Cha̍p Greenworld
Nn̄g kang āu, thàu-chá 5 tiám Hūi-chin kah Liông-kian kàu Bûn-Hiàn ê chhù, in bô khok mn̂g. Bô siūⁿ beh kiaⁿ-chhéⁿ--lâng, sı̍t-chè-siōng Bûn-hiàn bô tı̄ chhù, Hūi-chin chai-iáⁿ i khı̀ Scotland kı̀ⁿ Lē-bí, tı̄ kong-thiaⁿ-hoē ê chái-khí, chiah ē tńg--lâi.
Hūi-chin kah Liông-kian tiām-tiām kiâⁿ khı̀ hô-piⁿ ê chûn-ok, in bô-siaⁿ-bô-soeh kā chûn pàng-lo̍h hô, koh sái kàu hô ê tùi-bı̄n.
Tı̄ hô ê tùi-bı̄n in khı̀ tn̄g tio̍h nn̄g ê pêng-iú---Thian-sù kah Bí-lêng, in nn̄g ê chhēng pe̍h-saⁿ, saⁿ téng-bı̄n ı̀n Greenworld ê Mark, jiân-āu in lóng peh-chiūⁿ chûn-téng, chı̀ⁿ-chúi sái tùi chhat-liāu-chhiáng.
Thàu-hong ê chá-khí hô ê éng chin toā, m̄-koh Hūi-chin sı̄ chin gâu ê chúi-chhiú, tāi-iok poàⁿ tiám-cheng, tō kàu kang-tiûⁿ, nn̄g ê liap-iáⁿ-chhiú khiā tı̄ hô-piⁿ hip-siòng.
Hūi-chin hoah kóng,“ Liông-kian, tı̄ tó-ūi? ”
Liông-kian kóng,“ Tı̄ hia, tı̄ thiāu-á ê thâu-chêng. ” Hūi-chin sái tùi thiāu-á hia khı̀, tng in chiap-kı̄n ê sı̂, in khoàⁿ ē tio̍h tı̄ chúi-té ê chúi-kóng, che tō sı̄ kang-tiûⁿ tò hùi-liāu ê kóng, Liông-kian hoah kóng,“ Tı̄ chia! ” Hūi-chin kā chûn oat ǹg hong ê hong-hiòng, Bí-lêng lám hit ki thiāu-á, jiân-āu Liông-kian kah Thian-sù lo̍h chûn jı̍p-khı̀ hô--nih.
Hia ê chúi lâu chin kín, in ài lám tı̄ kóng kah chûn ê téng-bı̄n, Thian-sù tùi chûn-téng the̍h kúi-nā-ê ngē-choá tē-á, tē-á sè-ê, m̄-koh chin tēng, in-ūi in lāi-té té âng-mn̂g-thô͘. Thian-sù 1 pái the̍h chı̍t tē hō͘ Liông-kian, Liông-kian lo̍h khı̀ chúi-té, chiong tē-á that jı̍p khı̀ chúi-kóng, kúi hun-cheng liáu, kóng ê chhùi lóng sı̄ âng-mn̂g-thô͘ ê tē-á, choè-āu, Liông-kian tùi chúi-té peh--khí-lâi, hoah kóng,“ Hó--ah, lán chò hó--ah, âng-mn̂g-thô͘ í-keng tâm--ah, kúi tiám-cheng koè, tō ē chhiūⁿ chio̍h-thâu hiah tēng, taⁿ mı̍h-kiāⁿ bô-hoat-tō͘ lâu tùi hia chhut--lâi! In nn̄g-ê peh khí-lâi chûn-téng koh chhiò-chhiò khoàⁿ liap-iáⁿ-chhiú. Koh-lâi Liông-kian kah Hūi-chin tı̄ chûn-téng khiā--khí-lâi, giâ chı̍t tè pe̍h-sek ê pò͘-tiâu, pò͘-tiâu téng-bı̄n siá:
“Greenworld CHIT KI KONG2 THAÎ-SÍ HAÍ-KAÚ !”
