Hoé-noā-thoàⁿ ê kò͘-sū

Ùi Wiki Tô·-su-kóan

A-Bêng kin-nı̂ 5 hoè. Seⁿ tio̍h kó͘-chui koh ū chhùi-súi. In chhù--nı̍h kan-ta chit ê ta-po͘-kiáⁿ, sioh miā-miā. A-Bêng tùi tn̄g-leng khai-sí tio̍h chiok kéng-chia̍h. Tō͘-chè ê sı̂ sè-sè lia̍p chí, ná chhiūⁿ chhı̄ bē toā, put-sı̂ kám-mō͘ khù-khù-sàu, phoê-hu iā chhiâng-chāi chia chiūⁿ hia jiàu. Hó ka-chài 3 hoè hit nı̂, ū khah hó chhùi-táu. Bah, chhài ke-kiám chia̍h--chı̍t--koá. Bı̄n khah hàng-leng phòng-phoê, thé-keh khah chho͘-kut, sin-thé mā khah ióng-kiāⁿ--ah. 5-goe̍h sı̂-á, sai-pak-hō͘ tı̍t-tı̍t lo̍h, lo̍h kah kui-keng chhù lóng sı̄ chhàu-phú bı̄. A-Bêng hoat-sio nâ-âu thiàⁿ í-keng 3 jı̍t, soà--lo̍h--lâi 2 jı̍t āu, tò-pêng phı̄ⁿ-khang âng-âng, chiūⁿ iah-iah, koh lâi khí chúi-phā, lâu-thng, kian-phí, hō͘ Bêng--a jiàu kah hoat-hông hàng-chéng. Bô joā-kú phoê-hu-chín jú lâi jú toā jiah, iā thoàⁿ kàu chhùi-piⁿ, ām-kún, kha-tâng. A-Bêng ê a-má khe̍h chı̍t koàn hoé-sio io̍h-ko hō͘ boah, in a-pâ mā khı̀ chhù-piⁿ hit keng io̍h-pâng koāⁿ sián-io̍h-á kā so, chı̍t-tiám-á chha mā bô. Boé-chhiú liân Bêng--a ê sió-moē iā khı̀ hō͘ oè--tio̍h. A-Bú khoàⁿ m̄-sı̄ pān-sè, koáⁿ-kín chhoā 2 ê hiaⁿ-moē khı̀ Ko-i chhoē Phoê-hu-kho Tēⁿ I-su. Tēⁿ I-su kā khoàⁿ-khoàⁿ, mn̄g-mn̄g--leh, tio̍h kóng, "Bêng--a seⁿ hoé-noā-thoaⁿ--lah." A-Bú chin gı̂-ngái, mn̄g, "Sím-mı̍h sı̄ Hoé-noā-thoaⁿ? Goá m̄-bat thiaⁿ--khoè." Tēⁿ I-su kóng, "Jı̍t-pún-lâng kā hō-chò "lông chia chiı̂n"(膿痂疹). Hoâ-gí chioh Jı̍t-pún Hàn-jı̄ kiò-chò "lông chia chiı̂n"." A-Bú kám-kak chin kı̂-koài, "Lông Sia Chûn? Seⁿ che kap liông-hê ū siáⁿ-mı̍h koan-hē?” Tēⁿ I-su chhiò-chhiò kā kóng, "M̄-sı̄ sím-mı̍h liông-hê, chháu-hê--lah. Lông sı̄ kóng ū lâng, Chia sı̄ kóng ū phí-á, Chı̂n sı̄ teh kóng ū phoê-hu-chín ê ı̀-sù." Tēⁿ I-su khoàⁿ A-bú--a ū khah liáu-kái tio̍h chiap-soà kóng, "Chit ê miâ chiàu pēⁿ ê chèng-thâu lâi hō miâ, sǹg hō liáu bē bái. Lán ê oē kiò choè "hoé-noā-thoàⁿ", ı̀-sù sı̄ kóng chit ê pēⁿ chhin-chhiūⁿ chı̍t pha hoé, sı̀-kè thoàⁿ, ē lâu thng ná-chhiūⁿ noā, kian kim-sek ê phí iā ū sêng hoé ê sek-chúi." A-Bú koh mn̄g, "Thài ē seⁿ chit khoán