Kám-kek Lāu-pē
Se-kok ū chı̍t ê toā siâⁿ, peh-sı̀ⁿ chin choē, kheh-siong óng-lâi chin lāu-jia̍t, sǹg sı̄ toā seng-lí ê só͘-chāi. Siâⁿ-lāi siâⁿ-goā ū choē-choē keng lé-pài-tn̂g, kı̂-tiong siâⁿ-goā chı̍t keng chin-chāi chheng-sóng, ta̍k lé-pài-jı̍t ū lâm hū ló iù choē-choē lâng chū-chı̍p ho̍k-sāi Siōng-tè;gı̂m si o-ló Kiù-chú thoè lâng siū sí sio̍k-choē;kı̂-tó kiû un;koh bo̍k-su khí-lâi khiā, tha̍k Sèng-chheh kóng tō-lí kà-sı̄ chèng lâng.
Ū chı̍t-ê lé-pài-jı̍t, bo̍k-su teh kóng tō-lí ê sı̂, ū chı̍t-ê cha-bó͘ gín-ná, iok-lio̍k cha̍p-gō͘, la̍k hè, jı̍p-lâi ēng iù-se tà bı̄n, khin pō͘ ûn-ûn-á kiâⁿ, ı̀-sù sı̄ kiaⁿ-liáu kiáu-jiáu pa̍t-lâng;chiū khı̀ chē tı̄ mn̂g-kak ê khang ūi, chù-sı̂n chēng- chēng thiaⁿ bo̍k-su kóng tō-lí, thiaⁿ soah chiū tò-khı̀, chhin-chhiūⁿ hoaⁿ-hí ê khoán-sit. Kúi nā lé-pài lóng sı̄ án-ni, iáu-kú lâng m̄ chai i sı̄ chı̄-chūi ê kiáⁿ-jı̂, khoàⁿ i ê i-chiûⁿ put-chí súi, kú-tōng toan-chiàⁿ, liōng tek-khak sı̄ hù-khùi lâng ê kiáⁿ-jı̂. Hit sı̂ choē-choē lâng chū-chı̍p, ta̍k lâng chai I ēng iù-se tà bı̄n, ı̀-sù m̄ ài hō͘ lâng khoàⁿ-kı̀ⁿ.
Chit ê cha-bó͘ gín-ná un-khûn teh thiaⁿ tō-lí, chı̍t jı̍t bo̍k-su kéng chı̍t chat Sèng-chheh choè toê-ba̍k, chiū-sı̄ Má-thài 27:25. Iû-thài ê chèng peh-sı̀ⁿ tùi Pí-lia̍p-to kóng, “I ê huih kui tı̄ goán kap kiáⁿ-sun.” Bo̍k-su chiū kóng, “ Iâ-so͘ ê huih ū toā koân-lêng, toā kong-lô oē tû-khı̀ lâng ê choē, hoān-nā khoàⁿ-khin I ê lâng, tek-khak tio̍h siū tēng choē;chá Í-sek- lia̍t cho̍k m̄ sı̀n Iâ-so͘, tèng I tı̄ sı̍p-jı̄-kè, ka-kı̄ chio éng-oán ê chai-ē, kàu taⁿ iáu-kú tı̄ Siōng-tè chiù-chó͘ ê ē-bı̄n.” Gı̄-lūn bêng-pe̍k, bo̍k-su chiū khǹg kàu-hoē lāi ê lâng m̄-thang chhin-chhiūⁿ Í-sek-lia̍t cho̍k ê m̄ sı̀n Iâ-so͘, tı̀-kàu siū chiù-chó͘;tio̍h oá-khò Iâ-so͘ ê huih, chiah oē tit-tio̍h éng-oán ê hok-khı̀. Hit sı̂ liû-sı̂n chù-sim teh thiaⁿ ê lâng, sim-koaⁿ bô m̄ tín-tāng.
Hut-jiân thiaⁿ-kı̀ⁿ ū lâng toā kiò chı̍t siaⁿ “ Âi-io̍h;” chèng lâng oa̍t-kè-lâi khoàⁿ, Khoàⁿ- kı̀ⁿ chı̍t-ê cha-bó͘ gín-ná poa̍h-tó tı̄ thô͘-kha nı̍h, hūn-khı̀ chhin-chhiūⁿ sí chı̍t iūⁿ. Piⁿ-ah teh chē ê hū-jı̂n-lâng kín-kín khí-lâi hû i, hit ê bo̍k-su niû miâ kiò Má-lı̄-a, ia̍h cháu kàu i ê sin-piⁿ, hû i chhut lé-pài-tn̂g, chhah jı̍p bo̍k-su ê chhù, hō͘ i the tı̄ khòng-chhn̂g-nı̍h;chiah hian-khı̀ i tà bı̄n ê phè, khoàⁿ-kı̀ⁿ i ê bı̄n-māu chin-chiàⁿ chhin-chhíⁿ, thô-tûn, hēng-bı̄n, ū tı̂m-hı̂ lo̍k-gān ê iông-māu, pı̀-goa̍t siu-hoa ê bı̄n-sek.
Hit sı̂ bo̍k-su niû chē tı̄ i ê sin-piⁿ, thoè i kı̂-tó Siōng-tè, to̍k-to̍k khoàⁿ-kı̀ⁿ i hun-bê boē kóng-oē, kú-kú iáu-bē chhíⁿ, chiū ēng phang chúi pûn jı̍p i ê phı̄ⁿ-khang, beh hō͘ i thong-khı̀, ǹg-bāng oē chhíⁿ. Tia̍p-á kú chiū chhíⁿ bo̍k-su niû chı̍t ē khoàⁿ-kı̀ⁿ i chhíⁿ, chiū kín-mé tò-thè kúi pō͘, bián-tit hō͘ i kiaⁿ-hiâⁿ;chiū thiaⁿ-kı̀ⁿ I soè-á siaⁿ teh thó͘-khùi kóng, “ Hāi-ah, Iâ-so͘ ê huih kui tı̄ goán, kap goán ê kiáⁿ-sun lah;khó͘-ah, goá sı̄ Í-sek-lia̍t lâng ê cha-bó͘ kiáⁿ. Kó͘-chá Í-sek-lia̍t lâng bô iân-kò͘ tèng Iâ-so͘ tı̄ sı̍p-jı̄-kè, hit ê koan-hē ia̍h tek-khak liân-lūi kàu goá tio̍h tam-tng lah. ” Kóng soah chiū koh-chài sit-khı̀, pí tāi-seng khah siong-tiōng.
