Hiok--á kap Táng--ê
Ū nn̄g-ê peng-á, lóng sı̄ 1984 nı̂ chhut-sı̀--ê, chı̍t-ê kok-tiong chhut-gia̍p tō leh kang-tē chò khang-khoè, hō-chò “Hiok--á”, sı̄ poaⁿ-soá lo̍h-lâi Hong-goân ê Tayal; lēng-goā chı̍t-ê kok-tiong tha̍k bô thàu, mā ū chò chı̍t-chām-á khang-khoè, lâng lóng kiò i “Táng--ê”. Hiok--á bó͘ chhoā--a, kiáⁿ mā seⁿ--a, sui-bóng nı̂-hoè iáu sǹg chió, m̄-koh ē-sái kóng í-keng ū tām-po̍h-á siā-hoē keng-giām--a. Ū chı̍t-pái, Hiok--á hioh gō͘-kang ká, chiàu-lí kóng, pài-sı̀ hit-jı̍t ài siu-ká tńg--lâi, tūi--nih kui-tēng chhit-tiám chı̀n-chêng ài oân-sêng siu-ká ê têng-sû. Kàu cha̍p-tiám beh khùn--a, soah iáu bô khoàⁿ-kı̀ⁿ lâng, kun-koaⁿ hām sū-koaⁿ lāu--ê hoân-ló i ē chhut ı̀-goā, mā siūⁿ bô i ū jı̄n-hô tô-peng ê tōng-ki: kám-chêng ún-tēng, chò-peng-á-lâng goe̍h-kip iú-hān, mā bô thiaⁿ-koè i teh ai, kun-tiong ê choan-gia̍p ki-su̍t sui-bóng oh-laiú ū khah bān, chóng--sı̄ “giām-siu” mā lóng ū koè. Chı̍t-kang, nn̄g-kang, saⁿ-kang, kàu tē-gō͘-kang, tūi-á bē kham-tit tán--a, beh kā “lı̄-iâⁿ thong-pò” hoat--chhut-khı̀, tı̄ chit-ê sı̂-chūn, koh it-tı̍t hām in tau ê lâng liân-lo̍k, mā lóng iáu bô i ê siau-sit, ûi-it khak-tēng--ê sı̄ i cháu bē kú, sin-khu taⁿ-á saⁿ-chheng-kho͘. Tē-gō͘-kang ê sı̂, in tau ê lâng chóng-sǹg chiap-tio̍h i khà--tńg-khı̀ ê tiān-oē, sûi tō kā tūi--nih kóng, ē chhin-sin kā i chài-lâi Chó-iâⁿ. Tán i tńg--lâi, chiah thiaⁿ in thı̂n-siōng ê sū-koaⁿ lāu--ê kóng, kai siu-ká hit-kang, i kàu Chó-iâⁿ ê sı̂ tō chhiân chı̍t-tiám-cheng kú--a, m̄-káⁿ khà tiān-oē tńg tūi--nih, mā m̄-káⁿ khà tiān-oē tńg chhù--nih, choaⁿ-á tı̄『網咖』chiú gō͘-kang, bô-chı̂ⁿ--a chiah hām chhù--nih liân-lo̍k. Tô-peng tı̄ kun-tiong tiāⁿ thiaⁿ-kóng, m̄-koh nā m̄-sı̄ toà bē tiâu, tō-sı̄ kám-chêng in-sò͘, iáu m̄-bat ū chhiūⁿ i án-ne: sı̂-kan bē-hù--a, tō kui-khı̀ mài tńg--khı̀. Chit chân tāi-chı̀ hián-sı̄, i bô chhú-lí tāi-chı̀ ê lêng-le̍k, tú-tio̍h tāi-chı̀ tō siūⁿ beh siám, án-ne beh án-choáⁿ chhiâⁿ i ê gín-á? Khah hō͘ lâng hoân-ló--ê sı̄, chit-má ê siàu-liân-lâng kám lóng án-ne? Mài kóng beh sio-chiàn iah beh kiàn-kok, liân chò-lâng ê lāu-pē, chhú-lí ka-tı̄ ê sū-hāng khióng-kiaⁿ to ū būn-tê--a, i koh sı̄ ū tām-po̍h-á siā-hoē keng-giām--ê. Nā taⁿ-á i chı̍t-ê án-ne, hoān-sè sı̄ goá siūⁿ siuⁿ chē. M̄-koh goán tūi--nih lēng-goā chı̍t-ê soah koh jú hàm-kó͘. Táng--ê pàng-ká hit-kang, ùi Chó-iâⁿ chē bá-suh kàu Ko-hiông hoé-chhia-thâu, kàu hia chiah hoat-hiān chı̂ⁿ-tē-á pháng--khı̀, m̄-káⁿ khà tiān-oē tńg-khı̀ tūi--nih, mā m̄-káⁿ kap chhù--nih liân-lo̍k, tō iōng kiâⁿ--ê, kiâⁿ nn̄g-kang chiah tńg kàu Chó-iâⁿ (tiong-ng koh kiâⁿ bô--khı̀). Che sı̍t-chāi hō͘ lâng siūⁿ bô, i soah m̄-chai chhia-thâu lóng ū kun-jı̂n ho̍k-bū-chām? I kám m̄-chai ē-sái chhoē kéng-chhat? Chhiūⁿ chit-khoán kı̂-kı̂-khoài-khoài ê tāi-chı̀, tı̄ goán tūi--nih ē-sái kóng chin sù-siông, khah hoân-ló --ê sı̄, che tō-sı̄ chín siàu-liân-ke ê sò͘-chit, pau-khoah chı̀n-chêng thiaⁿ-tio̍h『草莓世代』ê chióng-chióng hàm-kó͘, lán kám bē hoân-ló? Kàu sı̂-chūn, in ài lâi keng chit-ê kok-ka neh? Siông-sè kā siūⁿ, che sı̄ án-choáⁿ chō-chiâⁿ--ê? (TGB Thong-sı̀n tē 66 kı̂, 2005 nı̂ 3 goe̍h)