Hûn-lı̂m ê Thó͘-húi
Sı̀-goe̍h-kan Hûn-lı̂m-koān ê thó͘-húi chin sēng, ū chiâⁿ chheng lâng chū-chı̍p tı̄ soaⁿ-lāi, siông-siông chhut-lâi cheng-piàng. Táu-la̍k ke Jı̍t-pún lâng ê tiàm iā hō͘ in cheng. Gō͘-goe̍h chhe 3 Jı̍t-pún peng it-jı̄ cha̍p miâ khı̀ beh lia̍h chha̍t, tian-tò hō͘ chha̍t ûi, phah-sí 2, 3 lâng, iā tio̍h-siong 4, 5 ê. Āu-lâi Jı̍t-pún chū-chı̍p in ê peng chiâⁿ-chheng miâ, khı̀ sio-chng; kè-kiōng sio chha-put-to 30 chng; bí chhek, ke-si chē-chē hō͘ in sio--tio̍h, iā ū phah-sí nn̄g saⁿ pah lâng. Tùi hit-tia̍p thó͘-húi ná-sēng; kàu 5 goe̍h 18 phah Lı̂m-kí-po͘. Hit-sı̂ ū chı̍t-ê goā-kok lâng hō͘ chha̍t phah-sí, chiū-sı̄ Bōng-bâi lâng, Khèng-kı̀ ê thâu-ke, chha-put-to 70 hoè ê lâng. Hit chá-khí ū tùi Lı̂m-kí-po͘ khí-sin ài khı̀ Chı̍p-chı̍p, lō͘--nı̍h tú-tio̍h chha̍t, káⁿ-sı̄ khoàⁿ i chò Jı̍t-pún lâng chiū kā i thâi.
Kàu 5 goe̍h 20 Táu-la̍k iā hō͘ thó͘-húi phah; iā phah Chhı̀-tông-hāng, Îⁿ-nâ-á, Pó-táu-á. Gō͘-goe̍h 28 phah Lo̍k-káng, phah bē khui tio̍h thè. Hit-sı̂ Lo̍k-káng ke ū sio chha-put-to 300 keng chhù kap tiàm-thâu. Āu-lâi Jı̍t-pún-peng tı̍t-tı̍t phah chı̀n-chêng. Táu-la̍k ke iā hō͘ in thó tò-tńg.
Ū lâng kóng Chı̍p-chı̍p chham Po͘-siā iā hō͘ chha̍t chiàm-khı̀. Ka-gı̄-siâⁿ kap Tang-toā-tun (chiū-sı̄ sin-siat ê Tâi-oân-hú-siâⁿ ) iā hō͘ in kong, kong bē khui. Chiang-hoà bô phah; kúi-nā-jı̍t ū koaiⁿ siâⁿ-mn̂g m̄-chún lâng sûi-piān chhut-jı̍p.
Hit-sı̂ Táu-la̍k peng khı̀ sio chng, lán thiaⁿ tō-lí ê hiaⁿ-tı̄ chı̍t-lâng ū chhut-lâi kā i khoàⁿ, bô gı̂-gō͘ hō͘ in phah-sí. Iā ū chı̍t-ê jı̍p-kàu ê hiaⁿ-tı̄, miâ kiò Ìm-hiaⁿ, i-ê chhù-the̍h chham hoè-mı̍h lóng hō͘ in sio--tio̍h; hiaⁿ-tı̄ chiū khioh tām-po̍h hō͘ i chò só͘-hùi. Lēng-goā bô thiaⁿ-kı̀ⁿ kóng hiaⁿ-tı̄ á-sı̄ pài-tn̂g ū siū sím-mı̍h sńg-hāi.
Lán khoàⁿ Tâi-oân ê kéng-gū chhin-chhiūⁿ chit-hō ê khoán, tio̍h pek-chhiat kiû Siōng-tè hō͘ sı̄-toā lâng chiàu tō-lí lâi khoán-thāi peh-sı̀ⁿ, peh-sı̀ⁿ thang hoaⁿ-hí sūn-thàn. “Tio̍h thè ông kap toā-koaⁿ kı̂-kiû, hō͘ lán chı̍t-sı̀-lâng kiong-kèng, toan-hong, pêng-an bô tāi-chı̀.” (I Thê-mô͘-thài 2 : 2)
(Tâi-lâm Hú-siâⁿ kàu-hoē-pò tē 137 koàn,1896 nı̂ 8 ge̍h)