Tı̄ hit-ê sı̂-chūn ū nn̄g hāng tāi-chı̀ hoat-seng. Thâu-chı̍t-hāng, chı̍t ê cha-po͘-lâng tùi kang-tiûⁿ cháu--chhut-lâi, ná hoah ná siūⁿ-khı̀, tē-jı̄-hāng hiông-hiông hong piàn toā, chin kín tō kā chûn-phâng tùi chûn ê chit pêng chhoe kàu lēng-goā hit pêng, phâng ê āu-táu toā-la̍t cheng tio̍h Hūi-chin ê āu-thâu-khok, Hūi-chin ná-chhiūⁿ han-chı̂-tē, siak lo̍h chúi, jiân-āu hong koh kā chûn-phâng chhoe hàiⁿ tńg-khı̀ goân-lâi hit pêng, chit-ê sı̂-chūn chûn tó tı̄ hit pêng, phâng mā tó tı̄ chúi-té, Liông-kian tı̄ phâng ê ē-bı̄n, phâng kah pò͘-tiâu kā i om-tiâu--leh, ū kúi-ā bió bô-hoat-tō͘ khoàⁿ tio̍h mı̍h-kiāⁿ, jiân-āu i peh khí-lâi chúi-bı̄n, tı̄ i āu-piah ū chı̍t ki kha tı̄ chúi-té tı̍t-tı̍t that, ū lâng iáu khàm tı̄ phâng-pò͘ ê ē-bı̄n, i kín koh lo̍h-khı̀ chúi-té kā Thian-sù tàu-saⁿ-kāng, kiat-kó Thian-sù soah kā Liông-kian lám giú lo̍h chúi, keng-koè kín-tiuⁿ koh kiaⁿ-hiâⁿ ê piàⁿ-miā, Liông-kian chiah kā nn̄g-lâng giú khí-lâi chúi-bı̄n. In nn̄g-lâng tàu-tı̄n mo͘h tı̄ chûn ê téng-bı̄n, tı̄ hia phēⁿ-phēⁿ-chhoán.
Liông-kian khoàⁿ Bí-lêng moh tı̄ chûn ê āu-táu, jiân-āu thiaⁿ tio̍h lâng teh hoah, oa̍t-thâu khoàⁿ tio̍h kang-tiûⁿ ū chı̍t ê lâng, ná hoah ná kí-tùi chúi-boé hia, m̄-koh Liông-kian hı̄ⁿ-á lāi ū chúi, thâu-sian thiaⁿ bē chheng-chhó, boé-á chiah liáu-kái.
Chit-ê lâng hoah kóng,“Kiù-lâng--ò͘! Hit-ê cha-bó͘ gín-á teh-beh im--sí-ah! ”
Liông-kian khoàⁿ i kí ê só͘-chāi, hn̄g-hn̄g khoàⁿ tio̍h ū pe̍h-pe̍h ê mı̍h-kiāⁿ phû--leh phû--leh, bô án-choáⁿ, chhiūⁿ kū-saⁿ-tē-á tı̄ chúi-bı̄n ná phû ná se̍h-lin-long, sı̄ Hūi-chin! Chúi chin kín teh kā i lâu kàu chúi-boé----hái--nih khı̀.
Liông-kian chheⁿ-kông siû tùi Hūi-chin hia khı̀, i chin gâu siû-chúi, m̄-koh pe̍h-saⁿ hō͘ i bān--lo̍h-lâi, i piàⁿ-miā siû, m̄-koh kán-ná chin bān chin bān, chúi chin toā koh kā i ek-tńg khı̀. Kàu í-āu i thè-hiu ê sı̂ chò-bāng mā ē bāng--tio̍h ---- siû tùi pe̍h-pe̍h ê khu-thé sı̄ hiah-nı̍h-á tn̂g, hiah-nı̍h-á bān, jı̂-chhiáⁿ khu-thé tı̄ i ê thâu-chêng chin kín phû lı̄-khui.
Choè-āu Liông-kian sa tio̍h Hūi-chin, Hūi-chin m̄-chai-lâng, bı̄n phak--leh tı̄ hia phû--leh phû--leh, Liông-kian beh kā i péng-sin, m̄-koh chin lân, Hūi-chin chin tāng, tng Liông-kian ka-la̍uh Hūi-chin ê chhiú, in koh lak lo̍h-khı̀ chúi-té, i kā Hūi-chin ê bı̄n chhòng khí-lâi chúi-bı̄n, m̄-koh thâu tò-siàng-hiàⁿ, bô teh tín-tāng, mā bô teh chhoán-khùi, Liông-kian mo͘h Hūi-chin ê bı̄n, tùi i ê chhùi pûn-khùi, nā thêng siû, tō koh tùi i ê chhùi pûn-khùi, chı̍t piàn koh chı̍t piàn, m̄-koh bô siáⁿ khí-sek.
