Goá sı̄ A-tiong

Lán hō͘ Chi-na lâng koán chı̍t-ê kú,tı̄ Tâi-oân,lâng kap lâng ê tiong-kan hō͘-siong lóng bē-tàng sı̀n-jı̄m:m̄-chai lí sı̄ “Tâi-oân-lâng ” iah-sı̄ “Tiong-kok-lâng”; m̄-chai lí sı̄ “Pún-séng-lâng ”iah-sı̄ “Goā-séng-lâng ”; m̄-chai lí sı̄ “Kok-á-bı̂n-tóng” ê iah-sı̄ “Bı̂n-á-chı̀n-tóng” ê . Tāi-ke lóng hō͘-siong chhai-gı̂, tú--tio̍h ê sı̂, tāi-seng to chin ài chai lí ê sin-hūn, mā sı̂-sı̂ kiông iàu-kiû tùi-hong piáu-bêng lí ê sin-hūn （identity), chiah ū hoat-tō͘ kè-sio̍k kóng--lo̍h-khı̀. A-káu peh--á siū-tio̍h chit-chióng bûn-hoà ê éng-hióng, sı̂-sı̂ sim-lāi lóng ū ap-pek-kám, kám-kak sı̂-sı̂ tio̍h piáu-bêng I ê sin-hūn, m̄-chai sè-kài hiah-nı̍h khoah hiah-nı̍h toā, sè-kan iáu-koh ū chin chē lâng kap lâng ē-tàng hō͘-siong sı̀n-lāi, ē-tàng hō͘-siong kau-thong ê só͘-chāi. I siū ê ap-le̍k lú toā, thê-hông lú toā, thê-hông lú toā, lú pháiⁿ koè-jı̍t. Tı̄ Tâi-oân sı̄ án-ne, khı̀ kàu Bí-kok mā án-ne. Hit pái A-káu-peh--á khı̀ Toronto khoàⁿ in cha-bó͘-kiáⁿ, kám-kak A-tok-á lâng-lâng chin hó chò-tı̄n, tāi-ke ke-á-lō͘ tú-tio̍h lóng ū chhiò-bı̄n, lóng ē kóng-oē. Tān-sı̄ A-káu-peh--á Eng-gí thiaⁿ bô, m̄-chai in teh kóng sím-mı̍h. Thàu-chá khí--lâi, A-káu-peh--á tı̄ in cha-bó͘-kiáⁿ ê chhù ê hū-kı̄n kiâⁿ-lâi kiâⁿ-khı̀ teh sàn-pō͘ kiâⁿ ke-lō͘, hn̄g-hn̄g khoàⁿ-tio̍h chı̍t-ê Tok-phı̄ⁿ-á a-peh kiâⁿ--lâi, Tok-phı̄ⁿ-á a-peh toā-siaⁿ kā A-káu-peh--á hoah kóng: “How do yo͘ do ?” A-káu-peh--á thiaⁿ chı̍t-ē, kiaⁿ chı̍t-tiô, m̄-chai beh án-choáⁿ kā èng, tān-sı̄ I tùi Tâi-oân toà--lâi-ê hā-ı̀-sek kā I kóng, I it-tēng sı̄ beh chai lí sı̄ sím-mı̍h-lâng, tō kā Tok-phı̄ⁿ-á a-peh toā-siaⁿ ı̀n-kóng: “Goá sı̄ A-tiong!” Keh-jı̍t thàu-chá, A-káu-peh--á chiàu-siông khí-lâi tı̄-hia sàn-pō͘ kiâⁿ ke-lō͘. Hó-sí m̄-sí, koh khı̀ tú-tio̍h hit-ê A-tok-á-peh--á, A-tok-á-peh--á hn̄g-hn̄g tō chhiò-bi-bi kiâⁿ-lâi, toā-siaⁿ koh teh hoah: “How do yo͘ do ?” A-káu-peh--á m̄-káⁿ tài-bān, tō kín kā I èng kóng: “Goá sı̄ A-tiong!” Tńg-lâi chhù-lin, A-káu-peh--á sim-lāi chit-ê kat it-tı̍t tháu bē-khui, chiū khı̀ mn̄g in cha-bó͘-kiáⁿ: “ Lín chia ê A-tok-á sı̍t-chāi chin u-ru-sai, goá cha-hng chiah kā kóng goá sı̄ A-tiong, sı̄ án-choáⁿ I kin-á-jit koh kā goá mn̄g goá sı̄ siáⁿ-mih-lâng !? Goá tio̍h ài kā I kóng kúi-pái I chiah chai-iáⁿ goá sı̄ A-tiong !? ” A-káu-peh--á lú-siūⁿ khi-mo͘ lú bái. In cha-bó͘-kiáⁿ kā I kóng: “M̄-sı̄ --lah! A-pa! Lâng nā kā lí kóng How do yo͘ do ê sı̂, lí tō kāng-khoán kā ı̀n How do yo͘ do, án-ne tō hó-sè liu-liu--lah!” Koè-jı̍t thàu-chá, A-káu-peh--á chin chá tō lâi ke-á-lō͘ hit-ê kak-thâu-á hia tán, I ê sim-lāi í-keng chún-pı̄ hó-sè hó-sè, chai-iáⁿ beh án-choáⁿ kap A-tok-á kóng-oē--lah. “Chím-má hō͘ goá tú--tio̍h, goá tō beh seng chhut-siaⁿ kā I chhéng-an, nā-bô, sı̍t-chāi ū-kàu chin sit-lé!” A-káu-peh--á sim-lāi phah-sǹg hó-sè hó-sè. Kiat-kó ū-iáⁿ, hn̄g-hn̄g A-tok-á-peh tı̄ hia hiòng chit-pêng teh kiâⁿ lâi--lah. A-káu-peh--á kín chông--koè, toā-siaⁿ tō kā hoah: “ How do yo͘ do ?” Chit-siaⁿ chia̍h-la̍t--lah, A-tok-á-peh tùi lō͘-á ê hit-pêng soah toā-siaⁿ kā A-káu-peh--á ı̀n-kóng: “Goá sı̄ A-tiong !”