Goá ū 1 ê bāng
Goá ū 1-ê bāng, chū sè-hàn tō tiāⁿ-tiāⁿ bāng tio̍h kāng-khoán ê chêng-kéng: 1-ê jı̍t-thâu beh lo̍h-soaⁿ ê àm-thâu-á, siōng boé--á, kui-phı̀ⁿ âng-hê chhiō tio̍h chhiân-hn̂g, mā chhiō tio̍h chhân-phiⁿ sió-lō͘ 1-ê khiâ kha-ta̍h-chhia ê gín-á, un-loán ê kng-soàⁿ ùi gín-á ê āu-piah-bı̄n siā--lo̍h-lâi, ín-khí i ê chhù-bı̄, siūⁿ beh chhoē kng-soàⁿ ê goân-thâu, tō oa̍t-thâu ǹg āu-piah-bı̄n khoàⁿ--khı̀, soah hō͘ 1-ê chiâⁿ toā ê hêng-iáⁿ hè-kiaⁿ--tio̍h ---- 1-tòng o͘-phú ê kang-tiûⁿ chhiā tı̄ chhân tiong-hng, hō͘ jı̍t-thâu chhiō kah kim-sih-sih, hoán-siā ê kng chiok chha̍k-ba̍k--ê, hō͘ i ba̍k-chiu peh bē kim. Sǹg bē chheng ê àm-mı̂, tı̄ bāng tiong, chhut-hiān koh-chióng hêng-thài ê kang-tiûⁿ, kóng bē chhut-siaⁿ ê khióng-pò͘ hām thòng-khó͘, siūⁿ beh hoah “kiù-lâng”, soah hoah bē chhut--lâi; cheng-sı̂n liáu-āu, kui sin-khu chhèng-koāⁿ, i chhoah bē lı̄ koh chhoán toā-khùi. Gín-á ê ok-bāng toā-pō͘-hūn lóng sı̄ khı̀ hō͘ kúi jiok, goá ê ok-bāng sı̄ bāng tio̍h kang-tiûⁿ, hit-chióng kiaⁿ-hiâⁿ liān chit-má teh kóng hō͘ lín thiaⁿ ê sı̂, iû-goân kám-siū ē tio̍h, giah pit ê chhiú m̄ thiaⁿ khòng-chè, tih phı̍h-phı̍h-chhoah, iū koh sı̄ ba̍k-bâi kat-kat hām tio̍h-kiaⁿ ê gán-sı̂n. Seng-oa̍h tiong, chū-jiân ē khı̀ siám- phiah kang-tiûⁿ. Ta̍k-pái chē chhia iah sı̄ chē hoé-chhia keng-koè kang-gia̍p-khu hit toāⁿ lō͘ ê sı̂, ài khoàⁿ thang-á goā hong-kéng ê goá, tō ē kā thâu àⁿ-kē-kē, kûn-thâu-bú tēⁿ-ân-ân, an-ùi ka-tı̄: Mài kiaⁿ! Mài kiaⁿ! 1-sı̂-á tō koè--khı̀-a. Tha̍k kok-tiong ê sı̂-chūn, in-ūi kiaⁿ khı̀ kang-tiûⁿ chò-kang, goá it-tı̍t chiok phah-piàⁿ tha̍k-chheh, m̄ sı̄ kiaⁿ chò- kang sin-khó͘, mā m̄ sı̄ kiaⁿ chò-kang ē hō͘ lâng khoàⁿ bē khí, sı̄ kiaⁿ “kang-tiûⁿ”, m̄ káⁿ khoàⁿ, mā m̄ káⁿ oá kı̄n. Toā-hàn liáu-āu, chiok ài khiâ chhia tı̄ chit-má ê toā-lō͘ sió-hāng sı̀-kè loa̍h-loa̍h-sô, kan-taⁿ m̄ káⁿ keng-koè kang-tiûⁿ, i tih siám-phiah hit-tiâu lō͘. Gín-á sı̂-chūn tùi kang-tiûⁿ ê kiaⁿ-hiâⁿ, khó-lêng sı̄ 1-chióng tùi『巨大型像』kiaⁿ-hiâⁿ ê phó͘-phiàn sim-lí, tō chhin-chhiūⁿ khoàⁿ tio̍h ko-soaⁿ toā- hái ē kiaⁿ-hiâⁿ kāng-khoán; toā-hàn liáu-āu, iû-goân hiah-nı̄ kiaⁿ-hiâⁿ, khó-lêng sı̄ 1-chióng lâng tùi seng-oa̍h khoân-kéng kám-kak put-an ê sim-lí piáu-hiān, tō chhin-chhiūⁿ kó͘-chá-lâng ê seng-oa̍h siū tio̍h soaⁿ-iá hó͘-pà ê ui- hia̍p kāng-khoán, hiān-tāi-lâng ê seng-oa̍h siū tio̍h in ka-tı̄ chhòng-chō ê hiān-tāi iá-siù ---- kang-gia̍p kho-ki ê ui-hia̍p. Chit-chióng kiaⁿ-hiâⁿ mā sı̄ hiān-tāi-lâng tùi kang-gia̍p kho-ki hoat-tián ê bô-nāi: i siūⁿ beh koè khah hó ê seng-oa̍h, siūⁿ beh chó͘-tòng chū-jiân khoân-kéng kap soaⁿ-iá hó͘-pà ê siong-hāi, soah bô chún-sǹg--tio̍h, tian-tò khí-chō 1-phı̀ⁿ koh khah toā ê『現代都市叢林』, lâng kāng-khoán toà tı̄ chhiū-nâ-á lāi-toé, siū tio̍h iá-siù ---- kang-tiûⁿ ê hè-kiaⁿ. Eng-àm siūⁿ tio̍h che kang-tiûⁿ ê tāi-chı̀, koh sı̄ 1 ê bô hó-bı̂n ê àm-mı̂--a, khó-ò͘ ê kang-tiûⁿ, iū koh tih ko-ko-tı̂ⁿ, sái-lāng goá ê nńg-chiáⁿ, hō͘ lâng án-choáⁿ bih mā bih bē lı̄. Goá ū 1 ê bāng, 1 ê éng-oán ê ok-bāng. (TGB Thong-sı̀n tē 25 kı̂, 2001 nı̂ 10 goe̍h)