Hiong-chhoan ê Thoân-kàu-chiá

Lé-pài ê jı̂n-sò͘ tı̍t-tı̍t kiám-chió, chū-hoē chiām-chiām léng-tām. Chit keng hiong-chhoan ê T.M. kàu-hoē tı̄ chiâⁿ cha̍p nı̂ chêng hō͘ lâng khoàⁿ choè sı̄ hoē-iú choē, keng-chè hó, sı̀n-tô͘ jia̍t-sim ê kàu-hoē; nā-sı̄ kūn-lâi hián-jiân teh soe-thè lah. Lı̂m Tiong-iông Thoân-tō kūi tı̄ pài-tn̂g ê káng-tâi chêng teh kı̂-tó; kau-chı̍p tı̄ i sim-lāi ê thòng-khó͘ thang tùi chhùi-nih ê thó͘-khùi chhám-chhoeh, sı̄m-chı̀ lâu ba̍k-sái ê siaⁿ piáu-hiān chhut-lâi. Kı̂-tó soah, chhin-chhiūⁿ chin ià-siān ê khoán-sit, jı̍p-lâi chē tı̄ tha̍k-chheh ūi, chhı̍h toh-téng ê jı̍t-kong-teng to̍h, chhiú lám-heng, thâu-khak kia̍h koâiⁿ teh tı̂m-su; chı̍t-bō͘ chı̍t-bō͘ ê hoê-ek tùi i ê náu-lāi cháu kè-khı̀. Nn̄g-nı̂ chêng: I chhoā hū-jı̂n-lâng Siok-cheng kap nn̄g ê kiáⁿ-jı̂ Kèng-it, Sı̀n-it lâi kàu chit keng kàu-hoē hù-jı̄m. Hu-hū lóng phāu tio̍h moá-hoâi ê jia̍t-chêng beh ūi Chú choè kang, sū-sı̍t iā sı̄ án-ni; in ū choân-sim piàⁿ-miā tı̄ só͘ kau-tāi ê chit-hūn. I te̍k-pia̍t ū pò͘-tō ê un-sù, só͘-í tùi goā ê kang-chok; bô-lūn tāi-chiòng pò͘-tō, á-sı̄ kò-jı̂n pò͘-tō lóng chı̄n só͘ oē ê teh choè. Àm-sı̂ nā bô chū-hoē, chiū chio hoē-iú, tióng-chip khı̀ ta̍k chng-siā pò͘-tō, choè hoàn-teng, pun pò͘-tō-toaⁿ. Ū sı̂ i ka-kı̄ chı̍t ê lâng khı̀ kap hiah ê boē io̍h-á ê ông-lo̍k-sian chē, tı̄ koe-lō͘ piⁿ káng-kái hok-im,chio lâng lâi tit pêng-an io̍h, hit ê jia̍t-chêng bô khah su hiah ê lâng. Jı̍t-sı̂ tı̄ lō͘-nih, á-sı̄ kok ka-têng khı̀ kap siā-hoē kok-sek, kok-iūⁿ ê bê-sı̀n-chiá chiap-chhiok tâm-tō ...... I án-ni choè, chiū-sı̄ i chai-iáⁿ che sı̄ kin-á-jı̍t hiong-chhoan kàu-hoē bán-kiù thè-pō͘ ê ı̂-it hong-hoat. Ū-iáⁿ! lâng sui-jiân ngı̄-sim bô hiah khoài lâi sı̀n, m̄-kú ū choè kang pit-tēng ū siu-sêng, tı̄ chı̍t nn̄g nı̂ bô ià-siān ê kang-chok hā, iā tit-tio̍h 5 hō͘ ê choân-ke kap kúi-nā ê chheng-liân lâi bō͘-tō, ū ê iā siū soé-lé, nā-sı̄ án-ni iáu bô hoat-tō͘ thang èng-hù to͘-chhı̄ ê siau-lō͘(供不應求). Nn̄g nı̂ chêng i lâi hù-jı̄m ê sı̂ kàu-hoē ū 30 hō͘, taⁿ ū ke-thiⁿ 5 hō͘, eng-kai sı̄ 35 hō͘ chiah tio̍h, m̄-kú sı̍t-chāi chiah chhun 20 goā hō͘ nā-tiāⁿ, só͘ bô khı̀ ê lâng tong-jiân lóng sı̄ siū sı̂-tāi ê kip piàn, kang-gia̍p siā-hoē ê éng-hióng lâu chhut-khı̀ tı̄ goā-bı̄n lah; jı̂-chhiáⁿ chia ê lâng toā-pō͘-hūn sı̄ khah jia̍t-sim, keng-chè iā pí-kàu khah hó ê lâng. Chhin-chhiūⁿ choè I-seng ê Lâu Tiúⁿ-ló; choè toā sū-gia̍p ê Tân Tiúⁿ-ló; choè seng-lí ê Ông Chip-sū, á-sı̄ kong-bū-oân Sím Kho-tiúⁿ, Lô͘ Lāu-su téng-téng, in lóng sı̄ kàu-hoē ê toā thiāu-chio̍h. In ê lı̄-khui ná chhin-chhiūⁿ chı̍t keng chhù ê tòng-liông chiām-chiām siū thiah cháu chı̍t-iūⁿ. Sui-jiân in tı̄ to͘-chhı̄ ê kàu-hoē iû-goân iā kè-sio̍k in ê jia̍t-sim, nā-sı̄ chhân-chng ê kàu-hoē ná lâi ná giâm-tiōng. Lé-pài-jı̍t khoàⁿ-kı̀ⁿ chheng-chheng bān-bān ê hoē-iú teh choè lé-pài, lāi-bı̄n 40 liâu í-á kàu-gia̍h hō͘ chı̍t lâng chē chı̍t liâu koh ū chhun. I siu-éng bûn-ngá ê káng-tō hong-sek, boē thang chhı̀-kek chiah ê lāu-lâng kap hū-jı̂n-lâng ê siau-hoà; ū sı̂ chí-ū chiâⁿ choè chı̍t tiûⁿ ê chhui-bı̂n-khiok chhiùⁿ hō͘ in an-bı̂n jı̍p thian-kok nā-tiāⁿ; hoē-iú chı̍t phiàn jia̍t-sêng ê hé jı̍p-lâi kèng-pài, hoán-tńg toà tio̍h chı̍t tè léng-tām ê peng tńg-khı̀. In ê sı̀n-sim kiám-chhái chiū tı̄ chit khoán ê khong-khı̀ tiong léng-tām lah. Kūn-lâi i chai-iáⁿ hoē-iú chiām-chiām teh bô hoan-gêng i. che thang tùi tı̄ kı̂-tó-hoē in ê kı̂-tó khoàⁿ--chhut-lâi:“ Siōng-tè ah! kiû Lí ê Sèng Sı̂n chhiong-moá Lí ê kang-lâng, hō͘ i gâu choè kang,hō͘ goán ê kàu-hoē chhin-chhiūⁿ í-chêng ê khoán-sit ...........”

