Chia m̄-sı̄ Washengton D.C.
Che m̄-sı̄ hián-bêng jı̂n-ài ê Lincoln Kı̀-liām-pi.
Chı̍t-tè pe̍h-sek ê chio̍h-pâi
Ēng choē-choē chhiⁿ-huih só͘ khí,
Ūi-tio̍h beh kı̀-liām
Tâi-oân-lâng kiōng-tông ê thé-giām.
Pi-bûn kap kàu-kho-su siá bô kàu-gia̍h--ê,
Taⁿ goá beh thiah-bêng, hō͘ lí chai-iáⁿ.
Khiā tı̄ Siū-san tang-pêng,
Tùi kı̀-liām-pi ê soaⁿ-téng khoàⁿ--lo̍h-khı̀:
Gō͘-cha̍p-nı̂ chêng,
Tiong-kok kun-tūi tùi chia chhiong-lo̍h-khı̀ soaⁿ-kha,
Kàu-tı̄ A-má ê kò͘-hiong Iâm-tiâⁿ-po͘.
Hô-pêng tâm-phoàⁿ tú-chiah kóng-tiāⁿ,
Bú-khı̀ thau-ūn kàu-ūi,
Iok-sok chek-sı̂ hō͘ thóng-tı̄-chiá thiah-lı̍h.
Chhèng-chí sàu-koè koe-lō͘.
Ko-hiông-káng lāi-hái âng koh chhàu-chhiⁿ.
Chhia-thâu thâu-chêng thia̍p-moá,
Chhēng chè-ho̍k ê sin-si.
Cha̍p-chhit-peh-hoè ê chheng-chhun
Hō͘ chhèng-siaⁿ kap chhı̀-to phah-chı̍h.
Hit-sı̂ goá ê toā-kū teh tha̍k Ko-hiông Tiong-ha̍k,
Chhong-kông chông-tò-lâi chhù--nih.
Mn̂g chı̍t-ē koaiⁿ,
Chiū thiaⁿ-tio̍h goā-bı̄n ê chhám-kiò.
Cha̍p-hoè ê A-má tùi thang-á-phāng thau-khoàⁿ,
Chı̍t-tı̄n Tiong-kok peng-á thoa i ê chhù-piⁿ,
Chı̍t-ê thâu-mn̂g pe̍h--khı̀ ê i-seng,
Kia̍h chhèng-pı̀ⁿ tú i ê pak-tó͘,
Tı̍t-kàu i âu-kiò, hūn-tó tı̄ thô͘-kha.
Che sı̄ goá chho͘-chho͘ thiaⁿ--tio̍h ê jı̄-jı̄-pat,
Kàu-kho-su phian bô-tio̍h ê
Ko-hiông-chhı̄ kháu-su̍t le̍k-sú.
Tāi-lí-chio̍h kı̀-liām-pi,
khek pe̍h-pe̍h, bū-bū ê jı̄,
Kı̀-lio̍k kò͘-ı̀ hâm-hô͘ ê le̍k-sú,
Hián-bêng thóng-tı̄-chiá hu-ké ê sêng-ı̀.
Hiān-tāi-sú--nih choè-toā ê sat-lio̍k,
Ìn tı̄ lín ê khò-pún--nih, kan-ta gō͘-choā Hàn-jı̄.
Che chiū sı̄ sı̍t-bı̂n thóng-tı̄,
M̄-sı̄ lán ài ê chhut-thâu-thiⁿ.
Thiⁿ chiām-chiām àm,
Bông-bū tà tı̄ soaⁿ-lûn.
Lán teh-beh lı̄-khui,
Oa̍t-tńg-sin koh khoàⁿ chı̍t-pái kı̀-liām-pi.
Bí-lē khang-hi ê hêng-iáⁿ, ûi-khùn tı̄ ian-bū tiong-ng.
Ǹg-bāng lán koh lâi chia ê sı̂, bū oē soàⁿ--khı̀.
Tâi tı̄ thô͘-kha-toé ê kan-chèng,
Tâi-oân-lâng sit-lo̍h ê kı̀-ek,
Oē théng-khui tı̄ lán bı̄n-chêng,
Pâi-lia̍t tı̄ tāi-lí-chio̍h-téng.
(Tâi-bûn-thong-sı̀n tē 62 kı̂, 1999 nı̂ 3 goe̍h)