Bo̍k-su niû thiaⁿ-kı̀ⁿ i ê oē, chiū chai i sı̄ Í-sek-lia̍t lâng, chóng-sı̄ m̄ chai i beh thái oē lâi chia chit keng lé-pài-tn̂g;chiū koh ēng phang chúi pûn jı̍p i ê phı̄ⁿ-khang, ū tia̍p-á kú, i ê ba̍k-chiu lio̍h-lio̍h-á thí-khui;khoàⁿ-kı̀ⁿ siⁿ-hūn ê hū-jı̂n-lâng khiā tı̄ sin-piⁿ, chiū oa̍t-lâi oa̍t-khı̀ m̄ chai ka-kı̄ beh thái oē tı̄ chia, kiaⁿ-hiâⁿ kóng, “ Goá tı̄ chia sı̄ sím-mı̍h só͘-chāi ah?lí sı̄ chı̄-chūi ah?” koh kóng, “ Khó͘-ah, goá sı̄ siū chiù-chó͘ ê Í-sek-lia̍t lâng. ”
Bo̍k-su niû kóng, “M̄ sái kiaⁿ, lí chhiáⁿ an sim, tio̍h khoàⁿ goá chhin-chhiūⁿ chí-bē. Lán sui-jiân m̄ saⁿ-bat, iáu-kú goá thiàⁿ lí, lí thang an sim, m̄ sái kiaⁿ. ” Cha-bó͘ gín-ná chiah chai i tı̄ pa̍t lâng ê chhù, chóng-sı̄ sim-koaⁿ iu-būn, chhin-chhiūⁿ phah-kat, oán-jiân chhin-chhiūⁿ ian só liú-bâi, hûn tà thô-bı̄n. Bo̍k-su niû chai i ê sim teh iu-būn, chı̄n-la̍t an-ùi, kah i m̄ sái khoà-lū. Hit sı̂, lāi-bı̄n ê lâng í-keng pı̄-pān mı̍h, lâi hō͘ i chia̍h.
Bo̍k-su niû chhiáⁿ i kóng tı̄ lé-pài-tn̂g só͘ tú-tio̍h ê tāi-chı̀. I ı̀n kóng, “ Goá thiaⁿ tō-lí, chhin-chhiūⁿ kiàm chha̍k-tio̍h goá ê sim. ” Bo̍k-su niû kóng, “An sim;goá ǹg-bāng lí in-ūi Iâ-so͘ ê huih bô siū chiù-chó͘, hoán-tńg tit-tio̍h chiok-hok. ”
Cha-bó͘ gín-ná kóng, “Sian-siⁿ niû ah, lí m̄ chai goá sı̄ chı̄-chūi, só͘-í chiah kóng án-ni. ”
Bo̍k-su niû kóng, “ Put-lūn lí sı̄ chı̄-chūi, hoān choē ê lâng, nā oá-khò Chú Iâ-so͘, chiū tit-tio̍h sià-bián, koh oē tit-tio̍h Siōng-tè ê un. ”
Cha-bó͘ gín-ná kóng, “ Sian-siⁿ niû ah, lí put2-jiân m̄ bat goá, iáu-kú thiàⁿ goá kàu án-ni, kiám m̄ tio̍h ēng goá ê sim-sū tı̍t-tı̍t lâi tùi lí kóng mah? Nā-sı̄ kiaⁿ-liáu thiaⁿ goá só͘ kóng, chai sı̄ sím-mı̍h cho̍k, phah-sǹg lí tek-khak bô beh chhin-chhiūⁿ án-ni thiàⁿ goá. ”
Bo̍k-su niû kóng, “ M̄ sái kiaⁿ;hoān-nā sı̀n Iâ-so͘ ê lâng, tek-khak thiàⁿ chèng lâng;sui- jiân bô sio̍k tı̄ pún kok pún cho̍k ê lâng, ia̍h oē thiàⁿ i;choè lí tı̍t-tı̍t kóng, m̄ sái kiaⁿ. ”
Cha-bó͘ gín-ná kóng, “ Goá pún sio̍k Í-sek-lia̍t cho̍k, goá ê lāu-pē miâ kiò Só͘-lô-bûn, chí-ū siⁿ goá chı̍t lâng, pèng bô hiaⁿ-tı̄ chí-bē; goá miâ kiò Tē-cha.”
Bo̍k-su niû chı̍t-ē thiaⁿ-kı̀ⁿ,sim-koaⁿ put-chí kı̂-koài, teh siūⁿ Só͘-lô-bûn sı̄ pún siâⁿ ê toā gûn-hâng chú, thang kok tē it pù, chit ê cha-bó͘ kiáⁿ sı̄ hù-kùi lâng ê chhim-kui-lú, i ê chhù-the̍h chin sóng, jı̍t-jı̍t ū chhia-hoâ iàn-lo̍k, beh thái ū êng thang lâi thiaⁿ tō-lí.
