Goá bán-hoê tiōng-hu ê ài-chêng

Goá kap goá ê tiōng-hu kiat-hun ū 5 nı̂ lah. I sı̄ chı̍t ūi i-seng, 5 nı̂ lâi goán ê ài-chêng lóng chin hó. Kin-nı̂ goá í-keng sı̄ 3 ê gín-á ê bú-chhin. Múi jı̍t tāi-pō͘-hūn ê sı̂-kan lóng hē tı̄ gín-á ê sin-chiūⁿ. Sui-jiân in oē hō͘ goá hoaⁿ-hí khoài-lo̍k, m̄-kú iā Chiām-chiām oē hō͘ goá chin-choē mâ-hoân; tùi chheng-chá kàu jı̍t-àm (chhim-iā), goá thong-jı̍t ūi in sin-khó͘ bô êng. Goá kin-nı̂ tú-tú 30 hè, khiok bô sǹg lāu, m̄-kú siū liáu gín-á ê liân-lūi, goá ka-kı̄ kak-tit lāu lah; tông-sı̂ goá tùi tı̄ gín-á sı̄ phāu-khí chı̍t ê sóng-khoài ê sim-chêng, ēng choân-pak ê cheng-sı̂n lâi chiàu-kò͘ in ê it-chhè. Pún lâi chhiàⁿ--ê khó-í thè choè, nā-sı̄ goá chóng boē an-sim. Só͘-í ūi liáu gín-á, goá goān hi-seng liáu goá ka-kı̄, goá ài choè chı̍t ê hiân-chhe liông-bú, hō͘ goá chı̍t ê soè ka-têng kè-tio̍h iu-bí khoài-lo̍k ê seng-oa̍h. Ná oē chai, goá ê tiōng-hu kūn-lâi tùi goá chiām-chiām léng-tām khí-lâi, tùi gín-á ê thài-tō͘ iā chin piàn lah. Gín-á ài pa-pah kā i boé thit-thô mı̍h, i chiū boē kı̀-tit lah, ài kap pa-pah thit-thô, i chiū the-sı̂ kóng, pı̄ⁿ-ı̄ⁿ chin bô-êng, pı̄ⁿ-lâng thài choē. Ta̍k-jı̍t chhim-iā 2 tiám chiah hoê-ka, iā thàu-chá chiū koh khı̀ pı̄ⁿ-ı̄ⁿ, liân pài 6 ē-po͘ to bô tı̄ chhù-nih. Khí-thâu goá siong-sı̀n sı̄ pı̄ⁿ-ı̄ⁿ ê kang-chok thài bô êng, in-ūi Tâi-oân ê khı̀-hāu gâu piàn, phoà-pı̄ⁿ lâng chin choē, só͘-í goá lóng bô teh giâu-gı̂ i. Chóng-sı̄ chı̍t jı̍t chı̍t jı̍t ê kè-khı̀, i tùi goá ê thài-tō͘ khiok sı̄ chı̍t jı̍t chı̍t jı̍t ê léng-tām. Goá thèng-hāu chhim-iā 1, 2 tiám, i tńg-lâi, chóng boē bián ài mn̄g i chı̍t jı̍t kang-chok ê chêng-hêng, á-sı̄ kap i kóng chı̍t koá ka-bū ê sū-chêng, i chiū bô siáⁿ hoaⁿ-hí. Ūi-tio̍h án-ni, goá thong-mı̂ boē khùn-tit, thòng-khó͘ ê jím-siū it-chhè. Goá siūⁿ kóng, i sı̄ tı̄ goā-bı̄n kang-chok-siōng ê mâ-hoân, lô-khó͘, tńg-lâi ke-lāi, tùi lāu-pô-á teh hoat-náu--ê, só͘-í goá iā goân-liōng i. Ū chı̍t jı̍t, goá ê chhù-piⁿ, chhut-miâ kāu-oē ê Ia̍p thài-thài, gû-jiân kàu goá ê ke lâi hân-tâm. I kóng, tı̄ pài 6 àm oá 9 tiám poàⁿ ū gū-tio̍h A-hiong ê pa-pah kap chı̍t ūi sió-chiá iā tı̄ tiān-hı̀-ı̄ⁿ-nih teh khoàⁿ “金玉盟.” Tùi Ia̍p thài-thài ê chhùi, goá chiah toā kak-chhíⁿ, goân-lâi í-keng ū liáu pa̍t ê ài-jı̂n lah, koài-tit i tùi goá ê thài-tō͘, hut-jiân léng ki-ki. Goá thiaⁿ-liáu Ia̍p thài-thài ê pò-kò, chin-chiàⁿ siū-khı̀, jím boē tiâu, ba̍k-sái