Goá beh tńg-lâi chèng-choh

Thàu-chá cheng-sı̂n, thang-á-mn̂g khui--khui, o͘-im-thiⁿ o͘-im-thiⁿ, chı̍t chūn hong chhoe--lâi, koh siàm hō͘-mn̂g-á, ná-chhiūⁿ hō͘ thàu-chá ê pháiⁿ-thiⁿ oè--tio̍h, Yawas sim-chêng soah piàn gah būn-būn. Bē-tàng koh chhiân sı̂-kan--a, Yawas o͘-tó͘-bái khiâ--leh tō koáⁿ-kín chhut-mn̂g. Koáⁿ kàu pō͘-lo̍k kóng-tiûⁿ, pún-té kóng 7 tiám-poàⁿ chı̍p-ha̍p, chit chūn to beh 8 tiám--a, m̄-koh lâi kàu ūi--ê iáu bô 10 ê--leh, ta̍k-ê ê chêng-sû koh ká-ná kap thiⁿ--nih ê hûn kāng-khoán, o͘-im o͘-im, bô siáⁿ cheng-sı̂n. Yawas kiâⁿ koè kap in ai-sah-chuh, thiaⁿ in kóng chiah chai-iáⁿ, chit kúi kang, “Asia âng-bûn-thô͘ kang-tiûⁿ” ê lâng sı̀-kè pàng-oē: “Goán ē chhut-tōng 400 ê oân-kang kap 200 ê kèng-chhat tán--lín, hó-táⁿ choh lín lâi!” Hoān-sè sı̄ hō͘ chiah-ê oē háⁿ--tio̍h, ta̍k-ê chiah m̄-káⁿ lâi…Yawas sim-koaⁿ-té teh ioh. Chit chūn, chí-hui-chhia ê là-pah ū siaⁿ teh tân, Yashi chē tı̄ kà-sú-chō, chhiú giâ mài-kuh, iōng Truku ê oē toā-siaⁿ hòng-sàng. Kóng bô kúi kù oē, chhia sái tín-tāng, keng-koè Yawas seng-khu piⁿ ê sı̂, Yashi thàm-thâu kā kóng: “Bô iàu-kín, goá lâi kā ta̍k-ê hoah--chhut-lâi!” Yashi ná hòng-sàng ná kā chhia sái jı̍p-khı̀ pō͘-lo̍k. 『我的外孫回來部落, 他問我Bagi的山在哪裡, 我告訴他, 那已經不是Bagi的山了, Bagi的山沒有了, 那是水泥廠的啊…』Ciru khiā tı̄ bô joā hn̄g hia, iōng chin chia̍h-la̍t ê Hoâ-gí teh kóng hō͘ tiān-sı̄-tâi ê kı̀-chiá thiaⁿ. Yawas sim-lāi siūⁿ-tio̍h sı̄-toā-lâng bat kā kóng--koè: Lán Truku kó͘-chá toà tı̄ soaⁿ--nih, Jı̍t-pún-lâng lâi ê sı̂, kóng he sı̄ kok-iú-tē, kiông-pek lán poaⁿ lo̍h soaⁿ, Kok-bı̂n chèng-hú lâi liáu-āu, kóng chia sı̄ kok-ka kong-hn̂g, koh kiò lán ài poaⁿ-cháu. “Chèng-hú” tō-sı̄ án-ne, chı̍t pō͘ chı̍t pō͘ pek lán lı̄-khui ka-tı̄ ê só͘-chāi, beh kā lán ê thó͘-tē chhiúⁿ--khı̀! Yawas siūⁿ gah tng chù-sı̂n, hiōng-hiōng thiaⁿ-tio̍h Samaw teh hoah-hiu, oa̍t-thâu khoàⁿ--koè-khı̀, kóng-tiûⁿ hit thâu, i se̍k-sāi ê o͘-bah-sáng o͘-chih-sáng chı̍t ê chı̍t ê ùi pō͘-lo̍k hit-pêng kiâⁿ--chhut-lâi, ū ê chah hoan-to, ū ê giâ tı̂-thâu, mā ū mo͘h chhiū-chai--ê. Yashi ê hòng-sàng chiâⁿ-sı̍t ū-hāu neh. Thiⁿ iû-goân o͘-im o͘-im, hong mā iáu koh chin thàu, m̄-koh bô koh sap hō͘-mı̂-á--a. Bô joā toā ê