Tē-cha kóng, “Sian-siⁿ niû ah, lí sı̄ teh kı̂- koài Só͘-lô-bûn ê cha-bó͘ kiáⁿ jı̍p lé-pài-tn̂g mah? Goá choan sim sı̀n Iâ-so͘ sı̄ Siōng-tè só͘ ín ê Ki-tok, sim chin-chiàⁿ ài tit-tio̍h I ê un, chóng-sı̄ chhim-chhim khó-sioh, goá m̄ sı̄ Iâ-so͘ kàu-hoē lāi lâng ê cha-bó͘ kiáⁿ. ” Bo̍k-su niû an-ùi i kóng, “Iâ-so͘ ū kóng, ‘Lâng nā chiū-kūn Goá, Goá koat-toàn bô khı̀-choa̍t i;’ nā lí ū sim beh chhē Chú, tek-khak oē tit-tio̍h. Taⁿ chhiáⁿ mn̄g lí chı̍t kù, Siōng-tè cháiⁿ-iūⁿ hō͘ lí bat Chú Iâ-so͘ ah?
Tē-cha ı̀n kóng, “ Goán lāu-pē sı̄ Í-sek-lia̍t lâng, goán ê cho̍k pêng-sò͘ chhim-chhim oàn- hūn Iâ-so͘, kap lóng-chóng sı̀n Iâ-so͘ ê lâng; lāu-pē ia̍h kà goá tio̍h án-ni, chóng-sı̄ pún cho̍k bē ū o̍h-tn̂g, só͘-í goán lāu-pē hō͘ goá jı̍p Iâ-so͘ kàu-hoē ê o̍h. Tı̄ o̍h-nı̍h tha̍k Siōng-tè ê Sèng-keng, kı̂-tiong choē-choē kóng-khí Iâ-so͘ ê lâi- le̍k, kı̀ⁿ ū iàu-kín ê chiuⁿ chat, goá chiū tha̍k kàu se̍k-se̍k, ia̍h kı̀ tı̄ sim-lāi, āu-lâi soà-khı̀ pa̍t keng, o̍h lú-kang, kàu kú-kú, chêng só͘ tha̍k ê lóng boē kı̀-tit. Kàu toā-hàn o̍h pún cho̍k ê khoán-sit, tı̄ ke-nı̍h ài thit-thô, lóng bô pa̍t hāng ê tāi-chı̀. Pē-bú thiàⁿ goá, chhin-chhiūⁿ chhiú-lāi ê chin-chu, hoān goá só͘ ài ê chiū lóng-chóng hō͘ goá, só͘-í goá ê chhiú-sek chiū- sı̄ kı̂-iūⁿ ê, i-chiûⁿ ke̍k hó khoàⁿ. Goá teh siūⁿ hit sı̂ ê tāi-chı̀, beh thái m̄ tio̍h kiàn-siàu?Gō͘ ge̍h-jı̍t chêng, goá só͘ chhim-chhim thiàⁿ-thàng ê lāu-bú, hut-jiân jiám-tio̍h pı̄ⁿ, sí-lah;taⁿ bô bú thang kà-sı̄, chin sı̄ kan-khó͘." Kóng soah ba̍k-sái chhin-chhiūⁿ lo̍h hō͘, nâ-âu cha̍t boē chhut siaⁿ. Bo̍k-su niû kóng, "Siōng-tè chip-chiáng siⁿ- sí ê koân, kı̀ⁿ I só͘ kiâⁿ ê, lóng bô chha-chhok; Siōng-tè hō͘ lí ê lāu-bú sí, khoán-sit sı̄ chhin- chhiūⁿ bô lı̄-ek lí, sı̍t-chāi sı̄ ēng chit ê beh ín- chhoā lí chhē Kiù-chú Iâ-so͘, thang tit-tio̍h éng-oán ê hok-khı̀;chhiáⁿ mn̄g, Sı̄ á m̄ sı̄?"
Tē-cha ı̀n kóng, "Nā oē tit-tio̍h án-ni, sı̄ toā kai-chài, sūi-jiân lāu-bú sí hō͘ goá iu-būn, iáu-kú ū thang siū an-ùi. Sian-siⁿ niû lí ê oē chin sı̄ hó, goá ê lāu-bú sí, sı̄ keh-tn̄g goá chit sè-kan chhia-hoâ ê iân-kò͘, tùi goá ê lāu-bú chhut-soaⁿ liáu-āu, ke-lāi put-chí léng-chēng, lāu-pē kap lāu-bú pêng-sò͘ saⁿ-kèng chhin-chhiūⁿ lâng-kheh, taⁿ khoàⁿ-kı̀ⁿ lāu-bú ê mı̍h tı̄-teh, ia̍h lâng bô-khı̀, sı̍t-chāi thang pi-siong ; lāu-pē ke̍k-kı̂ thiàⁿ goá, chia̍h pn̄g pá ê sı̂, tùi chē saⁿ-kap tâm-lūn, siông-siông tùi goá teh chheng-chàn lāu-bú ê hó tek, ēng chit ê lâi saⁿ an-ùi.
