Goá khiàm chı̍t-hāng

Téng lé-pài-2 khó-chhı̀, pài-4 kau chok-gia̍p, pài-5 ài kā lāu-su pò-kò, chit lé-pài-1 ài chiūⁿ-tâi pò-kò, pài-2 ài koh khó-chhı̀, pài-4 mā koh ài kau chok-gia̍p------ Sò͘-ha̍k, Kang-têng, Kang-têng, Eng-gí, Hàn-jı̄ hoan-e̍k siáu-soat, Tek-gí, Kang-têng, Ka-pi, Sò͘-ha̍k------ Ah hó--a! Boài chhap--i-a! Khoàⁿ 1-ē-á tiān-sı̄, pàng hō͘ khin-sang, kek hō͘ gōng-gōng, khoàⁿ chú-chhı̂- jı̂n『吳宗憲』kóng-chhiò-khoe. Pak-kiaⁿ-oē, Tâi-oân kô͘-ı̂, Chong-Kô͘, Chong-Hoâ-bı̂n-Kô͘------ Ho! Ho! Ho! Ha! Ha! Ha!---- Tò-tńg-lâi goá ê sió sè-kài, hoat-hiān goá ê tâi-gí kan-taⁿ tı̄ chit-ê 4-pêng-goā ê pâng-keng lāi-té chiah ū lō͘-iōng, hoat-hiān, goá ê chheh-keh-á téng-koân, ū 3-pún Eng-gí jı̄-tián, 2-pún Mandarin jı̄-tián, 1-pún Tek-gí jı̄-tián---- Kám-kak ài khùn--a. Goā-kháu àm-kong-chiáu koh teh kiò, thiⁿ eng-kai iáu-boē kng--ê. (TGB Thong-sı̀n tē 2 kı̂, 1999 nı̂ 11 goe̍h)