ū thâu-lō͘ á-bô. Kai Bo̍k-su chhiàⁿ--i, hit-tia̍p i lóng m̄ chai Sèng-kàu ê tō-lí sı̄ sím-mı̍h khoán. Āu-lâi chiām-chiām tit-tio̍h Kai Bo̍k-su ê kà-sı̄ chiū hoán-hoé ké-pı̀ⁿ lâi sı̀n Chú, niá sé-lí jı̍p kàu-hoē. Án-ni sǹg sı̄ pak pō͘ thâu chı̍t ê jı̍p-kàu--ê.

Āu-lâi Kai Bo̍k-su chiap-la̍p i chò ha̍k-seng kà-sı̄ tō-lí; bô kú chiū khı̀ chò thoân-tō, ū tiàm kúi-nā ūi ê pài-tn̂g. Kàu 26 hoè ê sı̂ kap Kai Bo̍k-su sı̀-kè siat kàu. Kàu 31 hoè chiū tàu kà Toā-o̍h, chò Toā-o̍h ê sian-seⁿ. Kàu 34 hoè ū seng chò Bo̍k-su; tùi hit-tia̍p liáu-āu lóng sı̄ tiàm tı̄ Tām-chúi pang-chān Kai Bo̍k-su liāu-lí kàu-hoē ê sū-bū. Kàu 50 hoè tı̀-pı̄ⁿ; tùi hit-tia̍p liáu-āu sin-thé khah lám, chò kang khah chió, tām-po̍h tàu kà Toā-o̍h kap sûn-sı̄ Kàu-hoē nā-tiāⁿ.

Tı̄ kin-nı̂ 5 goe̍h kan kap Lâu Bo̍k-su khı̀ sûn Gı̂-lân ê kàu-hoē, tò tńg-lâi bô kúi jı̍t pı̄ⁿ-sè khah siong-tiōng, ū chò-lı̄ kap phùi-hoeh. Sòng i-seng put-chí chı̄n-la̍t teh kā i-tı̄, chóng-sı̄ bô hoat-tit, kàu 6 goe̍h 2 hō koè-óng. Kin-nı̂ tú 58 hoè, sı̀n Chú ū 38 nı̂ kú, chò Bo̍k-su 24 nı̂.

I it-seng siông-siông kap koaⁿ kau-poê. Koaⁿ-tiûⁿ ê sū i put-chí chai-iáⁿ. Tı̄ 18 hoè ê sı̂ bat ūn-niû khı̀ Pak-kiaⁿ, ū tit-tio̍h siúⁿ gō͘ phín kun kong kap chek pó͘ koān sêng. Tı̄ 33 hoè ê sı̂ Tâi-oân ê sûn-bú kā i pó-chàu chı̄n sian-siú-pı̄ kiam siú lâm-lêng. Ia̍h tı̄ 43 hoè ê sı̂, tn̂g Bú-tâi ū kā i pó-chàu hāu-soán Ti-koān.

Kàu 45 hoè ê sı̂ Jı̍t-pún ê chèng-hú ū sù i sin chiong, ia̍h 46 hoè chò Tâi-pak thiaⁿ ê chham-sū, Î-sin Kong-hoē ê kàu-sū, Jı̂n-chè ı̄ⁿ ê úi-oân, kap Hoa-bı̂n hoē-koán ê kàu-sū. Tùi án-ni lâi khoàⁿ, i m̄ nā pān-lí Kàu-hoē ê sū-bū, í-goā iáu ū chı̄n la̍t tàu pān pa̍t hāng ê tāi-chı̀.