Cha-àm tı̄ bāng tiong iū-koh khoàⁿ-kı̀ⁿ lí,
Chhin-chhiūⁿ chiú-kiⁿ-ê;
Khut tı̄ Ko-hiông ê káng piⁿ,
Poê-phoāⁿ hn̄g-hn̄g siám-sih ê teng-thah;
Kò͘-siú o͘-àm-mı̂,
Jit5-sı̂, hı̂-hâng ê hán-hoah í-keng thêng-chí,
Jı̍p-iā, biō-kháu ê soan-hoa mā sûi hong phiau lı̄,
Bāng tiong ê lí, chēng chēng teh tán-thāi;
Tán-thāi o͘-àm-mı̂ koè khı̀,
Thang ngiâ-chih lēng-goā chı̍t-ê bô-êng ê chá-khí.
Hái-éng khin-khin phah hái hoāⁿ,
Put-sı̂ kek chhut bê lâng ê lōng-hoa,
Goân-sí ê chiat-chàu;
Chhin-chhiūⁿ a-bú chhiú tiong ê iô-nâ,
iô-à-iô, iô-à-iô,
Iô cháu siâⁿ-chhı̄ hoân-cha̍p ê sio̍k-khı̀,
Iô chhut ná bı̍t chı̍t poaⁿ ê kam-tiⁿ,
Iô goán tò-tńg-khı̀;
Tò-tńg-khı̀ it-seng lân-bōng ê gín-á-nı̂.
Tiò-hı̂, hoāⁿ-piah, biō-kháu, jı̍p-iā,
Siū-san soaⁿ téng bû iu chū-chāi ê chhiò siaⁿ;
Hı̂-hâng, chûn-chiah, Kı̂-āu, soa-phiâⁿ,
Tō͘-lûn lāi-bı̄n liân-siàu chheng-chhun ê hêng-iáⁿ;
Chı̍t pō͘ chı̍t kha-ı̀n,
Chı̍t khut chı̍t-tiâu kin,
Tı̄ tui-hong-tio̍k-lōng ê jı̍t-chí,
Ēng chhái-hông oē chhut-lâi ê chı̍t phiàn thiⁿ,
Kiò goán beh cháiⁿ-iūⁿ pàng-boē-kı̀!
Joā-choē ê bı̂n-bāng khı̂ⁿ lí lâi chhut-sı̀,
Joā-choē ê kò͘-sū tùi lí lâi khai-sí,
Sı̀ⁿ-miā nā sı̄ chı̍t-ê ı̂ⁿ,
Chá-bān goá oē koh tó-tńg-khı̀,
Têng-sin lâi phı̄ⁿ lo̍h-kin ê thô͘, bô thang thè-oāⁿ ê phang-bı̄.
Chit hūn tùi sı̀n lâi ê koat-chı̀,
Hō͘ goá sim-kam-chêng-goān lı̄-khui lí,
Thoa tio̍h liû-lông ê kha-pō͘,
Tang-sai-lâm-pak sı̀-koè khı̀,
Siáⁿ chai siang-kha ta̍h chhut mn̂g;
Kèng-jiân thiⁿ-piⁿ-hái-kak bô-liáu-sı̂,
Saⁿ-cha̍p goā ê phı̄ⁿ bô kiâm-sip-bı̄ ê “Jı̄-káu-mı̂, ”
Múi hông chhiu hong khí,
Phiàn-phiàn lo̍h-hio̍h thiam siuⁿ-si,
Nı̂-hoè jú ke-thiⁿ,
Siuⁿ-si jú kau-tı̂ⁿ,
Ah! Ha-má-seng!
Cha̍p-káu hoè lı̄-khui lí,
Siáⁿ-sı̂ chiah oē thang koh tò-tńg-khı̀!
Siáⁿ-sı̂ chiah oē thang koh tò-tńg-khı̀!
(Gân Sı̀n-seng Tâi-gí Bûn-ha̍k soán, 2002 nı̂ Chin-pêng Khı̀-gia̍p Chhut-pán)
