Hiān-chāi ê A-mi-cho̍k

A-mi-cho̍k, chiū-sı̄ tiàm tı̄ tang Tâi-oân khiā-khí ê goân-chū-bı̂n, in goân-pún bı̄n bô chhiah-jı̄, iā bô thâi lâng ê hong-sio̍k; in só͘ tiàm, sı̄ tı̄ pı̂ⁿ-iûⁿ soaⁿ-kha ê só͘-chāi, só͘-í lâng kā in hun-pia̍t sı̄ “kē-soaⁿ hoan.” (Pa̍t khoán, goân-pún lâm-lú, bı̄n lóng tio̍h chhiah-jı̄, iā siông-siông ài thâi lâng, seng-oa̍h sı̄ tiàm tı̄ soaⁿ-lāi, só͘-í lâng kā i hun-pia̍t sı̄ “koân-soaⁿ hoan”).

Taⁿ goá só͘ teh kóng--ê, sı̄ choan kóng “kē-soaⁿ hoan” (A-mi-cho̍k). Tùi Hoe-liân-káng kàu Tâi-tang, chı̍t choā pı̂ⁿ-iûⁿ, í-kı̍p iân hái-piⁿ, sı̀-koè lóng ū A-mi-cho̍k teh khiā-khí (tāi-iok ū oá 5 bān). Lūn in ê seng-oa̍h, choân-pō͘ sı̄ keng-lông, boē-hiáu choè seng-lí, ta-po͘--ê,ū-sı̂ ài lia̍h; cha-bó͘--ê, lóng tio̍h choh-sit.
Lūn kàu-io̍k, koaⁿ-hú tı̄ ta̍k só͘-chāi lóng ū kā in siat kong-ha̍k-hāu. Koh tı̄ ta̍k ê hoan-siā ū siat iā-ha̍k, hō͘ siàu-liân ê lâm-lú o̍h kok-gú, in chin hoaⁿ-hí o̍h kok-gú, oē kóng kok-gú ê siàu-liân lâng khah choē, oē kóng Hàn-oē--ê chin chió.
Lūn in ê khí-chhù, pún sı̄ soè-á-keng, chhù-lāi ēng tı̂n, koaⁿ-chin pa̍k pín-á choè khòng-chhn̂g, tiong-ng lâu chı̍t ê khang-toē thang khí hé hang sio. Hiān-chāi teh kái-chèng, chiām-chiām teh khí Tang-iûⁿ-sek, thang-á-mn̂g, po-lê-tó͘ thoah-mn̂g, chóng-sı̄ goā-bı̄n khoàⁿ chhin-chhiūⁿ Tang-iûⁿ-sek, lāi-bı̄n khiok bô siāng. Chóng-sı̄ kàu chit chām, chiū teh-beh gûi-hiám lah, in pêng-sı̂ sı̄ chin khiām, chóng-sı̄ í-keng ū lâng chhù khí chin sóng, chia̍h, chhēng ke̍k iu-téng--ê, bô kúi-nı̂ ê tiong-kan, chhân lóng boē--khı̀, chhù iā soà boē--khı̀, ke-hé lóng khai liáu-liáu. Kiaⁿ-liáu āu-lâi iā oē choē-choē lâng chhin-chhiūⁿ án-ni.
Lūn chong-kàu. In só͘ ho̍k-sāi--ê, khah iàu-kín sı̄ chó͘-kong, ta̍k-pái nā siu-tang liáu-āu, chiū thong siā liân-ha̍p chia̍h chiú thiàu-bú, kı̀-liām in ê chó͘-kong, iā piáu-bêng kám-siā chō-bu̍t Chú, ū-ê ū ho̍k-sāi lo̍k-thâu á-sı̄ ti-thâu. Tı̄ Gio̍k-lí chi-thiaⁿ koán-lāi ê A-mi-cho̍k in ê chhù-lāi khah choē ū chhāi sı̂n-siā, iā tı̄ choē-choē ê chng-thâu ū khí sı̂n-siā, kè-chhoā ê sı̂,chiū khı̀ sı̂n-siā chham-pài, kèng-chhat koaⁿ-lı̍p-hoē, chhin-cho̍k iā lóng tè khı̀ khoàⁿ, án-ni choè kiat-hun-sek. Chòng-sek iā ū-ê chhiáⁿ hê-siūⁿ lâi liām-keng, í-keng ū A-mi-cho̍k ê lâng choè Tang-iuⁿ-sek ê hê-siūⁿ, siông-siông hō͘ lâng chhiáⁿ khı̀ hù chòng-sek.
Lūn thoân-kàu tı̄ A-mi-cho̍k ê tiong-kan, chit-tia̍p tú teh khai-chiàn, sêng-chek hó, í-keng ū tit-tio̍h kúi-nā lâng lâi sı̀n. Hiān-sı̂ nā pò͘-tō tı̄ in tiong-kan, he̍k-sı̄ kò-jı̂n á-sı̄ thoân-thé, lóng hó ki-hoē. Kū-nı̂ 12 ge̍h, Pò͘-tō-thoân lâi Koan-im-soaⁿ ê sı̂, goá ū chhoā in khı̀ thàm hoan-siā. Hit-sı̂ ū kúi-nā ê hū-jı̂n-lâng choè-tı̄n, chiông-tiong chı̍t lâng Phoaⁿ--sı̄ A-moē. Lâu Thian-lâi Tiúⁿ-ló chhiáⁿ i choè thong-e̍k, chiū jı̍p-khı̀ in ê chhù-lāi, keng-kè kúi-nā ke, kóng tō-lí hō͘ in thiaⁿ, in thiaⁿ-liáu chin hoaⁿ-hí, lóng bô hoán-tùi, o-ló goán só͘ kóng--ê, sı̄ chin ū-iáⁿ, iā hián-bêng kám-siā ê khoán, kóng, Kai-chài lín lâi pò goán chai, sı̄ kiò-chhíⁿ goán ê sim. Lūn thoân-thé ê pò͘-tō, khoàⁿ Khó͘ Lâm-bián sàng só͘ pò--ê, chiū chai. Lūn thoân-kàu tı̄ A-mi-cho̍k, chiong-lâi tio̍h cháiⁿ-iūⁿ chı̀n-hêng, phí-jı̂n siông teh gián-kiù, ǹg-bāng āu-ge̍h beh chiap-soà koh siá tām-po̍h hō͘ lia̍t-ūi choè chham-khó.

(Tâi-oân Kàu-hoē Kong-pò tē 602 hō, ‘Koà-chhài-chí Pò’ tē 112 hō, 1935 nı̂ 5 goe̍h)