liàn chhut-lâi, nā m̄-sı̄ ūi-liáu ū chit 3 ê gín-ná, goá chiū lı̄-khui i cháu lah. Goá sı̄ chı̍t ê loán-jio̍k ê lú-sèng, chhá-ke, put-tàn éng-hióng liáu gín-á ê sim-chêng, hoán-tńg oē ka-kiông tùi-hong ê iàm-ò͘ⁿ ê sim-lí, m̄-kú nā bô chiong sū-chêng peh-khui, goá jím boē tiâu, bān-it goá chek-mn̄g i, i tong-jiân sı̄ m̄-khéng sêng-jı̄n ê. Siat-sú nā chit ê sū sı̄ bô sū-sı̍t leh, hoán-tńg oē lâu chı̍t ê lōng koé sêng chin ê toē-pō͘. Choè-āu goá koat-tēng tı̄ boē chiong sū lōng chheng-chhó ê chêng, chhái-chhú tiām-chēng ê thài-tō͘. Āu-lâi goá ê a-só tùi Hiong-káng lâi kàu Tâi-oân, goá chiū chiong chit kiāⁿ sū kap só-só chham-siông. I jı̄n choè “Tiōng-hu koh ū pa̍t-lâng, thài-thài m̄-sı̄ bô ū chek-jı̄m--ê. Ká-sú A-hiong ê pa-pah sı̄ chı̍t ê i-seng, i kui jı̍t bô êng í-āu, hoê kàu ka-lāi, chóng-sı̄ siūⁿ ài hióng-siū chı̍t-ē-á tiⁿ-bı̍t ê seng-oa̍h; nā-sı̄ khoàⁿ thài-thài iā bô êng liāu-lí ka-bū, koh kiaⁿ seng-sán ê thòng-khó͘, m̄-káⁿ koh jiá lí ê mâ-hoân leh. Só͘-í choè tiōng-hu--ê, iā ū i ê khó͘-būn. Nā-sı̄ choè chhe-chú--ê, oē thoè tiōng-hu siūⁿ chı̍t siūⁿ, lâi ke-thiⁿ chı̍t tiám-á liáu-kái, chiū hu-chhe ê tiong-kan ê chêng, ún-tàng iā oē hiong-ha̍p lah.” Goá thiaⁿ-liáu só-só chit ê khó͘-khǹg í-āu, múi-jı̍t lâu chı̍t sut-á sı̂-kan, ka-kı̄ chng-thāⁿ chı̍t-ē-á. In-ūi tùi ū gín-á í-āu, hoà-chng-phín, phang-chúi, chá-chá chiū í-keng bô ēng lah. Hiān-chāi koh khai-sí boah-hún tit-tio̍h kap siáu-lú sı̂-tāi chı̍t iūⁿ ê phiau-liāng. Kè-khı̀ in-ūi kiaⁿ-liáu koh ū sin (ū gín-ná), só͘-í chı̍t chhù, nn̄g chhù, saⁿ chhù lóng kū-choa̍t liáu i ê iau-kiû, boē-bián hō͘ i kiàn-siàu, àu-náu siū-khı̀. I khoàⁿ-tio̍h goá, chóng-sı̄ boē chhiò-bı̄n, piáu-sı̄ bô ū chı̍t-sut-á lo̍k-chhù ê sim-chêng. Che khó-lêng sı̄ i hiòng goā hoat-tián ê goân-in ê chı̍t ê. Hô-hòng, i tı̄ pı̄ⁿ-ı̄ⁿ-nih, múi-jı̍t kap it-poaⁿ phiau-liāng ê lú hō͘-sū chiap-chhiok, tı̄ hia siū in ê iú-he̍k, koh i hoê-ka āu, khoàⁿ-tio̍h chı̍t ūi sàm-thâu, hô͘-bı̄n ê chhe-chú, chū-jiân tùi goá chiū bô kám-kak hèng-chhù lah. Tùi goá kái-piàn liáu thài-tō͘ í-āu, chı̍t hong-bı̄n kái-chō goá ka-kı̄, chı̍t hong-bı̄n bán-hoê liáu i ê kái-piàn. Goán pún-lâi sı̄ chı̍t tùi kám-chêng chin hó ê hu-chhe, keng-koè poàⁿ nı̂ āu ê chhı̀-giām, goán hoê-ho̍k liáu í-chêng ê chōng-hóng, tiông-sin kiàn-lı̍p goán chı̍t ê tiⁿ-bı̍t, sóng-khoài ê sin lo̍k-hn̂g. （Lú-soan Ge̍h-khan Tē 42 kı̂, 1963 nı̂ 6 ge̍h)