Lông-le̍k ê sin-nı̂ nā kàu, ke-ke hō͘-hō͘ ū ēng “福” chit jı̄ tah tı̄ in ê mn̂g-táu-téng. Ū lâng siá “五福臨門” tah tı̄ mn̂g-téng. Án-ni lâng lóng teh ǹg-bāng choè ū hok-khı̀ ê lâng. Sui-jiân sı̄ án-ni, iáu-kú chin-choē lâng bô cha̍p-hun bêng-pe̍k “hok-khı̀” sı̄ sím-mı̍h.
San-tē ê lâng bô “hok-khı̀” chit kù oē. In-ūi chit kù ū chin ho̍k-cha̍p koh pau-hâm ê ı̀-sù tı̄-teh. Chı̀-chió hok-khı̀ ū saⁿ khoán ê ı̀-sù tı̄-teh.
I.Bu̍t-chit hong-bı̄n ê hok-khı̀.
Khah siông lâng nā ū chı̂ⁿ, choē kiáⁿ, choè koaⁿ, tn̂g hè-siū, án-ni chiū kiò i choè ū hok-khı̀. “福” chit jı̄ sı̄ tùi “示” kap “X” lâi choè-chiâⁿ ê, “示” sı̄ “神” ê ı̀-sù, chiū-sı̄ kóng, “Hok-khı̀” sı̄ Sı̂n ê siúⁿ-sù, “X” sı̄ bu̍t-chit chhiong-moá, á-sı̄ múi chı̍t lâng ū chhân ê ı̀-sù.
Sı̍t-chāi lán Tiong-kok lâng lóng sı̄ sı̀n “天賜平安福”, só͘-í siông-siông lâng ài hō miâ kiò “天福”. Lán Tiong-kok lâng ū “五福” ê lí-sióng, tı̄ 書經 ū kóng, Chit gō͘-hāng hok-khı̀ sı̄ 壽,富,康寧,收好德,老終命, ı̀-sù sı̄ tn̂g hè-siū, ū chı̂ⁿ, pêng-an, hó tek-hēng, hó sí. Che thang kóng lóng sı̄ tùi thiⁿ-téng ê Siōng-tè siúⁿ-sù ê, só͘-í lán tio̍h ho̍k-sāi Siōng-tè, m̄-thang tek-choē thiⁿ ê Chú.
Chóng-sı̄ bu̍t-chit ê hok-khı̀ sı̄ hok-khı̀ ê sió pō͘-hūn nā-tiāⁿ. Koh lâng siông-siông tùi chit ê jiá chai-ē, ū lâng ū chı̂ⁿ toà kim-khı̀ hō͘ kiông-tō thâi-sí, ū lâng tı̀-kàu hòng-tōng, ka-têng oan-ke téng-téng, tùi ū chı̂ⁿ hoán-tńg put-hēng. Ū lâng tn̂g hè-siū hō͘ kiáⁿ-sun put-hàu, khó͘ m̄ kín sí. Ū lâng choè koaⁿ hoán-tńg jiá chai-ē.
Sèng-keng Lō͘-ka 12:16-21, ū kı̀ chı̍t ê hó-gia̍h lâng teh hoaⁿ-hí i ê pù-ū, ka-kı̄ kóng i chı̍t-sı̀-lâng ū hok-khı̀. Chóng-sı̄ Siōng-tè kóng i sı̄ gōng-lâng; in-ūi i hióng-siū hit ê boē tio̍h. Án-ni chit sè-kan ê hok-khı̀ m̄-sı̄ kú-tn̂g, sı̄ chiām-sı̂, sı̄ boē thang oá-khò; só͘-í ài oá-khò chit ê, ū sı̂ sı̄ gōng.
II. Tùi sı̀n-gióng ê hok-khı̀.
Hok-khı̀ ê lāi-iông sı̄ hoaⁿ-hí kap an-sim. Lâng tio̍h chióng-koàn 20 bān, sui-jiân i ê sim hoaⁿ-hí, iáu-kú i nā chai hit àm, lâng teh-beh chhiúⁿ i ê chı̂ⁿ, án-ni i bô ū hok-khı̀. Ū lâng kiáⁿ chin-choē, lâng kóng i ū hok-khı̀, iáu-kú i chin sàn, ta̍k-jı̍t ūi-tio̍h kiáⁿ tio̍h hoân-ló, án-ni i bô hok-khı̀. Án-ni hok-khı̀ sı̄ hoaⁿ-hí kap an-sim lâi liân-ha̍p, sı̄ sim-koaⁿ ê kám-kak.
Ū lâng thàn 100 kho͘ chin hoaⁿ-hí, ū lâng thàn 1000 kho͘ teh put-pêng. Koh lâng khah siông chı̂ⁿ ná chē, sim ná toā, put-pêng ná chē. Nā-sı̄ sè-kan ê bu̍t-chit sı̄ ū hān, lâng ê sim sı̄ bô hān, só͘-í bu̍t-chit boē hō͘ lâng tit-tio̍h chin ê hēng-hok.
Tē-it iàu-kín, lâng tio̍h tùi sı̀n-gióng lâi tit-tio̍h hēng-hok, sı̄ chhin-chhiūⁿ soè-kiáⁿ, bô lūn i ê pē-bú sı̄ sàn á-sı̄ hó-gia̍h, tı̄ i ê lāu-bú ê heng-chêng kám-kak hēng-hok chı̍t-iūⁿ.
