Hô-pêng kap Chiàn-cheng
Kau-chiàn ê gûi-hiám sè-kan lâng lóng chai thang kiaⁿ, só͘-í nā tú-tio̍h lia̍t-kok kháu-khı̀ ê sı̂, á-sı̄ in-ūi tú-tio̍h saⁿ-cheⁿ koân-lı̄, chiū in tng-chit ê lâng jia̍t-sim khı̀ gián-kiù, chı̄n-la̍t lâi chhui-pâi, tek-khak ǹg-bāng hō͘ i hô-pêng kiat-kio̍k, ū-sı̂ chhiáⁿ chhut pa̍t-kok lâi chò kong-chhin, tek-khak m̄-khéng bô chim-chiok, lām-sám jiá-tāng kan-ko, hām-hāi kok-ka tı̄ gûi-hiám ê só͘-chāi, soà khan-liân--tio̍h sè-kài ê tāi-kio̍k, che sı̄ tùi kó͘-chá bô m̄-sı̄ án-ne lâi kiâⁿ. Tı̄ sai-pêng Au-lô-pa-chiu hiah-ê khah kiông ê kok, sui-jiân in teh saⁿ-cheⁿ chin kú, m̄-kú in ta̍k kok ū-ê saⁿ-kap liân-bêng, ū-ê chò-hoé hia̍p-iok, chiū in ê khùi-la̍t beh chha-put-to, sè-bı̄n iā beh pêⁿ-tú-pheng, iū-koh hit-hō kun-khı̀ chhèng-io̍h ê lūi, ū hoat-bêng hit khoán lı̄-hāi; chiū-sı̄ poe-chûn, chúi-lûi-théng hit-hō iā ná kek ná chı̀n-pō͘: án-ne tāi-ke chai thang khoà-lū, kiaⁿ-liáu chiàn-sū ê hō-toan chı̍t-ē khí, chiū i ê hām-hāi sı̄ chin toā, só͘-í tāi-ke sio kéng-kài, m̄-káⁿ sûi-piān lām-sám jiá-sū. In-ūi án-ne ū lâng chheng-ho͘ poe-chûn chò hô-pêng ê thiⁿ-sài, sı̄ kóng kau-chiàn ê khı̀-khū ná cheng-kong, chiū kàu-gia̍h thang at-chè sè-kan lâng hò͘ⁿ-chiàn ê sim, lâi pó-hō͘ in ê pêng-hô--lah. Chóng-sı̄ chiàn-cheng ê ki-koan, chı̍t ē kha̍p--tio̍h chiū hoat-choh, in-ūi ta̍k kok ū in ê liân-bêng kap hia̍p-iok ê koan-hē, só͘-í kau-chiàn ê hō-hoān soà ná thoa ná tn̂g, ná ká ná toā. Taⁿ in-ūi Sek-ní-ı̂ lâng ēng chı̍t-lia̍p pho̍k-lia̍t-tân tı̀m-sí Ò-kok ê hông-thài-chú, ná chhin-chhiūⁿ chiong chı̍t-lia̍p phàu-chí tı̀m-lo̍h khı̀ tı̄ Au-chiu ê tiong-sim chı̍t-poàⁿ-iūⁿ, tı̀-kàu Ò-kok, Ngô͘-kok, Tek-kok, Hoat-kok, Eng-kok, Pe̍k-ní-gı̄, lóng-chóng thoa-loa--lo̍h-khı̀ tı̄ chiàn-tiûⁿ ê lāi-bı̄n, chhin-chhiūⁿ hoé sio chháu-po͘, lóng bē oá-kı̄n--tit. Sı̄m-chı̀ thoa-lūi--tio̍h tang-pêng A-se-a-chiu, hô-pêng ê kio̍k-bı̄n, tı̀-kàu Jı̍t-pún iā kap Tek-kok soan-chiàn. Tû-khı̀ Bí-kok í-goā, kı̂-û khah chē thoa-loa--lo̍h-khı̀ tı̄ hit iu-chhiû chhi-chhám ê só͘-chāi. Sè-kan-lâng sı̄ sím-mı̍h choē-koà, lâi tú-tio̍h chiah toā ê kiap-sò͘? Chāi-chá tāi-ke in-khı̂n ēng pêng-hô lâi saⁿ kéng-kài, he kiám lóng sı̄ chng-chò ê oē mah, á-sı̄ lâng ê sim-koaⁿ siūⁿ beh jiáu-loān chiah lâi tú-tio̍h chit-hō ê hêng-hoa̍t? Tùi án-ne lâi siūⁿ, sè-kan-lâng ê só͘-chò lóng bô chiàu tō-lí, kan-ta thàn sai-khia ê su-io̍k. Lán tāi-ke tio̍h kín-sı̄n, bián-tit hoān-tio̍h chit khoán ê chai-hō. (Tâi-oân Kàu-hoē-pò tē 356 koàn,1914 nı̂ 11 ge̍h)