kóng-tiûⁿ, chit chūn oan-nā ū beh 60 ê lâng--a, khı̀-hun jú lâi jú sio-lo̍h. Miyai pun chhâ-pang-pâi-á pun gah bô-êng chhih-chhah, pang-á téng-koân, ta̍k-tè to iōng âng-chhat kā tē-toāⁿ tē-hō kap tē-chú ê miâ siá--khí-lih. Yekong mā cháu chêng chông āu teh kau-tài sū-kang. In thàu-mê bô khùn, sim-koaⁿ-thâu lóng leh koà-liām kin-á-jı̍t ê tāi-chı̀. “Kin-á-jı̍t, lán beh tńg-khı̀ chèng-choh!” Yekong ê siaⁿ ùi là-pah-thâu hòng-sàng--chhut-lâi, kóng-tiûⁿ lāi ê Truku, ta̍k-ê sim-koaⁿ íⁿ-á lóng toè leh jia̍t--khı̀-lâi. 3 goe̍h 12, Hoa-lian Siù-lı̂m ê Truku cho̍k-jı̂n beh tńg-khı̀ in ê thó͘-tē chèng-choh, Asia âng-bûn-thô͘ kang-tiûⁿ kā in ê thó͘-tē chhiúⁿ--khı̀, kin-á-jı̍t, in beh khı̀ kā thó͘-tē thó--tńg-lâi! 9 tiám-poàⁿ, tı̄ pō͘-lo̍k kóng-tiûⁿ chı̍p-ha̍p ê Truku kiâⁿ chhut kóng-tiûⁿ, chí-hui-chhia tı̄ thâu-chêng chhoā-lō͘, Yawas khiâ o͘-tó͘-bái toè tı̄ piⁿ--á, chí-hui-chhia āu-piah, kui lō͘ lóng sı̄ Truku cho̍k-jı̂n, ū sái-chhia--ê, oan-nā ū khiâ o͘-tó͘-bái--ê. Lı̄-khui kóng-tiûⁿ bô joā hn̄g ê só͘-chāi, Asia âng-bûn-thô͘ kang-tiûⁿ ê ūn-sàng-toà, tō koân-koân chhāi tı̄ chiàⁿ-chhiú pêng lō͘-piⁿ. Chhia-tūi it-tı̍t sūn kang-tiûⁿ chhiūⁿ-koe̍h piⁿ ê toā-lō͘ sái--khı̀, iân-lō͘ khoàⁿ ē tio̍h chhiūⁿ-koe̍h lāi-té ê piàn-tiān-só͘, ke-khı̀, chhiúⁿ-pâng… “Asia ê oân-kang hiaⁿ-tı̄, chhiáⁿ lín an-sim tńg-khı̀ choh-sit, m̄-bián hoân-ló. Gún kan-taⁿ sı̄ beh tńg-lâi chèng-choh, m̄-sı̄ lâi phò-hoāi kang-tiûⁿ--ê, lín bián hoân-ló--lah!” Chí-hui-chhia iân-lō͘ it-tı̍t hòng-sàng. Kang-tiûⁿ chhiūⁿ-koe̍h lāi-té, put-sı̂ chhut-hiān 10 kúi ê tı̀ n̂g kang-tē-bō-á ê kang-lâng, kui tı̄n khiā tı̄ hia teh siòng. “Kám-siā Asia âng-bûn-thô͘ kang-tiûⁿ chiah-nı̄ kāu lé-sò͘, phài chiah-nı̄ chē lâng beh hoan-gêng Truku tńg--lâi!” Chí-hui-chhia kè-sio̍k teh hòng-sàng. Chai-iáⁿ Truku beh lâi, Asia choan-kang thêng-kang chı̍t kang, tōng-iōng só͘-ū oân-kang, beh choân-le̍k chó͘-tòng Truku. Koè kang-tiûⁿ chiàⁿ-mn̂g, chhia-tūi oat koè chiàⁿ-chhiú pêng soaⁿ-lō͘ jı̍p--khı̀, peh kiā, beh it-tı̍t kiâⁿ khı̀ kàu Asia âng-bûn-thô͘ kang-tiûⁿ oá soaⁿ hit-pêng ê toā-mn̂g, hia ū chı̍t phiàn khǹg o͘-thoàⁿ ê toā khàng-tē, Truku ê thó͘-tē tō tı̄ hia. Chhia-tūi lâi kàu ūi, kang-tiûⁿ toā-mn̂g koaiⁿ gah bah-bah-bah, lāi-té koh ū chı̍t tâi siuⁿ-á-chhia tū--leh, hō͘ lâng bô hoat-tō͘ kā mn̂g sak--khui. Toā-mn̂g kap nn̄g pêng chhiūⁿ-koe̍h āu-piah, khiā chiâⁿ pah ê Asia ê kang-lâng, toā-mn̂g goā-kháu, 20 thóng ê kèng-chhat chhiú giâ tn̂g-kùn-á, pâi nn̄g choā chhāi tı̄ lō͘-piⁿ. Asia ê Chiu keng-lí chhoā 4~5 ê lâng, toā-pān toā-pān tòng tı̄ mn̂g-chhùi. “Lán ê chó͘-sian chū chá tō tı̄ chia seⁿ-thoàⁿ, mā kā chiah-ê thó͘-tē lâu hō͘--lán, chia pún-té tō-sı̄ lán ê, tńg-lâi ka-kı̄ ê só͘-chāi pún-té tō-sı̄ lán ê koân-lı̄. Kin-á-jı̍t, lán Truku beh tńg-lâi ka-kı̄ ê só͘-chāi, lán beh tńg-lâi ka-kı̄ ê thó͘-tē chèng-choh!” Chí-hui-chhia téng-thâu, Yekong chhiú giâ mài-kuh, toā-toā-siaⁿ teh soan-sı̄, kháu-khı̀ kian-tēng. Soan-sı̄ soah, Sı̂n-ha̍k-ı̄ⁿ Goân-chū-bı̂n ha̍k-seng-tūi sûi chhiú sio-khan, tı̄ toā-mn̂g thâu-chêng ûi chı̍t ê poàⁿ-ı̂ⁿ-kho͘-á, kā kèng-chhat kap Asia ê lâng tòng tiàm goā-kho͘-ûi. Kúi ê Truku o͘-chih-sáng kiâⁿ jı̍p kho͘-á lāi-té, beh iōng thoân-thóng ê hong-sek(gaya), chı̀n-hêng Tmukuy Masu gı̂-sek. In seng tı̄ thô͘-kha ó͘ chı̍t ê khang, chhùi--nih ná liām ná kā chhiú--nih ê ı̂ⁿ-chio̍h-thâu the̍h koân-koân: “Ǹg-bāng kin-nı̂ ê siu-sêng tō chhiūⁿ chit lia̍p chio̍h-thâu, tāng gah chhng-khò͘ ê thiāu-á to chih-chàiⁿ bē tiâu.” Kā koé chhio̍k-chhio̍k--leh, tàn lo̍h khang--nih: “Ǹg-bāng Truku kap thó͘-tē ê kám-chêng hām chit tè koé kāng-khoán, liâm gah koah bē khui.” Koh lâi, chhùi kâm sió-bí-chiú, tùi hit ê khang phùi--lo̍h: “Ǹg-bāng hō͘-chúi chhiūⁿ chiú hiah-nı̄ kāu hiah-nı̄ chē.” Soà--lo̍h, kā chúi-cheⁿ-chio̍h the̍h--khí-lâi koh khǹg--lo̍h-khı̀: “Ǹg-bāng chó͘-lêng sù hoé hō͘ Truku, kā gún chhiō-kng, hō͘ gún sio-joa̍h.” Liām soah, kā chéng-chí iā--jı̍p-khı̀, gı̂-sek tō oân-sêng--a. Samaw kap Yawas in chiah-ê siàu-liân--ê, ba̍k-chiu lóng thíⁿ-kim-kim, tiām-tiām khiā leh khoàⁿ. Gı̂-sek kiat-sok, Truku iau-kiû Asia kā mn̂g phah--khui, hō͘ Truku cho̍k-jı̂n jı̍p-khı̀ ka-tı̄ ê thó͘-tē chèng-choh. Asia ê Chiu keng-lí chit chūn iōng ka-tı̄ chhoân ê mài-kuh hoah-siaⁿ:『這是亞泥的土地, 你們無權進來…』Oē iáu-boē kóng soah, Yekong ê là-pah-siaⁿ sūi kā khàm--koè: “Goán bô beh thiaⁿ lí kóng siáⁿ, hō͘ goán jı̍p--khı̀, kā