(a) Chhē-tio̍h Thiⁿ-pē ê hoaⁿ-hí. Chhin-chhiūⁿ soè-kiáⁿ tē-it hoaⁿ-hí ê sı̄ i ê pē-bú. Lán tùi chhē-tio̍h thiⁿ-téng ê Pē iā sı̄ tē-it hoaⁿ-hí. “Lán chhut-sı̀ bô toà sím-mı̍h lâi, kè-sı̀ iā bô toà sím-mı̍h khı̀; nā-sı̄ ū thang chia̍h, chhēng, lán chiū beh ti-chiok.” Án-ni sui-jiân tı̄ sòng-hiong iā oē tiàm tı̄ Thiⁿ-pē ê thiàⁿ lâi kám-siā, hoaⁿ-hí.
(b) Oá-khò Thiⁿ-pē tit-tio̍h an-sim. “Bo̍h-tit oá-khò bô tiāⁿ-tio̍h ê chı̂ⁿ-châi, chí tio̍h oá-khò chiong bān-mı̍h moá-moá hō͘ lán hióng-siū ê Siōng-tè (Thê-mô͘-thài chiân-su 6:17).” Chhı̀-khoàⁿ thiⁿ-tiong ê pe-chiáu......lín ê Thiⁿ-pē iā teh chhı̄ in. Lín kiám bô pí hiah ê khah kùi-khı̀ mah? Án-ni lán tùi oá-khò Thiⁿ-pē oē an-sim.
(c) Tit-kiù ê hok-khı̀. “Kè-sit tit-tio̍h sià-bián, choē-koà tit-tio̍h jia-khàm ê, che lâng ū hok-khı̀” (Si-phian 32:1). Khóng-chú ū kóng, “君子憂道不憂貧”. Án-ni lán ū liông-sim ê lâng teh hoân-ló ê Chú Iâ-so͘ ū kiù lán, só͘-í Kiù-chú ê tō-lí tùi tı̄ choân jı̂n-lūi sı̄ hok-khı̀ ê siau-sit.
III. Éng-oán ê hok-khı̀.
Soè-hàn ê sı̂, goá bāng-kı̀ⁿ tı̄ lō͘-nih khioh-tio̍h chı̂ⁿ, chı̄n só͘ oē tē kàu lak-tē moá-moá. Chóng-sı̄ hoaⁿ-hí liáu soà chhíⁿ, tē-á koh bong, chiah chai sı̄ bāng, iû-goân khang-khang. Án-ni lâng ê it-seng iā sı̄ chhin-chhiūⁿ bı̂n-bāng. Iáu-kú lán ū éng-oán ê oa̍h-miā, só͘-í chit ê sè-kan ê hok-khı̀ nā tùi éng-oán ê sı̂-kan lâi khoàⁿ sı̄ chhin-chhiūⁿ bı̂n-bāng khioh-tio̍h chı̂ⁿ.
Chit sè-kan ke̍k ū hok-khı̀ ê lâng iā boē bián ū kan-khó͘, pı̄ⁿ-thiàⁿ, hoân-ló, choē-ok, ba̍k-sái; nā-sı̄ thian-tông lóng bô. Chit sè-kan ke̍k tn̂g hè-siū ê lâng iā bô chiūⁿ chı̍t-pah hè, nā-sı̄ kàu tı̄ hia thian-kok sı̄ éng-oán bô sí (Khé-sı̄-lio̍k 21:4).
Chit sè-kan ū chı̂ⁿ ê lâng ū tām-po̍h kim, á-sı̄ pó-chio̍h, chiū chin pó-poè koà tı̄ chhiú-nih, á-sı̄ phoa̍h tı̄ ām-kún lâi choè êng-kng. Nā-sı̄ sı̀n Chú ê lâng tı̄ thian-kok khoàⁿ chit khoán choè ke̍k sió-khoá ê mı̍h. In-ūi tı̄ thian-kok siâⁿ-chhiûⁿ sı̄ pó-chio̍h, ke-lō͘ sı̄ pho͘ kim (Khé-sı̄-lio̍k 21:18). Ū lâng choè koaⁿ kúi nı̂ kú, iā lia̍h choè chin hok-khı̀, nā-sı̄ sı̀n Chú ê lâng beh tı̄ éng-oán ê sè-kài kap Ki-tok saⁿ-kap choè ông. Só͘-í Pó-lô Sian-siⁿ pí tio̍h chit khoán ê toā koh éng-oán ê hok-khı̀, khoàⁿ chit khoán toē-chiūⁿ ê hok-khı̀ choè pùn-sò chı̍t-iūⁿ. Lán soè-hàn ê sı̂ khoàⁿ âng-á-phiau choè chı̂ⁿ, khoàⁿ liâng-chúi ê ông-koan choè châi-sán. Kàu hit sı̂ lán iû-goân oē chhin-chhiūⁿ Pó-lô Sian-siⁿ khoàⁿ chiah ê choè gín-á-mı̍h, choè pùn-sò chı̍t-iūⁿ.
Lia̍t-ūi! Lán tio̍h khoàⁿ khah hn̄g, sim tio̍h khǹg khah toā, lâi ǹg-bāng khah toā koh kú-tn̂g ê hok-khı̀.
(Tâi-oân Kàu-hoē-kong-pò tē 770 kı̂, 1953 nı̂ 2 ge̍h)