Chóng-sı̄ lāu-pē ū choē-choē tāi-chı̀, nā pān tāi-chı̀ ê sı̂, chiū khah boē iu-būn; to̍k-to̍k goá sı̄ chhim-kui lú-chú, lāu-pē nā chhut-khı̀, goá ka-kı̄ tı̄-teh, chiū siūⁿ-tio̍h lāu-bú, goá ê sim iu-būn pi-siong, siông-siông lâu ba̍k-sái. Ū chı̍t jı̍t, teh iu-būn ê sı̂, khiok siūⁿ-tio̍h chêng nı̂ tı̄ o̍h-lāi tha̍k-chheh ê sı̂, ū bat tha̍k-tio̍h chı̍t pún, lāi-bı̄n kóng, “ Hoān-nā lâng tio̍h-boâ kan-khó͘ pē tāng tàⁿ, tio̍h chiū-kūn Goá, Goá chiū siúⁿ-sù i pêng-an.” Goá siūⁿ chit ê oē kàu kú-kú, chiah kı̀-tit káⁿ sı̄ Iâ-so͘ ê oē, chit ê oē tı̄ goá ê sim, chı̍t bı̄n iu-būn, chı̍t bı̄n hoaⁿ- hí;só͘ hoaⁿ-hí ê, sı̄ hit ê oē put-chí hó, só͘ iu- būn ê, sı̄ kiaⁿ-liáu hit ê oē sı̄ tùi Iâ-so͘ chhut. Só͘-í sim kap chhùi teh saⁿ-kap gı̄-lūn, beh chiong chit ê oē lâi ka-kı̄ an-ùi, ia̍h ū thang hiâm;nā beh pàng-sak chit ê oē, tùi pa̍t ūi kiû, ia̍h boē tit-tio̍h pêng-an. Chin sı̄ lióng lân, chhin-chhiūⁿ chhùi-ta ê lâng khoàⁿ-kı̀ⁿ chíⁿ choâⁿ, ia̍h boē tit-tio̍h lim. Jú siūⁿ sim jú kan-khó͘, tàu-tí ài chai chit ê oē sı̄ Siōng-tè só͘ kóng, á-sı̄ Iâ-so͘ só͘ kóng ê. Hut-jiân siūⁿ-tio̍h goá ū chı̍t ê lú-pı̄ sı̄ Iâ-so͘ kàu ê lâng, i tek-khak ū Sin Iok ê Sèng-keng, chiū cháu kàu i ê pâng-lāi khı̀ chhē; kó-jiân ū chı̍t phō, chiū the̍h kàu siù-pâng, koaiⁿ mn̂g àm-chı̄ⁿ khoàⁿ, bián- tit hō͘ lāu-pē khoàⁿ-kı̀ⁿ lâi siū-khı̀. Chóng-sı̄ goá tha̍k hit chat taⁿ kú lah, boē kı̀-tit sı̄ kı̀ tı̄ sím-mı̍h chiuⁿ chat, só͘-í chiū ia̍h hian khoàⁿ, tiong-kan ū choē-choē lâi-le̍k, goá tāi-seng bat tha̍k ê, iáu-kú oē kı̀-tit. Chhē kàu kú-kú chiah chhē-tio̍h, chin-chiàⁿ sı̄ Iâ-so͘ ê oē; chhùi liām sim siūⁿ, lóng bô ià, sim-lāi teh siūⁿ goá nā choè Iâ-so͘ ê ha̍k-seng, chiū chit ê an-ùi ê oē kap goá ū kan-sia̍p."
Tē-cha kóng soah, chiū kā bo̍k-su niû kóng, "Goá ài it-chı̄n kóng, kiaⁿ-liáu sian-siⁿ niû lí thiaⁿ liáu ià-siān."
Bo̍k-su niû kóng, "M̄ sái khoà-lū goá oē ià-siān; chhiáⁿ lí it-chı̄n kóng, chóng-sı̄ kiaⁿ-liáu lí tú-chiah tı̄ lé-pài-tn̂g lāi kám-tio̍h, seng-khu bē ióng, káⁿ boē kham-tit kóng siuⁿ choē."
Tē-cha ı̀n kóng, "M̄ sı̄ án-ni; goá nā kóng, sim ná hoaⁿ-hí; goá koh kı̀-tit Siōng-tè tı̄ Kū Iok ê Sèng-chheh ū èng-ún Kiù-chú beh lâi an-ùi iu-būn ê lâng. Só͘-í goá the̍h Sèng-chheh un-khûn lâi tha̍k, ū khoàⁿ-kı̀ⁿ sian-ti Í-sài-a ê chheh, lūn Kiù-chú sí koh-oa̍h ê tāi-chı̀, lóng-chóng èng-giām tı̄ Iâ-so͘, tek-khak sı̄ Siōng-tè só͘ èng-ún ê Ki-tok lah. Goá koh oē kı̀-tit chı̍t chat kóng, 'Lán chhin-chhiūⁿ sit-bê-lō͘ ê iûⁿ. Iâ-hô-hoa chiong lán chèng lâng ê chē-koà lóng-chóng hō͘ I tam-tng.' Goá siūⁿ goá ia̍h sı̄ chhin-chhiūⁿ sit-bê-lō͘ ê iûⁿ, chóng- sı̄ pē goá ê choē hit kù, iáu-bē bêng-pe̍k, in-ūi m̄ chai ka-kı̄ ê choē; chóng-sı̄ ná tha̍k sim-koaⁿ ná kan-khó͘, só͘-í chiong chheh ha̍p-teh, thó͘- khùi kóng, 'Hāi-ah, tha̍k Iâ-so͘ ê chheh, sı̄ hō͘ goá ê sim kan-khó͘.’ Goá siông-siông ài tû-khı̀ chit-ê ı̀-sù, lóng tû boē khı̀. Lú-pı̄ lâi chhiáⁿ goá khı̀ chia̍h pn̄g, goá chiū chiong hit pún Sèng-chheh só tı̄ pâng-lāi, bián-tit hō͘ lāu-pē khoàⁿ-kı̀ⁿ, chóng-sı̄ lāu-pē khoàⁿ-kı̀ⁿ goá ū iu-būn ê bı̄n-sek, m̄ chai sím-mı̍h iân-kò͘, goá ia̍h m̄ káⁿ kóng-bêng. Chia̍h pá jı̍p goá ê pâng beh khùn, chóng-sı̄ khùn boē sêng biân, só͘ tha̍k ê ı̀-sù siông-siông chhı̀-chha̍k goá ê sim, chiū khí-lâi chē khûn-khûn tha̍k, ná tha̍k ná bêng Iâ-so͘ sı̄ Kiù-chú, tek-khak tio̍h sı̀n I chiah oē tit-tio̍h kiù. Tāi-seng só͘ bē chai ê choē, taⁿ ū chai, ná kú ná chai choē tāng, sui-jiân goá chai Iâ-so͘ thoè lâng sio̍k choē, ia̍h siông-siông gı̂ kap goá bô kan-sia̍p."
