Goán tiūⁿ-lâng

Goán tiūⁿ-lâng kiò-chò A-châi. Tı̄ 1998 nı̂ i lâi Qoebec ê Montreal chhoē--goán. Tı̄ goán tau toà kò-goā-goe̍h. I ta̍k chá-khí lóng chhut-khı̀ siā-khu sàn-pō͘ ūn-tōng. Ta̍k chá-khí lóng ē tú-tio̍h 1-ê A-tok-á, I ta̍k-pái lóng kóng “Bonjo͘r”. Goán tiūⁿ-lâng kiò-sı̄ teh mn̄g i ê miâ,tiō kā ı̀n kóng“A-châi”. liân-soà 3-jı̍t lóng án-ne mn̄g. Goán tiūⁿ-lâng kám-kak chin kı̂-koài, kā goá kóng, hit-ê A-tok-á chin bô kı̀-tı̂, goá to ū kā i kóng goá kiò-chò “A-châi” , ūi siáⁿ-mih ta̍k chá-khí iáu koh mn̄g goá “Bonjo͘r” (bóng -jū). Goá kā i kóng, “Bonjo͘r” sı̄ Hoat-kok-oē, gâu-chá ê ı̀-sù. Goán tiūⁿ-lâng hóng-jiân tāi-ngō͘, keh-jı̍t i tú-tio̍h hit-ê A-tok-á ê sı̂, tō toā-siaⁿ hoah“Bóng-jū” , A-tok-á hiòng i ı̀n kóng “ A-châi” .