Goá beh kap lí tı̄-teh

Tı̄ Hui-chiu khai-thok pò͘-tō ê eng-hiông , Lí-un-su-tun ( David Livengstone , 1813-1873 ) I tı̄ Hui-chiu kang-chok 16 nı̂ í-āu , tò-tńg lâi So͘-kek-lân . Pún-tē ê Kek-lah-su-ko ( Glasgow ) Tāi-ha̍k koat-tēng beh sàng Bêng-ū Hoat-ha̍k Phok-sū ha̍k-ūi hō͘ i. Pêng-siông sı̄ nā ū-lâng niá-siū ha̍k-ūi ê sı̂ , tāi-ke lóng jia̍t-sim phah-phok-á , lâi piáu-sı̄ khèng-chiok. Chóng-sı̄ hit-jı̍t , hoē-tiûⁿ chhiong-moá giâm-siok ê khı̀-hun . In-ūi tāi-ke khoàⁿ-kı̀ⁿ Lí-un-su-tun ê tò-chhiú chhiú-kut , hō͘ Hui-chiu ê sai kā-liáu siū-siong , khoà tı̄ sin-khu boē-oē tín-tāng . I tı̄ Hui-chiu 16 nı̂-kú , sin-khu hō͘ iām-jı̍t pha̍k-o͘ , koh hoān-tio̍h 27 pái ê jia̍t-pı̄ⁿ , bı̄n-sek sı̄ o͘ koh sán , sim-lāi siⁿ-khí chun-kèng ê liām-thâu , beh ná-ū sim-chêng khı̀ phah-phok-á ? Chit-ê ūi-tio̍h chin-lí phoe-miā ê thoân-tō-lâng , choè-āu khiā-khí-lâi ián-káng kóng, “Goá beh koh-khı̀ Hui-chiu ! Goá khí-thâu boē-hiàu Hui-chiu ê oē; koh Hui-chiu lâng ê thài-tō͘ bô tiāⁿ-tio̍h ; só͘-í goá ê sı̀ⁿ-miā , siông-siông tı̄ gûi-hiám tiong , nā-sı̄ ē-thang tiàm-chiah-kú , sı̄ in-ūi ū Sèng-keng ê oē kiat-liân goá ê sim; chit-kù oē sı̄ kóng : Khoàⁿ ah ! Goá beh kap lí tı̄-teh , tı̍t-kàu toē ê ke̍k-thâu.” ( Tâi-oân Kàu-hoē Kong-pò tē 2073 kı̂ , 1991 nı̂ 11 goe̍h )