Goá beh Sèng-keng

e̍k Ū chı̍t-ūi nı̂-lāu ê Ki-tok-tô͘, tı̄ 80 hoè siⁿ-jı̍t ê sı̂, beh sàng lé-mı̍h hō͘ i ê chhiàⁿ-kang-lâng. Àm-sı̂ lāu lâng chiong chhiàⁿ-kang-lâng lóng kiò lâi, chhiú-nı̍h the̍h chı̍t-pún phoê-bı̄n kim-kı̂ⁿ ke̍k hó khoàⁿ ê Sèng-keng, mn̄g chı̍t ê ta-po͘ ê kang-lâng kóng “Tı̄ chia ū chı̍t pún Sèng-keng kap 20 kho͘ ê chı̂ⁿ, chhut-chāi lí beh tá-lo̍h chı̍t-hāng.” Ìn kóng “Chú-lâng ah! goá m̄ bat jı̄, goá beh chı̂ⁿ.” Lāu-lâng chiū chiong 20 kho͘ hō͘ i. Koh mn̄g chı̍t ê lú ê kang-lâng, “Lí bat jı̄, hō͘ lí Sèng-keng.” I ı̀n kóng “Lāu-a-peh ah! goá thong-jı̍t bô êng lóng bô sı̂-kan thang tha̍k, chhiáⁿ lí iā chiong chı̂ⁿ hō͘ goá.” Tē-it lō͘-bé, mn̄g kàu chı̍t ê teh sàu thô͘-kha ê gín-ná kóng “20 kho͘ hō͘ lí, thang the̍h tò-khı̀ kiò lí ê ma-ma kā lí choè chı̍t-niá súi-saⁿ.” Chóng-sı̄ i ı̀n kóng “Lāu-a-peh! goá beh Sèng-keng.” Lāu-lâng tio̍h-kiaⁿ kóng “Lí iā m̄-bat jı̄, lí ài Sèng-keng ū sím-mı̍h lō͘-ēng?” Gín-ná ı̀n kóng “Goá ê ma-ma ta̍k-jı̍t tha̍k Sèng-keng hō͘ goá thiaⁿ, i ê Sèng-keng í-keng kū koh pháiⁿ lah. Goá siông-siông siūⁿ; nā ū chı̂ⁿ chiū tek-khak beh boé chı̍t pún hó ê Sèng-keng sàng i. Hiān-chāi chit-pún hó-khoàⁿ ê Sèng-keng, nā sı̄ sàng i sı̄ pí 20 kho͘ ê chı̂ⁿ koh khah oē hō͘ i hoaⁿ-hí pah-poē lah!” Lāu-lâng kóng “Goá ê gín-ná! Goān Siōng-tè chiok-hok lí”, kóng liáu chiū chiong Sèng-keng sàng i. Soè-kiáⁿ hiān-khui Sèng-keng khoàⁿ, ū gia̍p chı̍t-tiuⁿ chı̍t-pah-kho͘ ê gûn-phiò. Pa̍t-lâng chı̍t-ē khoàⁿ, lóng hō͘-hoé put-kı̍p. “Chú ê oē iâⁿ-kè n̂g-kim.” (Oa̍h-miā ê Bí-niû tē 44 kı̂, 1958 nı̂ 1 ge̍h)