 Kim ê-àm sı̄ i choè kan-khó͘ sim, choè siū chhı̀-kek ê chı̍t àm, in-ūi kı̂-tó-hoē soah,nı̂ lāu ê Bo̍k Tiúⁿ-ló khoàⁿ tio̍h kı̂-tó-hoē ê jı̂n-sò͘ chió kàu chhiⁿ-chhı̀n, the̍h chhut i ê chèng-gı̄-kám, tng i ê bı̄n-chêng bô soè-jı̄ kóng:“Sian-siⁿ ah! khoàⁿ-māi leh, chiah-nih chió lâng teh chū-hoē, lí kiám bô khoàⁿ-tio̍h?” “Goá chai, nā-sı̄ goá pí lín khah kan-khó͘ sim, goá pēng m̄-sı̄ bô chı̄n goá ê khùi-la̍t,chóng-sı̄ m̄-chai goá tio̍h cháiⁿ-iūⁿ choè?” “Goán ê iau-kiû sı̄: chí iàu lí hoê-ho̍k chhin-chhiūⁿ nn̄g nı̂ chêng ê chêng-hêng chiū hó.”“Bo̍k Tiúⁿ-ló, kàu-hoē soe-thè ê goân-in, m̄-thang lóng-chóng koài goá, che sı̄ sı̂-tāi ê hiān-siōng, kin-á-jı̍t ê hiong-chhoan kàu-hoē tāi-pō͘-hūn lóng siāng khoán ê kéng-gū. Kàu-hoē pún-lâi hiah ê toā-thiāu lóng chhut-khı̀ lah, sin lâi ê hoē-iú beh chō-chiū kàu chhin-chhiūⁿ hiah ê lâng, m̄-sı̄ chin khoài ê sū.”“Che sı̄ sū-sı̍t, goá m̄-káⁿ hó͘-jı̄n; m̄-kú lán khoàⁿ chá-sı̂ ê thoân-kàu-chiá ūi sím-mı̍h oē thang hō͘ kàu-hoē tit-tio̍h heng-ōng, jı̂ kin-á-jı̍t ê thoân-tō-chiá boē tàng nih? Goá ê ı̀-sù, sı̄ lán eng-kai tio̍h koh hùn-hoat chiah tio̍h.”“To-siā, goá chiah chı̄n só͘ oē ê lâi phah-piàⁿ, chhiáⁿ lín iā kap goá ha̍p-chok.”

x x x x x Siok-chēng ê àm-mı̂ tı̍t-tı̍t tò-oá, goā-bı̄n ê hong hū-hū-háu, nā-sı̄ i lóng bô kám-kak. Hut-jiân i thó͘ chı̍t ê toā-khùi ê siaⁿ kiaⁿ-chhíⁿ teh khùn ê hū-jı̂n-lâng Siok-cheng.“Êⁿ! Tiong-iông, lí iáu-bē khùn, hiān-chāi í-keng sı̄ poàⁿ-mı̂ lah.” Siok-cheng tùi bı̂n-chhn̂g peh khí-lâi, lâi chē tı̄ i ê sin-piⁿ, koh kóng, “Ū sím-mı̍h tāi-chı̀ hō͘ lí sit-bı̂n?”“Siok-cheng, goá siūⁿ beh lı̄-khui thoân-tō ê kang.”“Lí m̄-thang ūi-tio̍h Bo̍k Tiúⁿ-ló só͘ kóng hiah ê oē lâi sit-chı̀.” Siok-cheng an-ùi i kóng, “Bo̍k Tiúⁿ-ló ê oē sui-jiân ū khah bô kheh-khı̀, m̄-kú i só͘ kóng ê pèng m̄-sı̄ m̄-tio̍h. I sı̄ lāu toā-lâng, lán sı̄ chheng-liân lâng, i tùi lán ê kéng-kò, sı̄ hō͘ lán khah oē kín-sı̄n kap kek-khí lán choè kang ê jia̍t-sêng, che tùi lán sı̄ ū lı̄-ek ê.”“Goá m̄-sı̄ siong-sim Bo̍k Tiúⁿ-ló ê oē, goá sı̄ kám-kak goá bô kàu khùi-la̍t thang hō͘ Chú ēng, m̄-thang khang chiàm thó͘-toē, put-jû lı̄-khui kàu-kài lâi khı̀ choè pa̍t khoán ê kang-chok. Iā ēng lán só͘ choè oē tit kàu ê sı̂-kan kap kim-chı̂ⁿ lâi hōng-hiàn hō͘ Chú, che kap choè thoân-tō pı̂ⁿ-pı̂ⁿ siāng khoán, jı̂-chhiáⁿ tùi Siōng-tè kap lâng lóng khah pêng-an.”“Án-ni, lí sı̄ m̄ kam-goān kā Chú choè kang, beh tô-pı̄ sù-bēng sı̄ bô?”“M̄-sı̄, goá chin chū-kak; goān choè lô͘-po̍k tio̍h siū lâng siat-to̍k chit kù oē.”“Lí ê oē ū mâu-tún.” Siok-cheng chhiò-chhiò kóng, “Lí kı̀-jiân goān choè lô͘-po̍k,lim chit ê khó͘-poe, ūi sím-mı̍h iū-koh siūⁿ beh lı̄-khui sù-bēng khı̀ choè pa̍t khoán ê kang?” “In-ūi goá kám-kak boē thang êng-kng Siōng-tè lı̄-ek lâng ah.”“Nā-sı̄ án-ni bô iàu-kín, lán ê Chú sı̄ ài mn̄g lán ū teh choè bô? I bô mn̄g choè liáu án-choáⁿ, chí iàu lán tı̄ Siōng-tè ê bı̄n-chêng bô kiàn-siàu I ê kang, án-ni chiū hó. Chóng-sı̄ ká-sú lán nā siám-pı̄ chit ê sù-bēng, it-tēng boē thang tit-tio̍h chiok-hok. Goá siông-siông thiaⁿ kóng í-chêng poàn-tô͘ jı̂-hoè ê kang-lâng, kàu bé lóng hō͘ Siōng-tè bô hoaⁿ-hí, tú-tio̍h bô hó kiat-kó.”