Iâ-so͘ siū soé-lé
1. Tng hit sı̂ tı̄ Iû-thài,
Soé-lé Iok-hān lâi;
Soan-thoân chiū kóng tio̍h hoán-hoé,
It-chı̄n choē-koà tio̍h kín koé.
2. Tio̍h ài chai, thian-kok kūn,
Tāi-ke m̄-thang khùn;
Hoán-hoé soé-lé lâi chhin-kūn,
Thian-kok ún-tàng ū lí hūn.
3. Kiâⁿ soé-lé ê Iok-hān,
Kap lâng bô saⁿ-tâng;
Soaⁿ-kan khòng-iá sı̀-kè toà,
Saⁿ chhēng iûⁿ mn̂g hâ phê-toà.
4. Iok-hān lâi ài oān-chō͘,
Siu-tı̍t Chú ê lō͘;
Saⁿ-tǹg bô hó ê jı̍t-sı̍t,
Chhoàn chia̍h chháu-meh kap iá-bı̍t.
5. Choē-choē lâng kàu Iok-tàn,
Ài lâi chhē Iok-hān;
Hoaⁿ-hí tùi I niá soé-lé,
It-chı̄n choē-koà kam-goān ké.
6. Choē-choē lâng teh gı̄-lūn,
Lâng-lâng lâi chhin-kūn;
I kiâⁿ soé-lé ê kang-chok,
Phah-sǹg kiám-chhái sı̄ Kí-tok.
7. Iok-hān kóng tio̍h ài chai,
Pí goá lō͘-boé lâi;
I sı̄ tāi-seng goá sı̄ tè,
Kap I lâi pí goá chin sè.
8. Lō͘-bé lâi ū koân-lêng,
Phok-ài koh chhong-bêng,
Goá sı̄ sio̍k-jı̂n ū lâ-sâm,
Tháu I oê-toà iā boē kham.
9. I nā lâi ài beh ēng,
Lêng-hé kap Sèng-lêng;
Hō͘ lín oân-choân têng-thâu-siⁿ,
Hoán-hoé choē-ok lâi koé-pı̀ⁿ.
10. Tı̄ hit-sı̂ Iâ-so͘ lâi,
Ài pò Iok-hān chai;
Chiū kóng kā goá kiâⁿ soé-lé,
Iok-hān tio̍h-kiaⁿ chiū tò-thè.
11. Hiòng Chú kóng put-ha̍p lí,
Chhiáⁿ lí hō͘ goá sı̂;
Goá sı̄ eng-kai chiū-kūn lí,
Chhiáⁿ lí m̄-thang lâi chek-pı̄.
12. Iâ-so͘ kóng lūn kàu che,
Chhiáⁿ lí m̄-thang the;
Beh chò bô͘-hoān ài khiam-pi,
Tio̍h kiâⁿ só͘ ū ê lé-gı̂.
13. Che Iok-hān m̄-káⁿ the,
Iâ-so͘ chiū soé-lé;
Liâm-piⁿ tùi chúi chiū peh khí,
Khoàⁿ-kı̀ⁿ kı̂-koài ê tāi-chı̀.
14. Thiⁿ hut-jiân ūi I khui,
Khoàⁿ-kı̀ⁿ ū chı̍t ūi;
Chiū-sı̄ Siōng-tè ê Sèng Sı̂n,
Chhin-chhiūⁿ chíⁿ-á teh kàng-lı̂m.
15. Che chíⁿ-á sı̄ Sèng Snı̂,
Hioh tı̄ Chú téng-bı̄n;
Tùi thiⁿ koh chhut Sı̂n ê siaⁿ,
Hō͘ lâng thiaⁿ-tio̍h chin toā kiaⁿ.
16. Chhut siaⁿ kong chit ê kiáⁿ,
Chin chiàⁿ tit goá thiàⁿ;
I sı̄ hō͘ goá só͘ hoaⁿ-hí,
Sè-kan lâng-lâng ài thiaⁿ I.