I 4 kè khoàⁿ-khoàⁿ--leh, in iáu tı̄ hô tiong-ng, it-tı̍t hō͘ chúi chhiong tùi chúi-boé, tı̄ hia lı̄ hoāⁿ-piⁿ 25 bí, m̄-koh kah tı̄ tò-pêng tē jı̄ tiâu hô ê chúi-boé ū 200 bí hn̄g.
Hoāⁿ hiah hn̄g, chúi lâu hiah kín, Liông-kian thiám koh kiaⁿ, cha-hng lo̍h-koè hō͘, hō͘-chúi chin toā, tng teh lâu tùi chúi-boé ê hái, hō͘ toā-hong sàu--khı̀-lâi ê chúi-éng siàn tio̍h i ê bı̄n.
Liông-kian khai-sí iōng sí-gín-á-the ê hong-sek thoa Hūi-chin, thoa tùi hoāⁿ-piⁿ ê chhiū-á khı̀, múi siû poàⁿ hun-cheng, tō thêng--lo̍h-lâi tùi Hūi-chin ê chhùi pûn 4 pái khùi, chit pái i jı̄n-ûi ū khoàⁿ tio̍h Hūi-chin teh chhoán-khùi, m̄-koh bô khak-tēng, Hūi-chin ê bı̄n chin pe̍h, Liông-kian bô siūⁿ kóng i sı̄ m̄ sı̄ teh chhoán-khùi, chúi chin kín kā in chhiong tùi hái khı̀.
Liông-kian kha toā-la̍t tı̍t-tı̍t that, koh khah piàⁿ-miā siû, ū khah kín, chit-má chhun 5 bí, m̄-koh hoāⁿ koè-soà chin kín, tı̄ hoāⁿ-piⁿ ū 1 châng chhiū-á ê chhiū-ki lı̄ chúi-bı̄n chin kı̄n, Liông-kian piàⁿ-miā that, khı̀ sa tio̍h chhiū-ki, koh mo͘h tı̄ téng-bı̄n, hô-chúi teh thoa i cháu, suh chı̍t ê toā-khùi, koh sàng toā-toā khùi hō͘ Hūi-chin, Liông-kian chit-chūn chiah khak-tēng āu chı̍t khùi sı̄ Hūi-chin ka-tı̄ chhoán-khùi--ê.
Tāi-iok gō͘ hun-cheng āu i chiah kā Hūi-chin thoa chiūⁿ hoāⁿ, chiūⁿ hoāⁿ ê sı̂, i kah Hūi-chin tó-tı̄ thô͘-kha, koh sàng khùi hō͘ Hūi-chin, jiân-āu bong i ê sim-chōng, thâu-á chhiú siuⁿ léng, kám-kak bē chhut--lâi, jiân-āu, thiàu--ah! Teh chhoán-khùi--ah.
Liông-kian chō͘ Hūi-chin suh-khùi, kàu i ka-tı̄ ū-hoat-tō͘ chhoán-khùi ê sı̂, ū gō͘ hun cheng kú, liáu-āu khai-sí teh chhoah, sin chhēng tâm saⁿ, hō͘ hong chhoe ē koâⁿ. I m̄-chai beh án-choáⁿ, chiong thâu àⁿ-kē, khoàⁿ tio̍h Hūi-chin ê ba̍k-chiu peh-kim.
Liông-kian kóng,“ Hūi-chin, lí ū án-choáⁿ--bô? ”
Hūi-chin ū khui-chhùi kóng oē, m̄-koh chin sè siaⁿ, Liông-kian thiaⁿ bô teh kóng siáⁿ, Liông-kian tó--lo̍h-lâi, iōng chhiú moa Hūi-chin, hō͘ i ı̂-chhı̂ thé-un, ū kám-kak Hūi-chin ê sim-chōng teh thiàu, tı̄ i ē-bı̄n ê sin-khu teh chhoán-khùi, Liông-kian khai-sí khàu.