thó͘-tē hêng--goán!” “In boài hō͘ lán jı̍p--khı̀, lán tō ka-kı̄ jı̍p--khı̀!” Chí-hui-chhia téng-thâu, Bayan chiap-soà lo̍h kóng. Truku cho̍k-jı̂n chhı̍h oá--khı̀, tı̄ Asia toā-mn̂g-kháu, kui tı̄n kā Chiu keng-lí ûi--khí-lâi, toā-siaⁿ kā jiáng. Pún-té chhāi tı̄ lō͘-piⁿ hit 20 thóng ê kèng-chhat, sûi cháu lâi beh pó-hō͘ Chiu keng-lí, ha̍k-seng-tūi kap kèng-chhat tō án-ne khí chhiong-tu̍t, tı̄ Asia mn̂g-kha-kháu khiú lâi khiú khı̀. Khoàⁿ-tio̍h chit ê tiûⁿ-bı̄n, Yawas sim-koaⁿ-té tám-tám, gāng-gāng khiā--leh, m̄-chai kám beh chhı̍h koè tàu sak. 『還我土地! 還我土地!…』Ha̍k-seng-tūi chhoā-thâu khai-sí hoah kháu-hō, Yawas kui sian lâng HIGH--khí-lâi, mā toè ta̍k-ê toā-la̍t hoah chhut siaⁿ. Samaw m̄-chai tang-sı̂ cháu lâi Yawas seng-khu piⁿ, kā『請勿阻擋Truku返回』ê chhâ-pang pâi-á sa hō͘--i, tō chông jı̍p-khı̀ khí chhiong-tu̍t ê jı̂n-kûn lāi-té, Yawas tùn--chı̍t-ē, kā pâi-á giâ gah koân-koân-koân, toè Samaw chiⁿ--koè-khı̀. Kheh kàu thâu-chêng, Yawas khoàⁿ-tio̍h Yekong kap Miyai, chhiú the̍h hoat-ı̄ⁿ ê phoàⁿ-koat-su kap thó͘-tē ê só͘-iú-koân-chn̄g, iau-kiû Chiu keng-lí kā mn̂g khui--khui. Chiu keng-lí hoâiⁿ-pà-pà:『你們的耕作存續期只有10年, 你們也已經超過10年沒有在這裡耕作, 早已喪失土地使用權了! 法院不了解狀況就亂判, 這塊地是政府租給亞泥的, 你們自己去找政府要, 我絕對不讓你們進來!』Yashi thiaⁿ gah chiâⁿ bē-sóng, toā-siaⁿ kā chhoh:『土地被你們霸佔, 怎麼行使耕作權!』 Chiu keng-lí chı̍t kho͘ kâu-thâu niáu-chhí-bı̄n, Yawas chiâⁿ siūⁿ beh iōng chhiú--nih ê pang-á kā taiⁿ--lo̍h-khı̀. “Tńg-lâi lán ka-kı̄ ê thó͘-tē, sı̄ lán seⁿ-pún tō ū ê koân-lı̄, bô lâng ē-sái kā lán chó͘-tòng, lán chit-má tō beh jı̍p--khı̀, lán kian-chhı̂ hui po̍k-le̍k, m̄-koh nā ū lâng tāng-kha tāng-chhiú beh chó͘-tòng, Truku ū koân-lı̄ hoán-khòng!” Bayan tı̄ chí-hui-chhia téng-thâu toā-siaⁿ hoah. Koè bô poàⁿ tiám-cheng, kui tı̄n lâng iû-goân tı̄ toā-mn̂g-kháu teh sio-chèⁿ, Toā-mn̂g tò-pêng 20 kong-chhioh thih-si-bāng-á hia ū lâng teh hoah-hiu, ha̍k-seng-tūi tng teh kap Asia ê kang-lâng sio-sak, chhiong-tu̍t pí tú-chiah koh khah toā, sak bô joā kú, ha̍k-seng-tūi kā thih-si-bāng-á sak tó--khı̀, toā-mn̂g chia ê Truku lóng chông--lâi, nn̄g pêng sak koè-lâi chiⁿ koè-khı̀, koè bô 10 hun-cheng, Truku tō chı̍t ê chı̍t ê lòng--jı̍p-khı̀-a. Yawas mā koáⁿ-kín kā chhâ-pang