Bo̍k-su niû kóng, "Kám-siā Siōng-tè ín-chhoā lí chit ê kiù ê lō͘. Chú Iâ-so͘ sı̄ hó ê Bo̍k-chiá, lí tāi-seng bê lō͘, I chhē lí, ia̍h chhē kàu tio̍h; sı̄ á m̄ sı̄?"
Tē-cha ı̀n kóng, "Sı̄-ah, ū-sı̂ goá ê sim tiô thiàu, in-ūi chai Chú Iâ-so͘ tû-khı̀ goá ê choē; put-chí hoaⁿ-hí kı̂-tó, éng-éng bô boē kı̀-tit; kàu kı̂-tó soah, goá ê un. Goá khí-thâu jı̍p lé-pài-tn̂g, hit jı̍t goá chiū tit-tio̍h sià choē, sǹg hit jı̍t sı̄ goá lêng-hûn ê siⁿ-jı̍t."
Bo̍k-su niû mn̄g kóng, "Lí cháiⁿ-iūⁿ lâi kàu chit keng lé-pài-tn̂g?"
Tē-cha ı̀n kóng, "Goá ài siông-siông thiaⁿ bo̍k-su koé-seh Iâ-so͘ ê chheh, chóng-sı̄ kiaⁿ goá ê lāu-pē chó͘-tòng. Lín ê lé-pài-tn̂g tı̄ siâⁿ-goā, goá phah-sǹg chit só͘-chāi bô lâng bat goá, só͘-í chiah lâi chia. Goá khí-thâu thiaⁿ chit ê tō-lí sim-koaⁿ tit-tio̍h kám-kek, nā bô koh lâi, sim toā kan-khó͘ tòng boē tiâu, ná chhin-chhiūⁿ iau ê lâng him-bō͘ chia̍h chı̍t iūⁿ; siat-sú nā bô Iâ-so͘ goá chiū m̄ ài oa̍h, chóng- sı̄ kiaⁿ-liáu Iâ-so͘ m̄ chiap-la̍p ū choē ê cha-bó͘ gín-ná." Kóng soah, ba̍k-sái ū chhin-chhiūⁿ lo̍k hō͘, kan-khó͘ kàu tòng boē tiâu.
Bo̍k-su niû kóng, "Lí nā ài kap bo̍k-su kóng- oē, goá chiū kiò i lâi." Tē-cha kóng, "Che sı̄ goá ê sim só͘ goān." Bo̍k-su niû chiū lı̄-khui i ê pâng, kàu tiōng-hu ê só͘ chāi lio̍h-á kóng-khí Tē-cha ê lâi-le̍k. Bo̍k-su thiaⁿ-kı̀ⁿ liâm-piⁿ lâi. Tē-cha khí-thâu khoàⁿ-kı̀ⁿ bo̍k-su, put-chí ū kiàn-siàu, m̄ káⁿ kap i kóng-oē; āu-lâi thiaⁿ-kı̀ⁿ bo̍k-su só͘ kóng ê oē, lóng sı̄ un-jiû ê khoán- sit, ná chhin-chhiūⁿ lāu-pē ê thiàⁿ-thàng chı̍t iūⁿ.
Bo̍k-su kóng, "Lí tı̄ lé-pài-tn̂g só͘ thiaⁿ chiù- chó͘ ê oē, sı̄ kan-sia̍p tı̄ m̄ sı̀n ê Í-sek-lia̍t lâng; nā-sı̄ tı̄ lí chiū pı̀ⁿ choè un-tián ê oē." Chiū choeng Iâ-so͘ só͘ kiâⁿ khoán-thāi ū choē ê lâng ê tāi-chı̀, chı̍t hāng chı̍t hāng kóng-bêng. Tē-cha ê sim hoaⁿ-hí kàu boē kò͘-tit.
Bo̍k-su iáu teh kóng poàⁿ sı̂ kú, hut-jiân khoàⁿ-kı̀ⁿ Tē-cha bı̄n tài iu-iông, chiū mn̄g i, "Sím-mı̍h tāi-chı̀?" Ìn kóng, "Goá siūⁿ-tio̍h só͘ thiàⁿ ê lāu-bú, m̄ bat Kiù-chú, i kè-óng, goá m̄ chai i ê lêng-hûn cháiⁿ-iūⁿ. Koh goá ê lāu-pē pêng-sò͘ chhim-chhim oàn-hūn kiù-chú, chı̍t ē thiaⁿ-kı̀ⁿ Iâ-so͘ ê miâ, sim-koaⁿ chhin-chhiūⁿ hé to̍h. I nā chai-kiò goá sı̀n Iâ-so͘, oē chhin-chhiūⁿ lāi-kiàm chhı̀-chha̍k i ê sim, m̄-chai beh cháiⁿ-iūⁿ."
Bo̍k-su kóng, "Lí ê lāu-pē kiám m̄ chai lí sı̀n Iâ-so͘ mah?" Ìn kóng, "Iáu-bē chai, i chai goá ê sim ū iu-būn, lóng bô phah-sǹg chit ê tāi-chı̀, goá kiaⁿ-liáu nā chai chit ê tāi-chı̀, chiū kín-kín sí. Goá chai goá ê lāu-pē sèng-tē chin-chiàⁿ kò͘-chip, sui-jiân put-chí thiàⁿ goá, nā chai goá án-ni, lêng-khó͘ ài goá sí, ia̍h m̄ kam-goān goá sı̀n Iâ-so͘."
