Siông-siông thiaⁿ-kı̀ⁿ liû-thoân kóng, “He ! cha-bó͘-lâng.” Thiaⁿ-tio̍h chit kù, ta̍k lâng to liáu-kái hit ê ı̀-sù. Goá teh siūⁿ hit ê in-toaⁿ m̄-chai sı̄ cháiⁿ-iūⁿ? Hū-jı̂n-lâng tàu-tí ū kúi pō͘-hūn ê khoat-tiám lâi siⁿ-chhut chit kù ê liû-thoân. Taⁿ chiong só͘ siūⁿ chı̍t-sut-á siá tı̄-chia, khoàⁿ oē choè chı̀ sió-khoá ê bián-lē goá kap chí-bē á-boē ?
Chiū-sı̄ Siā-kau ê sū. Kó͘-chá sı̀n ū Lú-jı̂n kok, Chhoan-sim kok, Siáu-jı̂n kok. Tāi-ke sı̀n kàu oē ı̂-soaⁿ, nā-sı̄ chit chūn bô lâng ài sı̀n. Chiū-sı̄ tùi lâng ná ū siā-kau, sè-kài ê chōng-hóng giám-jiân chhin-chhiūⁿ tı̄ ba̍k-chiu-chêng. Hit ê kok nā-sı̄ ài kap pa̍t-kok kau-thong bō͘-e̍k, tùi-tiōng siā-kau, hit kok sı̄ bûn-bêng. Nā-sı̄ chhin-chhiūⁿ chá-sı̂ só kok ê sı̂ khiàm siā-kau, chiū oh chı̀n-pō͘, soà tò-thè. Ka-têng siā-kau nā khiàm, chhin-chhiūⁿ chá-sı̂ hū-jı̂n-lâng bô chhut mn̂g, choân bô siā-kau, nā kı̀ⁿ-tio̍h chhin-lâng ngia̍uh-ngia̍uh-chhoah, khiā boē-tiâu, oē kóng boē chhut, sı̍t-chāi khó-sioh. Siat-sú nā kap chhin-chhek óng-lâi chhin-jia̍t, tāi-ke saⁿ pang-chān, sı̍t-chāi sı̄ ka-têng chı̀n-pō͘ ê toē-ki.
Koh kàu-hoē ê siā-kau, ū chí-bē á-sı̄ hiaⁿ-tı̄ tùi kàu-hoē ê kang chin kòng-hiàn, lán iā tio̍h hoaⁿ-hí choè chhin-chhiūⁿ hit hō ê lâng, kiám-chhái sin-hūn ū pí pa̍t lâng khah koâiⁿ, iā-sı̄ tio̍h siūⁿ tio̍h Siā-kau nn̄g-jı̄ lâi ka-kı̄ kàng-kē lán ê sim, hoaⁿ-hí kap kàu-hoē ê lâng-lâng chhin-bı̍t óng-lâi, án-ni hoē-lāi hoē-goā tek-khak hoaⁿ-hí hoan-gêng chit khoán ê lâng. Iā liû-thoân ê oē iā oē chiām-chiām siau-bô.
Koh chı̍t khoán, chiū-sı̄ tē-it hó, tē-it iàu-kín ê siā-kau-hoat, chiū-sı̄ chiong lán ê Chú ke̍k chhin-ài ê tō-lí pò-iông hō͘ lâng chai. Chit khoán ê tō-lí sè-kan lâng-lâng to lóng ū hūn. Chhin-chhiūⁿ téng-bı̄n só͘ lūn ê siā-kau, ū lâng chin gâu kau-poê, chin khoah koh chhut-miâ. Khó-sioh khiàm Chú Iâ-so͘ ê tō-lí choè siā-kau ê lō͘, tı̀-kàu ū-sı̂ tú-tio̍h sit-pāi. Taⁿ ke̍k iàu-tiám chiū-sı̄ tı̄-chia. Só͘-í chhin-chhiūⁿ chit pang Pak-pō͘ ū siat Lú Soan-tō-hoē, tāi-ke chhut-iân chhe Soan-tō-hū sı̀-koè thoân tō-lí. Lán nā m̄-sı̄ tùi Chó͘-ke Soan-tō-hoē phài lâng thoân tō-lí hō͘ lán, lán tek-khak boē-tit kap Chú kau-poê. In nā m̄-sı̄ tùi sı̍t-hêng Siā-kau nn̄g-jı̄, lán sı̀n Chú ê khoài-lo̍k tùi tah-lo̍h oē tit-tio̍h? Lán nā ū chhut-iân hō͘ Soan-tō-hū, chiū-sı̄ i só͘ kàu ê só͘-chāi, lán ê siā-kau iā kàu tı̄-hia; nā chhut chı̍t-sián, sui-sı̄ sió-khoá, m̄-kú tùi Soan-tō-hoē ê kang lán ê siā-kau oē kàu tı̄-hia. Lú Soan-tō-hoē ê bo̍k-tek chiū-sı̄ in-ūi án-ni.
Só͘-í ǹg-bāng só͘ thiàⁿ-thàng ê chí-bē, ta̍k lâng ēng lín ê kiàn-sek koh ke-thiⁿ lâi siūⁿ, lán nā jı̍p Lú Soan-tō-hoē ū sím-mı̍h hui-siông ê kè-ta̍t tı̄-teh.
(Tâi-oân Hú-siâⁿ Kàu-hoē-pò tē 465 koàn, 1923 nı̂ 12 ge̍h)
