Tâi-oân Pak-pō͘, Chheng-tiâu sı̂, chiū ū; Lâm-pō͘, Jı̍t-pún-lâng lâi koán Tâi- oân, chiah khoàⁿ-tio̍h. Sè-kài sím-mı̍h só͘-chāi, sím-mı̍h sı̂, tāi-seng ū hoé- chhia? Eng-kok ê chhù, khah chē ū ian-tâng, thang hō͘ chàu-kha ê hoé-hun cháu-chhut, khoán-sit chhin-chhiūⁿ sè-keng hoē-siā. Ian-tâng nih, ū chı̍t-ki thih hoâiⁿ-koaiⁿ; hit ki hoâiⁿ-koaiⁿ, ū pa̍k thih-liān-á, tūi lo̍h lâi, liān-á boé ū pa̍k chı̍t-ê kau-á, thang kùi tê-kó͘, tiáⁿ, oe-á, kap ta̍k-hāng ê khı̀-khū. Hiah-ê mı̍h lóng ū khian-á thang kùi tı̄ hit-ê kau.
Ū chı̍t-jı̍t, chı̍t-ê ta-po͘ gín-ná teh pı̄-pān kún-chúi beh kā i ê lāu-bó phàu-tê. Chúi toā kún, chúi-ian tùi tê-kó͘ chhèng chhut-lâi. Ūi-tio̍h chúi-ian ê la̍t, tê-kó͘ chiū tı̄n-tōng-hı̀ⁿ, iô-lâi iô-khı̀, thih-liān iā toè i teh iô. Hit-ê gín-ná ná khoàⁿ, chiū ná siūⁿ, ka-tı̄ kóng, “Ài-ah, hit-ê tê- kó͘ nā ū lûn, tek-khak ē kiâⁿ.”
Chit-ê gín-ná, chiū khı̀ chı̍t-keng bé-kháu-thih tiàm, mn̄g tiàm-chú, khoàⁿ hiah-ê lân-san ê thih, ū hoaⁿ-hí hō͘ i khioh khı̀ ēng bô? Tiàm-chú ı̀n kóng Hoaⁿ-hí. Tiàm-chú khoàⁿ i gâu ēng, m̄-nā chiong lân-san ê thih hō͘ i, liân hong-lô͘ kap ke-si iā soà chioh i ēng. Teh siūⁿ hit-ê gín-ná, sim-lāi m̄-chai siūⁿ ài beh chò sím-mı̍h toā kı̂-koài ê mı̍h-kiāⁿ. Thêng bô loā kú khoàⁿ-kı̀ⁿ i khûn- khûn teh chò; m̄-nā lân-san thih kap ke-si chioh i ēng, soà pún-sin pang-chān i hoāⁿ-io̍h, chiong hiah-ê thih kā i liâm. Bô loā kú, chē-chē lâng khı̀ hit chng- nih, khoàⁿ i chō-chhut chı̍t-tiuⁿ chhia-á, tı̄ lō͘-nih teh kiâⁿ-lâi kiâⁿ-khı̀, tāi-ke bô m̄ gōng-ngia̍h.
Jiân-āu ū chı̍t-ê hó-sim ê lâng, khui lō͘ hō͘ i khı̀ tāi-ha̍k tha̍k-chheh, kàu pı̍t-gia̍p. Teh tha̍k ê sı̂, sim-lāi lóng bô pàng-sak i só͘ hèng-bı̄ ê. Chheh-nih ū kı̀ kóng, i put-sı̂ teh liān-sı̍p, m̄-nā ēng thih teh tàu, koh ēng choá oē hit-ê iūⁿ.
Kàu tióng-sêng ê sı̂, kap chı̍t-ê tâng-sim ê pêng-iú, saⁿ-kap khui chı̍t-ê thih- khı̀ ê hoē-siā; kó-jiân chō-chiâⁿ chı̍t tiuⁿ hoé-chhia, ē kiâⁿ, koh ē chài lâng, kap mı̍h.
Thâu-pái chè-chō ê hoé-chhia, m̄-sı̄ chhin-chhiūⁿ hiān-sı̂ ê khin-khoài, gâu cháu, sı̄ chin tāng, koh bān-bān-á kiâⁿ. Pa̍t-lâng khı̀ khoàⁿ in ê iūⁿ, ná gián-kiù, ná sêng-kong. Hoé-chhia lō͘, sı̄ khah bān chiah siat. Chài mı̍h ê hoé-chhia sı̄ 1825 nı̂ chiū ū, chài lâng ê sı̄ tı̄ 1829 nı̂ chiah siat.
In nn̄g-lâng, chō chin chē hāng ê khı̀-khū, chèng-hú o-ló in ê gâu, siat in chò toā-koaⁿ, koh ēng kong-lô ê siúⁿ, lâi siúⁿ in. Khó-kiàn chı̄n-tiong tı̄ sió-khoá ê tāi-chı̀ ê, ē kham-tit kau-thok i toā ê chek-jı̄m. Eng-kok gín-ná chin gâu!
(Tâi-oân Kàu-hoē Kong-pò tē 705 hō, 1947 nı̂ 9 ge̍h)
