Goá ê lāu-su

Ū chı̍t pái, sai, hı̂m kap hô͘-lı̂ chò-hoé khı̀ phah-la̍h, sai phah tio̍h chı̍t chiah bé; Hı̂m phah tio̍h chı̍t chiah lı̂-á; Hô͘-lı̂ phah tio̍h chı̍t chiah thò͘-á. In beh pun-pheⁿ chia-ê la̍h-mı̍h8. Sai kā hı̂m kóng: “Taⁿ, lí tāi-seng kóng, la̍h-mı̍h8 beh án-choáⁿ pun?” Hı̂m ı̀n kóng: “Bé siōng toā-chiah, hō͘ tāi-ông lí chia̍h; Lı̂-á khah sè, hō͘ goá chia̍h; Thò͘-á siōng-kài sè-chiah, tio̍h hō͘ hô͘-lı̂ chia̍h.” Sai thiaⁿ liáu, bô-kóng-bô-tàⁿ tō iōng i sông-koh-ū-la̍t ê jiáu chhut la̍t kā hı̂m mau--lo̍h-khı̀; Hı̂m chı̍t siaⁿ tō sí--khı̀ a. Soà--lo̍h khı̀ mn̄g hô͘-lı̂ khoàⁿ la̍h-mı̍h ài án-choáⁿ pun chiah hó. Hô͘-lı̂ chin kín soà-chhùi tō kóng: “Tāi-ông chái-khí khùn-chhéⁿ ê sı̂, seng chia̍h thò͘-á seh chı̍t ē chhùi-khí phāng; Tiong-tàu pak-tó͘ iau, chia̍h lı̂-á thang-hó khùn-tàu; Kàu àm-sı̂, tāi-ông pak-tó͘ chin iau ê sı̂ chiah chia̍h bé, án-ne tāi-ông chiah ē-tàng tòng kàu keh-tńg-kang chái-khí.” Sai thiaⁿ liáu chin hoaⁿ-hí, chiok boán-ı̀, i mn̄g hô͘-lı̂ kóng: “Lí ná-ē hiah gâu ? Sı̄ siáⁿ-lâng kà--lí ê ?” Hô͘-lı̂ iōng i kan-kúi koh káu-koài ê jiáu kí hit chiah hı̂m kóng: “I tō-sı̄ goá ê lāu-su.” (Tâi-bûn Bóng-pò Tē 11 kı̂, 1997 nı̂ 7 goe̍h)