Goá thang seng khı̀

Tı̄ Au-chiu tāi-chiàn ê chho͘-kı̂, Eng-kok ê Khu-tio̍k-lām bat hō͘ Tek-kok ê chúi-lûi phah tı̂m. Chı̍t-ê chúi-peng phiau-liû tı̄ chúi-téng, chin kai-chài ū khioh chı̍t-tè pang-á. Bô kú i khoàⁿ-kı̀ⁿ chı̍t-ê chúi-peng siû oá lâi, í-keng chin bô la̍t ê khoán, só͘-í chiū chiong pang-á hō͘ i, ka-kı̄ ēng siû--ê. (In-ūi hit tè pang-á boē-thang chài nn̄g-ê). In chiū án-ni lûn-liû siû-chúi kap hioh-khùn. Keng-kè khah kú, 2 lâng lóng chin ià-siān. Thâu chı̍t-ê chiū-kóng: “Hit tè pang-á hō͘ lí, in-ūi bô pān-hoat hō͘ nn̄g-ê lóng tit-kiù, goá sí sı̄ bô iàu-kín, in-ūi goá sı̄ Ki-tok-tô͘, goá sí liáu-āu beh khı̀ ê só͘-chāi í-keng koat-tēng liáu, chóng-sı̄ kiaⁿ-liáu lí iáu-boē, goá beh tāi-seng khı̀, siat-sú lí nā tit-tio̍h kiù, chiūⁿ-lio̍k í-āu tio̍h khı̀ chhoē bo̍k-su tui-kiû éng-seng, chài-hoē!” Kóng liáu-āu chiū chiong hit tè pang-á hō͘ i, bô kú chiū tı̂m-lo̍h tı̄ hái-éng ê ē-bı̄n. Hit ê pêng-iú khoàⁿ-kı̀ⁿ i tı̂m-lo̍h--khı̀ ê chêng-kéng, boē kı̀m-tit lâu ba̍k-sái kám-kek. Bô kú, i kó-jiân hō͘ kiù-seng-chûn kiù khí-iâi, sàng kàu lio̍k-tē khı̀ liâu-ióng. Āu-lâi kó-jiân chiâⁿ-choè chı̍t-ê Ki-tok-tô͘. (Oa̍h-miā ê Bí-niû tē 37 kı̂,1957 nı̂ 6 ge̍h)