Cha̍p-it Kong-thiaⁿ-hoē
Nn̄g kang āu, kong-thiaⁿ-hoē khai-sí, London ê kho-ha̍k-ka, mn̄g hāi-sí hái-káu ê pēⁿ-in. Bûn-hiàn khı̀ Scotland í-chêng, ū in-ūi chit-ê hoē, kah Tek-á kı̀ⁿ koè bı̄n, Tek-á ài Bûn-hiàn thè kong-si kóng-oē.
Tek-á kóng,“ Lí sı̄ lán chú-iàu ê seng-bu̍t-ha̍k kang-têng-su, chin tiōng-iàu, in ē siong-sı̀n lí. ”
Bûn-hiàn bô kóng-oē, siūⁿ kóng bô ài tı̄ kong-thiaⁿ-hoē soat-bêng, m̄-koh chai-iáⁿ it-tēng ài khı̀, Tek-á chhiò-chhiò, chı̀-chió i ê chhùi ū teh chhiò, m̄-koh i ê ba̍k-chiu lóng teh chim-chiok khoàⁿ Bûn-hiàn, chhiūⁿ hı̂-á ê sí-lâng-ba̍k.
Tek-á kóng,“ Bûn-hiàn, beh kóng siáⁿ, siūⁿ hō͘ siông-sè, āu lé-pài, lí nā kóng m̄-tio̍h, kúi-ā pah lâng ē bô thâu-lō͘, thâu chı̍t ê tō sı̄ lí, goá kā lí pó-chèng. ”
Hoē-tiûⁿ lâng chin kheh, tı̄ hia chin-chē kı̀-chiá kah liap-iáⁿ-chhiú, chng-thâu kah kang-tiûⁿ lâi ê lâng, mā bē chió, Bûn-hiàn ê hoé-chhia bān hun, m̄-chiah tı̄ hoé-chhia-thâu chā kheh-têng-á, tng i jı̍p hoē-tiûⁿ ê sı̂, khoàⁿ Liông-kian kah Greenworld ê siàu-liân--ê mā chē tı̄ hia, Bûn-hiàn tùi Hūi-chin chhiò, m̄-koh Hūi-chin bô chhiò, Hūi-chin bı̄n-sek pe̍h-sı̀-sat koh phoà-pēⁿ, Bûn-hiàn siūⁿ kóng i khó-lêng ū-sin ê khoán, ē-kı̀-tit Hūi-chin chhut-sı̀ chı̀n-chêng, in bó͘ Sò͘-gio̍k, bat tı̄ chá-khí chhiūⁿ án-ni, só͘-í tùi ka-tı̄ khó͘-chhiò.
Chú-chhı̂ kóng,“Tiuⁿ--sian-siⁿ, chhiáⁿ. ”
Bûn-hiàn kiâⁿ kàu hoē-tiûⁿ ê thâu-chêng, chē lo̍h ê sı̂ khoàⁿ tio̍h Tek-á léng koh phú ê gán-sı̂n teh siòng--i, siūⁿ kóng èng-kai sı̄ oāⁿ Tek-á khí-lâi kóng chia ê hau-siâu-oē.
Lu̍t-su khai-sí mn̄g Bûn-hiàn būn-tê, thâu-khí-seng iông-ı̄ⁿ, Bûn-hiàn soat-bêng i tı̄ kong-si chò joā-kú, kang-tiûⁿ chhut-sán joā-chē chhat-liāu, jiân-āu mn̄g tio̍h hùi-liāu-phín.