pâi-á giâ--leh, toè Samaw ê kha-chhng āu nǹg jı̍p-khı̀ kàu lāi-tè. Tú-chiah, ta̍k-ê lóng chù-sı̂n tı̄ toā-mn̂g-kháu sio-chèⁿ ê sı̂, ha̍k-seng-tūi-tiúⁿ Yibun chá tō chhoā 4~5 ê lâng, kā piⁿ--á ê thih-si-bāng-á ka tn̄g--a. Lâi kàu lāi-té, nn̄g pêng ê lâng kè-sio̍k sio-chèⁿ, ha̍k-seng-tūi pâi chı̍t choā, it-tı̍t hiòng thâu-chêng sak--khı̀, sió-khoá sak chhut chı̍t-koá khong-kan, kı̂-thaⁿ Truku tō kín toè tı̄ āu-piah, ū ê chhò chhiū-á, ū ê khau-chháu, ū ê ku̍t-thô͘ ó͘-khang, kā chhiū-chai chèng--lo̍h-khı̀. Ba̍k-nih-á niâ, kui phiàn po͘-á, lóng hō͘ Truku chiàm--khí-lâi-a. Yawas soà-chhiú kā pang-á phiaⁿ--leh, chông koè-khı̀ thâu-chêng, hām ha̍k-seng-tūi chò-hoé beh kā Asia ê kang-lâng sak--khui. Ná sak ná sak, Asia ê kang-lâng chin kín tō lóng thè tùi āu-piah khı̀--a. Yawas hām ha̍k-seng-tūi pâi chò chı̍t choā kiù-chhat-soàⁿ chē lo̍h thô͘-kha, kap Asia kang-lâng sio tùi-siòng. Oa̍t-thâu kā khoàⁿ, kui tı̄n Truku cho̍k-jı̂n khoaⁿ-khoaⁿ-á ùi po͘-á téng-thâu kiâⁿ--lo̍h-lâi, ná kiâⁿ ná chèng chhiū-chai, Yawas khoàⁿ gah chiâⁿ kám-sim, ba̍k-sái soah liàn--chhut-lâi. Tò-chhiú pêng, chı̍t ê siàu-liân ê Asia kang-lâng m̄-goān cháu, ngē-sí tòng tı̄ hia, Samaw mā ngē-sí beh ka i sak lı̄-khui. “Lí sı̄ sáⁿ siâu tòng tı̄ chia boài cháu?” Samaw chin pháiⁿ siaⁿ-sàu. “Che sı̄ goán kang-tiûⁿ, sı̄ án-choáⁿ ài hō͘ lín jı̍p--lâi?” Hit ê siàu-liân kang-lâng án-ne ı̀n. “Lín kong-si kā thó͘-tē chiàm--khı̀, hō͘ goán boē-tàng kè-sio̍k tı̄ chia seng-oa̍h, goán beh lâi kā thó͘-tē thó--tńg-lâi!” Samaw jú kóng jú toā-siaⁿ. “Hō͘ lín jı̍p--lâi, goán tō bô thâu-lō͘--a, lín ài seng-oa̍h, goán tō bián seng-oa̍h nih!” Siàu-liân--ê mā toā-siaⁿ jiáng. Samaw khí-phùi-bı̄n, toā-toā-la̍t kā sak heng-khám, siàu-liân kang-lâng tò-thè kúi-lō pō͘, hiám-á tò-thâu-chai, chiah khiā chāi niâ, kûn-thâu-bó tēⁿ--leh tō beh bok Samaw, āu-piah ê Asia kang-lâng kín kā giú--koè-khı̀, Yawas mā kín koè-khı̀ kā Samaw mo͘h--leh, tāi-chı̀ chiah soah--khı̀, nā bô, hoān-sè ē phah--khí-lâi. Chiàⁿ-chhiú pêng hia, tı̄ chı̍t tı̄n Asia kang-lâng bı̄n-thâu-chêng, Saki kā chhâ-pang pâi-á tùi thô͘-kha chhah--lo̍h, ná-chhiūⁿ teh soan-sı̄ i tńg-lâi kàu ka-tı̄ ê thó͘-tē--a. Saki khai-sí