“Siok-cheng, lí ê kiàn-kái ū tām-po̍h chhò-gō͘, lí kóng nā bô choè thoân-tō, Siōng-tè bô chiok-hok, goá bô chàn-sêng lí chit kù oē. “Thoân-tō” chit nn̄g jı̄ m̄-sı̄ pau-hâm ū chip-chiàu ê bo̍k-su, thoân tō nā-tiāⁿ. Hiān-chāi lán teh kiông-tiau “Sı̀n-tô͘ kai-peng,” “Kang-gia̍p chit-he̍k thoân-tō.” Chit ê ı̀-sù sı̄ kóng, “Múi chı̍t ê hoē-iú lóng sı̄ thoân-tō-jı̂n.” Choè chı̍t ê kàu-chit-chiá iā m̄-sı̄ chí-ū ta̍k jı̍t koaiⁿ tı̄ pài-tn̂g, chhin-chhiūⁿ biō-kong chú-chhı̂ lé-pài, chū-hoē, sûn hoē-iú nā-tiāⁿ, kı̂-thaⁿ ê jı̍t êng-êng bô choè sū. Kin-á-jı̍t ê sı̀n-tô͘ eng-kai tio̍h khiā tı̄ ka-kı̄ ê kong-ūi siōng lâi choè kng, choè iâm ê sù-bēng, kiàn-chèng Ki-tok. Só͘-í goá siūⁿ hiah ê pêng-sı̂ tı̄ siā-hoē teh ho̍k-bū jı̂n-kûn, iā siāng-sı̂ tı̄ kàu-hoē teh choè kang ê sı̀n-tô͘ chiah sı̄ sı̂-tāi ê thoân-tō-chiá. Nā án-ni beh án-choáⁿ kóng Siōng-tè bô hoaⁿ-hí, hoán-tńg sı̄ hō͘ Siōng-tè toā chiok-hok chiah tio̍h; sū-sı̍t goá mā khoàⁿ chit khoán ê lâng chin-chiàⁿ hō͘ Siōng-tè chiok-hok ê lâng chin-choē. put-kò iā ū chin-choē lı̄-khui kàu-kài liáu-āu, soà lı̄-khui Siōng-tè ê lâng, goá to m̄-káⁿ kóng.”“Goá chàn-sêng lí chiâⁿ-choè chit ê sı̂-tāi ê thoân-kàu-chiá, nā-sı̄ bô chàn-sêng lí lı̄-khui kàu-kài, in-ūi goá kiaⁿ-liáu lí chit khoán ê lí-sióng, kàu ū chı̍t jı̍t phian-tiōng tı̄ sè-kan lâi lı̄-khui Siōng-tè iā bô tek-khak.”“Hó! goá chai lí ê ı̀-sù, goá goān pē chit ki sı̂-tāi ê sı̍p-jı̄-kè.” Tiong-iông hut-jiân khoàⁿ-kı̀ⁿ nn̄g ê kiáⁿ-jı̂ khùn kàu chin súi, soà kóng, “M̄-kú lán ê kiáⁿ-jı̂ chiong-lâi m̄-thang koh hō͘ in ū hūn chit ê kan-khó͘; goá hiān-chāi chiah chai, ūi sím-mı̍h chin-choē thoân-kàu-chiá ê chú-tē chin chió lâng kè-sêng chit ê kang-chok ê goân-in lah.”“Soè-kiáⁿ iáu-bē toā-hàn, lán m̄-chai Siōng-tè chiong-lâi jû-hô kā in an-pâi, lán boē thang kóng sím-mı̍h; put-kò bô-lūn in chiong-lâi ū choè thoân-tō-chiá, á-sı̄ choè pa̍t khoán ê kang, lán tı̄ chit ê sı̂ lóng tio̍h hó-hó chai-poê in tùi Siōng-tè eng-kai ū ê sù-bēng-kám chiah tio̍h.” Siok-cheng kóng liáu, Tiong-iông put-chí kám-kek i ê sı̀n-sim, tùi i ê chhiú khan--leh, nn̄g lâng chiū kūi tı̄ bı̂n-chhn̂g téng kı̂-tó. Kı̂-tó soah, khoàⁿ goā-bı̄n ê thang-á, tùi tang-pêng siā-jı̍p chı̍t tiâu kng-soàⁿ, chiah chai thiⁿ í-keng kng lah. x x x x x Kin-á-jı̍t í-keng sı̄ ge̍h-té lah, koè-kè Lô Chip-sū iáu-bē the̍h sin-kim lâi, chiàu í-chêng lóng tı̄ ge̍h-tiong chiū oē the̍h-lâi, sui-jiân boē thang it-tēng ê jı̍t-kı̂ chheng-chhó, iáu-kú boē chhin-chhiūⁿ chit pái keng-kè beh 10 jı̍t kú lah. Chá-khí Siok-cheng beh chhut-khı̀ boé chhài, chı̂ⁿ-tē-á ài péng-lâi péng-khı̀, chhun 5 kak gûn nā-tiāⁿ, bô hoat-tō͘ thang chhut mn̂g; tı̄ lāi-bı̄n kiâⁿ-lâi kiâⁿ-khı̀, sim-lāi iā tio̍h-kip, iā kı̂-tó, nn̄g ê kiáⁿ Kèng-it, Sı̀n-it tı̍t-tı̍t chhá ma-ma tio̍h koáⁿ-kín khı̀.“Ma-ma, kin-á-jı̍t tio̍h kā goán boé bah tńg-lâi o͘h, goán chin kú lóng bô phè bah lah.” Kèng-it khiú lāu-bú ê saⁿ-á kóng,“Ma-ma, tio̍h kā goá boé Tomato tńg-lâi o͘h,” Sı̀n-it iā kóng.“Hó ! Hó! tán chı̍t-ē, ma-ma it-tēng kā lín boé.” Tiong-iông khoàⁿ tio̍h nn̄g ê kiáⁿ teh chhá lāu-bú, khoàⁿ liáu sim kan-khó͘, chiah tùi Siok-cheng kóng,“Goá siūⁿ, tio̍h tńg-lâi kā pa-pa chhun tn̂g-chhiú chiah tio̍h.” “M̄-kú chhun 5 kak gûn, beh án-choáⁿ chē chhia tńg-khı̀ the̍h.”