Lu̍t-su kóng,“ In sı̄ chin gûi-hiám ê hoà-hak2-phín, sı̄--bô? ”
Bûn-hiàn ı̀n kóng,“Tio̍h--ah, tong-jiân, nā tùi in bô sè-jı̄, toā-pō͘-hūn sı̄ gûi-hiám, m̄-koh tı̄ gún kang-tiûⁿ--nih, gún tùi in chin sió-sim, ta̍k-ê lâng chhēng te̍k-sû ê saⁿ, goán saⁿ nı̂ lâi m̄-bat ū giâm-tiōng ê ı̀-goā. ”
Lu̍t-su kóng,“Thiaⁿ tio̍h án-ni, goá chin hoaⁿ-hí, m̄-koh kang-tiûⁿ goā--leh? Lín chin-chiàⁿ tò chiah gûi-hiám ê hùi-liāu lo̍h khı̀ hô--nih? ”
Bûn-hiàn kóng,“ Sı̄--ah, goán ū tò. ” Hoē-tiûⁿ tō chı̍t-chūn ê hoah siaⁿ, Hūi-chin piⁿ-á chı̍t ê lâng, siūⁿ-khı̀ teh hoah-hiu, kéng-chhat kiò i tiām-tiām, Bûn-hiàn kè-sio̍k kóng,“Tong-jiân, goán tò chia ê hùi-liāu lo̍h khı̀ hô, m̄-koh bô tò chē, kan-na ta̍k kang nn̄g, saⁿ pah kong-seng, bô chin chē, jı̂-chhiáⁿ gún ta̍k kang tùi hô chhı̀-giām saⁿ pái, tı̄ kang-tiûⁿ piⁿ-á ê hô-chúi thong-siông chí-ū 2 ppm í-hā ê lông-tō͘, tı̄ hô ê chúi-boé koh lú chió, he bô gûi-hiám. ”
Lu̍t-su ta̍uh-ta̍uh-á kóng,“ Bô gûi-hiám? Lí ū khak-tēng? ”
Bûn-hiàn giâ-thâu kóng,“ Sı̄, goá khak-tēng. ” ê sı̂ ū Tek-á, Liông-kian, Hūi-chin chāi-lāi kúi-ā pah lâng ê ba̍k-chiu teh khoàⁿ--i.
Lu̍t-su bān-bān-á kóng,“ Goá chai-iáⁿ lín bat iōng niáu-chhí sı̍t-giām--koè, pō͘-hūn ê niáu-chhí bó lim ū chham hùi-liāu ê chúi, in ê kiáⁿ ū ê chhut-sı̀ tō bô kha, tio̍h--bô, Tiuⁿ--sian-siⁿ? ”
Bûn-hiàn thâu-pái khoàⁿ chı̍t ê lu̍t-su, sı̄ sè-hàn bē hiáⁿ-ba̍k, bı̄n sán, chhēng phú-sek ê saⁿ, thâu-mn̂g koh phú, Bûn-hiàn kám-kak i chiok sêng niáu-chhí, i ê ba̍k-chiu kng koh sè. Koh khah kı̂-koài ê goân-in sı̄ i chhiú the̍h chı̍t tiuⁿ pò-choá, Bûn-hiàn khai-sí kám-kak ē kiaⁿ--i.
Bûn-hiàn kóng,“ Sı̄, bô m̄-tio̍h, m̄-koh niáu-chhí pí lâng ke chin sè, jı̂-chhiáⁿ in tı̄ cha̍p kang lāi lim 5 ppm hùi-liāu lông-tō͘ ê chúi, he sı̄ chin toā ê chha-pia̍t, bô lâng ē khı̀ lim hô--nih ê chúi, hô tı̍t-chiap chhut hái. ”
Bûn-hiàn khoàⁿ lu̍t-su, teh tán mn̄g hái-káu ê būn-tê, m̄-koh i bô mn̄g, hoán-tó-tńg kóng,“Tiuⁿ--sian-siⁿ, só͘-í lí bē hoân-ló, nā ū lâng ı̀-goā lak-lo̍h khı̀ hô, lim chin chē hô-chúi, chhiūⁿ lí ka-tı̄ ê cha-bó͘-kiáⁿ án-ni ê ı̀-goā, bô gûi-hiám, tio̍h--bô? ”
Bûn-hiàn khoàⁿ tı̄ hoē-tiûⁿ tùi-bı̄n ê Hūi-chin, lia̍h-chún i ê ba̍k-chiu tı̄ hoán-pe̍h kah bı̄n-kheng piàn toā, sı̄ in-ūi ū-sin ê koan-hē.
Bûn-hiàn kóng,“ Bô gûi-hiám, chı̍t-tiám-á tō bô gûi-hiám. ”
Hoē-tiûⁿ ū ki-ki-kiò ê siaⁿ, he sı̄ lu̍t-su sè koh ná niáu-chhí ê chhiò, lu̍t-su the̍h chhut i ê pò-choá.