pēⁿ, ná-chún ē thoàⁿ. Bêng--a seng seⁿ, boé-chhiú in sió-moē mā toè teh seⁿ." "Sı̄--ah. Chit ê pēⁿ sı̄ tùi bâi-kín(bacteria) lâi--ê, ē chō-sêng phoê-hu hoat-hông, seⁿ chúi-phā. Chit-sı̂ chin gâu thoàⁿ. Thng lâu kah tah, pēⁿ tō thoàⁿ kah tah. Ū-sı̂ kui keng iù-tı̄-hn̂g ta̍k-ê gín-á lóng tio̍h ê chêng-hêng mā ū. Kui ke-hoé ê gín-á toā-sè-hàn lóng jiám--tio̍h iā ū. I ê phí-á kap lâu--chhut--lâi ê thng lóng ē oè--lâng, pa̍t jiah ê phoê-hu á-sı̄ pa̍t lâng nā bak--tio̍h, lóng ē khı̀ hō͘ thoân-jiám." "Án-ne beh án-choáⁿ tı̄-liâu khah hó?" "Chit hō pēⁿ chin kín tı̄-liâu. Ē-sái ēng khòng-seng-sò͘ io̍h-ko lâi boah. Ū-sı̂ nā khah chē jiah, boah bē chiâu-ûn, iā ē-ēng-tit chia̍h khòng-seng-sò͘ io̍h-oân á-sı̄ giâ-kóng-á. Ū kian-phí ê só͘-chāi ē-sái chiong sé-hoat-cheng thàu tı̄ chúi lāi-té koh ēng kin-á ùn chúi khin-khin-á kā phí lù-tiāu. In-ūi hoé-noā-thoaⁿ ê phí téng-bı̄n ū chē-chē ê sè-khún. Án-ne ē khah kín hó." "Beh án-choáⁿ ū-hông?" "Phó͘-thong sı̂ gín-á ài chia̍p hō͘ sé chhiú, te̍k-pia̍t sı̄ tùi goā-kháu jı̍p--lâi ê sı̂, tek-khak ài ēng sat-bûn sé hō͘ chheng-khı̀. Lēng-goā nā-chún kóng hoé-noā-thoaⁿ it-tı̍t bē tn̄g-kin, 3 put 5 sı̂ teh hoat bô-thêng, ē-sái khó-lū ēng sat-khún-sèng ê sat-bûn á-sı̄ sé-e̍k-cheng lâi sé. Nā kāng chı̍t ê só͘-chāi put-sı̂ teh hoat, ē-sái ēng khòng-seng-sò͘ io̍h-ko lâi boah, lâi ū-hông." "Án-ne-siⁿ goá chai. Āu-pái goá ē koh khah chù-ı̀ in phoê-hu ê oē-seng, kā in sng-sé hō͘ chheng-khı̀. Tēⁿ I-su, kiám koh ū sím-mı̍h ài chim-chiok--ê?” "Chit khoán pēⁿ sı̄ Liān-kiû-khún á-sı̄ Kim-sek Phô-thô-kiû-khún lâi chō-sêng. Ū 2% kàu 5% ê hoé-noā-thoaⁿ ū kip-sèng ê io-chí-iām ē toè teh hoat-seng, hō chò kip-sèng sı̄n-si-kiû-thé sı̄n-iām(io-chí hoat-iām, acute glomerular nephritis). Hoān-chiá ê jiō ē lô, piàn âng. M̄-kú lóng chin kín tio̍h hó kah lı̄. Joa̍h-thiⁿ sı̂-á chē koè koâⁿ-thiⁿ, tio̍h khah chù-ı̀ oē-seng. Goá án-ne kóng, lí kiám ū chheng-chhó?" A-bú kóng, "Goá lóng thiaⁿ ū. Tēⁿ I-su chin to-siā." "Bián kheh-khı̀. Chia̍h-io̍h, boah io̍h-ko. Ū siáⁿ būn-tê khah koh lâi khoàⁿ." (Tâi-oân-jı̄ cha̍p-chı̀ tē 9 kı̂, 2001 nı̂ 9 ge̍h)