Hông-tè teng-ke̍k

La̍k goe̍h chhe 10 Tiong-kok Hông- thài-hō͘ chhut-chiàu thong-ti, kóng, “In-ūi Hông-tè chē-ūi ê sı̂ khah chió- hoè, chāi-tiâu tek-khak tio̍h ū lâng kam-tok, hoān-nā gū-tio̍h chàu-chiuⁿ khim-tiám sù-hong chiah ê chèng-sū, chiū thang liāu-lí, só͘-í goá put-tek-put tio̍h sûi-liâm thèng-chèng. Chêng ū chhut-chiàu tēng-kui chún Hông-tè ha̍k-sı̍p kàu kok-chèng chiâu bat, chiah thang pún-sin tı̄-kok. Kàu-taⁿ cha̍p-sò͘ nı̂ kú, Sèng-siōng í-keng jı̍t-jı̍t khı̂n- khó͘ nı̂-nı̂ chı̀n-tek, ē hiáu-tit chú-chhâi chàu-chiuⁿ ê sı̄-hui, phoe-phêng kó͘-kim ê gı̄-lí, phoàⁿ-toàn chèng-sū. Só͘-í kin-á-jı̍t Thài-hō͘ soan-tiàu Hông-chhin lâi jū-chí kóng kin-nı̂ tang-cheh Hông-tè teh-beh pún-sin chè-kò thiⁿ-tē, iā koh jū Khim-thian-kàm te̍k-soán mê-nı̂ ê kiat-jı̍t, thang hō͘ Sèng-siōng teng-ke̍k. Taⁿ goá só͘ jū ê chí-ı̀ lín kok-séⁿ bûn-bú koaⁿ-oân tio̍h chun-thàn hōng-hêng.”

Āu-lâi Hông-thài-hō͘ koh chhut-chiàu kóng Khim-thian-kàm hok-chàu teng- ke̍k ê kiat-jı̍t í-keng te̍k-soán, chiū-sı̄ mê-nı̂ chiaⁿ-goe̍h 15 jı̍t.

Taⁿ-ū thiaⁿ-kı̀ⁿ chit-ê tāi-chı̀, sio̍k-chāi Tiong-kok ê Hok-im-hô-hoē tiâu-tı̂ kià chı̍t-tiuⁿ phoe, chhiáⁿ chóng kàu-hoē hiān-sı̂ tio̍h tı̀-ı̀ thè Hông-tè kı̂-tó. I-ê phoe kóng: “Chiàu Sèng-chheh kà-sı̄ lán, tio̍h thè chiah-ê ông kap toā-koaⁿ kı̂-tó. Hiān-sı̂ ū khah iàu-kín ê toā-sū teh-beh khí-in, lán tio̍h it-hoat pek-chhiat khún-kiû. Thàn Sèng-siōng la̍k-goe̍h 28 jı̍t chiâⁿ 16 hoè, chit-sı̂ i-ê sim-su sèng-chêng koan-hē chiong-lâi kok- ka ê pêng-tı̄. Iū-kiam Thài-hō͘ tú-á chhut chiàu tiāⁿ-tio̍h mê-nı̂ chiaⁿ-goe̍h beh hō͘ i teng-ke̍k. Iā bô loā-kú beh soán chiàⁿ-keng, só͘-í lán tio̍h pek-chhiat kı̂-tó Siōng-tè, hō͘ Hông-tè ū tı̀-hūi thang tı̄-kok, hō͘ i-ê peh-sèⁿ ē hióng thài-pêng ê hok-khı̀, hō͘ i pún-sin tn̂g hoè-siū, hō͘ i teng-ke̍k liáu-āu Ki-tok ê hok-im ē ná khui-khoah tı̄ kok-lāi, hoān-nā koaⁿ-oân peh-sèⁿ ná ài chhin-kı̄n tō-lí. “

(Tâi-lâm Hú-siâⁿ Kàu-hoē-pò tē 14 tiuⁿ, 1886 nı̂ 8 ge̍h)