Lu̍t-su kóng,“ Tiuⁿ--sian-siⁿ, lí ū khı̀ Scotland--bô? Ū khoàⁿ koè che--bô? ”
Tng Bûn-hiàn khoàⁿ tio̍h pò-choá chhiú khai-sí phı̍h-phı̍h-chhoah, chhoah kah ài hoāⁿ toh-á piⁿ, ū chı̍t tiuⁿ siòng-phı̀ⁿ sı̄ Hūi-chin khiā tı̄ kang-tiûⁿ piⁿ-á ê chûn-téng, lēng-goā chı̍t tiuⁿ sı̄ Hūi-chin tó tı̄ kiù-hō͘-chhia, Liông-kian tı̄ piⁿ-á, phiau-tê siá:
“Seng-bu̍t kang-têng-su ê cha-bó͘-kiáⁿ Chha chı̍t-tiám-á im sí tı̄ hô”
Tiām chı̍t khùn á, Bûn-hiàn siông-sè khoàⁿ pò-choá, m̄-koh ba̍k-chiu koài-koài, thâu-khak lāi lóng-sı̄ tı̂m tı̄ hô--nih ê Hūi-chin, kah khah-chá í-chêng tı̂m tı̄ hong-éng ê Sò͘-gio̍k---in bó͘.
Bûn-hiàn thâu it-tı̍t hàiⁿ lâi hàiⁿ khı̀, jiân-āu kā ba̍k-kiàⁿ the̍h lo̍h lâi chhit-chhit--leh.
Bûn-hiàn í pêng-chēng ê siaⁿ kóng,“ Bô, goá í-chêng m̄-bat khoàⁿ--koè. ”
Lu̍t-su ûn-ûn-á kóng,“ Hó, Tiuⁿ--sian-siⁿ, lín cha-bó͘-kiáⁿ an-choân ah, in ang kiù--i, mā bô sit-khı̀ gín-á, m̄-koh lim chin chē hô-chúi, hô-chúi mā tı̄ kang-tiûⁿ ê piⁿ-á, lí bē hoân-ló he--hò͘ⁿ? ”
Lu̍t-su kim-sih-sih ê ba̍k-chiu teh siòng Bûn-hiàn, chhiūⁿ niáu-chhí tng teh khoàⁿ i ê chia̍h-mı̍h, tı̄ Bûn-hiàn āu-bı̄n ê Tek-á bô-tiuⁿ-tı̂ soah khiā--khí-lâi, tı̄ tiām-chēng ê hoē-tiûⁿ, hoah kóng,“ Mn̄g chit-ê būn-tê siuⁿ chhiau-koè, bē-sái mn̄g hit khoán ê būn-tê, tong-jiân Bûn-hiàn ē hoân-ló in cha-bó͘-kiáⁿ, lí má-siōng thêng-chí cha-mn̄g. ”
Lu̍t-su kóng,“ Loā--sian-siⁿ, koh chı̍t hun-cheng, chı̍t hun-cheng lāi Tiuⁿ--sian-siⁿ, tō ē-sái cháu, chit-chūn i ài hoê-tap chit-ê būn-tê, Tiuⁿ--sian-siⁿ, lín cha-bó͘-kiáⁿ lim chiah chē hô-chúi, lí ē hoân-ló--bô? Lí ē hoân-ló lí ê sun--bô? ”
Bûn-hiàn iōng kiaⁿ-hiâⁿ ê gán-sı̂n, kim-kim-khoàⁿ lu̍t-su, thut-jiân-kan kiàn-siàu tńg siūⁿ-khı̀, pò-choá the̍h khí lâi tàn tùi sè-hàn kiam niáu-chhí-bı̄n ê lu̍t-su, toā-siaⁿ hoah kóng,“Tio̍h! Tio̍h! Tio̍h! Tong-jiân goá hoân-ló chit-ê gín-á, i kāng-khoán sı̄ gûi-hiám, chit-má hō͘ goá cháu. ”
Bûn-hiàn cháu chhut hoē-tiûⁿ, kiâⁿ khı̀ lō͘--nih, pah goā lâng ê ba̍k-chiu kim-kim khoàⁿ i cháu.
Cha̍p-jı̄ Bı̄-lâi
La̍k kò-goe̍h āu, Bûn-hiàn toà tı̄ hái-piⁿ ê sió-kong-ú, thâu-lō͘ bô khı̀, tāi-khoán hū-tam bē-khí, mā kā chhù bē-tiāu.
Tùi kong-ú ê thang-á-mn̂g ē-tàng khoàⁿ tio̍h hái, ta̍k kang chē teh hân-léng koh phú-phú ê hái, kúi-ā tiám-cheng kú.