“Ia̍h bô mā tio̍h siá phoe kiò pa-pa kià 100 kho͘ lâi.”“Tı̄ chı̂ⁿ iáu-bē lâi ê chit nn̄g, saⁿ jı̍t beh án-choáⁿ kè.” “Ū-iáⁿ to tio̍h.” Tiong-iông thâu-khak khi-khi teh siūⁿ bô pān-hoat, chin kú chiah siūⁿ-tio̍h.“Ah! Bêng-jı̂n hiaⁿ pêng-sı̂ kap lán chin hó, lí seng khı̀ kā i chioh 20 kho͘ hó bô?”“M̄-thang, choa̍t-tùi m̄-thang; choè thoân-kàu-chiá bô-lūn jû-hô boē ēng-tit kā hoē-iú chioh chı̂ⁿ, oē éng-hióng lán ê jı̂n-keh.”“Á-sı̄ lâi-khı̀ kā tâng-kang ê Liāu Sian-siⁿ chioh hó bô?”“Kúi jı̍t chêng i chiah cháu lâi kā lán chioh bô leh, lí soà boē kı̀-tit.”“Lô Chip-sū kūn-jı̍t tit-tio̍h chı̍t ê eⁿ-á,tāi-khài sı̄ bô-êng kàu boē kı̀-tit. Goá lâi-khı̀ in tau, chı̍t bı̄n khoàⁿ i ê eⁿ-á, chı̍t bı̄n khoàⁿ i oē sūn-soà the̍h hō͘ goá boē?”“Chit ê pān-hoat hó, chóng-sı̄ i ê chhù chin hn̄g, khı̀ koh tńg-lâi í-keng kè tàu lah, tiong-tàu m̄ tio̍h hō͘ iau?” “Mā bô hoat-tō͘, goá chiah khiâ chhia khah kín leh, khoàⁿ oē thang tńg-lâi hù tàu boē?” I ê chhia tú-á beh khiâ chhut-khı̀, Lô Chip-sū iā tú-hó khiâ chhia jı̍p-lâi.“Lô Chip-sū pêng-an.”“Pêng-an, sian-siⁿ-niû pêng-an,”“Pêng-an, chhiáⁿ jı̍p-lâi chē.” Siok-cheng ná kóng ná giâ í, 3 ê lâng lóng jı̍p-lâi chē lâng-kheh-thiaⁿ.“Chin kiong-hí, kám-siā Chú siúⁿ-sù lí koh tit-tio̍h chı̍t ê kong-chú, goá tú-tú beh lâi-khı̀ kā lí pài-hóng. Taⁿ Chip-sū-niû kap eⁿ-á lóng pêng-an hò͘ⁿ?”“Kám-siā Chú, lóng pêng-an. Sian-siⁿ-niû kiám sı̄ iā beh koh seng-sán lah?”“Sı̄ lah, tāi-khài koh nn̄g ge̍h-jı̍t.”“Hāi lah, lán kàu-hoē ê keng-chè ná lâi ná bái, chit ge̍h-jı̍t kā lí thoa kè chiah kú, sı̍t-chāi chin pháiⁿ-sè; sı̄ in-ūi khêng bô kàu thang hō͘ lí, khı̀ tùi hoē-iú ê chhù kā in bō͘-koan, chiah bān kàu kin-á-jı̍t.”“Boē lah, lí hiah-nih bô-êng, koh hō͘ lí tio̍h-boâ, chin to-siā.” Lô Chip-sū tùi choá tē-á piàⁿ chhut chı̍t tui ê chı̂ⁿ, ū 10 kho͘--ê,5 kho͘--ê, chı̍t kho͘--ê, 5 kak--ê, iā ū nn̄g kak, chı̍t kak--ê.“Lâi, lán lâi tàu sǹg, chiah ê sı̄ tēng-kı̂ hiàn-kim, lé-pài hiàn-kim, iā tùi Chú-jı̍t-o̍h hit pêng chioh lâi saⁿ-thiⁿ, khêng-khêng leh tú-á hó.” “Ah! chiah choē chı̂ⁿ, ma-ma, lán ū thang boé chhài lah.” Hut-jiân Sı̀n-it toā siaⁿ hoah chhut-lâi, hō͘ Tiong-iông, Siok-cheng ê bı̄n lóng âng--khí-lâi.“Chit ge̍h-jı̍t ê bí, chı̍t kun sı̄ 3 kho͘ poàⁿ; 4 ê lâng 160 kun, tú-hó sı̄ 560 kho͘, ha̍p pún-hōng 550 kho͘, lóng-chóng sı̄ 1110 kho͘, lí sǹg khoàⁿ ū bô?” “M̄-bián, chin to-siā.” Tiong-iông chiap hiah ê chı̂ⁿ chiū sûi-sı̂ tùi 10 kho͘--ê the̍h 10 tiuⁿ khí-lâi, kóng, “Lô Chip-sū, chit ge̍h-jı̍t ê cha̍p-hūn-chı̍t hōng-hiàn, goá soà hō͘ lí, chin sit-lé kàu hiān-chāi chiah the̍h hō͘ lí.” Jiân-āu chiong hiah ê chı̂ⁿ kau hō͘ Siok-cheng.“Ah! hó! hó! án-ni chin tú-hó, chia ê chı̂ⁿ thang the̍h lâi-khı̀ la̍p pún-ge̍h hūn ê tiān-hùi, kā lâng khiàm kúi-nā jı̍t, hō͘ lâng lâi chhui kúi-nā pái.” Hut-jiân Lô Chip-sū ê bı̄n pı̀ⁿ giâm-siok khí-lâi, chhin-chhiūⁿ ū oē beh kóng, m̄-káⁿ khui-chhùi, kám-kak chin pháiⁿ-sè ê khoán-sit, chin kú chiah kóng.“Lı̂m Sian-siⁿ, ū chı̍t hāng tāi-chı̀ chin pháiⁿ-sè kóng, m̄-kú sı̄ siū tio̍h tióng-chip ê kau-tāi, bô kóng iā boē ēng-tit.”“Bô iàu-kín, chí iàu choè oē tit kàu, goá goān chiap-siū lín ê ı̀-kiàn, chhiáⁿ lí kóng.”