Goá sı̄ 1 chiah Tâi-oân-káu
Kha-kut lò-lò chin gâu cháu
kha-tê-á chhiūⁿ kiuⁿ-á kha
Boé-á khiàu-khiàu, oan-oan khiau-khiau
Kài-sêng liâm-le̍k-á, ē-sái-chit koah-chháu
Chı̍h-pan o͘-o͘ sı̄ te̍k-sek, Lāi-hâng-lâng 1 khoàⁿ put-tit-liáu
o-ló goá sı̄ chiàⁿ-káng ê Tâi-oân-káu
................................
Goá sı̄ 1 chiah Tâi-oân-káu
Hı̄ⁿ-á kiā-kiā,o͘ phı̄ⁿ-kóng, saⁿ-kak ba̍k
Kha-thiāu tn̂g koh tı̍t, Koân-tō͘ ū-kàu
lāi-hâng-lâng o-ló ū hêng-ui
goā-hâng--ê kóng goá ok-khia̍k-khia̍k
Sûi-bóng pháiⁿ-khoàⁿ-bı̄n
Chhù-lāi kò͘ tiâu-tiâu
Lâng-lâi-kheh-khı̀
Goá ē-hiáu hoḿ, hoḿ, hoḿ
Pò-kò chú-lâng: lâng-kheh lâi-kàu
Lāi-sim chû-pi m̄-bat kā-lâng kā
chú-lâng o-ló goá chin bat tāi-chı̀
In-ūi Goá sı̄ 1 chiah Tâi-oân-káu
....................................
Goá sı̄ 1 chiah Tâi-oân-káu
m̄-sı̄ Jı̍t-pún chhiu-tiân-khián
mā m̄-sı̄ Pak-kiaⁿ hô͘-lı̂-káu
ia̍h-sı̄ chhâ-khián, thó͘-sah phó͘-mé-á káu
In lóng-sı̄ goā-lâi-káu
ū--ê beh sio-phah
ū--ê hō͘-lâng khoàⁿ-súi chò thióng-bu̍t
ū--ê sûi-bóng ē kò͘-ke
m̄-koh bē-hiáu kò͘ chng-thâu
Kan-nā Goá ---- Tâi-oân-káu
Tû-liáu kò͘-chhù í-goā
koh ē chng-thâu chhù-āu
sûn-thâu khoàⁿ-boé
m̄-hō͘ pháiⁿ-lâng ta̍h-kha-kàu
Goá ū siā-khu koan-liām
Goá chai-iáⁿ kha-ta̍h-sı̍t-tē
liáu-kái Tâi-oân sı̄ Goá-tau
só͘-í Goá sı̄ chiàⁿ-káng ê Tâi-oân-káu
........................
Goá sı̄ 1 chiah Tâi-oân-káu
ǹg-bāng goā-lâi- -ê hiaⁿ-tı̄ chí-moāi
Nā beh Tâi-oân khiā-khí
Tiō ài lo̍h-thô͘ tèng-kin
chiong Tâi-oân khoàⁿ-chò Lán-tau
m̄-thang kan-nā siūⁿ-beh lo̍h-hio̍h kui-kin
siàu-siūⁿ beh tńg-khı̀ hn̄g-hn̄g kı̀-tı̀ ê goân-hiong
Lán lâi saⁿ-kap keng-êng
Tâi-oân chit-tè han-chı̂-hn̂g
Hō͘ I ōng-ōng seⁿ-thoàⁿ hoat-tián bē hoat cha̍p-chháu
án-ni Lán tiō lóng-sı̄ Tâi-oân-káu
................................
Goá sı̄ 1 chiah Tâi-oân-káu
m̄-bián koh kóng
khah ài mā ài Gún-tau
chia ū Gún-ê thó͘-tē gí-giân bûn-hoà
ǹg-bāng ū Tâi-oân-sim ê goā-lâi-káu
ē-tàng kap Gún kāng-sim lâi chhòng-chō
Lán Tâi-oân ê sin bûn-hoà
ē-tàng tı̄ kok-chè khiā-khí
chiâⁿ-chò ū chun-giâm ū lí-sióng ê kok-ka
Lín kám chai-iáⁿ Goá ê miâ
Gún chú-lâng kiò Lah-jih
I kā-goá hō-chò Theh-lih
I sı̄ Tâi-oân-lâng
Goá sı̄ Tâi-oân-káu.
