Goá siūⁿ lóng bô

Chı̍t chiah bı̍t-phang kap báng-á teh tâm-lūn. Báng-á mn̄g bı̍t-phang kóng, “Bı̍t-phang hiaⁿ! goá ū kúi-nā hāng kap lí chin sio-siāng, lí ū sı̍t, ē poe, goá iā ē; lí sı̄ thâng-thoā ê chı̍t hāng, goá iā sı̄; koh lí ē tèng--lâng , goá iā ē. M̄-kú chı̍t hāng goá siūⁿ lóng bô! Án-choáⁿ goá poe kàu hia, lâng kā goá koáⁿ kàu hia; goá nā tèng lâng, lâng beh kā goá phah. In-hô lí iû-goân ē tèng lâng, koh lâng nā hō͘ lí tèng--tio̍h, pí goá khah chia̍h-la̍t, Án-choáⁿ lâng hiah thiàⁿ lí, hiah pó-sioh lí, khí chhù hō͘ lí toà, koâⁿ-thiⁿ sı̂ koh ēng thn̂g-chúi hō͘ lí lim,che sı̄ Án-choáⁿ? Goá siūⁿ lóng bô!” Bı̍t-phang kóng, “Hió͘! Goá chēng kàu Taⁿ khiok iā m̄-bat siūⁿ tùi hia khı̀, nā kā siūⁿ chin, tāi-khài sı̄ án-ni. Lí kap goá sui-jiân pêⁿ-pêⁿ ē tèng--lâng, iáu-kú lí teh tèng lâng kap goá bô siāng khoán; lí sı̄ ūi-tio̍h beh suh lâng ê huih lâi pá lí ê pak-tó͘, ūi-tio̍h kò͘ ka-kı̄ teh tèng lâng. Goá sı̄ mê-jı̍t ūi-tio̍h jı̂n-lūi chō-hok, chhái-hoe, jióng bı̍t lâi lı̄-ek lâng. Nā ū tèng lâng, sı̄ chí-ū tı̄ lâng beh hāi goá ê sı̂ nā-tiāⁿ, sı̄ chı̍t khoán ê chèng-tong hông-oē. Chiàu goá siūⁿ tāi-khài sı̄ in-ūi án-ni, lâng chiah beh pó-sioh goá, oàn-hı̄n lí.” Bı̍t-phang kap báng-á án-ni tâm-lūn ê sı̂, hut-jiân chı̍t chiah kim-sı̂n chng kah súi tang-tang poe-lâi, chiū mn̄g in kóng, “Bı̍t-phang hiaⁿ, Báng-á ché, lín nn̄g ê teh hoē sáⁿ-hoè?” Báng-á ı̀n i kóng, “Goá ū chı̍t hāng tāi-chı̀ siūⁿ lóng bô, teh chhéng-kàu Bı̍t-phang hiaⁿ lah.” Kim-sı̂n mn̄g kóng, “Sı̄ sím-mı̍h tāi-chı̀?” Ìn kóng, “Goá chin kı̂-koài, goá ē tèng--lâng, bı̍t-phang iā ē tèng--lâng, m̄-nā án-ni, i koh pí goá khah gâu tèng--lâng, Án-choáⁿ lâng chin thiàⁿ i, chin oàn-hı̄n goá; che chin kı̂-koài, goá siūⁿ lóng bô, Kim-sı̂n ché, lí siūⁿ ū bô?” Kim-sı̂n kóng, “Hò͘! sı̄ án-ni ò͘! Goá khoàⁿ lín nn̄g ê boē sı̄ kı̂-koài, chhiáⁿ lín thè goá siūⁿ māi leh. Goá lóng bô chhin-chhiūⁿ lín ē tèng--lâng, hiah pháiⁿ; goá ta̍k jı̍t chhēng súi súi, lâng nā pâi iân-sia̍h beh chhiáⁿ lâng-kheh, goá tō chhut-khı̀ ka sûn-sûn--leh, thè lâng èng-chiap lâng-kheh, poe-lâi poe-phı̀, chhiùⁿ koa hō͘ lâng thiaⁿ. Chhin-chhiūⁿ goá án-ni kiám bô chhin-chhiat, chóng-sı̄ lâng iā hı̄n goá bē tit sí. Koè-lâi lâng iā hoah, koè-khı̀ lâng iā hiàm. Ū-sı̂-á nā bô khah hó kha-chhiú leh, soà tio̍h hō͘ lâng phah--sí. Che goá siūⁿ koh-khah bô? Bı̍t-phang hiaⁿ, báng-á ché,lín kā goá siūⁿ khoàⁿ māi.” 7 goe̍h 24 jı̍t chok (Tâi-oân Kàu-hoē-kong-pò tē 740 hō, 1950 nı̂ 8 ge̍h)