“Lô Chip-sū goá seng sit-lé, goá tio̍h lâi-khı̀ boé chhài, chhiáⁿ lí hia chē.” Siok-cheng tùi í-á peh khí-lâi. “Hó! hó! chhiáⁿ lí bô-êng.” Lô Chip-sū tàm-thâu liáu-āu chiah ǹg Tiong-iông kóng,“Cha-hng chin àm, goán kúi-nā ê tióng-chip tı̄ Bo̍k Tiúⁿ-ló ê chhù chham-siông kàu-hoē keng-chè ê būn-toê, in lóng kám-kak tio̍h kàu-hoē keng-chè chiah khùn-lân, m̄-chai lí oē thang chiong “pān-kong-hùi” hit tiâu ê chi-chhut siūⁿ pān-hoat khah chiat-séng leh boē?”“Chit ê ı̀-sù sı̄ án-choáⁿ, goá bô sím-mı̍h bêng-pe̍k.”“Phı̀-jū lâi kóng: siok-sià lāi-bı̄n ê ēng tiān, chhin-chhiūⁿ chú-pn̄g ēng tiān-ko; joa̍h-thiⁿ ēng tiān-hong; àm-sı̂ ê teng tiám chin àm, chia ê khoàⁿ oē thang khah séng á boē?” Tiong-iông chai-iáⁿ chit ê ı̀-sù, nā-sı̄ i tiām-tiām lóng bô ı̀n, Lô Chip-sū koh kè-sio̍k kóng,“In iā kóng, chhin-chhiūⁿ it-poaⁿ ê pò-choá, á-sı̄ kàu-hoē ê x x pò, chia ê lán ê hoē-iú lóng ū lâng tēng-ia̍t, chiah mâ-hoân lí khı̀ in chhù khoàⁿ; kan-ta Kàu-hoē Kong-pò kap Êng-kong pò chiū hó, in-ūi chit nn̄g ê khan-bu̍t sı̄ lán Tiúⁿ-ló Kàu-hoē bô boē ēng-tit ê; nā án-ni, chı̍t nı̂ oē thang séng kúi-nā pah kho͘, m̄-chai lí ê ı̀-kiàn án-choáⁿ?” Hut-jiân lāi-bı̄n ê khong-khı̀ chin an-chēng, chin kú Tiong-iông chiah chin soè-siaⁿ ı̀n-tap.“Àm-sı̂ ê teng tiám chin àm, sı̄ goá ê toh-téng hit ki 10 w ê jı̍t-kong-teng nā-tiāⁿ.......... goá m̄-chai beh án-choáⁿ. Kı̀-jiân choè chı̍t ê Siōng-tè ê lô͘-po̍k, boē thang hióng-siū goá só͘ ū ê koân-lı̄, goá iā m̄-káⁿ ke kóng sím-mı̍h. Put-kò lín eng-kai chai-iáⁿ, hō͘ chı̍t ê thoân-kàu-chiá boē thang koáⁿ tio̍h sı̂-tāi, hit ê sòng-sit m̄-nā i pún-sin nā-tiāⁿ, chéng-kò kàu-hoē ê sòng-sit koh-khah toā.” Chit sı̂ Tiong-iông chin kek-tōng, ná lâi ná toā siaⁿ, tı̍t-tı̍t kóng,“Goá bat thiaⁿ tio̍h bó͘ tióng-chip chhin-sin tùi goá kóng, kūn-lâi ê sian-siⁿ, bo̍k-su sı̄ teh thoân-tō, m̄-sı̄ teh thoân-tō; khoàⁿ i lāi-bı̄n ê tiān-khı̀ siat-pı̄, chhēng-chhah ......nā kap nn̄g chheng nı̂ chêng ê Chú Iâ-so͘, kiâⁿ soé-lé Iok-hān, á-sı̄ Pó-lô in pí-kàu khí-lâi, sı̍t-chāi chha thiⁿ kàu toē. M̄-kú bô kúi jı̍t āu chit ê tióng-chip koh khoàⁿ tio̍h chı̍t ê thoân-tō sian-siⁿ chhēng kah chin kán-tan, i mā kóng, choè kah chı̍t ê thoân-tō, bô sêng chı̍t ê sian-siⁿ pān, i kóng tō-lí mā bô lâng beh thiaⁿ. Lí siūⁿ, beh kiò sian-siⁿ sı̄ choè sı̂-tāi ê lo̍k-ngó͘-chiá á-sı̄ chiân-hong?” Chit sı̂ lán teh ko-chhiùⁿ “Hok-im put-piàn, sı̂-tāi teh piàn, thoân-tō tio̍h piàn” ê sı̂-tāi. Lán ê tióng-chip sı̄ ài goá khiā tı̄ sím-mı̍h lı̍p-tiûⁿ? Oē kı̀-tit goá hù-jı̄m ê sı̂, ài lín chhoā goá lâi-khı̀ kap toē-hng ê kok ki-koan siú-tiúⁿ se̍k-sāi; lín kóng kàu-hoē m̄-thang kap sè-kan chham-chhap, āu-lâi goá ka-kı̄ khı̀ chhē in, in ta̍k ê to chin hoan-gêng goá thoân hok-im hō͘ in thiaⁿ. Goá beh chhiáⁿ in lâi káng-ián; lín kóng m̄-bián thiaⁿ hit khoán sio̍k-sū. Goá beh chio lín chhut-lâi pò͘-tō, lín kóng tāi-seng hō͘ kàu-hoē khah jia̍t-sim chiū hó. Chêng-pái goá beh chhiáⁿ lán hiong ê Oē-seng-só͘ sán-pô lâi tùi Lú Soan káng-ián ka-têng“Chiat-io̍k” būn-toê, hō͘ hiah ê lāu-lâng toā-toā hoán-tùi, kóng goá bô sı̀n-gióng. Goá beh khui Iù-tı̄-hn̂g; lín phoe-phêng goá ài beh hō͘ sian-siⁿ-niû choè pó-bó ke thàn chı̂ⁿ. Goá beh khui pó͘-sı̍p-pan, gı̄-bū kà ha̍k-seng; lín kóng goá sı̄ teh tián phòng-hong, ài miâ-siaⁿ, ū ê kóng goá sı̄ teh choè piàn-siòng ê ok-sèng pó͘-sı̍p thàn-chı̂ⁿ...... Goá kóng lán kàu-hoē tio̍h koan-sim siā-hoē, ho̍k-bū