tı̄ thô͘-kha ó͘-khang, kā chı̍t châng chı̍t châng keng-chio chèng--lo̍h-khı̀, 27 tang--a, i tán chit kang tán 27 tang--a. Yawas kā Samaw giú--leh, koh chē tńg ha̍k-seng-tūi lāi-té. Saki kè-sio̍k ku̍t-thô͘ bô thêng-khùn, i khiau-ku khiau-ku, thâu-mn̂g mā lóng pe̍h--khı̀-a, Yawas ê ba̍k-chiu it-tı̍t teh khoàⁿ Saki, thâu-khak lāi, chı̍t-koá iáⁿ-jiah mā teh tńg-se̍h, soah khoàⁿ gah gōng-sı̂n--khı̀. Chêng kúi nı̂, chèng-hú ê Goân-chū-bı̂n úi-oân-hoē khı̀ hoat-ı̄ⁿ kò Truku, Yekong chio in chiah-ê siàu-liân--ê chò tiau-cha, thiaⁿ pō͘-lo̍k lāi-té ê sı̄-toā-lâng kóng--tio̍h, Yawas chiah chai-iáⁿ chin chē koan-hē chit tè thó͘-tē ê tāi-chı̀. Kap kı̂-thaⁿ Truku kāng-khoán, Saki it-tı̍t tı̄ chit tè chó͘-sian lâu hō͘--in ê thó͘-tē téng-koân teh seng-oa̍h. 27 tang chêng, chèng-hú kóng chia sı̄ “Goân-chū-bı̂n pó-liû-tē”, sı̄ “chèng-hú ê tē”, Truku tı̄ chia chèng-choh, sǹg sı̄ kā chèng-hú cho͘ tē, ùi hit tang khai-sí sǹg, Truku ài kè-sio̍k tı̄ chia chèng-choh chhiau-koè 10 tang, chit tè tē chiah ē piàn-chò sı̄ Truku cho̍k-jı̂n--ê. Koè 2~3 tang, Asia kong-si ê lâng lâi kàu chia, kóng beh tı̄ chia khí kang-tiûⁿ. Hiong-kong-só͘ kiò pō͘-lo̍k ê Truku khı̀ khui hia̍p-tiau-hoē, iau-kiû Truku kā thó͘-tē niū hō͘ Asia kong-si sú-iōng, koh kóng ē hoat pó͘-sióng-kim hō͘ tē-chú. Saki tong-tiûⁿ kóng boài, soah hō͘ hiong-kong-só͘ kap Asia kong-si ê lâng pháiⁿ, in háⁿ kóng nā boài khı̀ niá pó͘-sióng-kim, tō beh kiò hoat-ı̄ⁿ lâi chhú-lí. Tiuⁿ-tû kúi-lō kang liáu-āu, Saki sui-bóng chiâⁿ m̄ kam-goān, m̄-koh koh kiaⁿ ē hō͘ hoat-ı̄ⁿ lia̍h--khı̀, boé--á iáu-sı̄ khı̀ niá--a, “chı̍t hun tē nn̄g chheng kho͘, goá ê tē tō án-ne bô--khı̀-a!” Hit nı̂ toè Yekong chò tiau-cha ê sı̂, Saki bû-nāi ê kháu-khı̀, Yawas thâu-khak lāi iáu kı̀ gah chin chheng-chhó. “Siáⁿ-mih pó͘-sióng-kim? Goá oáⁿ-ko chı̂ⁿ mā bô the̍h--tio̍h! Goá bô pàng-sak thó͘-tē, mā m̄-bat niá koè siáⁿ-mih pó͘-sióng-kim, sı̄ án-choáⁿ goá ê keng-chio-hn̂g tō piàn-chò in ê kang-tiûⁿ--a?” Login jú kóng jú siūⁿ-khı̀. “Goá beh khı̀ chèng-choh ê sı̂, Asia kong-si ê lâng kā goán koáⁿ-cháu, kóng chèng-hú í-keng kā tē cho͘ hō͘ in iōng--a, 20 tang liáu-āu tō ē hêng. M̄-koh kàu taⁿ to 20 kúi tang--a, Asia