Hiān-tāi Tàn-í-lí

I ēng án-choáⁿ lâi khiā tı̄ sai ê tiong-kan? (Ū chı̍t-ê hiaⁿ-tı̄ ê hui-siông ê thiàⁿ-thàng). M̄-nā Tàn-í-lí toà sai-hia̍t koè mê nā-tiāⁿ, tı̄ bô kúi-nı̂ chêng, iā ū chı̍t-ê chám-jiân ióng-kám ê gín-ná jı̍p tı̄ sai-hia̍t. Chit ê sū āu--lâi ū lâng kā Hián-lí tiān-hā kóng. Chit ê sū chiū-sı̄: Tı̄ 1917 nı̂, ū chı̍t-ê cha-bó͘ gín-ná miâ I-sū-ta̍t (Esta Gercia), chhut-sı̀ kha chiū phoà-siùⁿ. I ū chı̍t-ê sin-chiūⁿ ê hiaⁿ, miâ Au-hut-lia̍t (Alfred) chin thiàⁿ i, iā ǹg-bāng i chit ê sió-moē bô loā-kú ē kap i thit-thô. Nā-sı̄ chiām-chiām chai chit ê nńg-chiáⁿ sè-hàn ê I-sū-ta̍t tek-khak liân kiâⁿ to bē. Chit ê gín-ná lı̂n-bín ê sim, jú toā-hàn jú chhim, iā chı̄n i só͘-ē teh chò, beh hō͘ chit-ê phoà-siùⁿ ê seng-gâi khah hēng-hok. Nā-sı̄ hit-sı̂ ū chı̍t-ê ki-hoē, chiàu khoàⁿ ē-thang hō͘ chit-ê cha-bó͘ gín-ná tit-tio̍h táⁿ-tia̍p. Au-hut-lia̍t 12 hoè teh chò kip-sū lâi teh tō͘-oa̍h ê sı̂, ū chı̍t-pái thiaⁿ-kı̀ⁿ chhı̄-sai ê lâng kóng, Nā ū lâng káⁿ jı̍p i ê sai ê tû-lâi, beh 50 pōng (500 kho͘) siúⁿ lâng, sı̄ in-ūi bô lâng káⁿ jı̍p-khı̀. Hit-tia̍p chit-ê khiok-má-tiûⁿ oāⁿ lâi tı̄ Sê-iá (Sheffield). Au-hut-lia̍t chiū chhut-goā khı̀ hia, iā ióng-kám chiū jı̍p-khı̀ sai-tû-lāi, chóng--sı̄ iā bô siū hiah ê ok-béng ê siù siong-hāi. Só͘-í i chiū tit-tio̍h 50 pōng (500 kho͘) ê chhiú-hêng. Iā i chiū tı̍t-thàu khı̀ Ha-lia̍t-teng (Harley Street) chiū-sı̄ tı̄ Lûn-tun ê chhut-miâ i-seng ê ke. Chiong chiah ê chı̂ⁿ beh lâi phèng-chhiáⁿ i-seng khı̀ táⁿ-tia̍p in sió-moē. Ū chı̍t-ê chin gâu ê choan-bûn-ka, thiaⁿ-tio̍h chit ê Au-hut-lia̍t ê sū-chêng, chiū iok beh i in chit-ê phoà-siùⁿ ê sió-moē, chóng--sı̄ tek-khak m̄ siu i chit 50 pōng. Gâu ê i-seng khah-siông chhin-chhiūⁿ án-ni, che chiū-sı̄ in chong-kàu sim ê khoán; iā àm-chı̄ⁿ chhiáⁿ chit ê gín-ná, jiân-āu hit ê i-seng chiū thè i siat-hoat, kiò in sió-moē tio̍h khı̀ jı̍p Ông-lı̍p ê Kı̂-hêng pēⁿ-ı̄ⁿ, tı̄-hia tit-tio̍h chiâu-chǹg ê táⁿ-tia̍p. Iā Au-hut-lia̍t chiū tiāⁿ-tio̍h ı̀-sù chiong hit 50 pōng the̍h hō͘ hit keng pēⁿ-ı̄ⁿ, kiò in tek-khak tio̍h siu. Chit-ê sı̄ iok 5 nı̂ chêng ê sū, iā I-sū-ta̍t chū hit-tia̍p chiū toà hia. Au-hut-lia̍t bē bián-tit ū-sı̂ sim-koaⁿ giâu-gı̂ i tı̄ sai-hia̍t só͘ chò ê mō͘-hiám lóng kui khang-khang; chóng--sı̄ kiat-kio̍k kho-ha̍k sı̄ khah-iâⁿ pēⁿ-thiàⁿ. Hián-lí tiān-hā khı̀ thàm i ê pēⁿ-sek ê sı̂, i ū kiâⁿ chhut-lâi kap i biān-hoē. Ah! Au-hut-lia̍t ê bōng-sióng, kin-ná-jı̍t sı̍t-hiān. Lán ài soà kā i kiong-hí, iā soà kiû ǹg-bāng siū toā tı̀-ı̀m ê I-sū-ta̍t ē tit-tio̍h hok-khı̀ chia̍h tn̂g hoè-siū. (Tâi-oân Kàu-hoē-pò tē 516 koàn, 1928 nı̂ 3 ge̍h)