Hūi-chin liam-mi beh seⁿ--lò͘, Bûn-hiàn bé chin chē gín-á-saⁿ hō͘ i, pâng-keng lóng-sı̄ gín-á-saⁿ---ū goā-saⁿ kah khò͘, hún-âng-sek sı̄ hō͘ cha-bó͘ gín-á, nâ-sek sı̄ hō͘ cha-po͘ gín-á, mā ū sè-hāng, nńg-nńg ê chhit-thô-mı̍h ū nâ-sek chhim ba̍k-chiu ê chhit-thô-hı̂m kah sè-chiah tōng-bu̍t.
M̄-koh Bûn-hiàn pēng bô sàng chia--ê hō͘ Hūi-chin, in-ūi Hūi-chin bô ài kah i kóng-oē, tng i khı̀ khoàⁿ Hūi-chin, Hūi-chin bô beh chhap--i, nā khà tiān-oē, Hūi-chin tō kā tiān-oē koà tiāu, nā siá phoe,bô phah-khui tō thè tò-tńg--lâi.
Tı̄ pâng-keng ū chin chē chheh kah cha̍p-chı̀, m̄-koh lóng khǹg tı̄ bı̂n-chhn̂g-kha, àm-sı̂ ū-sı̂ ē khı̀ khoàⁿ, jı̍t--sı̂ tian-tò bô ài khoàⁿ, in lóng sı̄ iú-koan gín-á chhut-sı̀ chêng ê tāi-chı̀ kah ē jiám--tio̍h ê pēⁿ, Bûn-hiàn bô ài khı̀ siūⁿ--in, m̄-koh bô-hoat-tō͘ bô siūⁿ, kui kang lóng teh siūⁿ.
Kin-á-jı̍t, tng Bûn-hiàn chē teh khoàⁿ thang-á-mn̂g goā ê hái, chhiú tı̍t-tı̍t iô, iô bē soah. Ta̍k chá-khí lóng ē khà tiān-oē khı̀ pēⁿ-ı̄ⁿ mn̄g in cha-bó͘-kiáⁿ ū tı̄ hia--bô? Chit chái-khí, hō͘-sū kóng Hūi-chin ū tı̄ hia, jı̂-chhiáⁿ, tng teh seⁿ gín-á. Tı̄ chêng 4 tiám-cheng, ū nn̄g tiám-cheng Bûn-hiàn chē tı̄ tiān-oē piⁿ, kiaⁿ koh khà khı̀ pēⁿ-ı̄ⁿ, tiān-oē giâ saⁿ pái, saⁿ pái koh khǹg--leh.
Bûn-hiàn koh giâ tiān-oē, jı̍h hō-bé,7,8,3,--án-ne m̄-tio̍h, koh kā tiān-oē khǹg--leh, Bûn-hiàn bô-hoat-tō͘ thàu-koè tiān-oē ùi hō͘-sū léng-tām ê siaⁿ chai-iáⁿ siau-sit, ài chhin-sin khı̀ khoàⁿ gín-á.
Bûn-hiàn khiā--khí-lâi, goā-thò chhēng--leh, lo̍h khı̀ lâu-kha, goā-kháu chhoe--lâi ê hái-hong chin léng, hái kah thiⁿ phú-phú koh o͘-im. I jı̍p khı̀ tiàm--nih bé kúi-lúi-á hoe, chin chim-chiok kéng kng-âng kah kng-n̂g ê sek, tiàm-oân iōng choá kā in pau--khí-lâi, bián-tit hō͘ hoe siū sún-hāi, Bûn-hiàn the̍h tio̍h hoe, kín koh kín-tiuⁿ iân hái-piⁿ thàu-hong ê lō͘ kiâⁿ tùi pēⁿ-ı̄ⁿ khı̀.
Hái--nih tng teh lo̍h-hō͘, hái-káu sı̂-siông teh khiā ê soa-chiu, í-keng teh lo̍h-hō͘, bô joā-kú chng--nih mā ē lo̍h-hō͘, Bûn-hiàn phı̍h-phı̍h-chhoah, kā goā-thò ê ām-niá hiau koân, jiân-āu chhiú the̍h tio̍h kng-iām ê hoe, kiâⁿ jı̍p khı̀ koâⁿ-thiⁿ ê hân-hong--nih.
