Hó kap Bái

2 ê tiong-liân hū-jı̂n-lâng sio-tú-thâu teh khai-káng. In í-keng ū 15 tang bô kı̀ⁿ-bı̄n. A: “Lín hāu-seⁿ choè-kı̄n hó--bô?” B: “Hó? Hó chı̍t kho͘ ō͘-á han-chı̂ leh !” A: “Án-choáⁿ kóng?” B: “Án-choáⁿ kóng? Lí kā siūⁿ khoàⁿ māi leh: i chhoā chı̍t ê bó͘, ná ti-bó leh. Kui-kang kan-taⁿ bih tı̄ pâng-keng lāi chia̍h, khùn, khoàⁿ-chheh, thiaⁿ im-ga̍k. Chhù-lāi ê tāi-chı̀ lóng m̄ chhap. Ē-sái kóng chhiú put tāng sam-pó !” A: “Ah lín cha-bó͘-kiáⁿ hó--bô?” B: “Ò͘, nā i ū-kàu chán ! Chin-chiàⁿ ē hō͘ lâng o-ló kàu tak-chı̍h ! I kè chı̍t ê ang, kā i sioh miā-miā. Kui-kang kā i ho̍k-sāi tı̄ pâng-keng lāi chia̍h, khùn, khoàⁿ-chheh, thiaⁿ im-ga̍k. Chhù-lāi ê tāi-chı̀ lóng m̄ bián i chhap. Chin-chiàⁿ sı̄: kè tio̍h hó ang, kui-nı̂-thàng-thiⁿ lóng khin-sang !”