Goá ū choē

Goá ū choē. Tú-tio̍h thòng-khó͘ ê lâng, goá sim-lāi bē kám-kak tông-chêng; khoàⁿ-tio̍h khióng-pò͘ ê tāi-chı̀, goá sim-lāi bē kám-kak kiaⁿ-hiâⁿ; chiap-siu pa̍t-lâng ê pang-chān, goá sim-lāi bē kám-kak kám-kek. Goá ū choē. Goá thâu-khak lāi kan-taⁿ ē kı̀-tit goá beh tı̍h siáⁿ, goá siūⁿ beh chhòng siáⁿ, goá kah-ı̀ siáⁿ, goá siōng thó-ià siáⁿ. Goá ū choē. Goá tiāⁿ-tiāⁿ khoàⁿ bē-khí pa̍t-lâng ê jı̂n-seng, khoàⁿ bē-khí in chū sè-hàn kàu toā-hàn lóng hō͘ ka-tı̄ koè kāng-khoán ê seng-oa̍h, kiâⁿ kāng 1-tiâu lō͘, koai-koai-á tha̍k-chheh thang hó khó tē-1-miâ, tâm kúi-tiûⁿ-á ká-ná chin cheng-chhái ê loân-ài, chhoē hó thâu-lō͘, kè hó ang, chhoā hó bó͘, seⁿ kúi-ê hām ka-tı̄ sio-kâng ê koai-kiáⁿ. Goá ū choē. Bêng-bêng sı̄ 1-kiāⁿ chiok kán-tan ê tāi-chı̀, goá soah ta̍k-pái lóng kā ka-tı̄ kóng goá bô hoat-tō͘, i bô ta̍t-tit goá án-ne hi-seng, sè-kài bē in-ūi án-ne tō kái-piàn. Ē kı̀-tit í-chêng lí kā goá kóng--koè: “Bô ba̍k-chiu ê lâng khoàⁿ siōng chheng, bô hı̄ⁿ-á ê lâng thiaⁿ siōng bêng, chhiú lāi-té khang-khang chiah ē-tàng the̍h-tio̍h siōng chē mı̍h-kiāⁿ, chin-chiàⁿ sí--koè ê sèⁿ-miā chiah ē-tàng oa̍h liáu kú-kú-tn̂g-tn̂g.” M̄ chai ūi siáⁿ-mih, chai-iáⁿ ê tāi-chı̀ lú chē, goá tō lú m̄ bat tāi-chı̀; se̍k-sāi ê jı̄ lú chē, goá tō lú m̄ káⁿ kóng-oē; nı̂-hoè lú chē, goá kha-chiah-phiaⁿ āiⁿ ê choē tō lú tāng; lı̄ lí------gín-á sı̂-chūn lı̄ goá chiah kı̄n ê lí, mā lú lı̄ lú hn̄g. (TGB Thong-sı̀n tē 25 kı̂, 2001 nı̂ 10 goe̍h)