siā-hoē; lín kóng goá teh thoân siā-hoē hok-im. Goá tı̄ káng-tō kiông-tiau sı̀n-tô͘ eng-kai tio̍h ēng “Thiàⁿ kap ho̍k-bū lâi kiàn-siat Siōng-tè kok tı̄ toē ná chhin-chhiūⁿ tı̄ thiⁿ-nih”; lín kóng goá teh kóng sin Sı̂n-ha̍k, lóng bô sio̍k-lêng ê seng oa̍h ......... Goá m̄-chai beh án-choáⁿ choè?” Kóng kàu chia i thó͘ chı̍t ê khùi. “Lı̂m Sian-siⁿ, chhiáⁿ lí m̄-thang gō͘-hoē goá; tú-chiah ê oē, sı̄ goá khah ke-pô kā lí choán-ta̍t ê, m̄-sı̄ goá ê ı̀-sù.” “Goá chai-iáⁿ, chin sit-lé; chhiáⁿ goân-liōng goá ê kek-tōng.” Siok-cheng tú-á boé chhài tńg-lâi, í-keng 11 tiám lah.“Ia̍h bô, goá khah sit-lé, sı̂-kan bô chá, tio̍h tńg-lâi khı̀,” Lô Chip-sū tùi í-á peh khí-lâi, saⁿ-sı̂ chiū tńg-khı̀. x x x x x Hit ê-tàu chia̍h-pn̄g, nn̄g ê kiáⁿ khoàⁿ-tio̍h toh-téng ū bah, chin hoaⁿ-hí, soè-hàn ê Sı̀n-it phah pho̍k-á kóng,“Ê-tàu goá beh kám-siā.” Sı̀ ê lâng ba̍k-chiu khoeh-khoeh. “Kám-siā Thiⁿ-pē, siúⁿ-sù bí-niû, koh ū bah hō͘ goán chia̍h, khò Iâ-so͘ ê miâ. A-men.” Nn̄g ê kiáⁿ-jı̂ ná chhin-chhiūⁿ kaⁿ-siû, chia̍h kah chin hoaⁿ-hí, nā-sı̄ Tiong-iông phâng hit oáⁿ pn̄g khí-lâi, khoàⁿ tio̍h Siok-cheng ê pak-tó͘, iû-jiân ba̍k-sái lâu chhut-lâi, nn̄g ê gín-ná lóng bo̍k-bêng kı̂-biāu, sı̀ lúi ba̍k-chiu tı̍t-tı̍t kā i siòng, toā-hàn ê Kèng-it kā lāu-bú kóng, “Ma-ma, lí kā pa-pa pun siuⁿ chió mı̍h-phè teh háu-à lah.” hit sı̂ Siok-cheng ê ba̍k-sái iā lâu chhut-lâi, nā-sı̄ chhùi soà ài-chhiò. Hit ê-tàu bô chia̍h pn̄g, Tiong-iông khiâ chı̍t tiám goā cheng ê chhia lâi kàu chhı̄-lāi chhē i choè hó ê lāu-su, choè oē pang-chān i ê Lí Khé-bêng Bo̍k-su, kı̀ⁿ tio̍h bı̄n khui chhùi chiū kóng,“Lí Bo̍k-su, goá bô hoat-tō͘ thang koh jím-siū tı̄ chit keng kàu-hoē choè kang; goá koat-tēng beh sin-chhéng tiāu-tōng.” “Hó, chin hó, chhiáⁿ lí kóng, nā ū chı̍t hāng sū pí Chú Iâ-so͘ siū tio̍h ê khah toā, goá goān-ı̀ kā lí pang-bâng.” “Lí ê ı̀-sù sı̄ bô hoaⁿ-hí goá oāⁿ ūi.”“Oē thang án-ni kóng,” Lí Bo̍k-su tı̀m-thâu, “in-ūi ū chin-choē ê tông-o̍h lóng chhin-chhiūⁿ lí lâi án-ni tùi goá iau-kiû kè, nā-sı̄ in sêng-siū goá ê khó͘-khǹg, lóng koh tò-tńg khı̀ in ê chit-ūi.” “M̄-kú goá siong-sı̀n; goá nā kóng hō͘ lí thiaⁿ liáu-āu, lí ún-tàng boē chó͘-tòng goá ê iau-kiû.” “Chhiáⁿ lí kóng khoàⁿ-māi.” Tiong-iông chiū ēng kek-tōng koh hùn-khài ê oē tùi Lí Bo̍k-su tı̍t-tı̍t kóng, ná chhin-chhiūⁿ chı̍t ê siū un-khut ê lâng tùi hoat-koaⁿ teh hun-sò͘ chı̍t-iūⁿ, i àn-sǹg chē tı̄ bı̄n-chêng ê lāu-su oē kap i saⁿ-kap hùn-khài, nā-sı̄ Lí Bo̍k-su thiaⁿ liáu put-tān bô tōng-iông, hoán-tńg ha-ha toā chhiò kóng,“Lí iáu pí Tiuⁿ Ta̍t-jı̂n tông-o̍h khah thang kám-siā, i hō͘ chèng hoē-iú beh koáⁿ chhut-khı̀ koh kúi-nā ge̍h-jı̍t ê sin-kim bô thang hō͘ i lah.” Pí siōng put-chiok, pí hā iú û. Tiong iông ka-kı̄ kám-kak, án-ni goá iáu thang kám-siā, sim chiah tām-po̍h an-ùi, m̄-kú i ê sim-lāi iáu chhiong-moá chin-choē gı̂-būn, tùi Lí Bo̍k-su kóng,“Ūi sím-mı̍h choè chı̍t ê kang-lâng tio̍h án-ni siū-khó͘? Ūi sím-mı̍h sı̀n-tô͘ boē thang thé-liōng lán kap lán tâng-sim ho̍k-heng kàu-hoē? Ūi sím-mı̍h lán boē thang hióng-siū tio̍h sı̂-tāi ê koân-lı̄? Ūi sím-mı̍h lán ê ka-têng boē thang kap in pı̂ⁿ-téng ê thāi-gū, ūi sím-mı̍h ........” “Chhiáⁿ lí m̄-thang tı̍t-tı̍t kóng ūi sím-mı̍h.” Lí Bo̍k-su chám-tn̄g i ê ūi sím-mı̍h chiap lâi kóng, “Boē ēng-tit mn̄g Siōng-tè, ūi sím-mı̍h tio̍h tùi Siōng-tè