Bo̍k-su niû chiū kóng,”Cha-bó͘ eⁿ, lí tio̍h hó-táⁿ, tek-khak tio̍h hó-táⁿ. Chú Iâ-so͘ oē pang-chān lí, Sèng-chheh kóng, 'Siōng-tè chiàu- kò͘ lí, só͘-í thang chiong lóng-chóng só͘ khoà-lū ê tāi-chı̀ thok-tiōng I.' "
Bo̍k-su chiū kóng, "Chit ê oē chin-chiàⁿ sı̄ hó; goá ia̍h phah-sǹg án-ni, Chú Iâ-so͘ ū kóng, 'Hoān-nā jı̄n Goá tı̄ lâng ê bı̄n-chêng, Goá ia̍h jı̄n i tı̄ Thiⁿ Pē ê bı̄n-chêng, hoān-nā kū-choa̍t Goá tı̄ lâng ê bı̄n-chêng, Goá ia̍h kū-choa̍t i tı̄ Thiⁿ Pē ê bı̄n-chêng. '"
Tē-cha thiaⁿ-kı̀ⁿ kiaⁿ-hiâⁿ kóng, "Kúi-nā jı̍t chêng, goá bat tha̍k-tio̍h chit chat, tùi tha̍k liáu-āu, goá ê sim boē pêng-an, khoàⁿ ka-kı̄ ia̍h ná chhin-chhiūⁿ ké-hó ê lâng, sim sı̀n Iâ-so͘, ia̍h m̄ káⁿ jı̄n tı̄ lâng ê bı̄n-chêng, àm-chı̄ⁿ tha̍k Sèng-keng, àm-chı̄ⁿ jı̍p lé-pài-tn̂g. Siat-sú pa̍t lâng lâi phêng-lūn goá ê tn̂g-té, goá ia̍h bô iàu-kín; to̍k-to̍k goá kiaⁿ-liáu goá ê lāu-pē khoàⁿ-kı̀ⁿ goá jı̍p Iâ-so͘ ê kàu, tek-khak siū-khı̀ koáⁿ goá; m̄ nā án-ni, ia̍h tek-khak chiù-chó͘ goá. I nā koáⁿ goá lı̄-khui pún ke, hō͘ goá boē tit thang khiā toā chhù, boē tit thang chia̍h hó- mı̍h, chhēng súi saⁿ, koà kim khoân, kap kim liān-á, chit hō tāi-chı̀ ia̍h bô iàu-kín. Koh siat-sú hō͘ goá khiā phoà chhù, chia̍h ám-bê phè chhài-bé, saⁿ chhēng kàu phah-kat, bô lâng beh kap goá choè phoāⁿ, goá ia̍h m̄ kiaⁿ; só͘ boē jím-tit ê, chiū-sı̄ goá ê seng-khu hn̄g-hn̄g lı̄-khui thiàⁿ goá ê lāu-pē, boē tit thang chá-àm tı̄ i ê sin-piⁿ, tio̍h-boâ hōng-ióng, lâi chı̄n choè kiáⁿ ê chit, tò-tńg siūⁿ ióng-io̍k ê un-chêng, thê-hê ê tek-hēng, un chhim bû- ke̍k; chı̍t-sı̂ saⁿ pun-lı̄, chhin-chhiūⁿ pa̍t lâng, boē bián-tit siong sim, chı̄-chūi-á oē jím-tit. " Kóng soah, ba̍k-sái chhin-chhiūⁿ lo̍h-hō͘, thı̂- khàu bô soah.
Bo̍k-su niû khoàⁿ-kı̀ⁿ, ia̍h thoè i siong-sim. Bo̍k-su kóng, "M̄ sái khoà-lū, Ki-tok bēng-lēng I ê ha̍k-seng, tio̍h jı̄n I ê miâ tı̄ lâng ê bı̄n-chêng, ia̍h tek-khak oē pang-chān lán chiâⁿ chit ê tek-hēng. Chú koh ū kóng, 'Thiàⁿ pē-bú khah kè-thâu tı̄ Goá ê, bô ha̍p-gı̂ tı̄ Goá'." Bo̍k-su kóng chit kù, sı̄ beh hō͘ Tē-cha ê sim koat-toàn,pàng-sak lóng-chóng ê khoà-lū, hó-táⁿ jı̄n Iâ-so͘ ê miâ.
Hit sı̂ jı̍t beh lo̍h, Tē-cha chiū kap in saⁿ-sı̂, Bo̍k-su kā i kóng, "Siōng-tè kóng, 'M̄ sái kiaⁿ, Goá pı̀-iū lí, kiù lí.' " Bo̍k-su niû ia̍h kóng, "Goá siông-siông thoè lí kı̂-tó; an sim thang tò-khı̀." Bo̍k-su koh kóng, "Lí ê sim nā khéng, chiū thang saⁿ kap kūi-lo̍h kı̂-tó." Tē-cha kóng, "Hó" Chiū tāi-ke kūi-lo̍h tı̄ Siōng-tè ê bı̄n-chêng, bo̍k-su thoè Tē-cha kiû Siōng-tè ke-thiⁿ i ê sı̀n, chhoā i tı̄ thiⁿ-lō͘, hō͘ i hó-táⁿ jı̄n Iâ-so͘ ê miâ tı̄ lâng ê bı̄n-chêng; koh kiû kám-hoà Tē-cha ê lāu-pē ê sim. Kı̂-tó soah, chiū lóng khí-lâi, chai Siōng-tè ū kap in tı̄-teh. Tē-cha kap bo̍k-su bo̍k-su niû saⁿ-sı̂ tò-khı̀; chı̍t lō͘ sim-koaⁿ hoaⁿ-hí, kàu chia̍h ê-hng tǹg ê sı̂, khoàⁿ-kı̀ⁿ lāu-pē, Tē-cha put-chí hoaⁿ-hí ài kóng hō͘ i ê lāu-pē chai i choè Iâ-so͘ ê ha̍k- seng; nā-sı̄ ū pêng-iú saⁿ-kap teh chia̍h, m̄ hó-sè kóng; chia̍h liáu chiū cháu-jı̍p pâng-lāi, hian-khui Sèng-keng lâi tha̍k, kūi-lo̍h kı̂-tó, chiah chai chit sı̂ ê pêng-an, sı̄ chá-chêng só͘ bē bat ū. Keh jı̍t kap lāu-pē saⁿ-kap chē; beh chia̍h chá-khí, Tē-cha ài kóng-chhut chit ê tāi-chı̀; chóng-sı̄ sim-koaⁿ pho̍k-pho̍k-chhéng, chhùi ài kóng, kóng boē tit chhut-lâi, sim-lāi siūⁿ ài chia̍h, chia̍h boē lo̍h-khı̀. I ê lāu-pē khoàⁿ-kı̀ⁿ, kiaⁿ-liáu sı̄ phoà-pı̄ⁿ teh kan-khó͘, lāu-pē chiū hián-bêng choē-choē thiàⁿ-thàng ê chêng; chóng-sı̄ it-hoat hián-bêng i ê thiàⁿ-thàng, Tē-cha it-hoat siong-sim.
