Hàu-hēng

Ùi Wiki Tô·-su-kóan
Cha̍p-ge̍h ê Pò Thiam-ōng Sian-siⁿ lūn Hàu-hēng chin siông-sè, chin hó, chin iàu-kín. Taⁿ goá m̄-sı̄ beh siá lâi pó͘, iáu ū tùi-tiōng--ê ài koh kı̀ tı̄ pò-choá siàu-liām bô-soah. 
Cheng-chú ū kóng, “Pah hāng ê hó, tē-it sı̄ tio̍h ū-hàu.” Si-keng kóng, “Lāu-pē siⁿ-goá, lāu-bú iúⁿ-chhı̄ goá. Ai ah ! siⁿ goá hiah kan-khó͘ tio̍h-boâ; ài pò i chhim-chhim ê un, iā boē-oē.” Koh kóng, “Boē-oē thiàⁿ i ê pē-bú, lâi thiàⁿ pa̍t-lâng, sı̄ hoán-poē ê tek-hēng, boē-oē kèng i ê pē-bú, lâi kèng pa̍t-lâng sı̄ hoán-poē ê lé-sò͘.” 
Sèng-keng ū kóng, “Biáu-sı̄ pē-bú ê lâng tio̍h siū chiù-chó͘.” (Sin-bēng-kı̀, 27 : 16.) “Pē-bú siⁿ lí, sui-jiân kàu-lāu eng-kai thiàⁿ i, m̄-thang pàng-sak.” (Chim-giân 23 : 22) “Mē pē-bú ê lâng, i ê teng tek-khak hoa; i ê kng tek-khak àm.” (Chim-giân 20 : 20) “Choè kiáⁿ-jı̂ ê, lín tiàm tı̄ Chú, tio̍h sūn-thàn lín ê pē-bú, sı̄ eng-kai ê.” (Í-hu̍t-só͘ 6 : 1-3.) “Siōng-tè kóng, Tio̍h kèng lín ê lāu-pē lín ê lāu-bú.” (Má-thài 15 : 4). 
Sèng-keng kap kó͘-chá ê gâu-lâng só͘ kà-sı̄ lūn iú-hāu ê sū, iáu ū chin-choē kóng boē chı̄n. Chiàu án-ni lâi siūⁿ lán sı̀n Chú ê tē-it iàu-kín sı̄ pài Siōng-tè, kèng pē-bú. Goá siūⁿ “Hàu” boē-oē chı̄n. Sui-sı̄ án-ni, sio̍k-gú kóng, “Pē-bú thiàⁿ kiáⁿ tn̂g-lâu-chúi; kiáⁿ thiàⁿ pē-bú sı̄ chhiū-bé iô-hong.” 
Lán Pak-pō͘ Kàu-hoē iáu nńg-chiáⁿ, toā oá-khò Ka-ná-tāi Kàu-hoē ê khan-sêng; ka-kı̄ chū-tı̄ ê khùi-la̍t bô kàu-gia̍h, só͘-í thoân-kàu ê khı̀ khah hn̄g iā sı̄ tı̄ Tâi-oân. Nā-sı̄ Thoân-tō-kio̍k ū-sı̂ iā phài pún só͘-chāi ê lâng hō͘ i tò-khı̀ pún-ke ê pài-tn̂g lâi lı̄-ek kàu-hoē soà thang hō͘ in ê pē-bú khah an-sim. Che iā-sı̄ hián-bêng ài hō͘ lâng ū ki-hoē thang chı̄n choè kiáⁿ ê pún-hūn, êng-kng Thian-kok sı̀n Chú ê kài-bēng. 
Chèng-hú lı̍p Su-hoān-ha̍k-hāu khah-siông iā phài chut-gia̍p-seng tò-khı̀ pún só͘-chāi choè sian-siⁿ; che iā-sı̄ hó ê bô͘-iūⁿ. 
Lán ê kàu-hoē beh heng-khí sı̍t-chāi tāi-ke tio̍h chı̄n khùi-la̍t lâi kiâⁿ hàu-hêng, chiū thang tit-tio̍h Siōng-tè ê chiok-hok, hō͘ ka, kok, kàu-hoē thang tit-tio̍h toā chı̀n-pō͘. 
(Tâi-oân Kàu-hoē-pò tē 463 koàn,1923 nı̂ 10 ge̍h)