iáu kāng-khoán kā tē chiàm tiâu-tiâu…” Hóng-būn Ciru ê sı̂, Yawas hoat-hiān Truku sı̄ án-choáⁿ hông phiàn, án-choáⁿ hông sái-lōng--ê. 3 tang chêng, Goân-chū-bı̂n úi-oân-hoē khı̀ hoat-ı̄ⁿ kò Truku, kóng Truku kā thó͘-tē choán cho͘ hō͘ “hui goân-chū-bı̂n” sú-iōng, ûi-hoán “pó-liû-tē koán-lí pān-hoat” ê kui-tēng, beh kā Truku ê thó͘-tē koân-lı̄ thô͘-siau. Pō͘-lo̍k lāi-té, ta̍k-ê lóng sa bô hoat-seng siáⁿ-mih tāi-chı̀. Siu-tio̍h choá-chn̄g ê sı̂, khoàⁿ bô teh siá siáⁿ; chiūⁿ hoat-têng ê sı̂, mā thiaⁿ bô hoat-koaⁿ teh kóng siáⁿ; hoat-lu̍t sı̄ siáⁿ-mih, in thâu-khak lāi lóng sa-bô-cháng…án-ne sı̄ beh án-choáⁿ? Ta̍k-ê lóng chin bû-nāi mā chin kiaⁿ-hiâⁿ. M̄-koh, Yekong m̄-goān hòng-khı̀: “Chèng-hú koh khah ok-chit, châi-thoân koh khah ah-pà, lán lóng ài kā thó͘-tē thó--tńg-lâi!” Boé--á, Yekong chhoē-tio̍h chin chē chu-liāu, ū tē-chú hòng-khı̀ thó͘-tē koân-lı̄ ê hòng-khı̀-su, ū kā thó͘-tē niū hō͘ Asia kong-si ê tông-ı̀-su, koh ū niá pó͘-sióng-kim ê chheng-chheh…chit chūn chiah chai-iáⁿ, tong-chhoe-sı̂, ūi-tio̍h beh hō͘ Asia kong-si tı̄ chia khí kang-tiûⁿ, hiong-kong-só͘ ê lâng chò ké chu-liāu, téng-thâu koh ū ké chhiam-miâ, iōng chiah-ê là-sap-pō͘ kā Truku chau-that, iōng phiàn--ê, iōng háⁿ--ê, iōng chhiúⁿ--ê, Truku ê thó͘-tē tō-sı̄ án-ne piàn-chò âng-bûn-thô͘ kang-tiûⁿ--ê! Goân-chū-bı̂n úi-oân-hoē siūⁿ beh kā àn-kiāⁿ thiat-hoê, hoat-ı̄ⁿ chò phoàⁿ-koat chı̀n-chêng, Asia kong-si mā phài lâng beh lâi hô-kái, kóng ē-tàng hoat koh khah chē pó͘-sióng-kim. Truku khui-hoē koat-tēng: “Truku boài tı̍h chı̂ⁿ, goán kan-taⁿ beh tı̍h ka-kı̄ ê thó͘-tē!” Kū-nı̂ 8--goe̍h, hoat-ı̄ⁿ soan-phoàⁿ, pok-hoê Goân-chū-bı̂n úi-oân-hoē kò Truku ê àn-kiāⁿ, thó͘-tē iáu-sı̄ Truku--ê, kui pō͘-lo̍k ta̍k-ê lóng hoaⁿ-hoaⁿ-hí-hí, koh choan-kang kí-pān gı̂-sek chè-pài chó͘-lêng. M̄-koh kúi-lō goe̍h-jı̍t koè--khı̀-a, Asia âng-bûn-thô͘ kang-tiûⁿ iû-goân bô beh poaⁿ-soá, chèng-hú mā bô beh chhut-bı̄n chhú-lí, phoàⁿ-koat ná teh phoàⁿ-koat--leh. Truku m̄-chiah koat-tēng ka-tı̄ lâi thó thó͘-tē. Truku tı̄ po͘-á chia hoan-tē, chhò chhâ-kho͘, chèng chhiū-chai, bú beh tiám goā cheng kú, kèng-chhat, Asia kang-lâng kap Chiu keng-lí it-tı̍t khiā tı̄ piⁿ--á khoàⁿ, boài