Kàu chia̍h soah, nn̄g lâng teh chē, Tē-cha sim-lāi teh siūⁿ, "Goá chit tia̍p nā m̄ kóng, beh thèng-hāu sím-mı̍h sı̂ ah?" Sim beh kóng, chhùi iū kóng boē chhut-lâi. I ê lāu-pē khan i ê chhiú kóng, "Tē-cha, goá só͘ thiàⁿ ê cha-bó͘ kiáⁿ ah, siáⁿ-sū iu-būn ah?" Tē-cha kia̍h thâu ba̍k-sái chhin-chhiūⁿ lo̍h-hō͘. i ê lāu-pē chı̍t-ē khoàⁿ i, thâu-khak chiū koh àⁿ-lo̍h-khı̀, koh kóng, "Goá ê kiáⁿ ah, lí ê sim ài cháiⁿ-iūⁿ? Tio̍h kóng hō͘ goá chai, put-lūn beh sím-mı̍h goá hoaⁿ-hí hō͘ lí, chiàu lí ê sim só͘ ài. Goá tı̄ sè-kan tē it thiàⁿ ê chiū-sı̄ lí, to̍k-to̍k m̄ chai lí ê sim ài cháiⁿ-iūⁿ?" Tē-cha it-bı̄ iô thâu, kóng boē chhut chhùi. Só͘-lô-bûn chhun chhiú beh phō i, Tē-cha lut-lo̍h-khı̀, phak tı̄ lāu-pē ê heng-khám thı̂-khàu.
Só͘-lô-bûn boē hiáu-tit Tē-cha sím-mı̍h ı̀-sù, chiū ēng chhiú hoāⁿ i ê thâu-khak, chiok-hok i, kóng, "Goān Siōng-tè siúⁿ hok-khı̀ hō͘ lí, ēng I êng-kng ê bı̄n chiò lí, koh si un hō͘ lí; goān Siōng-tè ê bı̄n khoàⁿ-kò͘ lí, siúⁿ-sù lí pêng-an." Tē-cha thiaⁿ chiah ê oē, chhin-chhiūⁿ khòng-hān ê chhân tú-tio̍h lo̍h toā-hō͘, chiū soè-á siaⁿ kiû Siōng-tè hû-chhı̂ i ê loán- jio̍k, kám-hoà lāu-pē ê sim. Só͘-lô-bûn thiaⁿ- kı̀ⁿ i teh kı̂-tó, m̄ chai i kiû sím-mı̍h chiū kóng, "Goān Siōng-tè ún-chún goá ê kiáⁿ só͘ kiû." Kóng soah, Tē-cha kia̍h thâu, kia̍h-khí chhiú kóng, "Oá-khò Iâ-so͘ Ki-tok ê miâ, sı̄ goá ê sim só͘ goān."
Só͘-lô-bûn chı̍t ē thiaⁿ-kı̀ⁿ Iâ-so͘ Ki-tok ê miâ, chiah chai i sı̄ sı̀n Iâ-so͘, chiū toā siū-khı̀, pı̀ⁿ bı̄n-sek, ba̍k-chiu gı̂n i, peh-khí-lâi khiā, boē kóng poàⁿ kù oē. Tē-cha thı̂-khàu phō i ê kha, Só͘-lô-bûn siū-khı̀ chhiong thiⁿ, chek-pı̄ i kóng, "chı̄-chūi kà-sı̄ lí chit ê chiù-chó͘ ê miâ ah?" Tē-cha kóng, "Só͘ thiàⁿ ê lāu-pē ah, m̄-thang chiù-chó͘ Kiù-chú ê miâ; Iâ-so͘ ia̍h sı̄ í-sek-liat2 lâng ê Kiù-chú." Só͘-lô-bûn thiaⁿ-kı̀ⁿ it-hoat toā siū-khı̀. kóng, "Goá chiù-chó͘ chit ê miâ, chhùi chheng-ho͘ I ê lâng, i ê chı̍h tek-khak tio̍h ko͘-tâ." Chit ê oē chhı̀ jı̍p Tē-cha ê sim, chiū kóng, "Án-tia ah, án-tia ah." Só͘-lô-bûn chó͘-chí i, m̄ chún i kóng, chiū kóng, "Goá bô cha-bó͘-kiáⁿ; poē-ge̍k goá ê bēng-lēng ê, m̄ sı̄ goá ê cha-bó͘ kiáⁿ; siū chiù-chó͘ ê lâng ah, tio̍h kín-kín khı̀, bo̍h-tit koh kı̀ⁿ goá ê bı̄n." Soà liân siaⁿ chiù-chó͘ Iâ-so͘ kóng soah, chhia-khui Tē-cha choè i khı̀
Tē-cha poa̍h-tó tı̄ thô͘-kha, kú-kú peh lóng boē khí-lâi, chóng-sı̄ iáu-kú thiaⁿ-kı̀ⁿ lāu-pē chiù-chó͘ ê siaⁿ. Kiūⁿ-peh-nı̀ khí-lâi, chiū jı̍p i ê pâng, kūi-lo̍h tı̄ Siōng-tè ê bı̄n-chêng, pek-chhiat khún-kiû. Sim-koaⁿ chhin-chhiūⁿ chı̍t tè chio̍h ka-la̍uh lo̍h-khı̀, chiū àm-chı̄ⁿ ka-kı̄ siūⁿ, goá ê só͘ kiâⁿ sı̄ tio̍h iah m̄ tio̍h? Goá chai thàn Iâ-so͘, chiū-sı̄ thàn Siōng-tè; koh siūⁿ, thàn Siōng-tè, sı̄ lâng tē it iàu-kín ê tāi-chı̀; sim sui-jiân thiàⁿ lāu-pē, lêng-khó͘ ûi-keh lāu-pē ê ı̀-sù, ia̍h m̄-thang bô thàn Siōng-tè ê bēng- lēng. Chiū chē-teh, hian-khui Sèng-keng, tha̍k Si-phian jı̄-cha̍p-chhit phiⁿ, só͘ kı̀ kóng, "Pē- bú nā pàng-sak goá, chiū Iâ-hô-hoa oē hû-chhı̂ goá." Tùi án-ni, chiū koh kiû Siōng-tè hû-chhı̂ i ê loán-jio̍k, ke-thiⁿ i ê sı̀n, hō͘ i oē tí-tng lóng-chóng ê iù-hek; koh kiû I tio̍h kám-hoà lāu-pē ê sim, hō͘ i chá-chá bat Iâ-so͘ I ê Kiù-chú. Kı̂-tó soah, chiū chiūⁿ bı̂n-chhn̂g khı̀ khùn, chóng-sı̄ sim-lāi ū tāi-chı̀, thong mı̂ khùn boē chiâⁿ bı̂n.
