Goá ū chı̍t-ê bāng:
Toā-chûn sái-jı̍p káng,
Jı̍t-kng thàng bông-bū,
Hái-bı̄n hiān tó-sū.
Koé-chí moá soaⁿ-iá,
Lo̍k-kûn hioh chháu-niá,
Gín-á chhiú khan chhiú,
Cháu-koè chheng-á-chhiū.
Soaⁿ-kok-tiong ha̍p-chhiùⁿ,
Oē-gí bô kāng khiuⁿ.
Āu-jı̍t teh chū-hoē,
Saⁿ kóng pē-bú-oē.
Goá ū chı̍t-ê bāng:
Sin-kok sin siâⁿ-pang,
Khui-khoah ê ke-chhı̄,
Chhiong-moá hoe-phang-bı̄.
khan-pán tah piah-piⁿ,
Hàn-jı̄ bô khoàⁿ--kı̀ⁿ.
Kan-ta Lô-má-jı̄,
Thán-hoâiⁿ choè phiau-kı̀.
Siat-lı̍p sin kui-kí,
Hoe-ho̍k hó kéng-tı̀.
Sin kok-ka siâⁿ-chhı̄,
Tháu-oāⁿ sin oa̍h-khı̀.
Goá ū chı̍t-ê bāng:
Kàu-io̍k tit tháu-pàng,
Āu-lâi chèng soè-kiáⁿ,
Siok-toê bián koh siá.
M̄-bián o̍h Hàn-jı̄,
khoài-lo̍k gín-á-sı̂.
Kái-ēng A B C,
O̍h sè-kài sin-ti.
Bûn-jı̄ kái hoat-tō͘,
Siā-hoē toā chı̀n-pō͘.
Bú-gí saⁿ ha̍k-sı̍p,
Jı̄m-tông ná khak-lı̍p.
Goá ū chı̍t-ê bāng:
Tāi-tāi só͘ kià-bāng,
Tèng-kun Bí-lē-tó,
Sin kok-ka khí-chō.
Bú-gí choè kun-goân,
Bûn-hoà éng liû-thoân.
Chok-ka hiàn châi-chêng,
Bûn-ha̍k hó kong-kéng.
Sian-jı̂n khı̂n iā-chéng,
Āu-tāi hó siu-sêng.
Tı̀-ı̀m phó͘-thiⁿ-ē,
Bān-kok tâng khim-poē.
Goá ū chı̍t-ê bāng:
Jı̂n-seng bô hu-khang,
Bāng tiong ê ka-kı̄,
Sin-khu siū phah-chhùi.
Tiām-tiām lo̍h thô͘-moê,
Kut-huih ak chhân-toē.
Hō͘-è ê hō͘-è,
M̄-chai goá só͘-choè.
Chhim-thiàⁿ bô oàn-hoé,
Kian-tēng sı̀n bô hoè.
Kı̂-thāi sim hoaⁿ-hí,
Jı̍t-āu kiat hó chí.
(Tâi-bûn-thong-sı̀n tē 61 kı̂, 1999 nı̂ 2 goe̍h)