hō͘ Truku kè-sio̍k hiòng lāi-té khı̀. Chit chūn, chı̍t ê a-pô khiā tı̄ Chiu keng-lí bı̄n thâu-chêng, chhiú pí tùi hit tı̄n Asia kang-lâng āu-piah khı̀, “Goá ê thó͘-tē tı̄ hit-pêng, goá beh khı̀ hia…” Chhùi--nih ná liām ná beh kiâⁿ--koè-khı̀, Chiu keng-lí hiu Asia kang-lâng kā tòng, bô beh hō͘ i koè--khı̀. “Sı̄ án-choáⁿ boài hō͘ goá koè? He sı̄ goá ê tē, goá beh koè--khı̀!” A-pô toā-siaⁿ jiáng, ngē beh koè--khı̀, kang-lâng kā sak--tńg-lâi. Tı̄ po͘-á teh choh-sit ê Truku khoàⁿ--tio̍h, chông--lâi, beh kā kang-lâng sak--khui, hō͘ a-pô ē-sái kàu ka-tı̄ ê tē chèng-choh. Tō án-ne nn̄g pêng koh chhiong-tu̍t--khí-lâi. Yawas mā kín chông lâi tàu sak lâng. Tı̄ jı̂n-kûn lāi-té, Yawas hoat-hiān seng-khu piⁿ, tı̀ kang-tē-bō-á ê lâng pí tú-chiah ke beh chı̍t poē, m̄-chai sı̄ tùi toh-ūi pok--chhut-lâi-ê. Tò-chhiú pêng, chı̍t ê ha̍k-seng nǹg jı̍p-khı̀ kàu hong-só-soàⁿ āu-piah, sūi hō͘ lâng ùi io mo͘h--leh, hò͘ chhut-lâi goā-kháu. Bô tiuⁿ-tı̂, Yawas bı̄n hông bok chı̍t kûn, Asia kang-lâng kap kèng-chhat jú lâi jú chho͘-ló͘, bē-su kā Truku tòng chò thó͘-húi kāng-khoán. Ciru mā hông bok--tio̍h, khı̀-phut-phut, m̄-chai ùi toh-ūi sa-tio̍h kùn-á, giâ koân-koân chhiong--jı̍p-khı̀ tō beh hàm--lo̍h. Samaw tı̄ i piⁿ--á, kā kùn-á khiú--leh, kín kā Ciru ûi--chhut-khı̀. Tiûⁿ-bı̄n jú lâi jú loān, in ê lâng jú lâi jú chē, chhut-chhiú mā jú lâi jú tāng, Truku hông tòng tı̄ ka-tı̄ thó͘-tē goā-kháu, chhiong bē koè hong-só-soàⁿ. Hoân-ló Truku chiah-ê sı̄-toā-lâng ē siū-siong, Truku cho̍k-jı̂n koat-tēng bô beh koh ngē chhiàng--lo̍h-khı̀. “Chia sı̄ Truku ê thó͘-tē, goán bē hòng-khı̀, m̄-lūn lín iōng siáⁿ-mih chhiú-toāⁿ beh chó͘-tòng, goán it-tēng ē koh tò-tńg--lâi!” Yekong toā-siaⁿ kā Chiu keng-lí jiáng. Yawas sim-koaⁿ-té chin m̄ kam-goān, bô chı̂ⁿ bô sè ê lâng kám tio̍h ài hō͘ chèng-hú kap châi-thoân án-ne chau-that? Lı̄-khui ê sı̂, Yawas kiâⁿ tı̄ hit ê a-pô seng-khu piⁿ, siūⁿ beh kap i kóng kúi kù oē, soah kóng bē chhut-chhùi, kan-taⁿ tiām-tiām toè tı̄ a-pô piⁿ--á. A-pô ná kiâⁿ ná oa̍t-thâu khoàⁿ, Yawas thiaⁿ-tio̍h o͘-bah-sáng chhùi--nih it-tı̍t liām: “Goá beh tńg--khı̀, he sı̄ goá ê thó͘-tē…” (TGB Thong-sı̀n tē 20 kı̂, 2001 nı̂ 05 goe̍h)