Thàu-chá khí-lâi, thoè lāu-pē kap pún-sin kı̂-tó, sim iáu-kú teh ǹg-bāng kin-ná-jı̍t lāu-pē siū-khı̀ oē soah. Kàu chia̍h chá-khí ê sı̂, Só- lô-bûn chiū kah lú-pı̄ phâng mı̍h jı̍p-khı̀ pâng- lāi hō͘ Tē-cha chia̍h. Lú-pı̄ thàn chú-lâng ê bēng-lēng lâi kiâⁿ, kā Tē-cha kóng, "Chú-lâng m̄ ài khoàⁿ-kı̀ⁿ ko͘-niû." Tē-cha ai-siong thı̂- khàu, chiū siá chı̍t tiuⁿ phoe kah lú-pı̄ toà-khı̀ hō͘ i ê lāu-pē. Phoe-lāi ê ı̀-sù to̍k-to̍k sı̄ kiû lāu-pē iông-ún i saⁿ-kı̀ⁿ, í-goā bô kiû pa̍t hāng. Só͘-lô-bûn hê phoe kóng, "Lí nā thàn Ki-tok, goá éng-éng m̄ chún lí kap goá saⁿ-kı̀ⁿ." Tē- cha chai lāu-pē ê ı̀-sù í-keng tiāⁿ-tio̍h, kàu ē-po͘ chiū khı̀ bo̍k-su ê só͘-chāi, chiong chit-ê tāi-chı̀ chı̍t-hāng chı̍t-hāng kóng hō͘ in thiaⁿ. Bo̍k-su chiū chiong Siōng-tè ê tō-lí, khó͘-khǹg an-ùi i. kah i tio̍h choan sim oá-khò Siōng-tè, ia̍h tio̍h siông-siông thoè lāu-pē kı̂-tó. Tē-cha kap in saⁿ-sı̂ chiū tò-khı̀, sim-lāi koat-toàn éng- éng bô beh lı̄-khui Iâ-so͘, ta̍k jı̍t kiû Siōng-tè kám-hoà lāu-pē ê sim, nā-sı̄ Só͘-lô-bûn ê ı̀-sù kò͘-chip bô ı̂-e̍k.
Tē-cha í-keng lı̄-khui i ê lāu-pē cha̍p goā jı̍t kú, siūⁿ beh chū-choan khı̀ kı̀ⁿ i, ia̍h m̄ káⁿ chhı̀n-chhái, chhin-chhiūⁿ sim ài khı̀, kha m̄ káⁿ kiâⁿ khı̀; chiong jı̍t ut-chut, kan-ta tha̍k Sèng-chheh, kap khı̀ bo̍k-su ê chhù gı̄-lūn tō-lí koé būn tiāⁿ-tiāⁿ. I ê sim put-chí iu-būn lāu- pē ê o͘-àm, kap hut-jiân sit-lo̍h lāu-pē ê thiàⁿ- thàng, iáu-kú kai-chài ū Iâ-so͘ ê thiàⁿ-thàng thang lâi pó͘, sui-jiân sit-lo̍h chı̍t hāng, iáu-kú tit-tio̍h chı̍t chheng hāng.
Só͘-lô-bûn ka-kı̄ chı̍t lâng, sim-koaⁿ iu-būn, m̄ ài tı̄-lí tāi-chı̀, ta̍k hāng tāi-chı̀ pàng-hē-teh, lóng bô liāu-lí, in-ūi m̄ chai pêng-an ê lō͘, só͘-í boē tit-tio̍h an-ùi, ū-sı̂ ài séng-chhat iâ-so͘ tō- lí ê chin ké, ū-sı̂ siūⁿ-tio̍h Tē-cha ê bı̄n; sim-koaⁿ lóng boē tiāⁿ-tio̍h, ū-sı̂ ài koé i ê kò͘-chip ê phaih, chóng-sı̄ hō͘ hit ê oàn-hūn Iâ-so͘ ê chêng, that-ba̍t tı̄ sim-nı̍h, at-chí chiah ê hó ê liām-thâu, só͘ boē koé, ia̍h m̄ káⁿ tùi pa̍t lâng kóng-khí i iu-būn ê in-toaⁿ. Koh bô sim thang kı̂-tó Siōng-tè, só͘-í cheng-sı̂n hun-hun, sin-thé chiām-chiām soe-lám, tùi án-ni, tı̀-kàu phoà- pı̄ⁿ.
