Hoē-iú pah-pah khoán
e̍k (goân chok Tō͘ Lâm-hêng) Hoē-iú pah-pah khoán, kāng chı̍t-keng kàu-hoē ê hoē-iú tùi thoân-kàu-chiá ê khoàⁿ-hoat kap iàu-kiû sı̂-siông ē hui-siông bô kāng-khoán. Tú-á kiat-hun ê sı̂, goá sı̂-siông khiâ ki-chhia chài sian-siⁿ-niû khı̀ thàm-hóng, ū-ê hoē-iú chin hoaⁿ-hí, it-tı̍t giú goán ang-bó͘ chò-hoé chia̍h-pn̄g, tān-sı̄ iā ū hoē-iú ē kóng, “Hńg! toè kah hiah tiâu, chhiūⁿ-é chı̍t-kang bô chò-hoé tō boē-sái kāng-khoán.” Goá chhiò-chhiò bô kóng siáⁿ, tān-sı̄ thiaⁿ tio̍h chit-khoán oē, sim-lāi chóng-sı̄ ngāi-gio̍h ngāi-gio̍h. Goán iû-goân chiàu án-ni chı̀n-hêng thàm-hóng, ē-tàng chò-hoé chhut-khı̀ chiū chò-hoé chhut-khı̀. Nā ū tāi-chı̀ á-sı̄ chó͘-tòng, goá chiah ka-tı̄ chı̍t-ê khı̀. Tng goá ka-tı̄ chı̍t-ê khı̀ sûn hoē-iú, chin-choē hoē-iú kı̀ⁿ-bı̄n tē it kù oē chiū sı̄, “Sian-siⁿ-niû ná ē bô chò-hoé chhoā--chhut-lâi?” Ū chı̍t-pái, goá khoàⁿ-chheh khoàⁿ liáu siān, siūⁿ ài ka-tı̄ chı̍t-ê khiâ o͘-tó͘-bái khı̀ kau-goā cháu-cháu leh, sūn-lō͘ jı̍p-khı̀ hoē-iú ê chhù khoàⁿ-khoàⁿ leh, ū hoē-iú khoàⁿ sian-siⁿ-niû bô-lâi, chiū tùi goá kóng, “Sian-siⁿ ah, bián hiah-nı̍h sioh lah, ā m̄-sı̄ sím-mı̍h toā-jı̍t-thâu, iā kiaⁿ sian-siⁿ-niû pha̍k o͘--khı̀?” Ū-kàu oan-óng koh kiam àu-náu. Kúi nı̂ āu, goá siū hong-lı̍p chò bo̍k-su, iā ū gín-á, kè-sio̍k tı̄ chit-keng kàu-hoē bo̍k-hoē, thàm-hóng hoē-iú, liân gín-á mā chhoā--khı̀. Hoē-iú toā-pō͘-hūn hoaⁿ-hí khoàⁿ goán chhoā gín-á khı̀, sı̂-siông the̍h mı̍h-kiāⁿ hō͘ goán-ê gín-á, kā i phō, kap i sńg. Í-chêng thàm-hóng kóng-oē ê loē-iông, khah-choē sı̄ kóng hoē-iú ê tāi-chı̀. Chit-má iā ē kóng tio̍h goán-ê gín-á. Hoē-iú thoân-siū goán kài-choē pı̀-hng kap keng-giām, tùi goán chiâⁿ ū pang-chān. Gín-á ê phı̂-khı̀ ū-sı̂ khah pháiⁿ khòng-chè, sı̂-siông tı̄ hoē-iú ê chhù chē bô-goā-kú tō chhá beh tńg--khı̀. Só͘-í, kı̄n-lâi goá khah-chió chhoā sian-siⁿ-niû kap gín-á chò-hoé thàm-hóng, bián-tit hông-gāi thàm-hóng. Án-ni goá iā thiaⁿ-tio̍h chit-khoán giân-gí: “Phiàn siú--ê, sı̄-m̄-sı̄ bo̍k-su ê gín-á tō khah pó-poè, m̄-káⁿ chhoā--chhut-lâi? Goán mā ū gín-á, mā sı̄ ta̍k lé-pài chhoā khı̀ lé-pài.” Goán sı̍t-chāi kám-khài choē-choē, chiong che ê tāi-chı̀ kā hù-kı̄n chı̍t-ūi kàu-kài ê tióng-poè kóng, i thiaⁿ liáu ha-ha tāi-chhiò kóng: “M̄-bián ūi tio̍h chit-khoán tāi-chı̀ hoân-ló, koàn-sı̀ tō hó--lah.” Kiám án-ni? Goá chin hoâi-gı̂.
(Hong-hiòng tē 11 kı̂, 1991 nı̂ 7 goe̍h)