mn̄g kóng,“Goá tio̍h choè sím-mı̍h?” á-sı̄ kóng, “Lí kā goá hē tı̄ chia sı̄ ài goá choè sím-mı̍h?” Tiong-iông hō͘ Lí Bo̍k-su kóng án-ni, chhı̀-chha̍k i ê sim, soà kám-kak chin kiàn-siàu, Lí Bo̍k-su iā bô soè-jı̄ kè-sio̍k kóng,“Tiong-iông kun, kin-á-jı̍t hiong-chhoan kàu-hoē ê kéng-gū, goá hui-siông ê liáu-kái kap tông-chêng, te̍k-pia̍t sı̄ chia ê tâng-kang, put-kò goá ū 3 tiám ê kiàn-gı̄ kóng hō͘ lí choè chham-khó, chhiáⁿ lí chiah siông-sè siūⁿ khoàⁿ-māi.” 1) Choè chı̍t ê chheng-liân ê thoân-kàu-chiá, tio̍h tāi-seng chū-kak chia ê tāi-chı̀ sı̄ it-tēng oē pōng-tio̍h ê chhı̀-phè. M̄-bián kóng kàu Sèng-keng tiong hiah ê sian-ti, sù-tô͘, te̍k-pia̍t sı̄ Chú Iâ-so͘, chiū-sı̄ lán hiān-chāi chia ê toā bo̍k-su chu sian-poè, in ê sêng-kong lóng sı̄ tı̄ chit khoán ê hé-iām tiong jím-siū sêng-kong ê. Chóng-sı̄ kūn-lâi ê kang-lâng ná chhin-chhiūⁿ tùi chit khoán ê khó͘-lān khoàⁿ choè boē koàn-sı̀, bô eng-kai. Goá jı̂m-ûi jú ū chit khoán ê khó͘-lān jú oē thang hián-bêng Siōng-tè tùi lí ê khı̀-tiōng. Só͘ ūi “pi-ai ê só͘-chāi chiū-sı̄ Sèng ê toē.” Lí iā chai-iáⁿ sè-kài chhut-miâ ê Sèng-koa: Goá só͘ siū ê khó͘-lān, bô lâng chai-iáⁿ,--Êng-iāu Ha-le-lú-iah. Sı̄ chia ê o͘-lâng tiàm tı̄ chit khoán thòng-khó͘ ê pi-ai só͘ chhiùⁿ-chhut sèng-lı̄ ê im-ga̍k, só͘-í chhiáⁿ lí m̄-thang tí-khòng būn-toê. 2) Kàu-hoē boē chı̀n-pō͘, sı̀n-tô͘ boē thang liáu-kái, keng-chè ê khùn-lân, che sı̄ kin-á-jı̍t hiong-chhoan kàu-hoē pit-jiân ê hiān-siōng, só͘-í m̄-bián kè-thâu siong-sim,chí iàu tı̄ Siōng-tè ê bı̄n-chêng chı̄n pún-hūn khı̀ choè chiū hó. Lán eng-kai tio̍h ēng tông-chêng ê gán-kong chhē chhut goân-in liáu-kái in chiah tio̍h. Sū-sı̍t-siōng chiah ê sı̀n-tô͘ ê sı̀n-sim á-sı̄ hōng-hiàn,lóng bô khah su tı̄ chho͘-tāi ê sı̀n-tô͘, put-kò sı̄ sim iú û le̍k put-chiok (心餘力拙) nā-tiāⁿ. Goá khoàⁿ in chin-choē sı̀n-tô͘ ê keng-chè hiah-nih khùn-lân, sı̄m-chı̀ bô thang chia̍h, bô thang chhēng, nā-sı̄ khoàⁿ in chı̍t nı̂ ê hōng-hiàn ê sò͘-jı̄, hui-siông ê kiaⁿ lâng, kàu-gia̍h hō͘ siâⁿ-chhı̄ ê sı̀n-tô͘ kiàn-siàu, hō͘ goá hui-siông ê kám-kek, só͘-í lán tio̍h ū hūn tı̄ in ê kan-khó͘, iā sı̄ eng-kai ê. 3) Choè iàu-kín ê chı̍t hāng: m̄-thang tô-pı̄ sù-bēng, choa̍t-tùi m̄-thang ūi-tio̍h chia ê khùn-lân lâi siūⁿ beh tiāu-tōng, án-ni sı̄ hián-bêng lán sı̄ sèng-kang siōng ê pāi-pok-chiá. Lán teh kó͘-bú lán ê sı̀n-tô͘ tı̄ chit ê sı̂-tāi tio̍h o̍h Chú ê khoán-sit; “Tùi thiⁿ lâi kàu choē-ok ê sè-kài choè I chín-kiù lâng, thiàⁿ lâng ê kang, sı̄m-chı̀ chiong chı̍t ki chân-jím khó-phàⁿ ê sı̍p-jı̄-kè pı̀ⁿ-chiâⁿ êng-kng chhàn-lān ê kı̀-hō, só͘-í tio̍h tı̄ chit ê o͘-àm ê sè-kan choè kng,choè iâm ê sù-bēng.” Sū-sı̍t chit ê chek-jı̄m tú-á sı̄ lán tiàm tı̄ hiong-chhoan kàu-hoē Siōng-tè só͘ hō͘ lán thoân-kàu-chiá kim-jı̍t ê khò-toê. Beh án-choáⁿ tiông-sin keng-êng chit keng kàu-hoē hoê-ho̍k chhin-chhiūⁿ í-chêng hiah-nih chhàn-lān ê le̍k-sú? Beh án-choáⁿ kiáu-chèng sı̀n-tô͘ ê kū koan-liām, saⁿ-kap tı̄ sin sı̂-tāi tâng hū-khí Chú ê kok? che chiah sı̄ kin-á-jı̍t lán tio̍h siūⁿ, tio̍h choè ê būn-toê. Tong-jiân būn-toê m̄-sı̄ hiah-nih kán-tan, iā m̄-sı̄ it-sı̂ chiū oē thang sêng-kong ê, nā-sı̄ chit ê sı̂-tāi tú-tú sı̄ kū ê beh kè-khı̀, sin ê teh-beh lâi ê chin-khong chōng-thài hā, chiàⁿ-sı̄ lán choè kang ê hó ki-hoē, lán nā oē thang tu̍t-phoà ba̍k-chêng ê lân-koan, pâi tı̄ bı̄n-chêng ê sı̄ sèng-lı̄ kap sêng-kong lah. Goá ê oē lí thiaⁿ liáu oē liáu-kái boē? Tiong-iông bô ı̀n, tı̍t-tı̍t tàm-thâu, bı̄n lō͘ chhut chhiò-iông, thang chai i chı̍t phiàn iu-ut, giâu-gı̂ ê sim í-keng hō͘ bo̍k-su ê oē chhiong-phoà. “Bo̍k-su, nā-sı̄ án-ni, ba̍k-chêng choè iàu-kín ê kang-chok sı̄ sím-mı̍h?” “Hiān-chāi choè iàu-kín ê kang-chok ū nn̄g hāng: Tē 1, tùi goā eng-kai siūⁿ chhut biāu-hoat “Thoân-tō,” tú-tú chiàu lí só͘ teh choè ê kè-sio̍k khı̀ choè, m̄-thang ià-siān. Tē 2, tùi lāi, “Kàu-io̍k,” sı̀n-tô͘ ê gō͘-kái kap sêng-kiàn lóng sı̄ khoat-hoa̍t kàu-io̍k ê goân-in.” “Chóng-sı̄ nā hoē-iú kun-pún bô hoan-gêng lán, kiám thang koh kè-sio̍k tı̄ hia hō͘ in bô hoan-gêng?” “Goá jı̄m-ûi chí-iàu hó-hó kàu-io̍k, it-chhè ê khùn-lân lóng beh tı̄ sı̂-kan lâi tit-tio̍h kái-koat.” “M̄-kú pâi tı̄ bı̄n-chêng ê seng-oa̍h, būn-toê boē thang kái-koat, beh kiò lâng án-choáⁿ jím-siū?” “Sı̄, che sı̄ choè toā ê būn-toê, goá teh siūⁿ eng-kai tùi 3 hong-bı̄n lâi kái-koat:Tē 1, Tiong-hoē eng-kai koan-sim. Tē 2, To͘-chhı̄ kàu-hoē iā chhiáⁿ chhun-chhut pang-chān ê chhiú lâi. Tē 3, chhut-goā ê hoē-iú eng-kai tı̄ keng-chè tńg-lâi oān-chō͘ bú-hoē chiah tio̍h,” “Che sı̄ chin hó ê hong-hoat, m̄-chai in goān-ı̀ kè-lâi pang-chān goán bô?” “Goá oē chı̄n só͘ oē ê lâi ho͘-io̍k chit ê kang-chok.” “To-siā bo̍k-su ê chí-sı̄, taⁿ goá bô beh tô-pı̄ Chú ê sù-bēng, goān giâ chit ki sı̍p-jı̄-kè, lim chit ê khó͘-poe lâi hū-khí sı̂-tāi ê chek-jı̄m. Chhiáⁿ bo̍k-su siông-siông thoè goá kı̂-tó.” Jı̍t-thâu í-keng lo̍h-soaⁿ, chhù-lāi ê tiān-hé to̍h khí-lâi. Àm-tǹg hō͘ Lí Bo̍k-su chhiáⁿ liáu-āu, i chiū sûi-sı̂ lı̄-pia̍t bo̍k-su. x x x x x Goā-bı̄n sui-jiân àm, lō͘ sui-jiân hn̄g, nā-sı̄ i khiâ hit tiuⁿ phoà-kū ê chū-choán-chhia, chhiong-boán tio̍h boē bat ū ê hoaⁿ-hí kap ǹg-bāng, tı̍t-tı̍t hiòng chhù teh khiâ, lóng bô kám-kak kiaⁿ-hiâⁿ. I ê kha ná teh ta̍h, chhùi ná liām i pêng-sı̂ só͘ ài liām ê chı̍t chiat si: Tı̄ iu-ut hong liâng ê chhiū-nâ lāi, Bô chhàn-lān ê jı̍t-kng teh chiò; Chhiⁿ-chhı̀n ê o͘-iáⁿ kui jı̍t teh tà-oá, Sı̀ⁿ-miā hoa̍t-phoat ê kı̀-hō bô lâng khoàⁿ tio̍h. xxx xxx xxx xxx Siok-chēng ê lō͘-piⁿ. siⁿ-chhut chı̍t lúi kiau-nńg ê hoe-lúi; I m̄-kiaⁿ pháiⁿ ê khoân-kéng pau-ûi sin-piⁿ I chı̄n só͘ oē chhèng chhut hun-hong ê phang-bı̄, Iā tián-khui bí-lē ê gân-sek; Hō͘ kè-lō͘ ià-siān ê lú-kheh, Tit-tio̍h un-loán in sim-lêng; Iā pàng-khin in tı̂m-tāng ê kha-pō͘. Kha ná ta̍h ná kín, i koh siūⁿ-khí Dant Sı̂n-khiok khai-thâu ê chı̍t kù oē: Tı̄ goá jı̂n-seng ê lú-hêng tiong,Tı̄ chit ê o͘-àm ê chhiū-nâ-lāi; Goá chhē tio̍h goá ka-kı̄. Put-ti put-kak ê tiong-kan kàu chhù lah,chhù-lāi ê tiān-hé to̍h chin kng; thiaⁿ-kı̀ⁿ Siok-cheng teh toâⁿ-khı̂m kà nn̄g ê kiáⁿ chhiùⁿ-koa. I khiā tı̄ mn̂g-kháu, tiām-tiām thiaⁿ kàu chhiùⁿ liáu, chiah ēng i ê chhiú phah pho̍k-á chhut siaⁿ kóng,“Chin gâu chhiùⁿ, chin hó-thiaⁿ.” Nn̄g ê kiáⁿ chı̍t ê thiaⁿ-tio̍h lāu-pē tńg-lâi, hoaⁿ-hí kàu ke̍k, cháu chhut-lâi hō͘ i phō, chı̍t chhiú phō chı̍t ê; in iā tùi i ê thâu-khak lám-leh, chı̍t ê chhùi-phoé tı̍t-tı̍t kā i chim. Chin kú soè-kiáⁿ Sı̀n-it chiah khí-thâu sai-nai kóng,“Pa-pa! ma-ma kóng beh siⁿ chı̍t ê me-me hō͘ goán neh, lán lâi lé-pài, kā Siōng-tè thó khah kín hō͘ lán.” “Tio̍h! hó! taⁿ chē hō͘ hó, lâi choè lé-pài.” (Tâi-oân Kàu-hoē Kong-pò tē 962 hō,1965 nı̂ 7 ge̍h)