1 Thiⁿ-téng koâiⁿ-koâiⁿ Iâ-so͘ chē ūi,
Lóng-chóng thian-sı̂n ho̍k-sāi pài-kūi,
Bián-liû chhàn-lān bı̄n-māu êng-kng,
Koân-pèng bû hān hok-khı̀ chiâu-chn̂g.
2 Thiⁿ toē bān-mı̍h bē ū ê sı̂,
Siōng-tè ê Kiáⁿ kap Pē khiā-khí,
Choân-lêng Chú-cháiⁿ éng-oa̍h ê Tō,
Thiⁿ toē Bān-mı̍h sı̄ i chhòng-chō.
3 Bān bı̂n hoān-choē ûi-ke̍h hoat-tō͘,
Tio̍h lo̍h tē-ge̍k lóng bô oa̍h-lō͘,
Siōng-tè put-jím chèng-lâng tı̂m-lûn,
Chhe-khián Iâ-so͘ kiù lán lêng-hûn.
4 Iâ-so͘ kàng-seng tiàm toē bı̄n-chiūⁿ,
Phín-hēng sûn-choân choè lán bô͘-iūⁿ,
Hián-bêng sı̂n-jiah thoân Thiⁿ tō-lí,
Siat-lı̍p kong-lô thoè lâng siū sí.
5 Sí liáu saⁿ-jı̍t Iâ-so͘ koh oa̍h,
Piáu-bêng sio̍k-choē chı̍t-pái kàu-gia̍h;
Chiām toà toē-bı̄n kà-sı̄ ha̍k-seng,
Iû-goân chiūⁿ-thiⁿ chip-chiáng koân-pèng.
6 Sè-kan boa̍t-jı̍t thiⁿ-mn̂g khui-khoah,
Iâ-so͘ kàng-lı̂m kiò lâng koh-oa̍h,
Sè-kan chèng-lâng siū i sím-phoàⁿ,
Pò-siúⁿ hêng-hoa̍t tiāⁿ-tio̍h bô oāⁿ.
7 Hit jı̍t í-āu lóng-chóng pháiⁿ-lâng,
Éng-oán tı̂m-lûn bô thang ǹg-bāng,
Iâ-so͘ ha̍k-seng hoaⁿ-hí chiūⁿ-thiⁿ,
Hióng-siū hok-khı̀ kàu bān-bān nı̂.
